د لاسرسۍ وړ لېنکونه

تازه خبر
سه شنبه ۱۴ لیندۍ ۱۴۰۲ کابل ۰۷:۳۵

نړۍ

روسیي پولیسو په تبلسک ښار کې یو مشکوک سړی نیولی

روسیي پولیس وايي، چې دوي په تبلسک ښار کې داسې یو مشکوک سړی نیولی، چې غوښتل یې انفجاري مواد د خلکو په میل باکونو یا هغو ځانګړو ډبیو کې ځای پرځای کول چې د خلکو لیکونه او پوستي په کې راځي.

د پلټونکو په حواله دې څلور دیرش کلن سړي په تبلسک کې په یوه اپارتمان کې جوړ شوی انفجاري مواد په پوست باکونو کې ایښودل.

دې ډول انفجاري موادو په واسطه د جون په یوویشتمه او اته ویشتمه یو دوه شپته کلنه ښځه او پنځوس کلن سړي سخت ټپیان شوي وو .

پلټونکي وايي، چې دا سړی یې په هغه کور کې موندلی چې دی په کې په اوړي کې اوسي او په دې کور کې داسی وسایل موندل شوي چې چاودیدونکې مواد ورباندي جوړیږي.

د ورځې تازه خبرونه دلته ولولئ

ییلوا جانسن: د منځني ختیځ د کړکېچ له کبله اروپا د تروریستي حملو له لوی ګواښ سره مخ ده

د اروپايي ټولنې د کورنیو چارو کمېشنره ییلوا جانسن
د اروپايي ټولنې د کورنیو چارو کمېشنره ییلوا جانسن

د اروپايي ټولنې د کورنیو چارو کمېشنرې خبرداری ورکړی چې په منځني ختیځ کې د روان کړکېچ له کبله اروپا د تروریستي حملو له لوی ګواښ سره مخ ده.

ییلوا جانسن نن یوې خبري غونډې ته وویل، د اسراییلو او د حماس د سختدریځې ډلې ترمنځ د جګړې له کبله چې په ټولنه کې کوم ویش راغلی دی، داسې مهال چې د کرسمس جشن راروان دی په اروپايي ټولنه کې د تروریستي حملو خطر شته.

هغې په دې اړه نور جزییات ورنه کړل او دفتر یې هم سمدستي په دې اړه د جزییاتو لپاره غوښتنې نه دي ځواب کړي.

اروپايي ټولنه او متحدایالات حماس د یوې تروریستي ډلې په توګه پېژني.

مېرمن جانسن دا څرګندونې داسې مهال کوي چې د اروپايي ټولنې د بهرنیو چارو وزیران په بروکسل کې راټول شوي دي.

دا په داسې حال کې ده چې د شنبې په ماښام د فرانسې په پلازمېنه پاریس کې د آیفل برج مخې ته یوه بریدکوونکي یو جرمنی سیلاني د چړې په ګوازونو وواژه او دوه تنه نور یې ټپیان کړل.

د بلوچستان چارواکي: منظور پشتین له نیول کېدو وروسته له دې ایالت څخه اېستل شوی

له ارشیفه د منظور پشتین یو تصویر
له ارشیفه د منظور پشتین یو تصویر

د بلوچستان چارواکي وايي چې د پښتون ژغورنې غورځنګ PTM مشر منظور پشتين یې تر نيول کېدو وروسته له دې ایالت څخه اېستلی دی.

د بلوچستان د اطلاعاتو سرپرست وزیر جان محمد اڅکزي پرون خبریالانو ته وويل پشتين د خیبر پښتونخوا د ډېره اسماعيل خان پولیسو ته سپارل شوی، خو د ډيره اسماعيل خان د پوليسو سرچينو مشال راډيو ته وويل چې پشتين اسلام اباد ته بیول شوی.

اڅکزي تور ولګاوه چې د پشتين ساتونکو پر پولیسو ډزې کړي او د موټرو په ټکر کې یې يو دولتي مامور هم زخمي کړی، خو پر ټولنیزو شبکو په خپرو شویو ويډيوګانو کې ښکاري چې امنيتي ځواکونو موټر د پشتين د موټر مخه نیسي.

