د لاسرسۍ وړ لېنکونه

تازه خبر
جمعه ۱۵ زمری ۱۴۰۰ کابل ۰۵:۲۰

افغانستان

"نړیواله ټولنه دې د افغان پولیسو د روزنې او تجهیز په اړه خپلې کړې ژمنې پوره کړي"

د افغانستان د کورنیو چارو وزارت، له نړیوالې ټولنې غواړي؛ چې د هیواد د پولیسو د روزنې او تجهیز په اړه خپلې ټولې ژمنې عملي کړي.

د دې وزارت ویاند صدیق صدیقي نن په دې وزارت کې د یوه سېمینار په څنګه کې خبريالانو ته وویل؛ که څه هم د پولیسو د تجهیز لپاره زمینه برابره شوې، خو نوموړي ټینګار وکړ، چې په دې اړه دې ټولې ژمنې پوره کړل شي.

“هیله لرو، هغه ژمنې چې د افغان پولیسو د روزنې او تجهیز په اړه شوي؛ سل په سلو کې عملي شي، تر 2014 کال پورې وخت لرو.”

دغه سېمینار چې د وړتیاوو د لوړولو او د پولیسو د ښه مدیریت او مشرۍ لپاره سر له ننه د درو اونیو لپاره دوام وکړي، د پولیسو مشرانو برخه په کې اخیستې.

د ورځې تازه خبرونه دلته ولولئ

دوستم: وسله‌وال طالبان هڅه کوي شمال یا لوېدیځ کې د یو مهم ولایت مرکز ونیسي

مارشال عبدالرشید دوستم

مارشال عبدالرشید دوستم وايي، وسله‌وال طالبان هڅه کوي چې په شمال یا لوېدیځ کې د یو مهم ولایت مرکز ونیسي.

د افغانستان د ملي جنبش مشر چې تازه له ترکیې راستون شوی نن‌یې په کابل کې یوې خبري غونډې ته وویل، طالبانو پر څو ولایتونو زیات تمرکز کړی دی.

ښاغلی دوستم زیاتوي: "طالبان تر بل هر ولایت زیات له خپلو ټولو امکاناتو څخه د جوزجان، بیا د تخار، هرات او کندهار د نیولو لپاره کار اخلي څو د دې ولایتونو له مرکزي ښارونو څخه یو لاندې کړي."

جوزجان چې د دوستم پلرنی ټاټوبی او د نوموړي د نفوذ سیمه بلل کېږي دا مهال په‌کې طالبانو ګڼې ولسوالۍ نیولې دي او د شبرغان ښار د نیولو لپاره‌یې بریدونه زیات کړي دي.

همدارنګه هرات، کندهار، تخار او هلمند کې هم چې دوستم ورته اشاره وکړه دا مهال ګڼې ولسوالۍ د طالبانو تر واک لاندې دي او ولایتي مرکزونه‌یې د حکومتي ځواکونو او وسله‌والو طالبانو ترمنځ د کوڅه په کوڅه جګړو شاهدان دي.

ښاغلي دوستم وویل چې د افغانستان څخه د دفاع لپاره باید یو قوي پرېکړه وشي.

عبدالرشید دوستم د روان کال د جوزا په میاشت کې ترکیې ته تر سفر مخکې په څو ولایتونو له هغې جملې جوزجان کې د پوځي عملیاتو مشري کوله.

نوموړی د چهارشنبې په ورځ افغانستان ته ستون شو او ټاکل شوې ده چې په ځینو سیمو کې د طالبانو په وړاندې د پوخي عملیاتو مشري وکړي.

غني او رئیسي د افغانستان او ایران "د همکاریو او اړیکو پر پراختیا" خبرې وکړې

د افغانستان او ایران ولسمشرانو لیدنه

د افغانستان او ایران ولسمشرانو نن په تهران کې سره د افغانستان او ایران ترمنځ "د همکاریو او اړیکو پر پراختیا" خبرې کړې دي.

ارګ په دې اړه یوه خبرپاڼه کې ویلي جمهور رئیس اشرف غني او جمهور رئیس سید ابراهیم رئیسي ترمنځ دې لیدنه کې د ایران نوي جمهور رئیس "د افغانستان اسلامي د اسلامي دولت څخه د ملاتړ په تداوم او د سولې لپاره د سیمه‌ییزې اجماع پر کوښښونو ټینګار وکړ."

