د لاسرسي لېنکونه

تازه خبر
یکشنبه ۲۶ لړم ۱۳۹۸ کابل ۰۴:۴۴

افغانستان

ولسمشر کرزی: د هېواد دښمنان د ملي بنسټونو له منځه وړل غواړي

افغان ولسمشر حامد کرزي په هېواد کې د افغان امنیتي ځواکونو په خلاف په حملو کې زیاتیدو ته په اشارې خبردارې ورکړ، چې د هېواد دښمنان د ملي بنسټونو له منځه وړل غواړي.

کرزي د افغان دولت درې ګونو قواو ترمنځ ګډې غونډې پرمهال وویل، چې د افغان پوځیانو د تلفاتو شمېر په دې وروستیو کې ډير شوي دي:

(هره ورځ له شلو تر پنځه ويشت تنو تلفات لرو، پر پوليسو او پوځيانو بريدونه زيات شوي دي.

د افغانستان دښمن پوهيږي چې دغه د افغانستان ساتنه کوي او بنسټ دي، نو دوي غواړي چې د دې خاورې امنيتي بنسټ کمزوري کړي.)

دا خبرداري په داسې وخت کې ورکول کيږي، چې په هېواد کې د امنیتي مسؤلیتونو د انتقال بهیر دریم پړاو په پلې کیدو دې، چې په بشپړیدو سره به یی د هېواد پنځه اویا سلنه نفوس د دوي تر پوښښ لاندې راشي.

د ورځې تازه خبرونه دلته ولولئ

د ثبات او همپالنې پلویانو فاریاب کې د رایو بیا شمیرنې مخه ونیوله

ارشیف

د ثبات او همپالنې د انتخاباتي ټيم پلویانو نن په فاریاب ولایت کې د رایو د بیا شمیرنې د بهیر مخه ونیوله.

د ټاکنو د خپلواک کمېسیون ولایتي رئیس محمد بشیر حسام نن آزادۍ راډیو ته وویل ټاکل شوې وه چې دا بهیر سهار مهال پیل شي خو د عبدالله عبدالله په مشرۍ د ثبات او همپالنې د ټیم د پلویانو د اعتراض له کبله وځنډېد:

هغه زیاته کړه: "د ثبات او همپالنې ناظران رانغلل، هغوی د تحصن خېمه وهلې او راغونډ شوي، مونږ موضوع له مرکز سره شریکه کړه او هغوی راته وویل چې د تشدد د مخنیوي لپاره دا بهیر بند کړئ."

په همدې حال کې د ټاکنو د خپلواک کمېسیون نن په یوه خبرپاڼه کې اعلان وکړ چې په کابل، کندهار، هرات، لوګر، هلمند، پکتیا، پکتیکا، خوست، نورستان، فراه، کندز، دایکندي، زابل او غور ولایتونو کې د رایو د بیا شمېرنې او تفتیش ځنډېدلی بهیر بیا پیل شوی خو په خبرپاڼه کې د فاریاب د پېښې یادونه نه ده شوې.

د رایو د بیا شمیرنې بهیر تېره اوونۍ د ثبات او همپالنې په ګډون د څو ټاکنیزو ډلو د مخالفت له کبله وځنډېد.

د ټاکنو د خپلواک کمېسیون مشرې پرون په کابل کې خبریالانو ته وویل چې دا پرېکړه یې له ټولو ټاکنیزو ډلو سره د موافقې پر اساس کړې ده.

چارواکي: کندهار کې ۷ وسله وال مخالفین وژل شوي

ارشیف

د کندهار مېوند کې ۱۷ وسله والو ته مرګ ژوبله اوښتې دغه پوځي عمليات د تېرو ۲۴ ساعتونو راهيسې د میوند ولسوالۍ د جګروم او جرخشک په سيمو کې د افغان ګډو ځواکونو لخوا ترسره شوي دي.

په کندهار کې د ۲۰۵ اتل قول اردو ویاند خواجه يحی علوي ازادي راديو ته وويل په ترسره شوو عملياتو کې ۷ وسله وال وژل شوي او ۱۰ نور ټپيان دي.

نوموړي وویل، د دغو پوځي عملياتو پر مهال د وسله والو ۳۰ پټنځايونه هم له منځه وړل شوي دي.

علوي په عملياتو کې د افغان ځواکونو د زیان يادونه ونه کړه.

طالبانو هم تر اوسه په دې اړه رسنیو ته څه نه دي ویلي.

