د لاسرسۍ وړ لېنکونه

تازه خبر
جمعه ۷ سلواغه ۱۴۰۱ کابل ۰۵:۳۹

نړۍ

د ترکیې په اسټانبول کې یوه امریکایۍ مېرمن وژل شوي ده

راپورونه وايي، هغې امریکايۍ ښځې چې په اسټانبول کې یې په تنهایۍ سره خپلې رخصتۍ تیرولې مړې موندل شوي دي.

د ترکیې دولتي خبري اژانس وايي، پولیس موندل شوي جسد د ساري سیرا ګڼلی دی. نوموړې درې دېرش کلنه وه. په راپور کې ویل شوي دي، چې د دې قضیې په تړاو دا مهال پولیس له یوولس کسانو څخه پوښتنې ګرویږنې کوي.

سیرا چې د نیویارک په ښار کې د میشتو د دوو ماشومانو مور ده؛ د وروستۍ ځل لپاره ورسره د جنورۍ په یو ویشتمه نېټه تماس نیول شوی. نوموړې په جنورۍ کې اسټانبول ته د عکسونو د اخیستلو لپاره چې د دې ورسره لېوالتیا لرله راغلې وه.

د ورځې تازه خبرونه دلته ولولئ

روسيې پر اوکراين د راکټي بريدونو نوې څپه پيل کړې

د اوکراين او روسيې جګړه

روسي ځواکونو نن سهار (د جنورۍ ۲۶) پر اوکراین د راکټي بریدونو یوه نوې څپه پیل کړه او تېره شپه د بې پیلوټه الوتکې له برید وروسته ویل کېږي چې، لږ تر لږه یو کس په‌کې وژل شوی دی.

د اوکراین د پلازمېنې کییف ښاروال ویتالي کلیچکو ویلي، په دغه ښار کې د نن ورځې په برید کې یو کس وژل شوی او دوه نور ټپیان شوي دي.

کلیچکو د کییف له اوسېدونکو څخه وغوښتل چې په پناه ځایونو کې پاتې شي.

د روسیې نوي راکټي بریدونه وروسته له‌هغې وشول چې د اوکراین ولسمشر ولودمیرزلنسکي د دغه هېواد له لوېدیځو متحدینو وغوښتل چې اوکراین ته د اوږد واټن ویشتونکي توغندي او پوځي الوتکې ورکړي چې د هوایي دفاع د پیاوړتیا لپاره اغېزناک تمام شي.

زلنسکي له لوېديځ د ليرې واټن ويشتونکي توغندي او پوځي الوتکې غوښتي

د اوکراين ولسمشر ولودمير زلنسکي

وروسته له‌هغې چې جرمني او د امریکا متحدو ایالتونو ژمنه وکړه چې کییف ته به په لسګونو پرمختللي محارب ټانکونه ورکړي، د اوکراین ولسمشر ولادمیر زلنسکي سمدستي د لیرې واټن ویشتونکو توغندویو او پوځي الوتکو پر غوښتنې ټینګار وکړ.

زلنسکي تېره شپه په ویډیویي پیغام کې وویل چې اوس لازمه ده چې، اوکراین ته الوتکې ورکړل شي.

زلنسکي زیاته کړه، دا مهمه ده چې د دفاعي همکاریو په نورو برخو کې هم پرمختګونه ولرو.

زلنسکي وویل چې، پرون د ورځې په لومړیو کې یې د ناتو له سرمنشي ینس ستولتنبرګ سره خبرې وکړې او زیاته یې کړه، چې موږ باید اوکراین ته د لیرې واټن ویشتونکو توغندیو د لېږد لاره هم خلاصه کړو او همدارنګه باید د توپونو په برخه کې همکاري پراخه او اوکراین ته د الوتکو ورکړې ته هم داخل شو.

د امریکا ولسمشر جوبایډن پرون اعلان وکړ چې هېواد به یې اوکراین ته یو دېرش ابرامز ټانکونه ولېږي.

د جرمني صدر اعظم اولاف شولځ هم ویلي چې، هېواد یې اوکراین ته ۱۴ لیوپارد ډوله ټانکونه ورکوي.

تر دې مخکې برېتانیا ویلي و، چې اوکراین ته یې ۱۴ چلینجر ټانکونه استولي دي.

د لوېدیځ له دې پوځي مرستو سره هم‌مهاله مسکو خبرداری ورکړی چې اوکراین ته د ټانکونو لېږل پارونکی او خطرناک عمل دی.

تر دې وړاندې د اوکراین ولسمشر ولودمیر زلنسکي ویلي، د روسیې د یرغل په وړاندې د ځان د دفاع لپاره ۳۰۰ ټانکونو ته اړتیا لري.

د امريکا ولسمشر اوکراين ته د دېرش ابرامز ټانکونو د استولو اعلان کړی

د امريکا ابرامز ټانکونه، انځور - ارشيف

د امریکا ولسمشر اعلان کړی چې هېواد به یې اوکراین ته یو دېرش ابرامز ټانکونه ولېږي.

