د لاسرسي لېنکونه

تازه خبر
پنجشنبه ۳۰ لړم ۱۳۹۸ کابل ۰۸:۲۱

افغانستان

یوناما په افغانستان کې د ښځو لپاره د امن ځایونو د شتون ملاتړ وکړ

په افغانستان کې د ملګرو ملتونو د مرستو دفتر (یوناما) په دې هېواد کې د ښځو لپاره د امن ځایونو د شتون ملاتړ وکړ.

یوناما د سې شنبې په ورځ په یوې اعلامیې کې وویل، د ښځو او انجونو لپاره د امنو کورونو او د هغوي د مصونیت او ساتنې پوره ملاتړ کوي.

یوناما وایي، دا امن ځایونه یا کورونه د ښځو پر وړاندې د تاوتریخوالي په له منځه تلو کې مهمه ونډه لري.

دا په داسې حال کې ده، چې د افغانستان د عدلیې وزیر حبیب الله غالب د یکشنبې په ورځ، دا ډول کورونه د ښځو لپاره د فحشا او بداخلاقۍ ځایونه بللې وو.

د ښځو د چارو وزارت په دې امن ځایونو کې د هر ډول اخلاقې فساد تورونه په کلکه رد کړي دي.

د ورځې تازه خبرونه دلته ولولئ

د افغانستان حکومتي مشرانو د احمد وحید مژده وژنه غندلې

ښاغلی مژده پرون ماښام (عقرب ۲۹مه) د کابل په دارالامان سیمه کې په داسې حال کې چې جومات ته پر لاره وو، دوو موټرسایل سپرو له خوا په ډزو ووژل شو.

د افغانستان ولسمشر محمد اشرف غني او اجرائیه رئیس عبدالله عبدالله د لیکوال او سیاسي کارپوه احمد وحید مژده وژل غندلي. ښاغلی مژده پرون (عقرب ۲۹مه) په کابل ښار کې د وسله والو کسانو په ډزو ووژل شو.

د ارګ په خبرپاڼه کې چې نن له غرمې وروسته خپره شوې، ولسمشر محمد اشرف غني امنیتي چارواکو او عدلي ادارو ته سپارښتنه کړې چې د مژده وژنه وڅېړي او عاملین یې مجازات کړي.

اجرائیه رئيس عبدالله عبدالله پرون، د هغه پر وژل کېدو خواشیني څرګنده کړه او هغه یې یو تروریسي عمل وباله.

ښاغلی مژده پرون ماښام د کابل په دارالامان سیمه کې په داسې حال کې چې جومات ته پر لاره وو، دوو موټرسایل سپرو پرې برید وکړ. بریدګر د هغه تر وژلو وروسته له سیمې وتښتېدل.

احمد وحید مژده سیاسي کارپوه او د طالبانو د رژیم پخوانی چارواکی و. د طالبانو له رژیم ړنګېدو راهیسې نوموړي په کابل کې ژوند کاوه.

هغه به ترډېره په رسنیو کې د دولت د منتقدینو په توګه راڅرګندېده او په افغانستان کې د بهرنیو پوځیانو د حضور مخالف و. پر هغه د طالبانو د نظر پلوی شخص ګڼل کېده.

طالبانو هم په یوه اعلامیه کې د ښاغلي مژده وژنه غندلې او هغه یې د استخباراتي کړیو کار بللی.

طالب ویاند ذبیح الله مجاهد په یوې اعلامیې کې ویلي چې وحیده مژده د یو پیاوړي اسلامي نظام د ټینګښت لپاره مبارزه کوله او ادعا یې کړې چې په دې لاره کې یې هڅې د وژنې سبب شوي دي.

افغانستان کې په ټولنیزو رسنیو کې ګڼو ژورنالیستانو، مدني فعالانو او سیاستوالو هم د وحید مژده وژنه غندلې ده.

تر اوسه هیچا پر نوموړې د برید مسولیت پر غاړه نه دی اخیستی.

سټولټنبرګ: د افغانستان په ټاکنو کې هېڅکله مداخله نه کوو

د ناټو تړون عمومي منشي ینس سټولټنبرګ

د ناټو تړون عمومي منشي په افغانستان کې د ډیموکراتیک حق ترلاسه کولو لپاره په تېرو ولسمشریزو ټاکنو کې د خلکو ګډون ستایلی او ویلي یې دي چې دوی هېڅکله په ټاکنو کې مداخله نه کوي.

