د لاسرسۍ وړ لېنکونه

تازه خبر
جمعه ۱ زمری ۱۴۰۰ کابل ۱۱:۳۷

افغانستان

د استانبول د پروسې د لوړ پوړو کارکونکو غونډه په باکو کې جوړه شوه

د افغانستان د بهرنیو چارو وزارت وايي، د استانبول د پروسې د لوړ پوړو کارکونکو غونډه د افغانستان او ازربایجان د بهرنیو چارو د وزارتونو د معینانو په مشرۍ په باکو کې جوړه شوه.

د افغانستان د بهرنیو چارو وزارت د یوه بیان په خپرولو سره ویلي چې په دې غونډه کې د آسیا د زړه هیوادونو او د استانبول له پروسې څخه ځینې ملاتړکونکیو هیوادونو استازي برخه لري.

په دغه بیان کې همدا راز راغلي د دغې غونډې اصلي موضوع په الماتا کې د آسیا د زړه هیوادونود بهرنیو چارو وزیرانو د دریم ځل غونډې د ترسره کیدو او ورته د پلانونو د وروستي کولو په سر خبرې جوړوي.

د ورځې تازه خبرونه دلته ولولئ

د ۲۰۳ تندر قول اردو: پکتیا کې ۱۷ طالبان وژل شوي او ۹ نور ټپیان دي

پکتیا کې افغان امنیتي ځواکونه د عملیاتو پر مهال

په پکتیا کې د ۲۰۳ تندر قول اردو چارواکي وايي په دې ولایت کې ۱۷ وسله وال طالبان وژل شوي او نهه نور ټپیان دي.

ددې قول اردو ویاند ایمل مومند رسنیو ته وویل چې تېره شپه افغان ګډو ځواکونو د هوايي قواوو په ملاتړ د پکتیا ولایت د سیدکرم ولسوالۍ په اړوند سیمو کې هوایي او ځمکني عمليات کړي.

مومند زیاته کړه: "۱۷ وسله وال طالبان وژل شوي او ۹ نور ټپیان دي، د جګړې سیمه کې د ۶ جنګیالیو جسدونه پاتې او همداراز ۴ عرادې وسایط، مهمات او زیاته اندازه درنه او سپکه وسله له منځه وړل شوې ده. "

هاخوا د سیمې خلک بیا وایي، عملیاتو کې د ماشومانو په ګډون یو شمېر عام خلک هم زیانمن شوي، خو د پکتیا د امنیه قوماندانۍ ویاند حیات الله نظامي ازادي راډیو ته وویل چې یو ماشومان د طالبانو له لوري د توغول شوي هاوان مرمۍ له امله ټپي شوی.

وسله والو طالبانو تر اوسه د دې عملیاتو او په جنګ کې د زیانمنو ملکي وګړو په اړه تبصره نه ده کړې، خو د دې ډلې ویاند ذبیح الله مجاهد رسنیو ته په تازه استول شوي اعلامیه کې یې ویلي چې د افغان او بهرنیو ځواکونو له لوري د هوایي او ځمکنيو عملیاتو په غبرګون کې به د دوی جنګیالي په دفاعي حالت کې پاتې نه شي او په خپله جنګي پالیسۍ کې به بدلون راولي.

د خبریالانو فدراسیون: افغان جګړه کې دې د رسنیو ازادي رعایت شي

ارشیف

د کاپیسا په نجراب ولسوالۍ کې د یوې محلي راډیو د خپرونو تر بندېدو وروسته د خبریالانو نړیوال فډراسیون وايي، د افغانستان جګړه کې باید د رسنیو ازادي رعایت شي.

په نجراب ولسوالۍ کې د افغان ځواکونو او وسله والو طالبانو ترمنځ تر جګړې وروسته د نجراب راډیو خپرونې تېره سې شنبې بندې شوي او کار کوونکي یې د خوندیتوب لپاره نورو ځایونو ته وتښتېدل.

د خبریالانو نړیوال فډراسیون نن په یوه اعلامیه کې وویل، د دې راډیو د ډېری کار کوونکو کورونه په هغو سیمو کې دي چې د طالبانو لاسته ورغلي او ځینې یې کابل ته تللي دي.

دغه فډراسیون د جګړې له ښکېلو لوریو غوښتنه کړې چې د بیان او رسنیو ازادیو ته درناوی وکړي او بشر دوستانه قوانین رعایت کړي.