کندهار کې د لاسي توکو او کورنیو محصولاتو نندارتون جوړیږي

ارشیف

د کلیو پراختیا وزارت وزارت وايي، ټاکل شوې چې را روانه اوونۍ په کندهار ولایت کې لاسي توکو او کورنیو محصولاتو ته د بازار موندنې په هدف یو نندارتون جوړ شي.

د دغه وزارت ویاند فریدون اژند نن ازادي راډیو ته وویل، دغه نندارتون به درې ورځې دوام وکړي او د افغانستان له ۷ زونونو نه به په سل غرفو کې بېلا بېل توکي په کې نندارې ته کېښودل شي.

ښاغلي اژند زیاتوي، چې په دغه نندارتون کې به تر ډېره ښځینه لاسي توکي نندارې ته وړاندې شي.

د کلیو پراختیا وزارت وايي، د راتلونکې میلادي میاشتې په سر کې دېته ورته نندارتون په کابل کې هم جوړیږي.

په ۱۵ ولایتونو کې د اوبو د ۵۸ بندونو د جوړېدو چارې پیلیږي

ارشیف

د اوبو او انرژۍ وزارت وايي، چې په نږدې راتلونکې کې به په ۱۵ ولایتونو کې ۵۸ د اوبو د وړو بندونو د جوړېدو چارې پیل شي.

د دغه وزارت ویاندې مژدې بهنود نن ازادي راډیو ته وویل، د دغو بندونو ټول لګښت ۲۲۷ میلیونه افغانۍ کیږي، چې په بېلابېلو ولایتونو کې جوړیږي.

هغې زیاته کړه: "د چیک ډیمونو له جوړېدا هدف له موسمي سیلابونو نه مخنیوی، د اوبو سم مدیریت، د مځکې لاندې اوبو سطحې لوړوالی، کرنیزو او څښاک د اوبو چمتوالی او له ۱۳ زره هکتاره نه زیاته ځمکه تر اوبو لاندې کېږي."

د اوبو او انرژۍ وزارت وايي، په پام کې ده چې په نږدې راتلونکي کې د ۳۳۴ نورو بندونو د تړونونو چارې هم چې ۵۶ میلیونه امریکايي ډالره پرې لګښت راځي هم ورستۍ شي.

د دغو بندونو د جوړولو لګښت ټول له دولتي بودجې ورکول کېږي.

افغانستان او ویسټ انډیز کرکټ لوبډلې نن وروستۍ شل اوره لوبه کوي

د افغانستان او ویسټ انډیز ترمنځ دا مسابقې د هند په لکنهو ښار کې روانې دي.

د افغانستان د کرکټ ملي لوبډله نن، د نوامبر په ۱۷مه ، د ویسټ انډیز د کرکټ له لوبډلې سره د شل اورونو کرکټ درېیمه او وروستۍ مسابقه لري.

د ویسټ انډیز او افغانستان د کرکټ د لوبډلو ترمنځ د شل او پنځوسو اورونو کرکټ سیالۍ د نوامبر په شپږمه پېل شوې.

له هغه راهیسې، افغانستان درې د پنځوسو اورونو مسابقې ویسټ انډیز ته ور وبایللې.

د افغانستان لوبډلې یوه د شلو اورونو سیالي ویسټ انډیز ته ور بایللې ده.

خو په دوهمه شل اوریزه مسابقه کې چې تېره شپه وه، د افغانستان د کرکټ ملي لوبډلې ویسټ انډیز ته په ۴۱ مڼډو ماته ورکړه.

د افغانستان او ویسټ انډیز ترمنځ دا مسابقې د هند په لکنهو ښار کې روانې دي.

د نوامبر په ۲۷مه د دواړو ټسټ مچ دی.

رسولي: بګرام زندان ته پر تلوونکو څارنوالانو برید شوی

د لویې څارنوالۍ ویاند جمشید رسولي

د افغانستان لویې څارنوالۍ ویلي، هغه ۴ څارنوالان چې د شمالي په قره باغ کې وویشتل شول، د بګرام زندان ته روان وو.

دا خبره د لویې څارنوالۍ ویاند، جمشېد رسولي پرون د اسوشیټېډپرس خبري اژانس ته کړې ده.

د بګرام په توقیف ځای کې د انس حقاني په شمول د وسله والو طالبانو مهم وګړي بندیان دي.

په پرونۍ حمله کې دوه څارنوالان وژل شوي او دوه زخمیان دي.

د زخمیانو د وضعیت په اړه معلومات نه دي خپاره شوي.

خو د افغانستان د ولسمشر ویاند صدیق صدیقي پرون ټویټ وکړ چې انس حقاني او ملګري يې د بګرام په توقیف ځاي کې دي، حکومت یې د تبادلې مسئله څېړي او د ملي ګټو پر اساس به پرېکړه کوي.