د ناټو عمومي منشي ینس سټولټنبرګ پرون، د نومبر په ۲۰مه، خبریالانو ته په افغانستان کې د ټاکنو په تړاو د روانو لانجو په اړه وویل چې دوی له افغانستان سره همکارۍ ته متعهد دي، د ټاکنو لپاره یې د امنیت په تامین کې همکاري کړې خو په ټاکنیزو چارو کې لاسوهنه نه شي کولای.

ښاغلي سټولټنبرګ دا مهمه وګڼله چې انتخاباتي کمېسونونه د رأیو د تفتیش او بیا شمېرنې بهیر بشپړ کړي او پایلې اعلان کړي.

د افغانستان د ټاکنو خپلواک کمېسون ویلي چې د راییو د تفتیش او بیا شمېرنې بهیر به د دې اونۍ تر پایه بشپړ کړي او راتلونکې اونۍ به د ټاکنو ابتدايي پایلې اعلان کړي.

حمدالله محب د ګډو ګټو لرونکو هېوادونو ناسته کې د افغانستان پر وضعیت خبرې کړي

د افغانستان د ولسمشر د ملي امنیت سلاکار حمدالله

د افغانستان د ولسمشر د ملي امنیت سلاکار حمدالله محب د ګډو ګټو لرونکو خپلواکو هېوادونو د امنیتي مشرانو په غونډه کې د افغانستان پر امنیتي وضعیت خبرې کړې دي.

دغه غونډه پرون د نومبر په ۲۰مه، په مسکو کې جوړه شوې وه.

د ګډو ګټو لرونکو خپلواکو هېوادونو د وېبپاڼې په حواله، د دې سازمان د ملي امنیت شورا مشرانو پر هغو تهدیدونو او امنیتی خطرونو خبرې وکړې چې د دې سازمان غړي هېوادونه ورسره مخامخ کېدلائ شي.

د حمدالله محب او نورو د خبرو جزئیات نه دي په ډ اګه شوي.

په پرونۍ غونډه کې د ګډو ګټو لرونکو خپلواکو هېوادونو ترمنځ د همکارۍ پر پراختیا خبرې شوي، ترڅو په اغېزناک ډول د غړو هېوادونو په سرحدي سیمو کې د بهرنیو تروریستانو د فعالیت او تګ راتګ مخنیوی وکړي.

د قزاقستان د ولسمشر د ملي امنیت سلاکار پرون د بهرنیو ګواښونو او همدا راز د سوریې او افغانستان د وضعیت په اړه خپل رپوټ نورو ته وړاندې کړ.

سیاسي کارپوه احمد وحید مژده کابل کې ناپيژاندو وسله والو وواژه

احمد وحید مژده

د افغانستان د کورنیو چارو وزارت ویلي، سیاسي کارپوه احمد وحید مژده نن ماښام د ناپېژاندو وسله والو له خوا په ډزو وژل شوی دی.

ددغه وزارت ویاند نصرت رحیمي وايي، نوموړی نن (عقرب/لړم ۲۹مه) په داسې حال کې چې د لمانځه ادا کولو لپاره د مسجد پر لور روان و، د موټر سایکل سپرو له خوا د کابل په دارلامان سیمه کې په نښه شو.

ښاغلي رحیمي ویلي چې موضوع د پولیسو تر تعقیب لاندې ده، خو تراوسه یې په تړاو څوک نه دي نیول شوي.

احمد وحید مژده سیاسي کارپوه او د طالبانو د رژیم پخوانی چارواکی و. د طالبانو له رژیم ړنګېدو راهیسې نوموړي په کابل کې ژوند کاوه.

هېچا د ښاغلي مژده د وژلو مسئولیت نه دی منلی.

سروې: طالبان د نړۍ تر ټولو مخکښه وژوونکې ډله ده

ارشیف

یوه نوې سروې ښیې چې طالبان تیرکال تر ټولو وژونکې ډله وه.

د سروې له مخې په سوریې او عراق کې د تاوتریخوالي په کمېدو په افغانستان کې تروریستي بریدونه ډیر شوي دي.

په ۲۰۱۹ میلادي کال کې د تروریزم نړیوال انډکس چې د آسترالیا په سیدنې ښار کې د مېشت د سولي او اقتصاد انسټېټیوټ لخوا خپور شو ، ښیي په ۲۰۱۸ میلادي کال کې افغانستان کې د ټولو وژنو یو اویا ۷۱ سلنه د طالبانو له خوا شوي دي.

دا شمېره د ټولې نړۍ د تروریستي پېښو د قربانیانو ۳۸ فیصده جوړوي.