تاجکستان چمتو ده چې تر ۱۰۰ زرو افغان کډوالو ته پناه ورکړي

تاجکستان کې افغان کډوال

تاجکستان وايي، تیار دی چې له افغانستانه د اوښتونکو څه باندې سل زره کډوالو ته پناه ورکړي.

د تاجکستان د اضطراري حالاتو او ملکي دفاع د کمېټې مرستیال امام علي ابراهیمزاده نن وویل، که د افغان کډوالو شمېر تر دې زیات شي، دوشنبې به له نړیوالو ډلو د مرستې غوښتنه وکړي.

ابراهیمزاده وویل چې د کډوالو د احتمالي جوپې لپاره د چمتووالي په لړ کې په ختلان سیمه کې د خوړو د دوو لویو زېرمو جوړول پیل شوي دي.

د ابراهیمزاده په خبره په وروستیو کې په ۱۱ الوتنو کې ۱۶۰۰ افغانان چې د جګړو له کبله تاجکستان ته اوښتي وو، بېرته افغانستان ته ستانه کړای شوي دي.

د افغانستان په شمال کې د جګړو له شدت سره جوخت ګڼ افغانان مجبوره شوي، تاجکستان او د منځنۍ اسیا نورو هېوادونو ته واوړي.

خوست کې د چرګانو د دانې تولیدي فابریکه فعاله شوه

د چرګانو دانه

نن جمعه (د زمري په ۱ نېټه) په خوست کې د خصوصي سکټور په چوکاټ کې د چرګانو د دانې نسبتاً لويې تولیدي فابریکې چې په یوه شپه ورځ کې د ۵ زره بوجیو خوراکې، د تولید ظرفیت لري په فعالیت پیل وکړ.

په یاده فابریکه چې یو تن خوستي پانګوال ۱۶۶ میلیونه افغانۍ پانګونه کړې، د اوس لپاره ۱۲۰ تنو کاریګرو ته په کې د کار کولو زمینه برابره شوې ده.

د یادې فابریکې یو تن مسوول عبدالله باور ازادي راډیو ته وویل، دا فابریکه به د نورو ولایتونو سربیره ګاونډیو هېوادونو ته هم د چرګانو د خوراکې صادرات ولري.

بل لوري ته د خوست چارواکي وايي، هغه کسان چې غواړي دې ولایت کې پانګونه وکړي، هغوی ته به د امنیت په ګډون ټولې لازمې اسانتیاوې برابر کړي.

د خوست والي مهمند کټوازي پانګوالو، صنعت کارانو او هغوی سره چې دې ولایت کې پانګونې ته لېوالتیا لري، د هر ډول مرستو ژمنه وکړه.

سره له دې چې خوست کې ډېر پانګه وال پر تولیدي فابریکو پانګونې ته لېوالتیا لري، خو بیا هم د چارواکو د پرله پسې ژمنو سره-سره له کلونو راهیسې د صنعتي پارک د فعالیدو په مخکې ټولنیزې ستونزې نه دي هوارې شوي.

دفاع وزارت وايي طالبانو پر ۹۰ سلنه سرحدونو ولکه نه ده ټينګه کړې

وسله وال طالبان

د افغانستان دفاع وزارت د طالبانو هغه ادعا رد کړه چې د افغانستان د ۹۰ سلنه سرحدونو د نیولو لپاره یې کړې وه.

د دغه وزارت مرستیال ویاند فواد امان د طالبانو تر پرونۍ ادعا وروسته نن د فرانسې خبري اژانس سره په خبرو کې دغه ادعا درواغ بللې ده.

که له یوې خوا له افغانستانه د بهرنیو ځواکونو وتلو روان دي، په وروستیو کې وسله والو طالبانو د کلیدي سرحدي دروازو تر څنګ د افغانستان پر ځینو برخو ولکه ټینګه کړې ده.

د امریکا د ګډو ځواکونو لوی درستیز جنرال مارک میلي تېره چهارشنبه ویلي وو، وسله والو طالبانو د ۴۲۰ ولسوالیو د مرکزونو له ډلې تقریباً پر نیمايي هغو ولکه ټینګه کړې ده. خو د افغانستان حکومتي چارواکو په وار- وار ویلي، دوی د وسله والو طالبانو پرضد د روانې جګړې له کبله ګڼې ولسوالۍ بېرته نیولي دي.