دا لا نه ده څرګنده شوې چې د بګرام زندان ته پر لاره پر څارنوالانو خونړۍ حمله له دې مسئلې سره تړاو لري که نه.

ولسمشر غني تېره اونۍ وویل چې انس حقاني او دوه نور ملګري به یې د افغانستان د امریکایي پوهنتون له دوو استادانو سره تبادله شي.

خو اسوشیټېډپرس پرون د وسله والو طالبانو د ویاند ذبیح الله مجاهد په حواله ویلي چې هغوی نه پوهېږي چې انس حقاني او دوه نور کسان ولي نه دي خوشې شوي.

چارواکو د غیر قانوني کانونو کیندنې مخنیوي لپاره له پروګرامونو خبر ورکړ

ارشیف

د افغانستان د کانونو او پترولیم وزارت د ولسمشر له لارښونې سره سم د غیر قانوني کانونو د کیندنې د مخینوي لپاره پروګرامونه تر لاسه لاندې لري.

د دغه وزارت ویاند عبدالقدیر مطفي نن د دغه څرګندونو تر څنګ ازادي راډيو ته وویل، چې دغه اقدام به کانونو او پترولیم وزارت ته په یوه عایداتي سرچینې بدل شي.

مطفي زیاته کړه: "زموږ اساسي هدف دا دی چې له دې وروسته دغه وزارت د دولت پر یوې عایداتي سرچینې بدل شي او تر ډېره زمونږ تمرکز په هغو پروژو دی چې هغه مونږ هدف ته رسوي."
د ښاغلي مطفي په وینا د کانونو د استخراج د یو شمېر تړونونو د ارزولو او بیا غور بهیر هم پیل کړی دی.

د یادونې ده چې مخکې له دې د افغانستان د یو شمېر کانونو د غیر فني او د زورواکو او وسله والو مخالفینو له خوا یې د غیر قانوني کیندنې په اړه راپورونه ورکړل شوي دي.

چارواکي: د ۱۳۹۹ لمریز مالي کال بودجې سند ملي شورا ته استول شوی

ارشیف

د افغانستان مالیي وزارت د ۱۳۹۹ مالي کال د بودجې سند د تصویب لپاره ملي شورا ته استولی.

د دغه وزارت ویاند شعمروز مسجدي نن ازادي راډیو ته وویل، د راتلونکي مالي کال په پراختیايي بودجه کې د تېر په پرتله لس فیصده کموالی راغلی دی.

ښاغلي مسجدي زیاتوي، چې د ۱۳۹۹ مالي کال ټوله بودجه ۴۲۸ میلیارده افغانۍ تخمین شوې ده.

هغه زیاته کړه: "موږ له استماعیه جلسو، ولایتونو ته له سفرونو او د افغانستان اقتصادي پروګرامونو ته په پام سره دغه مسوده چمتو کړې، چې ۲۸۹ میلیارده افغانۍ عادي بودجه چې معاشونه او دولتي خدمتونو کې ورنه استفاده کیږي، او ۱۳۹ میلیارده پراختيايي بودجه مو په پام کې نیولې."

د مالیې وزارت تمه ښيي، چې ملي شورا د نوي مالي کال له پيل وړاندې دغه سند تصویب کړي، څو د راتلونکي مالي کال پروګرامونه له بودجې سره سم پیل شي.

افغانستان او ویسټ انډیز نن د شل اورونو کرکټ لوبه کوي

د ویسټ انډیز او افغانستان د کرکټ د لوبډلو ترمنځ سیالۍ د نوامبر په ښپږمه پېل شوې

د افغانستان د کرکټ ملي لوبډله نن د ویسټ انډیز د کرکټ له لوبډلې سره د شل اورونو کرکټ مسابقه لري.

د کرکټ بورد د رسنیو مسئول، فرید هوتک تېره شپه ازادي راډیوته وویل: "د شل اوره کرکټ د دویمې سیالۍ کوربه افغانستان دی، دریمه شل اوره مسابقه به سبا وي، افغانانو ځانونه ښه ورته تیار کړي دي."

د ویسټ انډیز او افغانستان د کرکټ د لوبډلو ترمنځ د شل او پنځوسو اورونو کرکټ سیالۍ د نوامبر په ښپږمه پېل شوې.

له هغه راهیسې، افغانستان درې د پنځوسو اورونو او یوه د شلو اورونو سیالي ویسټ انډیز ته ور بایللې دي.