طالبان تېر کال تر داعش وسله والې ډلې چې تر ټولو لویه وژونکې ډله وه، مخکې شول.

د سولې او اقتصاد انسټېټیوټ د راپور پر اساس تېر کال د داعش ډلې له خوا د وژل شویو مجموعي شمېر ۷۰ فیصده راټیټ شوی او ۱۳۲۸ تنو ته رسېږي.

د دغه راپور له مخې په ټوله نړۍ کې تېرکال د تروریستي بریدونو د قربانیانو شمېر ۱۵۹۵۲ تنو ته ورسېد.

کابل کې د سوک وهنې سیالۍ پای ته ورسېدې

ارشیف

په کابل کې د سوک وهنې منتخبې سیالۍ نن پای ته ورسېدې.

د سوک وهنې په دغو سیالیو کې ۲۸۴ لوبغاړو ګډون کړی وو.

یادې سیالۍ په مرکز کابل کې له تېرو ۷ ورځو راهیسې په بېلابېلو وزنونو کې روانې وې.

د سوک وهنې فدراسیون مسوولین وايي، دوی له ۲۸۴ لوبغاړو څخه ۲۰ تنه د کابل د سوک وهنې منتخبې لوبډلې ته غوره کړي دي.

دغه سیالۍ هر کال د هېواد د سوک وهنې ملي فدراسیون له لوري د غوره لوبغاړو د پیژندلو په هدف ترسره کېږي.

خوست کې چاودنې ټرافیک وژلی

ارشیف

په خوست ښار کې چاودنې یو ټرافیک وژلی او ۳ نور يې ټپیان کړي دي.

نن د چارشنبې په ورځ غرمه مهال د خوست ښار په مجاهد څلور لاري کې د ځای پر ځای شوي ماین چاودنه کې یو ټرافیک وژل شوی او دوه ټرافیکان او یو ملکي وګړی ټپیان شوي دي.

د خوست د امنیه قومدانۍ ویاند حیدر عادل مشال راډیو ته وویل، چې وژل شوی ټرافیک غني شاه نومیږي چې د موټرو د لایسنس مدیر و.

ده وویل، په دې پېښه کې دوه نور ټرافیکان او یو ملکی وګړي ټپیان شوي دي.

د امنیې قوماندانۍ ویاند دا هم وویل، چې ماین د ښار په ګلدان کې ځای پر ځای شوی وو.

بلخوا د خوست د عامې روغتیا ریاست چارواکي بیا د ټپیانو شمېر څلور کسه ښيي.

د عامې روغتیا ریاست مرستیال ډاکټر ګل محمدالدین محمدي وايي، د پېښې له ځایه د یو وژل شوي ټرافیک مړی، همدارنګه څلور ټپیان روغتونونو ته لیږدول شوي، چې درې يې ترافیک او یو ملکي وګړی دی.

تر اوسه د پيښې مسؤلیت کوم چا پر غاړه نه دی اخیستی.

راتلونکی کال له ۵۰ زره ډېرو ښځو ته د کرنیزو پروګرامونو لړۍ پیلیږي

ارشیف

د افغانستان د کرنې او مالدارۍ وزارت په پام کې لري چې راتلونکي کال کې له۵۰ زرو ډېرې مېرمنې د کرنیزو پروګرامونو تر پوښښ لاندې راولي.

د دغه وزارت ویاند اکبر رستمي نن ازادي راډيو ته وویل، د کرنې وزارت هڅه کوي چې په راتلونکي کال کې په ۲۵ زرو میرمنو کورنۍ باغچې وویشي.

نوموړي دغه شان وویل، تېرکال د افغانستان په بېلابېلو ولایتونو کې ۵۴ زره میرمنې د کرنې او مالدارۍ وزارت له پروګرامونو چې د چرګانو او مچیو د ساتنې، شنو خونو، باغونو او د میوو او سبزیجاتو د پروسس پروګرامونه په کې شامل و برخمنې شوې دي.

ښاغلی رستمي وايي،د دې پروګرامونو له جوړولو هدف دا دی چې د کرنې او کورني تولیداتو د پرختیا په برخه د ښځو وړتیاوې زیاتې شي.

مالیې وزارت: د افغانستان اقتصادي وده ۳ سلنه لوړه شوې

د نړیوال بانک د شمېرو له مخې اوس هم د افغانستان ۶۰ سلنه لګښتونه پر نړیوالو مرستو ولاړ دي.

د افغانستان اقتصادي وده په روان ۱۳۹۸مالي کال کې ۳ سلنې ته لوړه شوې ده.