کورنیو چارو وزارت: طالبانو په سپین بولدک کې سل ملکیان وژلي

ارشیف، سپین بولدک وسله وال طالبان

د افغانستان د کورنیو چارو وزارت پر طالبانو تور لګولی چې د کندهار په سپین بولدک ولسوالۍ کې یې تر ۱۰۰ زیات ملکیان وژلي دي.

د دغه وزارت ویاند میرویس ستانکزي نن جمعه له ازادي راډیو سره په مرکه کې دا خبره وکړه: "د لومړنیو اطلاعاتو له مخې طالبانو شااوخوا ۴۰۰ کسان له کورونو ایستلي دي، د څه باندې ۱۰۰ کسانو اجساد موندل شوي دي. ځینې یې په کورونو کې شهیدان کړي، ځینې اجساد د سپین بولدک په رېګونو او چوکونو کې پیدا شوي دي چې اکثریت یې ملکیان دي."

د کندهار له سپین بولدکه د ملکیانو د وژنې او د خلکو د کورونو د لوټ د ادعاوو په تړاو په لومړني عکس العمل کې د ولسمشر لومړي مرستیال امرالله صالح دا کار د غچ لپاره عام وژنه بللې ده.

ښاغلي صالح نن سهار په خپل ټوېټر کې زیاته کړې چې اکثر قربانیان ورزشکاران، مدني فعالان، سوداګر او هغه خلک وو چې له دولت سره په خواخوږي تورن وو.

د طالبانو ویاند ذبیح اله مجاهد بیا پر دې ډلې د سپین بولدک د وروستیو پېښو په تړاو لګېدلي تورونه رد کړي دي.

لغمان چارواکي: قرغیو کې چاودنې د ۳ ماشومانو په ګډون ۵ تنه ټپیان کړل

ارشیف، د لغمان د قرغیو ولسوالۍ

په لغمان ولایت کې چاودنې د ۳ ماشومانو په ګډون ۵ تنه ټپیان کړل.

د لغمان ولایت د امنیه قوماندانۍ ویاند شفیع الله افغانیار ازادي راډیو ته وویل چې دا پېښه پرون پنجشنبه (د چنګاښ ۳۱مه ) ماسخوتن شااوخوا ۸ بجې د قرغیو ولسوالۍ د کندې حسن خېلو سیمه کې د ملکي وګړو پرهغه مرسډیز موټر وشوه چې په خبره یې، د وسله والو مخالفانو له خوا پر ځای پرځای شوي ماین وربرابر شو.

افغانیار په دې پېښه کې د ۳ ماشومانو د ټپي کېدو خبر ورکوي، خو د لغمان د عامې روغتیا رئیس عبدالمعروف جلیلي بیا ازادي راډیو ته وویل چې له یادې پېښې ۵ تنه چې ماشومان هم په کې دي، روغتون ته انتقال شوي او اوس تر درملنې لاندې دي.

تراوسه چا د دې پېښې مسؤلیت نه دی منلی.

انتوني بلېنکن د قطر مرستیال صدراعظم سره پر افغان سولې غږیدلی

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر د افغان سولې د پروسې او څو نورو مسالو په تړاو د قطر د صدراعظم له مرستیال او بهرنیو چارو وزیر سره خبرې کړي.

انتوني بلېنکن او محمد بن عبدالرحمن بن جاسم ال ثاني بېګا په واشنګټن کې لیدلي.

ښاغلي بلېنکن په خپل ټوېټر لیکلي چې یوه سیاسي حل ته د رسېدو په هدف د افغانستان د سولې د خبرو د چټکتیا لپاره د قطر په سخاوتمندانه ملاتړ، له یمن سره په مرستو او ځینو نورو مسالو باندې له ښاغلي ال ثاني سره وغږېد.

بلېنکن ویلي: "موږ ژمن یو چې په سیمه کې د سولې لمن پراخه کړو."

د قطر پلازمېنه دوحه کې د افغانستان د دولت او طالبانو پلاوي د سولې خبرې مخته وړي.

هلته د امریکا او طالبانو تر منځ د ۲۰۲۰میلادي کال د فبروري په ۲۹مه تړون هم وشو چې پر اساس یې له افغانستانه د امریکايي ځواکونو د بشپړ وتلو پروسه پيل شوه.