ارګ د ایران د نوي جمهور رئیس ښاغلي رئيسي له خولې وايي: "د مشروع نظام او د افغانانو د حقونو او سولې پروسې ملاتړ کوم."

رئیسي زیاته کړې چې ګاونډيان په ځانګړي ډول افغانستان‌یې "په بهرني سیاست کې لوړ مقام لري."

افغان جمهور رئیس ایران ته، د دې هیواد جمهور رئیس په توګه د ابراهیم رئیسي د لوړې په مراسمو کې د ګډون لپاره سفر کړی دی.

دا سفر داسې مهال کېږي چې تهران څو اوونۍ مخکې د طالبانو د یو پلاوي کوربه و.

افغان چارواکو تر دې مخکې وخت ناوخت ایران د طالبانو او همدارنګه هغو وسله‌والو په ملاتړ تورن کړی چې د افغانستان په لوېدیځ کې د اوبو پر بندونو بریدونو کې لاس لري.

افغان ځواکونو د هلمند مرکز لښکرګاه ځینو سیمو کې 'پوځي عملیات' پیل کړل

ارشیف، هلمند کې د افغان ځواکونو عملیات

افغان ځواکونه وايي، د هلمند مرکز لښکرګاه په هغو سیمو کې یې پوځي عملیات پیل کړي چې په وروستیو کې د طالبانو لاس ته لوېدلې دي.

د میوند قول اردو ویاند عبدالقدیر بهادرزي نن د دې عملیاتو په اړه وویل: "د لښکرګاه په لارو او سړکونو د الله اکبر په نعرو له طالبانو څخه د سیمو د نیولو چاڼیز عملیات پیل شول. عملیات به تر هغې دوام وکړي تر څو وروستي طالبان وځپل شي."

بل‌خوا د دفاع وزارت مرستیال ویاند فواد امان پر خپل ټویټر لیکلي دي چې افغان هوايي ځواک نن د لښکرګاه په ختیځ کې د طالبانو په یوه ۳۰ کسیزه غونډه بمباري کړې چې په‌کې د دې ډلې مشران هم وو.

طالبانو په دې اړه کومه تبصره نه‌ده کړې، خو تر دې مخکې یې افغان ځواکونه تورن کړي و چې په هوايي بریدونو کې یې ولسي خلکو او عامه ودانیو ته زیان رسولی دی.

د افغانستان دفاع وزارت مرستیال ویاند ښاغلی امان وايي چې په لښکرګاه‌یې ځمکنیو او هوايي بریدونو ته زور ورکړی او ډېر ژر به دا ښار له طالبانو پاک کړي.

د ۲۰۱۵ میوند قول اردو قوماندان سمېع سادات د سې شنبې په ورځ د لښکرګاه د ښار د ځینو سیمو له خلکو غوښتي و چې له خپلو کورونو دې ووځي څو په عملیاتو کې زیانمن نه‌شي.

دا مهال د لښکرګاه ښار ډېرې سیمې وسله‌والو طالبانو تر کنټرول لاندې دي. افغان امنیتي او دفاعي چارواکي وايي، طالبانو د ولسي خلکو په کورونو کې ځای نیولی او هغوی نه‌پرېږدي چې له کورونو ووځي او دې چارې د حکومتي ځواکونو عملیات د ولسي مرګ‌ژوبلې د مخینوي لپاره سلو کړي دي.

د راپورونو پر بنسټ پر لښګرکاه د یوې اوونۍ جګړو په ترڅ کې سلګونه ولسي وګړو ته مرګ‌ژوبله او شخصي او عامه شتمنیو درانه زیانونه لیدلي دي.

په خوست کې ۴۸ کیلو چرس او لېږدونکي يې نیول شوي

نیول شوي نشه يي توکي

په خوست کې پولیسو ۴۸ کیلو چرس، یو موټر او د یادو نشه يي توکو دوه تنه لېږدونکي نیولي دي.

نن د پنجشنبې (د زمري ۱۴مه) په ورځ خوست امنیه قوماندان سمونوال سیف الله سرحدي ازادي راډیو ته وویل، نیول شوېو کسان غوښتل، دا نشه يي توکي د پکتیا د څمکنیو څخه خوست ته ولېږدوي چې د موسی خېلو په ولسوالۍ کې د پولیسو له خوا ونیول شول.