د PTMمشران د چارواکو ادعاوې رد کړې دي.

په عین حال کې یوشمېر فعالانو او سیاستوالو د پښتین پر نیول کېدو اعتراضونه کړي دي.

د غورځنګ غړي او سیاستوال علي وزیر پر اېکس شبکې لیکلي زندان او حملې به د دوی زغم نه یوازې کم نه کړي؛ بلکې ټینګ او پوخ به یې کړي.

د ښځو د تعلیم او حقونو فعالې او د PTM غړې سنا اعجاز د پشتین نیول او پر هغه برید غندلي دي.

منظور پشتین د بلوچستان ایالت پولیسو پرون وروسته له هغه ونیوه چې د موټرو پر کاروان یې ډزې وشوې.

په دې برید کې ده ته زیان وانه وښت، خو د ده یو همکار او یوه لاروۍ مېرمن ټپيان شول.

د PTM فعالان وایي چې دا ډزې د پاکستان امنیتي ځواکونو کړي.

پوتین روانه اوونۍ متحده عربي اماراتو او سعودي عربستان ته سفر کوي

د روسیې ولسمشر، ولادیمیرپوتین
د روسیې ولسمشر، ولادیمیرپوتین

ټاکل شوې چې د روسیې ولسمشر ولادیمیرپوتین روانه اوونۍ متحده عربي اماراتو او سعودي عربستان ته سفر وکړي.

د روسيې دولتي رسنیو ریا نووستي او تاس خبر ورکړی چې پوتین د یوه کاري سفر لپاره دې دوو هېوادونو ته ځي او په ترڅ کې به یې له سعودي ولیعهد محمد بن سلمان سره هم وګوري.

متحده عربي امارات اوس مهال د اقلیمي بدلون په اړه د نړیوال کنفرانس کوربه دی، خو معلومه نه ده چې پوتین به په دې غونډه کې ګډون وکړي که نه.

د غزې په جنوب کې د اسراییلو پوځي او هوایي عملیات روان دي

غزه کې یو شمېر اسراییلي ځواکونه
غزه کې یو شمېر اسراییلي ځواکونه

د غزې په جنوب کې د اسراییلي پوځ عملیات له ځمکې او هوا څخه روان دي.

اسراییل دا عملیات داسې مهال پیل کړي چې متحدوایالتونو او ملګروملتونو پرله پسې ترې غوښتي دي چې د ملکي وګړو خوندیتوب ته پام وکړي.

اسراییل ژمنه کړې چې دا عملیات به د حماس ډلې تر پوره ځپلو پورې روان وي.

دا ډله متحدایالات او اروپايي ټولنه تروریستي سازمان ګڼي.

امریکايي چارواکو په غزه کې د اسراییل او حماس ډلې ترمنځ د اوربند له پای ته رسېدو وروسته د زیاتېدونکو انساني تلفاتو او په دې اړه چې آیا له اسراییلو دا تمه لري که نه چې پر هغو سیمو دې حملې نه کوي چې د خوندي ځایونو په توګه په ګوته شوي په ځواب کې ویلي چې په دې اړه خبرې له وخته مخکې دي.

د منظور پښتین نیول کیدو ته د یو شمېر فعالانو او سیاستوالو غبرګونونه

له ارشیفه د پښتون ژغورنې غورځنګ د مشر منظور پښتین یو تصویر
له ارشیفه د پښتون ژغورنې غورځنګ د مشر منظور پښتین یو تصویر

یوشمېر فعالانو او سیاستوالو د پښتون ژغورنې غورځنګ د مشر منظور پښتین نیول کېدو ته غبرګونونه ښودلي دي.

د همدې غورځنګ فعال او سیاستوال علي وزیر پر خپله اېکس پاڼه یا پخواني ټویټر لیکلي، زندان او بریدونه به د دوی زغم نه یوازې دا چې کم نه کړي؛ بلکې زیات او پوخ به یې کړي.

د ښځو د تعلیم او حقونو فعالې او د پي.ټي.ایم غړې سنا اعجاز هم د پښتون نیول کېدل او پر هغه برید غندلی دی.