دا مسابقې د هند په لکنهو ښار کې روانې دي.

د نوامبر په ۲۷مه د دواړو ترمنځ د ټسټ لوبه ده.

چارواکي: د سالنګونو لاره یوازې د کوچنیو موټرو ته خلاصه ده

ارشیف: د سالنګ لویه لار

د سالنګونو د څارنې او ساتنې اداره وايي چې نن شنبه د نومبر ۱۶مه، د سالنګ لار کوچنیو موټرو ته خلاصه ده.

خو لوی موټرلا هم پر دې لار دتګ راتګ اجازه نه لري.

په سالنګونو کې د واورې د سخت اورښت له امله د سالنګ لار د مسافرو موټرو ته هم بنده شوې وه.

خو د سالنګونو د ساتنې او څارنې د ادارې مشر ضمیر امرخېل پرون، د نوامبر په ۱۵مه، ازادي راډیو ته وویل چې د سالنګ لار د مسافر وړونکو موټرو لپاره خلاصه ده.

ضمیر امرخېل: "د شنبې په ورځ نن د سالنګ لار مسافر وړونکو موټرو ته خلاصه ده خو ټېلر او لوی موټر نه شي تېرېدلی، مسافر وړونکي موټر هم یوازې په دې شرط چې ټیرونو ته یې ځنځيرونه اچولي وي او په معین سرعت د تګ اجازه لري."

ضمیر امرخېل وویل چې په سالنګونوکې ۵۳ سانتي متره واوره شوې ده.

خوست کې د وزیرستان کډوال له حکومته مرستې غواړي

ارشیف

په خوست کې د وزیرستان پراته کډوال له حکومته مرستې غواړي.

د هغوی یو شمېر مشرانو پرون د ازادي راډیو خبریال ته وویل چې د ژمي له را رسېدو سره په بېړني ډول خوراکي توکو ته اړتیا لري.

د وزیرستان یو کډوال احمد افغان: "ملګرو ملتونو به مخکې، موږ ته په ژمي کې ۲۰۰ ډالر د لرګیو لپاره راکول، همدا رنګه به یې دال، غوړي او نور خوراکي مواد را رسول< خو دلته ساړه ډير دي، دلته کمپلو، بسترو او نورو موادو ته اړتیا لرو، سخت حالت دی."

د ازادي راډیو دخبریال په حواله، د کډوالو لپاره د ملګروملتونو د مرستې ادارې په خوست کې له مېشتو وزیرو سره مرستي د پخوا په پرتله ډېر کم کړي او ښايي په راتلونکو څو میاشتو کې مرستي پرې بند کړي.

په خوست کې د مېشتو کډوالو مشران وايي چې د وزیرو لږترلږه ۱۵ زره کورنۍ له وزیرستانه د امنیتي ستونزو له امله خوست ته ور کډه شوې دي.

د تخار د ورسج ولسوالۍ امنیه قومندان درېیو ساتونکو سره بغلان کې ووژل شو

د بغلان د پولیسو ویاند احمد جاوېد بشارت ازادي راډیو ته وویل، پر حکیمي هغه مهال برید وشو چې د بغلان ولایت له جلګې ولسوالۍ څخه د تخار په ورسج ولسوالۍ کې خپل کار ته پر لاره و.

د افغانستان په شمال ختیځ کې چارواکي وايي، د تخار د ورسج ولسوالۍ امنیه قومندان محمد افضل حکیمي له خپلو درېیو ساتونکو سره نن سهار د بغلان ولایت په پلفي کوتل کې وژل شوی دی.

د بغلان د پولیسو ویاند احمد جاوېد بشارت ازادي راډیو ته وویل، پر حکیمي هغه مهال برید وشو چې د بغلان ولایت له جلګې ولسوالۍ څخه د تخار په ورسج ولسوالۍ کې خپل کار ته پر لاره و.

بشارت بریدګر د حکومت وسلوال مخالفان بللي دي. په برید کې پر حکیمي سربیره د هغه درې ساتونکي هم وژل شوي دي.

شپېته کلن محمد افضل حکیمي د بغلان په جلګه ولسوالۍ کې پخوانی جهادي قومندان و او د څه وخت لپاره یې په دې ولسوالۍ کې د امنیې قومندان په توګه هم دنده ترسره کړې وه.

اندرابي: داعش ډلې افغانستان کې ماته خوړلې ده

د کورنیو چارو وزارت سرپرست مسعود اندرابي

د ننګرهار ولایت اچین ولسوالي او یوشمېر نورې سیمې د داعش ډلې ځالې ګڼل کېدې، خو د کورنیو چارو سرپرست وزیر مسعود اندرابي د یکشنبې په ورځ وویل چې داعش ډلې په افغانستان کې ماتې خوړلې ده.