نوموړی زیاتوي، د نشه يي توکو سره یو موټر او د هغې دوه لیږدونکي هم نیول شوي دي.

سمونوال سیف الله سرحدي وايي، نیول شوي کسان به د تحقیقاتو په خاطر عدلي او قضايي ادارو ته ور وپېژندل شي.

نوموړی وړاندې وايي: "یو عراده کرولا موټر سره دې دوه عاملینو يې چې دوی په دې موټر کې په ډېر ماهرانه شکل چرس ځای پر ځای کړي وو چې ۴۸ کیلو وزن لري او په ۴۲ پاکټونو کې ځای پر ځای شوي دي، دوی غوښتل دا مواد د شهرنو له خوا نه خوست ته داخل کړي چې زموږ اتلو پولیسو د موسی خېلو په استقامت کې د تلاشۍ په جریان کې کشف کړل چې دوی به بعدي اجرااتو لپاره عدلي او قضايي ادارو ته معرفي کېږي. "

خوست د افغانستان له هغو ولایتونو دی چې نشه يي توکي په کې نه کرل کېږي، خو کارونکي ېې ډېر دي او د نشه يي توکو قاچاقبران يې په پټه له بېلابېلو سیمو دې ځای ته ور وړي.

کندز چارواکو پر ۵۰۰ اړمنو بې ځایه شوېو کورنیو مرستې وویشلې

د کندز ولایت سرپرست والي نجیب الله عمرخېل

د کندز سیمه ییز چارواکي وايي، دوی دغه ولایت کې له تېرې ورځې راهیسې د ۶ میلیونه افغانیو په ارزښت پر پنځه سوه مستحقه بې ځایه شوېو کورنیو د اړینو مرستو ويشلو لړۍ پیل کړې ده.

د کندز ولایت سرپرست والي نجیب الله عمرخېل ازادي راډیو ته وویل، د مرستو د وېشلو په دې بهېر کې په هرې بې ځایه شوې کورنۍ د ۱۲ زره افغانیو په ارزښت خوراکي او غیر خوراکي توکي وېشل کېږي.

دی وايي: "موږ له هغو ټولو مرستندویو موسساتو څخه مننه کوو چې له بې وزله خلکو سره مرستې کوي."

په ورته وخت کې هغه شمېر بې ځایه شوېو کورنیو چې د دولت له لوري مرستې ترلاسه کړي خوښې څرګندوي، خو یو شمېر یې دغه مرسته کافې نه بولي.

د نوموړي ولایت د کډوالو او راستنېدونکو چارو رئیس غلام سخي رسولي بیا وايي، کندز کې وروستیو جګړو څه باندې ۲۰ زره کورنۍ بې ځایه کړي.

له نژدې دوو میاشتو راهیسې د کندز ښار شااوخوا نژدې څنډې د شدیدو جګړو شاهد دی.

ننګرهار چارواکي: هغه کس وژل شوی چې سرخرود کې یې پلچکونه الوزولي وو

ویجاړ شوی پلچک

د ننګرهار چارواکي د هغه کس د وژلو ادعا کوي چې تېره شپه یې د سرخ رود په فتح اباد سیمه کې درې پلچکونه په بمونو الوځولي وو.

د ننګرهار مطبوعاتي دفتر ازادي راډیو ته په را استول شوېو معلوماتو کې ویلي چې د ننګرهار سره رود ولسوالۍ په فتح اباد سیمه کې وسله والو طالبانو تېره شپه درې پلچکونه په بمونو الوځولي وو چې د امنیتي ځواکونو د بریدونو په پایله کې د نجیب په نوم هماغه کس له اته نورو وسله والو طالبانو سره یوځای ووژل شو چې پلچکونو ته یې بمونه ايښي وو.

د رالېږل شویو معلوماتو له مخې، د ننګرهار والي ضیاءالحق امرخېل د پلچکونو ویجاړول جنایت بللی او ځایي مسؤلانو ته یې د ژر رغونې سپارښتنه کړې ده.

د یادونې وړ ده چې څو میاشتې وړاندې هم په دغه سیمه کې یو پلچک په بمونو الوځول شوی و چې ورسره د ننګرهار ۴ ولسوالیو ته د تګ راتګ پر مهال خلک له ستونزو سره مخ شوي وو.