هرات چارواکي: کَرُخ ولسوالۍ بېرته له طالبانو ونیول شوه

ارشیف، هرات کې امنیتي سرتیري د عملیاتو پرمهال

د هرات چارواکي وايي، کَرُخ ولسوالي یې بېرته له طالبانو ونیوله.

دا خبره د یاد ولایت پوځي شورا نن په یوه اعلامیه کې کړې ده.

په اعلامیه کې راغلي چې د کَرُخ د بیا نیولو لپاره سهار وختي عملیات پيل شول چې په نتیجه کې یې طالبانو ته درنه مرګ ژوبله واوښته او افغان پوځیانو د کَرُخ د ولسوالۍ مرکز ونیوه.

د هرات پوځي شورا ادعا کړې چې د لومړنیو معلوماتو له مخې ۱۵ وسله وال طالبان وژل شوي او شل نور ټپیان دي.

وسله والو طالبانو لا تراوسه د افغان چارواکو د دې ادعا په تړاو څه غبرګون نه دی ښوولی.

د افغانستان د ملي امنيت سلاکار له خپل بريتانوي سيال سره وکتل

د افغانستان او بریتانیا د ملي امنیت سلاکارانو د سولې، امنیت او له ترورېزم سره د مبارزې په اړه خبرې وکړې.

حمدالله محب له سر سټېفن لاوګرو سره پرون پنجشنبه په لندن کې ولیدل.

د افغانستان د ملي امنیت شورا له خبرپاڼې سره سم، ښاغلي لاوګرو له افغانستان سره د بریتانیا د ملاتړ د دوام ډاډ ورکړ، ویې ویل، هېواد به یې له افغانستان سره د نورو هېوادونو د ملاتړ په خپلولو کې همکاري وکړي.

په خبرپاڼه کې همدا راز ویل شوي چې دواړو چارواکو سلا وکړه چې له خپلو سیمه ییزو سیالانو سره همکاري به ګډ امنیتي هدفونه پیاوړي او ګډې بریاوې خوندي کړي.

د افغانستان د ملي امنیت سلاکار د چهارشنبې په ورځ بریتانیا ته په رسمي سفر ورسېد.

امریکا په افغانستان کې د طالبانو پرضد څو هوايي بریدونه کړي

ارشیف، هوايي عملیات

امریکايي چارواکي وايي، د دغه هېواد پوځ په دې اوونۍ کې د افغانستان د حکومت په ننګه د کندهار په شمول په افغانستان کې د طالبانو پرضد څو هوايي بریدونه کړي دي.

د اسوشیټېډ پرېس خبري اژانس د راپور له مخې د امریکايي ځواکونو دا هوايي بریدونه د هغو الوتکو په وسیله چې له افغانستانه بهر دي، د طالبانو پر ضد په جګړه کې د امریکا د ملاتړ د دوام اراده ښيي.

امریکا د خلیج په هېوادونو کې راز-راز جنګي الوتکې لري چې په افغانستان کې هدفونو ته ځان رسولی شي.

دا له کله چې تېره اوونۍ په افغانستان کې د امریکايي ځواکونو وروستنی قوماندان جنرال سکاټ مېلر له افغانستانه لاړ، لومړی ځل دی چې په افغانستان کې امریکايي الوتکې عملیات کوي.

اسوشیټېډ پرېس خبري اژانس وايي، د کربي له څرګندونو وروسته د دفاع وزارت یوه بل چارواکي وویل چې د چهارشنبې او پنجشنبې په ورځو امریکا د افغان امنیتي او دفاعي ځواکونو د ملاتړ لپاره تر څلورو ځلونو زیات هوايي بریدونه کړي دي.

د دغه چارواکي په وینا، لږ تر لږه دوه عملیاته د هغو توپونو او نقلیه وسایلو د ویجاړولو لپاره وشول چې طالبانو له افغان امنیتي ځواکونو څخه نیولي وو.

دا بریدونه چې یو یې د کندهار په شمال کې وشو، د افغان چارواکو په غوښتنه شوي دي.

امریکا ته د ځینو افغانانو د ویزو په اړه کانګرس لایحه تصویب کړه

د امریکا ویزه

د امریکا د استازو جرګې پرون پنجشنبه یوه لایحه تصویب کړه چې پر اساس یې هغو افغانانو ته چې له امریکايي او ايتلافي ځواکونو سره یې مرسته کړې ده، د ځانګړو وېزو د ورکولو پروام پراخیږي او چټکېږي.