بایډن د چهارشنبې په ورځ د جنورۍ په ۲۵مه وویل، دغه ټانکونه به د اوکراین پوځي وړتیا لوړه کړي.

د جرمني صدر اعظم اولاف شولڅ هم ویلي چې، هېواد یې اوکراین ته ۱۴ لیوپارد ټانکونه ورکوي.

تر دې مخکې برېتانیا ویلي و، چې اوکراین ته یې ۱۴ چلینجر-۲ ټانکونه استولي دي.

د لوېدیځ له دې پوځي مرستو سره هم‌مهاله مسکو خبرداری ورکړی چې اوکراین ته د ټانکونو لېږل پاروونکی او خطرناک عمل دی.

تر دې وړاندې د اوکراین ولسمشر ولودمیر زلنسکي ویلي، د روسیې د یرغل په وړاندې د ځان د دفاع لپاره ۳۰۰ ټانکونو ته اړتیا لري.

پولیسو د پاکستان د تحریک انصاف ګوند جګپوړی غړی 'فواد چوهدري' نیولی

د تحریک انصاف ګوند جګپوړی غړی فواد چوهدري

د پاکستان پولیسو د تحریک انصاف ګوند جګپوړی غړی فواد چوهدري نیولی دی.

فواد چوهدري په دې تور نیول شوی چې د پاکستان د انتخاباتو کمېسیون مشر او غړیو ته یې ګواښ کړی دی.

فواد چوهدري د عمران خان د صدرات په وخت د اطلاعاتو وزیر و او د ولسمشر مرستیال و.

دی د تحریک انصاف اصلي ویاند دی.

د چوهدري مېرمنې هیبا نن رسنیو ته وویل چې سهار وختي لس پولیس په لاهور کې د دوی کور ته ورغلل او چوهدری یې په زور موټر ته پورته کړ.

د تحریک انصاف ګوند ویاندې شرین مزاري وویل چې چوهدري نن په لاهور کې محکمې ته لاس تړلی راوستل شو، پولیسو له قاضي وغوښتل چې دا سړی اسلام اباد ته انتقال کړي.

قاضي د ازادي راډیو مشال څانګې ته دا خبر تایید کړ چې چوهدري به اسلام اباد ته واستوي.

کرکټ؛ د ۲۰۲۲ کال غوره ځوان لوبغاړی اعلان شو

مارکو یانسین

د کرکټ نړیوالې شورا د اعلان پر اساس مارکو یانسین د ۲۰۲۲ کال غوره ځوان/ ایمرجینګ لوبغاړی ونومول شو.

یانسین د سویلي افریقا کیڼ لاسی چټک توپ توپ اچونکی دی.

کرکټ نړیوالې شورا لیکلي چې نوموړي تېر کال په ټېسټ کرکټ کې ۳۶ وېکټې اخیستې وې او ۲۳۴ منډې یې کړې وې.

همدارنګه نوموړي په یو ورځنیو سیالیو کې ۲ او په شل اوریزو کې یوازې یوه وېکټ اخستې وه.

له نوموړي سره په دې سیالۍ کې د افغانستان ابرهیم ځدراڼ، د هند ارشدیپ سینګه او د نیوزیلنډ فاین الین مقابله کوله.

د یادونې وړ ده چې یادې شورا په یو بل اعلان کې د هند سوریا کومار یادوف په شل اوریزو سیالیو کې د ۲۰۲۲ کال غوره لوبغاړی ونوماوه.

اوکراين کې د بشري مرستو دوه برتانوي کارکوونکي وژل شوي

د اوکراین د يوې جګړه ځپلې سيمې انځور

اوکراین کې د بشري مرستو دوه کارکوونکي وژل شوي دي.

د بشري مرستو د ټولنو دوه برتانوي کارکوونکي د اوکراین په ختیځ کې له جګړه ځپلو سیمو د تخلیې د عملیاتو پرمهال وژل شوي دي.

د کریس پېري او اندریو باګشاو د تري تم کېدو خبرونه څو اوونۍ مخکې ورکړل شوي وو.

پرون د پېري کورنۍ په یوه بیان کې چې د برېتانیا د بهرنیو چارو وزارت خپور کړ تایید کړه، چې پېري او همکار یې باګشاو د اوکراین په ختیځ ښار سولیدار کې هغه مهال چې د تخلیې په عملیاتو کې یې مرسته کوله، وژل شوي دي.

د خبریالانو د خونديتوب کمېټه: تېر کال نړۍ کې د خبریالانو د مړینې کچه ۵۰سلنه ډېره شوې وه

د خبریالانو د خوندیتوب کمېټې لوګو

د یوه نوي راپور له مخې په نړۍ کې د خبریالانو د مړینې په کچه کې په ۲۰۲۲ کال کې د یوه مخکیني کال په پرتله پنځوس سلنه زیاتوالی راغلی دی.