وسله والو طالبانو په دې اړه تر اوسه څه نه دي ویلي.

چارواکي: د سرپل مرکز کې د طالبانو برید په شا تمبول شوی

د افغانستان په نقشه کې د سرپل ولایت

افغان چارواکي وايي، د سرپل په مرکز کې یې د طالبانو برید په شا تمبولی دی او هغوی ته یې درنه مرګ ژوبله اړولې ده.

د ۲۰۹ شاهین قل اردو ویاند حنیف رضايي ازادي رادیو ته وویل، د طالبانو د بریدونو په وړاندې په ځوابي عملیاتو کې یې د دې ډلې یو مرکز له منځه وړی دی.

رضايي زیاته کړه: "هغه بریدونه چې د ښار په څنډو کې پر طالبانو وشول، په مجموع کې ۳۴وسله وال طالبان د دوی د یوه قوماندان په ګډون چې اصلاً د غور اوسیدونکی و، وژل شوي دي، ۱۴ تنه نور یې ټپیان شوي او یو مرکز یې هم له منځه وړل شوی دی. دا جګړه د دې سبب شوه چې د طالبانو بریدونه په شا وتمبول شي او له ماتې سره مخ شي."

طالبان تر اوسه پورې په دې اړه څه نه دي ویلي.

خو د طالبانو یو ویاند ذبیح الله مجاهد پر خپل ټویټر لیکلي چې د ډلې په ورڅېرمه ولایت جوزجان کې د مرکز شبرغان په څنډو کې ګڼې پوستې او سیمې له حکومتي ځواکونو نیولي او د ښار خوا ته د پرمختګ په حال کې دي.

ملي امنیت: د لغمان د بادپښ ولسوالۍ بېرته له طالبانو ونیول شوه

د لغمان د بادپښ ولسوالۍ

د افغانستان د ملي امنیت ځواکونه وايي، د لغمان د بادپښ ولسوالۍ یې بېرته له طالبانو څخه نېولې ده.

د ملي امنیت د ۰۲ قطعې په یوه خبرپاڼه کې ویلي چې د دې قطعې ځواکونه تېره شپه د بادپښ ولسوالۍ په بشپړه توګه له طالبانو ونیوله.

ملي امنیت د دې ولسوالۍ د بېرته نېولو په عملیاتو کې د اوو طالب وسله والو د وژل کېدو ادعا هم کړې ده.

طالبانو تر اوسه پورې په دې اړه تبصره نه ده کړې.

دې ډلې په وروستیو څو میاشتو کې د لغمان په شمول څو ولایتونو کې ګڼې ولسوالۍ له افغان حکومت څخه نېولې دي.

د ارزګان والي: طالبانو شاعر او مورخ عبدالله عاطفي وژلی

شاعر او مورخ عبدالله عاطفي

د ارزګان والي وايي، وسله‌والو طالبانو په دې ولایت کې یو شاعر او مورخ وژلی دی.

محمد عمر شېرزاد ازادي راډیو ته وویل، وسله‌والو په چورې ولسوالۍ کې عبدالله عاطفي په نوم دا شاعر او لیکوال تېره شپه لومړی شکنجه کړی او بیا یې وژلی دی.

ښاغلي شېرزاد زیاته کړه: "طالبانو تېره شپه شاعر او تاریخ لیکونکی عبدالله عاطفي په چوره ولسوالۍ کې له کوره ایستلی، لومړی یې شکنجه کړی او وروسته‌یې شهید کړی دی."

چوره ولسوالۍ دا مهال د وسله‌والو طالبانو په لاس کې ده.

د ولسمشر لومړي مرستیال امرالله صالح هم وژل شوی عاطفي په اقتصاد او تاریخ پوهنه کې د دوو ماسټریو لرونکی بللی او د هغه د وژلو پړه‌یې پر طالبانو اچولې ده.

نوموړي پر خپل ټویټر ویلي، د افغان ذهنیت تر برید لاندې دی.

خو طالبانو د عاطفي په وژنه کې لاس لرل رد کړي دي.