د افغانستان مالیې وزارت ویاند شمعروز خان مسجدي نن ازادي راډيو ته وویل، چې د افغانستان د اقتصادي ودې مهم دلایل د سیمې له هېوادونو سره د هوایي دهلیزونو رامنځته کېدل دي، چې صادرات ورسره ښه او د کرنې په برخه کې هم وده رامنځته شوې.

هغه زیاته کړه: "خوشبختانه کوم راپورونه چې مونږ لرو په بيلابيلو سکټورونو کې د پراختیا له امله د افغانستان اقتصادي وده ۳ سلنه لوړه شوې چې دا په تېرو څلورو کلونو په پرتله تر ټولو لویه اقتصادي پراختیا ده."

د یادولو وړده، چې د ۱۳۹۹ لمریز مالي کال لپاره اقتصادي وده د ۳.۴ سلنې په شاوخوا کې ټاکل شوې، چې د ۱۳۹۸ لمریز کال په پرتله ۰،۵ سلنه ښوول شوې ده.

د اقتصادي چارو پوه میرویس افغان وایي، د نړیوالو اوسني مالي ملاتړ ته په کتو په ۱۳۹۸ لمریز مالي کال کې ۳ فیصده اقتصادي وده لږ ده او باید د افغانستان په کورنیو سرچینو ډېر کار وشي.

د نړیوال بانک د شمېرو له مخې اوس هم د افغانستان ۶۰ سلنه لګښتونه پر نړیوالو مرستو ولاړ دي.

باور دا دی، که افغان حکومت مالي چارې رڼې کړي، اقتصادي وده به نوره هم زیاته شي.

چارواکي کندهار او ارزګان کې د ۲۸ وسله والو د وژنې ادعا کوي

AFGHANISTAN -- Afghan policemen stand guard at a checkpoint ahead of parliamentary election in Kandahar, October 18, 2018

افغان ځواکونو کندهار او ارزګان کي د لسګونه وسله والو د مرګ ژوبلي ادعا کوي.

د ګډو افغان ځواکونو پوځي عمليات په سوېل کې د ۲۰۵ اتل قول اردو د پوځي چارواکو تر قومندې لاندې د کندهار په میوند او د روزګان په ګيزاب ولسوالۍ کې ترسره شوي دي.

د ۲۰۵ اتل قول اردو ویاند خواجه يحي علوي ازادي رادیو ته وویل چې په دغه عملیاتو کې د کمانډو ځواکونو ترڅنګ افغان هوایي ځواک هم برخه اخستې وه.

نوموړی وایي، د افغان ځواکونو په دغو عملياتو کې د کندهار په میوند کې ۱۹ وسله وال وژل شوي او ۱۴ نور ژوبل شوي او همدراز د ارزګان په ګيزاب کې ۴ وسله وال وژل شوي او ۴ نور ژوبل شوي دي.

علوي وایي، په دغو عملياتو کې د وسله والو ۴۸ کړۍ ماينونه او وسلې هم د افغان ځواکونو لاسته ورغلي دي.

طالب وسله والو تر اوسه په دې اړه رسنيو ته څه نه دي ویلي.

د یو بل خبر له مخې افغان ځانګړو ځواکونو تېره شپه د کندهار په خاکريز ولسوالۍ کې پوځي عمليات ترسره کړي دي.

د کندهار د والي ویاند احمد بهير احمدي ازادی راډیو ته وویل چې په دغو عملياتو کې پنځه وسله وال وژل شوي او پنځه نور ژوبل شوي دي.

په دې اړه هم طالب وسله والو تر اوسه رسنيو ته څه نه دي ویلي.

لوګر کې د هیلکوپټر راغورځېدو پېښه کې دوه امریکايي سرتېري وژل شوي

ارشیف

د امریکا دوه پوځیان په افغانستان کې د هیلکوپټر د را غورځیدو په پيښه کې وژل شوي دي.

په افغانستان کې دیره امریکایي ځواکونو نن په یوه خپره کړې خبرپاڼه کې ویلي، په دې اړه چې د دغه هیلکوپټر د راغورځېدو علت څه و، څېړنه کوي.

د خبرپاڼې له مخې لومړنۍ څیړنې ښیي چې دغه هیلکوپټر د دښمن په ډزو نده را نسکوره شوې.

په دې اړه نورجزئیات نه دي ورکړل شوي خو د طالبانو ویاند ذبیح الله مجاهد په خپله ټویټرپاڼه کې ادعا کړې چې د امریکا شینوک ډوله هیلکوپټر دوی د لوګر په څرخ ولسوالۍ کې رانسکوره کړې او په کې ټول پوځیان یې وژلي دي.