د ننګرهار ولایت په شېرزاد ولسوالۍ کې د طالبانو اړوند یو زندان او یو کلینیک د دولتي ځواکونو په عملیاتو کې ویجاړ شوي دي.

د ننګرهار د والي ویاند عطاوالله خوږیاڼي ازادي راډیو ته وویل: "د عملیاتو پرمهال په زندان او کلینیک کې څوک نه و، نو ځکه څوک نیول شوي یا ازاد شوي نه دي، خو مخکې هغه کسان چې دوی نیول یا به یې ځورول له همدې زندانه به یې کار اخیست."

طالبانو تراوسه په دې اړه څه نه دي ویلي.

د ښاغلي خوږیاڼي په خبره، په شېرزاد ولسوالۍ کې د طالبانو پرضد عملیات له دوو اونیو راهیسې روان دي.

سټولټنبرګ: ناټو د افغانستان د امنیتي ځواکونو مرستې ته دوام ورکوي

سټولټنبرګ داسې مهال دا خبرې وکړې چې کې په داسې حال کې چې د امریکا د بهرنیوچارو وزیر مایک پومپیو په څنګ کې ولاړ و.

د ناټو عمومي منشي وايي، دغه تړون د افغانستان له دفاعي او امنیتي ځواکونو سره مرسته کوي او روزي یې، ترڅو دا خبره یقیني کړي چې د اسلامي دولت (داعش) ډله بیا هېڅکله په افغانستان کې ځاله نه کوي.

یینس سټولټنبرګ پرون (نومبر ۱۴مه) د داعش ډلې پرضد ائتلاف کې د شاملو ۳۰ هېوادونو د چارواکو په ګډون په واشنګټن کې په یوه غونډه کې وویل، ناټو او متحده ایالاتو موافقه کړې چې د دوستو هېوادونو د پوځي ځواکونو د وړتیا لوړولو لپاره به هڅو ته دوام ورکوي، ترڅو د تروریزم پرضد مبارزه کې پیاوړي شي.

د ناټو عمومي منشي د داعش ډلې د مشر ابوبکرالبغدادي وژل کېدل یو مهم پرمختګ وباله او زیاته یې کړه چې دا ډله به هغه ځای بیا هېڅکله ترلاسه نه کړي چې په سوریه او عراق کې له ماتې وروسته یې په افغانستان کې ځان ته موندلی و.

په خوست کې چاودنې یو ماشوم وژلی او دوه کسان‌یې ټپیان کړي

د افغانستان په جنوب ختیځ ولایت خوست کې سیمه‌ییز چارواکي وايي، د صبریو او یعقوبیو ولسوالۍ کې د ماین چاودنې یو ماشوم وژلی او دوه کسان‌یې ټپیان کړي دي.

د خوست د صبریو او یعقوبیو ولسوال عبدالحی ځاځي ازادي راډیو ته وویل چې چاودنه نن سهار (عقرب ۲۳مه) د دې ولسوالۍ په یوه بازار کې شوې ده.

هغه وویل: "د سهار لسو بجو شااوخوا یو بم چې په موټرسایکل کې ځای پر ځای شوی وو، د ملکي خلکو له موټر سره چاودلی دی. په دې پېښه کې دوه ملکيان ټپیان دي چې د درملنې لپاره روغتون ته لېږل شوي او یو نهه کلن ماشوم وژل شوی دی."

تر اوسه چا د دې چاودنې مسؤلیت نه‌دی منلی.​

ایران کې د موټرو ټکر کې ۲۸ افغان کډوال مړه شوي

ارشیف

د ایران په جنوب ختیځ کې د دوو موټرو د ټکر له کبله ۲۸ افغان کډوال مړه شوي دي.

د ایران نیمه دولتي خبري اژانس ایلنا راپور ورکړی چې ۲۱ نور کسان په دې پېښه کې ټپیان شوي دي.

دا پېښه نن سهار وختي (عقرب ۲۲مه) د سیستان او بلوچستان ولایت په خاش ښارګوټي کې شوې ده.

دا سیمه تر ډېره په غیر قانوني ډول د افغان کډوالو د قاچاق لپاره کارول کېږي.

د ناخوندي نقلیه وسایطو، کمزورې بېړنیو خدماتو او هم د ټرافیکي قوانینو د نه‌مراعاتولو له کبله ایران د نړۍ په سطح تر ټولو بده ټرافیکي سابقه لري.