د دې ډلې ویاند ذبیح‌الله مجاهد پر خپل ټویټر لیکلي: "عاطفي یو بې‌طرفه لیکوال او شاعر و، د قتل قضیه‌يې چې شخصي معلومېږي او په خفه ډول وژل شوی."

د طالبانو تر واک لاندې ځینو نورو سیمو کې هم په وروستیو اوونیو کې یو شمېر کسان له کورونو ایستل شوي او وژل شوي دي چې په ډېرو کې یې طالبانو لاس لرل رد کړي او په اړه‌یې د څېړنو د پیل ویلي، خو تر اوسه د کومې وژنې د څېړنې پایلې رسنیو سره نه‌دي شریکې شوي.

د مجاهد په وینا څېړنه روانه ده او دوی هڅه کوي چې عاملین‌يې پیدا او مجازات کړي.

په ټولنیزو رسنیو کې ګڼو لیکوالو، فرهنګیانو او ټولنیزو فعالانو د عبدالله عاطفي وژل غندلي او هغه‌یې یو داسې عالم او لیکوال بللی چې په هېڅ سیاسي لوري پورې یې تړاو نه‌درلود.

چارواکي: نورستان کې د کچالو حاصل ۲۰ سلنه زیات شوی

ارشیف، د افغانستان کچالو

د افغانستان د کرنې، مالدارۍ او اوبو لګولو وزارت وايي، روان کال په نورستان کې د کچالو په حاصل کې ۲۰ سلنه زیاتوالی راغلی.

د دغه وزارت ویاند اکبر رستمي نن پنجشنبه (د زمري ۱۴مه) ازادي راډيو ته وویل، تېر کال په دغه ولایت کې په ۲۰۰ هکتاره ځمکه کې کچالو کرل شوي وو چې نږدې څلور زره مټریک ټنه کچالو یې کړي وو.

د نوموړي په وینا، روان کال په دغه ولایت کې په ۲۳۰ هکتاره ځمکه کې کچالو کرل شوي و چې څلور زره ۶۰۰ مټریک ټنه کچالو یې کړي، زیاتره ځمکه په مرکز پارون کې کرل شوې ده.

ښاغلی رستمي زیاتوي چې دا شمېرې ښکاره کوي چې د تېر کال پرتله ورکې ۲۰ سلنه زیاتوالی راغلی.

د کرنې وزارت چارواکي وايي، د کچالو کښت ته د بزګرانو لېواتیا، کچالو لپاره د مناسب بازار او بزګرانو سره فني او مسلکي مرستې هغه عمده لاملونه دي چې په نورستان کې د کچالو په حاصل کې زیاتوالی راوستی.

افغانستان: بېلابېلو هېوادونو ته صادراتو کې۳۰ سلنه زیاتوالی راغلی

ارشیف، له کابل هوايي ډګره صادریدونکي توکي

د افغانستان د صنعت او سوداګرۍ وزارت وايي، د روان مالي کال په لومړیو شپږو میاشتو کې بېلابېلو هېوادونو ته په صادراتو کې۳۰ سلنه زیاتوالی راغلی.

د دغه وزارت په اعلامیه کې د سوداګرۍ وزیر نثار احمد غوریاني له قوله ویل شوي چې روان کال د سیمې او نړۍ له هېوادونو سره د صادراتو د زیاتوالي او سوداګریزو چارو د سمون لپاره څو تړونونه لاسلیک شوي وو چې ورسره د سبزیو او مېوو په صارداتو کې د پام وړ زیاتوالی راغلی.

د غوریاني په خبره وچه مېوه او زعفران د افغانستان له عمده صادراتي توکو حسابېږي او د اینجې 'هېنګ' بوټي د پروسس او بسته بندي او د صادارتو د څرنګوالي په موخه له څو خصوصي او دولتي بنسټونو سره د همکارۍ تړونونه تر لاس لاندې دي.

د صنعت وزارت وايي، ټاکل شوې چې د متحده عربي اماراتو په دُبۍ ښار کې ډېر ژر یو شپږ میاشتنی نړیوال نندارتون هم جوړ شي.

د دغه وزارت چارواکي زیاتوي چې دغه نندارتون کې د افغاني توکو د ګډون او نندارې ته د اېښودلو لپاره چمتوالی روان دی.