خو د افغانستان دفاع وزارت د طالبانو دغه ادعا ردکړې ده.

د دې وزارت ویاند فواد امان نن په یوه خپره کړې خبرپاڼه کې ویلي چې دغه هیلکوپټر د دښمن په ډزو نده رانسکوره شوې.

هغه همداشان ویلي چې افغان ځواکونو ته زیان نه دی رسېدلی.

وسله وال طالبان پرته له دې چې شواهد وښیي تل د هیلکوپټر او د بې پیلوټه الوتکو د رانسکوریدو ادعاوې کوي.

د روان کال له پیل راهیسې په افغانستان کې د جګړو په تړاو پېښو کې ۱۹ امریکایي پوځیان وژل شوي دي.

په اوس وخت کې شاوخوا دیارلس زره امریکایي ځواکونه په افغانستان کې دېره دي او د دې ترڅنګ د ناتو د نورو اروپایي غړیو هېوادونو زرګونه سرتېري د دې تړون د غوڅ ملاتړ په ماموریت کې دنده ترسره کوي.

د روانې میاشتې په پیل کې د امریکا د وسله والو ځواکونو لوی درستیز جنرال مارک میلي اټکل کړی چې امریکایي ځواکونه چې اتلس کاله په افغانستان کې حضورلري، د څو نورو کلونو لپاره هم په دې هېواد کې پاتې شي.

"نږدې دوه دریمه برخه افغان ماشومان جګړې اغیزمن کړي"

ارشیف

نږدې دوه دریمه برخه افغان ماشومان په افغانستان کې روانې جګړې اغیزمن کړي دي.

دا خبره په بریټانیا کې میشتې سیف د چیلډرین مرستندویه مؤسسې کړې ده.

سیف د چیلډرن پرون په خپاره کړي راپور کې پر ماشومانو د جګړې د اغېزو د مختلفو بڼو یادونه کړې او ویلي یي دي چې د کورنۍ د غړي د له لاسه ورکولو، د جګړې یا د بریدونو د پېښو د لیدلو یا په جګړه کې د ټپي کېدو له لارې ماشومان اغیزمن شوي دي.

په دغه راپور کې چې په څلورو ولایتونو کې له اوو سوو لویانو او ماشومانو سره د مرکو پر بنسټ چمتو شوی ویل شوي چې د ماشومانو ډېره برخه یې لکه له ژور خفګان او اندېښنو څخه کړیږي او د درملنې لپاره یې ضروري خدمتونو ته لاس رسۍ هم نه لري.

میندو او پلرونو چې ورسره مرکې شوي ویلي چې ماشومان ښوونځي ته په لاره ویریږي.

د افغانستان لپاره د ملګروملتونو د مرستندویه ماموریت یوناما له خوا د وروستي درې میاشتني خپور شوي راپور له مخې تیرکال افغانستان د افغان ماشومانو لپاره له کله چې یوناما له ۲۰۰۹ میلادي کال راهیسې د جګړې د زیانونو په اړه د راپور ورکولو لړۍ پیل کړې، تر ټولو خونړی کال و.

د دغه راپورله مخې ۹۲۷ ماشومان وژل شوي او ۲۱۰۰ نورټپیان شوي و.

چارواکي: کونړ کې داعش ډله جدي ګواښ نه شي پېښولى

ارشیف

د کونړ ولايت چارواکي وايي په دغه ولايت کې د داعش په نوم وسله وال کوم جدي ګواښ نه شي پېښولى.

د افغانستان ولسمشر محمد اشرف غني پرون د کونړ څنګلور ولايت ننګرهار په مرکز جلال اباد کې وويل، چې په دې ولايت کې داعش ډله په بشپړ ډول له منځه تللې ده.

خو په ولسي جرګه کې د کونړ د خلکو استازي نعمت اله کرياب پرون وويل، چې د داعش ډلې وسله والو د کونړ په ځينو ولسواليو کې امنيتي خطر رامنځته کړى دى.

د کونړ د والي مرستيال ګل محمد بيدار تېر ماښام ازادۍ راډيو ته وويل، د داعش وسلوال دومره جدي ګواښ نه دى.