په ایران کې هر کال په اوسط ډول شااوخوا ۱۷۰۰۰ کسان ټرافیکي پېښو کې مړه کېږي.

"د لومړنیو پایلو په اعلان کې ځنډ د ټاکنو کمېسیون نیمګړتیا نه‌ده"

د ټاکنو کمېسیون یوه ویاند ذبیح الله سادات

د افغانستان د انتخاباتو خپلواک کمېسیون د ولسمشرۍ انتخاباتو د لومړنیو پایلو د ځنډ پړه د یو شمېر نوماندانو، له کمېسیون سره پر همکارو کمپنیو او ځینو نورو بنسټونو اچوي.

د دغه کمېسیون یوه ویاند ذبیح‌الله سادات نن (عقرب ۲۳مه) ازادي راډیو ته وویل: "د خلکو اندېښنې پر ځای دي او حق لري چې انتقاد وکړي، خو بل اړخ ته که وګورئ، موږ په دې انتخاباتو کې ټکنالوژي وکاروله د دې لپاره اړونده کمپنۍ معرفي شوې وه. که هغه کمپنۍ خپل مسؤلیتونه پر وخت نه‌شي ترسره کولای، یا هم د کاندیدانو له لوري پوره همکاري نه‌کېږي او د پروسې پر وړاندې خنډ جوړېږي؛ نو دا د کمېسیون نیمګړتیا نه، بلکې د هغو نهادونو نیمګړتیا ده چې په لوی لاس غواړي دا پروسه نوره هم وځنډېږي."

یو شمېر کابل ښاریانو اندېښنه وښوده چې د انتخاباتو کمېسیون ورځ تر بلې د پایلو ځنډولو سره د خلکو باور زیانمنوي.

دا دوهم ځل دی چې د ولسمشرۍ انتخاباتو د لومړنیو پایلو اعلان ځنډېږي .

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

دغه کمېسیون پرون ناوخته وویل چې د تخنیکي ستونزو او نورو مسایلو له کبله نه‌شي کولای پر ټاکلي وخت دا پایلې اعلان کړي.

د ۱۳۹۹ مالي کال بودجه د افغانستان کابینې تصویب کړې

د افغانستان د مالیې وزارت وايي، د راتلونکي ۱۳۹۹ مالي کال د بودجې مسوده جوړه او د کابینې له‌خوا تأیيد شوې.

د دې وزارت ویاند شمعروز خان مسجدي د پنجشنبې په ورځ (عقرب ۲۳مه) ازادي راډيو ته وویل، د ۱۳۹۹ مالي کال ټوله بودجه ۴۲۸ میلیارده او ۳۸۰ میلیونه افغانۍ ده.

د ښاغلي مسجدي په خبره، په دې کې ۲۸۹ میلیارده‌یې عادي او ۱۳۹ میلیارده او ۲۷۹ میلیونه‌یې پراختیايي بودجه ده.

هغه وویل، دغه بودجه متوازنه، ځواب ویونکې او د ټولنې د لومړیتوبونو په نظر کې نیولو سره ترتیب شوې ده.

ټاکل شوې دغه بودجه نن یا راتلونکې اوونۍ مشرانو جرګې ته واستول شي.

د ولسمشرۍ ټاکنو د لومړنیو پایلو د ځنډ په اړه نن د ټاکنو کمېسیون معلومات ورکوي

په پام کې وه دغه پایلې د میزان په ۲۷ اعلان شي، خو د تخنیکي ستونزو له امله د عقرب ۲۳مې ته وځنډېدې.

د افغانستان د ټاکنو خپلواک کمېسیون به نن د نومبر په ۱۴مه، د جمهوري ریاست د ټاکنو د ابتدايي پایلو په اعلان کې د بیا ځنډ په اړه معلومات وړاندې کړي.

د دغو ټاکنو لومړنۍ پایلې باید نن اعلان شوې وی، خو د ټاکنو خپلواک کمېسیون پرون اعلان وکړ چې د ابتدایي پایلو اعلان‌یې ځنډولی دی.

د دغه کمېسون یوه ویاند عبدالعزیز ابراهیمي پرون رسنیو ته وویل، د تخنیکي ستونزو او نورو مسئلو له امله دا کار له ټاکلي مهالوېش سره سم نه‌شي کېدلائ.

دا دوهم وار دی چې د میزان ۶مې ولسمشرۍ انتخاباتو لومړنۍ پایلې ځنډېږي.