پښتین پرون دوشنبه د بلوچستان ایالت د پولیسو له خوا وروسته تر هغه ونیول شو چې پر موټریز کاروان یې ډزې وشوې او دی ترې روغ ووت.

د پښتون ژغورنې غورځنګ فعالان وایي، ډزې د پاکستان د امنیتي ځواکونو له خوا شوي چې د منظور پښتین یو همکار او یوه لاروۍ میرمن په کې ټپي شوې ده.

برېتانیا: د اوکراین جګړه کې شاوخوا ۷۰ زره روسي سرتېري وژل شوي

د روسیې د واګنر په نوم اجیر جنګیالي
د روسیې د واګنر په نوم اجیر جنګیالي

د برېتانیا د دفاع وزارت اټکل کوي چې د روسیې شاوخوا ۷۰ زره سرتېري له اوکرایني ځواکونو سره په جګړه کې وژل شوي دي.

دغه وزارت پرون دوشنبه په اوکراین کې د جګړې د تحولاتو په اړه خپل تازه راپور کې د روسانو د تلفاتو دغه شمېر اعلان کړی دی.

په راپور کې راغلي چې په وژل شویو روسانو کې شاوخوا ۵۰ زره یې د روسیې پوځیان او ۲۰ زره نور یې د واګنر ډلې اجیر جنګیالي دي.

د برېتانیا د دفاع وزارت په حواله د اوکراین په جګړه کې له ۱۸۰ زرو تر ۲۴۰ زرو پورې روسي پوځیان او د واګنر جنګیالي ټپیان شوي هم دي.

روسیې په دې اړه څه نه دي ویلي.

روسیه او اوکراین دواړه په جګړه کې د خپلو وژلو شویو سرتېرو په اړه څه نه وایي.

د غزې تازه حال؛ اسراییلو د حماس خلاف نوي عملیات پيل کړي

د غزې په یوه څنډه کې اسراییلي ټانکونه
د غزې په یوه څنډه کې اسراییلي ټانکونه

د اسراییل پوځ د حماس او نورو تندلارو ډلو پرضد د تهاجمي عملیاتو په ترڅ کې د غزې د تړانګې جنوب ته لسګونه ټانکونه لېږلي.

متحدایالتونه او اروپايي ټولنه حماس تروریستي ډله ګڼي.

د اسراییل پوځ پرون د غزې د جنوب په ځینو برخو کې له الوتکو څخه خبرپاڼې خپرې کړې چې په هغو کې یې خلکو ته خبرداری ورکړی و، چې له خپلو سیمو ووځي.

عیني شاهدانو فرانسپرس خبري اژانس ته ویلي چې پرون یې د غزې جنوبي ښار خان یونس ته نژدې اسراییلي ټانکونه، زغرګاډي او بولدوزرونه لیدلي دي.

دا له کورنیو بې ځایه شویو ډکه ده.

اسراییلي پوځ ویلي دي چې په خان یونس کې به د حماس او نورو تروریستي ډلو پرضد تهاجمي عملیات وکړي.

اسراییلو ژمنه کړې چې پر خپل قلمرو د حماس ډلې د اکتوبر د اوومې د برید په غبرګون کې به دا ډله له منځه وړي.

د غزې د روغتیا وزارت چې د حماس ډلې په لاس کې دی، ویلي چې د فلسطینیانو په قلمرو کې د اسراییلو په حملو کې نژدې ۱۵۹۰۰ کسان چې په سلو کې اویا یې ښځې او ماشومان دي وژل شوي دي.

همداراز د اسراییل پوځ پرون اعلان وکړ چې د اکتوبر له اوومې نېټې څخه یې ۴۰۱ سرتېري وژل شوي دي.

روسي ځواکونو د اوکراین په دونتسک کې د ځینو سیمو د بیا نیولو هڅې پیل کړي

اوکرایني ځواکونه د جګړې لومړۍ لیکه کې
اوکرایني ځواکونه د جګړې لومړۍ لیکه کې

د اوکراین په ختیځ کې چارواکي وايي چې روسي ځواکونو د دونېڅک سیمې پر اویدیفکا ښار د برید لپاره حملو ته زور ورکړی او په هره بیه چې وي غواړي، دا ښار کلابند او بیا یې ونیسي.