بیدار زیاته کړه: "جدي ګواښ يې په دې نه ګڼو، يو خو دا دى چې دوى په لرې پرتو سيمو او ځنګلونو کې دي چې کله مو عمليات تنظيم کړي او د دوى پر وړاندې مو اقدام کړى، دوى ته مو زیانونه اړولي او دوى تښتېدلي دي، ژمى دى، هوا هم يخه ده، دوى يوازې پټنځايونه ګوري چې ژوندي پاتې شي، د پرمختګ او ګواښ پېښولو وړ نه دي."

د ننګرهار والي تېره يکشنبه ازادۍ راډيو ته ويلي وو، چې په دې ولايت کې د داعش ډلې تر ٦٠٠ زيات غړي دولت تسليم شوي دي.

هغو وسله والو چې ځانونه په افغانستان کې د داعش د خراسان څانګې غړي بولي، په افغانستان کې د ځينو خونړيو بریدونو مسؤليت منلى دى.

قطر لوبډلې افغان لوبډلې ته په فوټبال کې ماته ورکړې

د قطر د فوټبال ملي لوبډلې پرون د افغانستان لوبډلې ته يو د صفر پر وړاندې ماته ورکړه.

دغه سيالي نړيوال او د اسيايي هېوادونو جام ته د لار موندنې لپاره د سیالیو په لړ کې وشوه.

دغه سیالي تېره شپه د تاجکستان د پلازمېنې دوشنبې په مرکزي لوبغالي کې وشوه.

د فوټبال نړيوال فډراسيون (فيفا) د امنيتي دلايلو له مخې د افغانستان په کوربه توب د سیالیو لپاره د تاجکستان ډګرونه غوره کړي دي.

د افغانستان د فوټبال ملي لوبډلې تر اوسه په E ګروپ کې پنځه سیالۍ کړې دي.

له بنګله دېش څخه يې لوبه ګټلې، له هندوستان سره مساوي شوې، خو د قطر او عمان په وړاندې يې ماتې خوړلې ده.

افغانستان په خپل ګروپ کې، د ٢٠٢٢میلادي کال نړيوال جام او په ٢٠٢٣میلادي کال کې د اسيايي هېوادونو جام ته د لار موندنې لپاره په دریم کتار کې دى.

سټولټنبرګ: افغانستان لا هم ناټو لپاره تر ټولو ستر ماموريت ګڼل کېږي

ارشیف

د ناټو سرمنشي وايي، افغانستان لا هم د ناټو پوځي تړون لپاره تر ټولو ستر ماموريت ګڼل کېږي.

ينس سټولټنبرګ پرون سې شنبه په بروکسل کې په يوه خبري کنفرانس کې وويل، چې ناټو په افغانستان او عراق کې د اسلامي دولت ډلې د بيا ټوکېدلو په مخنيوي کې مهم رول لوبولى دى.

هغه وايي: "د افغانستان ماموريت چې لا هم زمونږ تر ټولو پراخ پوځي عمليات ګڼل کېږي لا دوام لري، چې د ټروريزم پر وړاندې پر مبارزه متمرکز دى، څو ډاډ ترلاسه شي چې افغانستان بيا د تروريستانو په خوندي ځاله بدل نه شي، د ناټو په نړيوال تړون کې ټول متحدان او شريکان د داعش ډلې ماتې ته ژمن دي."

د ناټو سرمنشي دا خبرې په بروکسل کې د ناټو تړون د بهرنيو چارو وزيرانو تر غونډې يوه ورځ مخکې کړې دي.

تمه کېږي د دغو چارواکو په نننۍ غونډه کې د ناټو تړون غړو هېوادونو د اجنډا پر وروستي کولو او د کتنو پر پروګرام بحث وشي.

د ډسمبر مياشتې پر دريمه او څلورمه به د ناټو په هغه سر مشريزه کې چې په لندن کې جوړېږي، د بحثونو په اجنډا کې د افغانستان موضوع هم شامله وي.

د افغانستان او ويسټ انډيز د کرکټ څلور ورځنۍ تمريناتي سیالي کوي

ارشیف

د افغانستان او ويسټ انډيز د کرکټ ملي لوبډلې نن په خپلو کې څلور ورځنۍ تمريناتي سیالي کوي.

د هندوستان په لکنو کې دغه سیالي د افغانستان په وخت نن د سهار اته بجې پيلېږي.

د کرکټ بورډ وياند فريد هوتک نن چهارشنبه په دې اړه ازادي راډيو ته وويل: "نن د افغانستان او ويسټ انډيز د کرکټ ملي لوبډلو ترمنځ څلور ورځنۍ تمريناتي لوبه کېږي، دا تمريناتي لوبه ده، تر دې وروسته د افغانستان په کوربه توب د افغانستان او ويسټ انډيز ترمنځ د نومبر په ٢٧مه ټيسټ لوبه پيلېږي، چې د ډسمبر تر لومړۍ نېټې به دوام وکړي."