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

د ټاکنو کمېسون مسئولینو ژمنه کړې چې نن (عقرب ۲۳مه) به د دې ځنډ په اړه جزئیات له خبریالانو سره شریک کړي.

د انتخاباتو خپلواک کمېسیون: د رأیو بیاشمېرنه ودرول شوه

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

د افغانستان د انتخاباتو خپلواک کمېسیون وايي، د ولسمشریزو انتخاباتو د رأیو د بیاشمېرنې او تفتیش بهیر ودرول شو.

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

ښاغلی ابراهیمي زیاتوي چې دغه بهیر د کمېسیون تر راتلونکي هدایت درېدلی، د هغو محلونو د تفتیش او بیاشمېرنې بهیر چې د رأیو صندوقونه‌یې پرانیستي دي او د تفتیش او څېړنې لاندې دي، له دغه امر مستثنی دی.

د انتخاباتي شکایتونو کمېسیون هم د دغه بهیر له درېدو هرکلی کوي.

د دغه کمېسیون کمېشنر او ویاند محمد قاسم الیاسي ازادي راډیو ته وویل، د ولسمشرۍ انتخاباتو د رأیو د تفتیش او بیاشمېرنې بهیر باید له یو یا دوو ورځو زیات وخت ونه‌نیسي.

طالبان: خوندي ځای ته د طالب بندیانو رسېدو پورې برمته استادان نه‌خوشې کوو

ذبیح‌الله مجاهد چې ځان د طالبانو ویاند بولي ازادي راډیو ته په یوه استولي پیغام کې دا خبره کړې ده.

طالبان وایي تر هغه به د افغانستان-امریکايي پوهنتون دوه تښتول شوي استادان خوشې نه‌کړي چې انس حقاني او دوه نور طالبان چې پرون‌یې د افغانستان حکومت د خوشې کولو اعلان وکړ، یوه خوندي ځای ته انتقال شوي نه‌وي.

ذبیح‌الله مجاهد چې ځان د طالبانو ویاند بولي نن (عقرب ۲۲مه) ازادي راډیو ته په یوه استولي پیغام کې دا خبره کړې ده.

ولسمشر محمد اشرف غني پرون د امریکايي پوهنتون د دغو استادانو د خوشې کولو په بدل کې له بګرام زندان څخه د انس حقاني او د طالبانو ډلې دوو نورو غړو عبدالرشید عمري او مالي خان د ازادولو اعلان وکړ.

ښاغلي غني وویل، دغه پرېکړه‌یې له نړیوالو شریکانو او په ځانګړې توګه له امریکا سره په مشوره او له طالبانو سره د سولې مخامخ خبرو پیلېدو په هدف کړې ده.

تر اوسه څرګنده نه‌ده چې د طالبانو دغه بندیان اوس چېرته دي، خو تېره ورځ یوې سرچینې چې نه‌یې غوښتل نوم‌یې واخیستل شي، ازادي راډیو ته وویل چې دا کسان د بګرام له زندان څخه لېږدول شوي دي.​

ننګرهار کې د 'کاسا-۱۰۰۰' پروژې پر لاره د ماينونو شنډول پيل شوي

ارشیف

په ننګرهار کې د 'کاسا-١٠٠٠' پروژې په مسير کې د ماينونو د موندلو او شنډولو چارې پيل شوې.

د والي وياند پرون ازادي راډيو ته وويل، ماينونو د موندلو او شنډولو کار د جلال‌اباد له اتمې ناحيې پيل شو، په کامې، ګوشتې، لعلپورې او مومندرې ولسواليو کې به هم ترسره کېږي.

عطاالله خوګياڼي وويل، په دې ډول به د 'کاسا-١٠٠٠' په نوم د برښنا د لېږد پروژې د ټولو ټاورونو يا ستنو ساحې له ماينونو پاکې شي.

هغه زیاته کړه: "د دې پروسې په ترڅ کې به د ټولو ټاورونو ځمکه وپلټل شي، څو د ماينونو د موجوديت په صورت کې ماينونه له‌منځه يووړل شي او په راتلونکي کې د کار پر مهال کومه بده پېښه ونه‌شي."

د ننګرهار چارواکي وايي داسې اندېښنې شته چې د 'کاسا-١٠٠٠' پروژې په مسير کې به له پخوانيو جګړو ماينونه پاتې وي.

'کاسا-١٠٠٠' د منځنۍ او جنوبي اسيا په سطحه يوه مهمه پروژه ګڼل کېږي چې په مرسته به‌يې د افغانستان له طريقه د قرغزستان او تاجکستان ١٣٠٠ مېګاواټه برښنا پاکستان ته انتقالېږي.