په نیویارک کې دېره د خبریالانو د خوندیتوب کمېټې CPJ په یو راپور کې چې پرون خپور شو ویلي، چې دا خبریالان تر ډېره په اوکراین، مکسیکو او هایتي کې وژل شوي دي.

په راپور کې راغلي چې په ۲۰۲۲ کال کې په ټوله نړۍ کې د رسنیو ۶۷ کارکوونکي وژل شوي چې دا له ۲۰۱۸ کال راهیسې د خبریالانو د مړینې تر ټولو لوړه شمېره ده.

راپور زیاتوي چې له دې ډلې ۳۵ تنه د اوکراین، مکسیکو او هایتي خبریالان دي.

د CPJ د راپور له مخې تېرکال په اوکراین کې د رسنیو ۱۵ کارکوونکي وژل شوي دي.

د جرمني صدراعظم: اوکراين ته به 'ليوپارډ' ټانکونه ولېږل شي

د جرمني صدراعظم اولاف شولځ پرېکړه وکړه، چې اوکراین ته په جرمني کې جوړ شوي لیوپارډ ټانکونه ولېږي.

هغه د پولنډ په څېر نورو هېوادونو ته هم اجازه ورکړه، چې اوکراین ته دغه ټانکونه ورکړي.

په همدې حال کې ویل شوي چې د امریکا متحدو ایالتونو هم پرون سې‌شنبه اوکراین ته د ابرامز په نوم ټانکونو او نورو پوځي مهماتو د ورکړې خبره کړې ده.

خو د امریکا د حکومت یوه ویاند په دې باب له تبصرې ډډه وکړه.

تر دې مخکې متحدانو پر جرمني انتقادونه کول، چې نه خپله اوکراین ته دا ټانکونه ورکوي او نه هم متحدانو ته دا اجازه ورکوي.

جرمني ویل، تر هغو اوکراین ته دا ټانکونه نه ورکوي، چې لومړی د امریکا متحدو ایالتونو ابرامز ټانکونه اوکراین ته نه وي ورکړي.

شهباز شريف د برښنا پارچاوۍ له امله له خپل ملت بښنه غوښتې

شهباز شريف

د پاکستان صدراعظم شهباز شریف پرون سې‌شنبه د برښنا د پارچاوۍ له کبله له خپل ملت څخه بښنه وغوښته.

له دوشنبې تر پرون پورې د ۲۴ ساعتونو لپاره په پاکستان کې برښنا نه وه، چې د دغه هېواد ۲۲۰ ملیونه وګړي په تیاره کې پاتې وو.

په پاکستان کې د برښنا د پارچاوۍ له کبله د تولیدي فابریکو چارې په ټپه ولاړې وې او په روغتونونو کې له اضطراري جنراټورونو کار واخیستل شو.

د پاکستان د انرژۍ وزیر، خرم دستګیر خان ویلي، په دغه هېواد کې برښنا د سې‌شنبې سهار بېرته عادي حالت ته راوګرځېده.

خو د پاکستان په ځینو برخو کې د برښنا د تولید هغه بټۍ چې په اټومي انرژۍ او د ډبرو په سکرو چلېږي، بیا فعالېدو ته اړتیا لري.

د پاکستان صدراعظم شهباز شریف ویلي، د خپل حکومت په استازیتوب د هغه کړاو له کبله له خپلو خلکو بښنه غواړي، چې علت یې د دوشنبې په ورځ د برښنا پارچاوي وه.

شریف ویلي، د برښنا د دې پارچاوۍ د علت معلومولو لپاره یې د څېړنو امر کړی دی او عاملان به مجازات شي.

ترکیې له سويډن او فنلنډ سره جوړېدونکې غونډه لغوه کړې

د ترکیې بیرغ

ترکیې له سویډن او فنلنډ سره هغه درې اړخیزه غونډه لغوه کړې چې ټاکل شوې وه په فبرورۍ میاشت کې جوړه شي.

انقرې دغه اقدام وروسته له هغې وکړ چې په ستاکهولم کې د تېرې اوونۍ په پای کې د ترکیې سفارت ته نژدې یوه اعتراضیه غونډه وشوه چې د قرانکریم یوه نسخه هم په کې وسوځول شوه.

د ترکیې د دولتي ټلوېزیون ټي آر ټي د ډیپلوماتیکو سرچینو په حواله ویلي چې دا غونډه د انقرې په غوښتنه ځنډول شوې ده.

د ترکیې د ولسمشر رجب طیب اردوغان ویاند د روانې میاشتې په پیل کې ویلي و چې، ټاکل شوې د ناټو سرمنشي ینس ستولتنبرګ هم په دې غونډه کې ګډون وکړي.

د ترکیې ولسمشر رجب طیب اردوغان پرون وویل، ستاکهولم دې په ناټو کې د غړیتوب لپاره د ترکیې د ملاتړ تمه نه کوي.

نور راوښيه

XS
SM
MD
LG