د هندوستان په لکنو کې د افغانستان او ويسټ انډيز ترمنځ درې پنځوس اووره او درې شل اووره سیالۍ هم شوې دي.

د پنځوس اووره سیالیو لړۍ ويسټ انډيز، خو د شل اووره سیالیو لړۍ افغانستان ګټلې ده.

"د افغانستان امریکايي پوهنتون خوشي شوی امریکایی استاد تر درملنې لاندې دی"

کېون کېنګ (ښی) او ټیموټي وېکس نن په زابل کې طالبانو له بنده خوشي کړل. د دوی په بدل کې د افغانستان حکومت درې طالبان ازاد کړل.

د طالبانو له بنده د خوشي شوي امریکايي استاد کېون کېنګ کورنۍ رسنیو ته په یوې بیانیه کې ویلي چې ښاغلی کېنګ اوسمهال له امریکايي چارواکو سره تر درملنې لاندې دی او امریکا کې له خپلې کورنۍ سره بېرته یوځای کېدو ته ځان چمتو کوي.

په دغه بیانیه کې چې ازادي راډیو ته استول شوې، د هغه خور سټیفاني میلر د خپل ورور پر خوشي کېدو او دا چې بېرته خپل کور ته ورګرځي خوښي ښوولې ده.

د ښاغلي کېنګ کورنۍ په دغې بیانیې کې د افغانستان له حکومت، ولسمشر اشرف غني، ولسمشر ډونالد ټرمپ، د امریکا د بهرنیو چارو له وزیر مایک پامپیو، د امریکا د ملي امنیت سلاکار رابرټ اوبراین، د افغانستان د سولې لپاره د امریکا له ځانګړي استازي زلمي خلیلزاد او نورو هغو کسانو څخه چې د کېون کېنګ په خوشي کېدو کې ښکېل وو، مننه کړې ده.

عمران خان د افغانستان امریکايي پوهنتون د دو استادانو خوشي کېدو هرکلی وکړ

د پاکستان صدراعظم عمران خان

د پاکستان صدراعظم عمران خان د افغانستان امریکايي پوهنتون د دوو استادانو د خوشې کېدو هرکلی وکړ.

ښاغلي خان په خپله ټویټرپانه د ښکېلو خواوو چې دغه کار یې ممکن کړی ستاینه کوي او وايي چې پاکستان د افغانستان د جګړې له پاره د یوې سیاسي حل‌لارې د موندلو په هدف د خپلې پالېسۍ د یوې برخې په توګه، د دغو استادانو د خوشې کېدو اسانتیا برابره کړې ده.

عمران خان زیاتوي، موږ هیله‌من یو چې دغه ګام د ټولو ښکېلو لورو د ډاډ لامل شي، څو د سولې بهیر بیا ورغوي.

د عمران خان په دغه ټویټ کې راغلی چې پاکستان به د سولې بهیر لپاره د اسانتیاوو برابرولو ته ژمن پاتې شي.

چارواکي: لوګر کې ۹ مهم طالبان وژل شوي

ارشیف

په لوګر کې د وسله والو مخالفینو نهه مهم غړي وژل شوي

د لوګر امنیتي چارواکي وایي، تېره ورځ د ملي پولیسو ځانګړو ځواکونو د هوايي ځواکونو په ملاتړ د لوګر ولایت د بره کي برک ولسولۍ په بابري، آهنګران او الف جان کلیو کې عملیات کړي، چې په ترڅ کې يې د وسله والو طالبانو نهه کلیدي غړي وژلي دي.

د لوګر د پولیسو ویاند شاپور احمدزي ازادي راډیو ته وویل، چې په دې عملیاتو کې د وسله والو طالبانو یو شمېر سپکې او درنې وسلې هم له منځه وړل شوي ډي.


تر اوسه وسله والو طالبانو ددغو عملیاتو په اړه رسنیو ته څه نه دي ویلي.

مسکو د "مارګایتاایګناتووا" نوم د ورکو کسانو په لیست کې شامل کړی

ارشیف

د مسکو پولیسو هغه راپورونه تائید کړي چې د روسیې د انټرفکس خبري اژانس د اډیټرې مارګاریتا ایګناتووا نوم یې د ورکو کسانو په لیست کې شامل کړی دی.