ولسمشر غني ایران ته ولاړ

ارشیف، ولسمشر غني

د افغانستان ولسمشر محمد اشرف غني نن پنجشنبه (د زمري ۱۴مه) سهار ایران ته روان شو.

نوموړی به تهران کې د نوي منتخب ولسمشر ابراهیم رییسي د لوړې په مراسمو کې ګډون وکړي او له ایراني چارواکو سره به جلا جلا لیده کاته هم ولري.

ارګ په یوه خبرپاڼه کې ویلي چې دې یو ورځني سفر کې د جمهوري ریاست دوهم مرستیال سرور دانش، د بهرنیو چارو وزیر حنیف اتمر او یو شمېر نور چارواکي د ولسمشر ملګرتیا کوي.

ښاغلي رییسي د سې شنبې په ورځ هم د تحلیف یو لړ مراسم ترسره کړل، خو نننۍ مراسم یې د ایران په پارلمان کې ترسره کېږي.

راتلونکې اوونۍ د ملګرو ملتونو امنیت شورا پر افغانستان غږیږي

د ملګرو ملتونو د امنیت شورا

تمه ده چې د راتلونکې اوونۍ په پيل کې د ملګرو ملتونو امنیت شورا د افغانستان پر وضعیت خبرې وکړي.

ځینو ډپلوماتیکو سرچینو ویلي دي چې ښایي دا غونډه د شنبې یا یکشنبې په ورځ وشي.

د افغانستان حکومت د چهارشنبې (د زمري ۱۳مه) په ورځ د داسې یوې غونډې د جوړیدو غوښتنه وکړه.

د ملګرو ملتونو امنیت شورا د سې شنبې په ورځ په یوه بیان کې له ښکېلو لوریو وغوښتل چې شخړې کمې کړي. د امنیت شورا په بیان کې پر اوربند هم ټینګار وشو.

د ملګرو ملتونو د راپور له مخې د سږ کال لومړیو شپږو میاشتو په ترڅ کې په افغانستان کې د تېرکال همدې مودې پرتله ملکي تلفات اووه څلوېښت په سلو کې زیات شوي دي.

د اسلامي همکاریو سازمان د افغانستان په اړه ژوره اندېښنه وښوده

د اسلامي همکاریو سازمان مشر یوسف بن احمد العثیمین

د اسلامي همکاریو سازمان په افغانستان کې د شخړو زیاتېدو ته ژوره اندېښنه ښکاره کړه.

د دې سازمان عمومي مشر یوسف بن احمد العثیمین په یوه بیان کې چې د چهارشنبې (د زمري ۱۳مه) په ورځ خپور شو، وویل چې په افغانستان کې د وروستیو شخړو د قربانیانو له کورنیو سره او د افغانستان له حکومت سره خپله خواخوږي څرګندوي.

په دې بیان کې د افغانانو په مشرۍ او مالکیت د سولې پر خبرو ټینګار شوی دی او هر راز ترورېزم غندل شوی دی.

نی: د طالبانو تر واک لاندې سیمو کې لسګونه رسنۍ فعالیت نه کوي

ارشیف

په هغو سیمو کې چې طالبانو په وروستیو کې نیولي دي د لسګونو راډیوګانو او ټلوېزیونونو خپرونې بندې شوي دي.

د افغانستان د ازادو رسنیو د ملاتړ بنسټ یا نی وایي چې د طالبانو له لوري د ولسوالیو د نیولو او په ولایتونو کې د جګړو له شدت سره یو پنځوس رسنۍ د اپریل له میاشتې راهیسې فعالیت نه کوي.

د نی په باور د دې رسنیو د بندېدو له امله تر زرو ډېرخبریالان او د رسنیو کار کوونکي بې کاره شوي دي.

د طالبانو د رژیم په وخت یوازې شریعت غږ راډیو خپرونې کولې او په دوه زره لومړي کال کې د دوی د رژیم له ماتې را وروسته په افغانستان کې د تېرو دوو لسیزو په ترڅ کې یو سل او اویا راډیوګانو او لسګونو ټلویزیونونو خپرونې پيل کړي دي.

د افغانستان د اطلاعات او فرهنګ وزارت وایي چې د وروستیو امنیتي ستونزو له امله تر سلو ډېرو خبریالانو له ولایتونو کابل ته پناه راوړې ده.

نور راوښيه

XS
SM
MD
LG