د اویدیفکا ښار د پوځي ادارې مشر ویتالي باراباش پرون دولتي رسنیو ته وویل چې اوکرایني ځواکونه له څو اونیو راهیسې له روسي پوځیانو سره په درنو جګړو کې ښکېل دي او دوی هڅه کوي چې د دې صنعتي ښار پر لور د روسي پوځیانو د پرمختګ مخه ونیسي.

هغه زیاتوي چې اوکرایني ځواکونه اوس مهال له یوه نوي اړخه د روسي سرتېرو له حملو سره مخامخ دي.

اوکرایني قوماندانانو ویلي چې روسي ځواکونو ته د پوځي عملیاتو پرمهال سخت تلفات اوښتي دي.

د اسراییل د پوځ ټینګار؛ د غزې له خان یونس ښارګوټي دې خلک ووځي

له خان یونس سیمې یو شمېر وتونکي خلک
له خان یونس سیمې یو شمېر وتونکي خلک

د اسراییل پوځ په غزه کې له خان یونس ښارګوټي د خلکو د وتو غوښتنه بیا تکرار کړه.

په دې ښارګوټي کې چې په غزه کې د اسراییل د جګړې له پیل راهیسې څواوونیو کې په لسګونو زره بې ځایه شویو فلسطینیانو پناه اخیستې خلکو ته یې د وتلو خبرداری داسې مهال ورکول کیږي چې اسراییل په غزه کې ځمکني عملیات او هوایي بریدونه زیات کړي دي.

اسراییل په غزه کې پوځي عملیات د یوه اوه ورځني اوربند له پای ته رسیدو وروسته پراخوي چې هدف یې د سخت دریځې حماس ډلې له منځه وړل ښودل شوې دي.

حماس چې امریکا او اروپایي ټولنه یې یوه ترهګره ډله بولي، پراسراییل د اوکتوبرپه اوومه له پراخ برید سره دغه جګړه چې د اسراییل او فلسطینانو ترمنځ څولسیزو کې ترټولو خونړۍ جګړه بلل کیږي، پیل کړه.

د دغې جګړې په ترڅ کې په زرګونو کسان وژل شوي او د محاصره شوې غزې د شاوخوا ۲،۳ ملیونه نفوس دوه پر درېیمه برخه وګړي له خپلو سیمو بې ځایه شوي دي.

د تاجکستان ولسمشر له نړیوال بانک څخه د کاسا زر پروژې د بېرته پیل غوښتنه وکړه

د تاجکستان ولسمشر، امام علي رحمان
د تاجکستان ولسمشر، امام علي رحمان

د تاجکستان د ولسمشر مطبوعاتي دفتر وایي چې ولسمشرامام رحمان د نړیوال بانک له مشراجی بنګا Ajay Banga سره په کتنه کې ټینګار وکړ چې اړتیا ده د برېښنا د لوړ ولتاژ لرونکې کاسا زر پروژې چارې بېرته پیل شي.

د روسیې د انترفاکس خبري آژانس د راپورله مخې، په دې کتنه کې چې په دوبۍ کې د ملګروملتونو د اقلیم د بدلون د ۲۸ م کنفرانس په څنډه کې ترسره شوه، ولسمشر رحمان ټینګار وکړ چې د دغې سترې پروژې چې د افغانستان له لارې د مرکزي آسیا د انرژۍ مارکیټ له جنوبي آسیا سره نښلوي، کار یې باید له سره پیل شي.

د راپورله مخې، د دغې پروژې په عملي کیدو سره به له قرغزستان او تاجکستان څخه ۱۳۰۰ مېګاواټه برېښنا افغانستان او پاکستان ته لېږدول کیږي.

د آسیا پراختیایي بانک ترڅنګ نړیوال بانک چې په افغانستان کې د سترو پروژو له مهمو تمویلوونکو ګڼل کېږي، د تېرکال په دوبي کې اعلان وکړ چې افغانستان او پاکستان ته د کاسا ۱۰۰۰ په نوم د برېښنا غځولو د پروژې له تمویل څخه لاس اخلي.

نور راوښيه

XS
SM
MD
LG