افغانستان به د ٣٠٠ مېګاواټه برښنا د ترلاسه کولو ترڅنګ د ټرانزيټ له درکه له دې پروژې په کال کې له ٤٠ تر ٦٠ میليونه ډالره عوايد ترلاسه کړي.

چارواکي: ارزګان کې طالبانو د روغتيا وزارت د پروژې دوه کارکوونکي وژلي

عبادي وويل، وسله‌والو طالبانو دواړه برمته شوي کسان وژلي دي.

د ارزګان چارواکي وايي، وسله‌والو طالبانو د روغتيا وزارت د يوې پروژې دوه کارکوونکي پرون وژلي دي.

دغه کسان تېره يکشنبه د يوه کلینيک په ساختماني چارو بوخت وو چې وسله‌والو طالبانو وتښتول.

د ارزګان د والي وياند زړګي عبادي پرون ازادي راډيو ته وويل، وسله‌والو طالبانو دواړه برمته شوي کسان وژلي دي.

هغه زیاته کړه: "دوه کسان چې د روغتيا وزارت پروژه تطبيقوله چې کلینيک و، طالبانو له ځان سره يووړل، بدبختانه چې دواړه کسان‌يې شهيدان کړي دي."

د والي وياند وايي د عصمت‌الله او عبدالباري په نوم دغه دوه کسان د ترينکوټ ښار اړوند له ده‌يک سيمې برمته شوي وو.

وسله‌والو طالبانو د دې پېښې په اړه څه نه‌دي ويلي.

دا هم څرګنده نه‌ده چې د دغو کسانو د خوشې کېدو په بدل کې برمته کوونکو کومه غوښتنه مطرح کړې وه؟

د ټاکنو کمېسیون د ولسمشرۍ ټاکنو لومړنیو پایلو د ممکنه ځنډ خبر ورکړ

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

د افغانستان د ټاکنو خپلواک کمېسيون ​وايي فکر نه‌کوي چې وکړاى شي د ټاکنو لومړۍ نتيجې د لړم/ عقرب پر ٢٣مه اعلان کړي.

د دغه کمېسيون يوه وياند ذبيح سادات تېره شپه ازادي راډيو ته وويل، د ځينو ستونزو له کبله ښايي دغه اعلان وځنډېږي.

سادات زیاته کړه: "ستونزمنه به وي که موږ د ولسمشرۍ ټاکنو لومړنۍ نتيجه پر ٢٣مه نېټه اعلان کړو، خو کمېسيون بيا هم خپله نهايي هڅه کوي، څرنګه چې په ځينو ولايتونو کې مزاحمتونه ايجاد شول، اوس به دغه اعلان موږ ته ستونزمن وي."

د ټاکنو خپلواک کمېسيون وايي، درمالوګ کمپنۍ د ٥ ورځو په ځنډ د رأی ورکوونکو معلومات ورسره شريک کړي دي.

کمېسيون وايي، د ځينو کانديدانو ډلو په څو ولايتونو کې د رأيو د بياشمېرنې او تفتيش د پروسې پر وړاندې خنډونه جوړ کړي دي.

د ټاکنو خپلواک کمېسيون وايي، په ٤ ولايتونو کې د رأيو د بياشمېرنې او تفتيش پروسه ختمه شوې ده، خو په ٩ ولايتونو کې دغه پروسه پيل شوې نه‌ده.

په پام کې ده له اتو زرو د ډېرو صندوقونو رأیې له سره وشمېرل شي، ترڅو هغه رأیې ترې بېلې شي چې د رأی ورکوونکو بایومټریک معلومات‌یې نه‌دي ثبت شوي.

لوګر کې د بهرنیو ځواکونو پر قطار ځانمرګی برید شوی

د لوګر مرکز پل علم انځور

د لوګر امنیتي چارواکي وایي، نن له غرمې وړاندې د پل علم اړوند د شېنګ کمپ په سیمه کې د بهرنیو ځواکونو پر قطار ځانمرګی برید شوی.

په لوګر کې د ملي اردو د څلورمې پلې لوا قوماندان عبدالمتین حسن خېل ازادي راډیو ته وویل، چې په یاد برید کې د ځانمرګي بریدګر له وژل کېدو پرته نورو ملکي او نظامي کسانو ته تلفات نه دي اوښتي.

تر اوسه وسله والو طالبانو او کومې بلې مخالفې ډلې د دې برید مسؤلیت او په برید کې اوښتو تلفاتو په اړه رسنیو ته څه نه دي ویلي.

نور راوښيه

XS
SM
MD
LG