دا لایحه په لوی اکثریت یعنې د ۱۶ مخالفو رایو پر وړاندې په ۴۰۷ موافقو رایو تصویب شوه.

اوس به دا لایجه سنا جرګې ته وړاندې شي.

زرګونه افغانان چې تېرو شلو کلونو کې یې له امریکايي او ناټو ځواکونو سره مرسته کړې او اوس احساس کوي چې د طالبانو له لوري له جدي خطر سره مخامخ دي. دوی د امریکا او نورو هیوادونو وېزو ته انتظار دي.

د پوهنې وزارت د ښوونځیو د ازموینو وخت اعلان کړ

د افغانستان د پوهنې وزارت

د افغانستان د پوهنې وزارت د ښوونځیو د ازموینو وخت اعلان کړ.

د دې وزارت ویاند نجیبې ارین په دې اړه تېر ماښام ازادي راډیو ته وویل: "د اسد په شپږمه په سړو او ډېرو سړو سیمو کې د کال د نیمايي ازموینې اخلو. په تودو ولایتونو کې کله چې رخصتۍ پیل شوې، لا وروستۍ ازموینې بشپړې شوې نه وې او څو مضمونه پاتې دي، د اسد په شپږمه نېټه به د تودو ولایتونو وروستۍ ازموینې هم په بشپړ ډ‌ول واخیستل شي او بیا به د کال وروستۍ یا دوبنۍ رخصتۍ پیل شي."

له بلې خوا د پوهنې وزارت په یوه خبرپاڼه کې ویلي چې ښوونځیو ته د زده کوونکو د ورتګ په اړه یې پرېکړه له روغتیا وزارت سره په ګډه کړې ده.

په افغانستان کې د کرونا وبا له ډېرېدا وروسته ښوونځي او پوهنتونونه بند شول.

افغانستان او اسټرالیا د ډیپلوماټانو پر بېرته راتګ سره غږیږي

د افغانستان او اسټرالیا ګډ بیرغونه

ټاکل شوې ده چې د افغانستان او اسټرالیا د بهرنیو چارو وزیران افغانستان ته د استرالیايي دیپلوماتانو د بېرته راتګ د څرنګوالي په اړه خبرې وکړي.

د افغانستان د بهرنیو چارو وزارت پرون پنجشنبه په یوه اعلامیه کې وویل، په افغانستان کې د خپل دیپلوماتیک حضور د بیا پیلولو په باب د اسټرالیا د حکومت د پرېکړې هرکلی کوي.

د بیان له مخې، د افغانستان حکومت له اسټرالیا سره له نژدې کار کړی چې په کابل کې د اسټرالیايي دیپلوماتانو د ماموریت د بیا پیلېدو سریزې برابرې شي.

استرالیا دوې میاشتې پخوا په دې خاطر چې د افغانستان امنیتي وضعیت به ژر خراب شي، په کابل کې خپل سفارت بند کړ.

د کونړ د غازي اباد ولسوالۍ د وضعیت په اړه ضد و نقیض راپورونه

د افغانستان په نقشه کې د کونړ ولایت

د کونړ ولایت د غازي اباد ولسوالۍ د وضعیت په اړه لاهم ضد و نقیض راپورونه ورکول کېږي.

پرون پنجشنبه (د چنګاښ ۳۱مه) وسله والو طالبانو ادعا وکړه چې دا ولسوالۍ یې نیولې ده خو تېره شپه ناوخته د کونړ والي محمد اقبال سعید ازادي راډیو ته وویل چې افغان هوايي ځواک په دې ولسوالۍ کې د طالبانو مورچې بمباري کړي دي.

ده طالبانو ته د مرګ ژوبلو د شمېر په اړه بې خبرې وښوده.

پرون سهار طالبانو او د سیمې اوسېدونکو تایید کړه چې د ولسوالۍ مرکز د طالبانو لاسته ورغلی خو وروسته ځايي خلکو ازادي راډیو ته وویل چې هوايي ځواک په ولسوالۍ کې پر طالبانو بمباري وکړه.

د کونړ چارواکي او د سیمې ځینې اوسېدونکي وايي چې د دغه ولایت د غازي اباد ولسوالۍ په جګړو کې ډېر شمېر بهرنیان په تېره بیا د لشکر طیبه غړي جنګېږي.

نور راوښيه

XS
SM
MD
LG