د مسکو د پولیسو یوه ویاند پرون دوشنبې دولتي خبري آژانس تاس ته وویل، د دې ځوانې ژورنالیستې مور د پولیسو په دفتر کې د خپلې لور د تري تم کېدو راپور ثبت کړی او پولیسو هم هڅې پیل کړې دي چې پته یې معلومه کړي.

روسي رسنیو د ۲۹ کلنې ایګناتووا د مور له قوله راپور ورکړی چې وايي، دې خپله لور وروستۍ ځل د یکشنبې په ورځ د سهار په نهو بجو په داسې حال کې چې کلیسا ته تلله ولیده خو هغه وايي چې د هویت کارت، موبایل ټېلفون او پیسې یې نه دي ورسره وړي.

ولسمشر غني جلال آباد ته رسېدلی

ارشیف

ولسمشر غني جلال اباد ته رسېدلی دی.

د ننګرهار والي ویاند عطاالله خوګیاڼی وايي،ولسمشر سره د مشرانو جرګې مشر فضل هادي مسلیمار، په ولسې جرګه کې د ننګرهار استازي، د کابېنې غړي او د ملي امنیت سلاکار ډاکتر حمدالله محب ملګري دي.

خوګیاڼی وايي، ولسمشر به په ننګرهار کې هغو قومي مشرانو ،پاڅون کوونکو او پوځي افسرانو سره هم وګوري چې چا په یاد ولایت کې د داعش په ماتولو کې یې فعاله ونډه اخستې ده.

ویل کېږي، ولسمشر به خلکو سره له ملاقاتونو وروسته وینا هم وکړي.

نوري: وسله والو د ناوې ولسوالۍ د ابتدایه محکمې څارنوال وژلی

ارشیف

پرون مازیګر ناڅرګندو وسله والو د غزنې ناوې ولسوالۍ د ابتدایه محکمې څارنوال او د هغه وراره په ډزو وژلي دي.

د غزني د والي ویاند محمد عارف نوري ازادي راډیو ته وویل، د څارنوال محمد حسن حلیمي پر موټر غزني ښار ته څېرمه د ګنج په سیمه کې برید شوی دی.

هغه وايي: "د ګنج په سیمه کې د ناوې ولسوالۍ د ابتدایه څارنوالۍ پر څارنوال وسله وال برید شوی، په دې کې خپله څارنوال او وراره یې شهیدان شوي او وسله وال له سیمې تښتېدلي دي."

دا په داسې حال کې ده چې په وروستیو کې د افغانستان د عدلي او قضايي ادارو پر قاضیانو او څارنوالانو دا ډول هدفي بریدونه زیات شوي دي.

د روانې نومبر میاشتې په اومه نېټه د حکومت مخالفو وسله والو د لوګر ولایت کې د پکتیا د استناف محکمې د دریوو قاضیانو په شمول څلور تنه ووژل.

په یو بله پېښه کې څلور ورځې مخکې د کابل په قره باغ ولسوالۍ کې بګرام ته پر روانو افغان څارنوالانو برید وشو چې دوه یې ووژل شول او دوه نور هم ټپیان شول.

د بغلان ترافیکي پېښې یو تن وژلی او څلوېښت نور یې ټپي کړي

په ټپیانو کې ښځې او ماشومان هم شامل دي.

په بغلان کې په یوه ترافیکي پېښه کې یو تن وژل شوی او څلوېښت نور ټپیان دي.

د بغلان د امنیې قومندانۍ ویاند احمد جاوید بشارت نن آزادي راډیو ته وویل چې دا پېښه د یوه مسافر وړوړنکي بس د چپه کېدو له کبله رامنځته شوې ده.

دغه پېښه د بغلان ولسوالۍ په ګرداب سیمه کې شوې ده.

په ټپیانو کې ښځې او ماشومان هم شامل دي.

ښاغلی بشارت زیاتوي چې ټپیان سیمه ییزو روغتونونو ته لېږدول شوي دي.

د پېښې د علت په اړه تر اوسه څه نه دي ویل شوي.

تر دې وړاندي تر ډېره د افغانستان په بېلابېلو ترافیکي پېښو کې موټر چلوونکي په تېزچلونې او بې احتیاطۍ تورن شوي دي.

هرات کې فابریکه لرونکو د بهرنیو غنمو پرځای خپل کورني اخیستي

ارشیف

د هرات د سوداګرۍ او صنایعو خونې چارواکي وايي، د هرات د اوړو د تولید فابریکه لرونکو سږ کال د سوداګرۍ خونې په همکارۍ د بهرنیو غنمو پرځای، کورني غنم اخیستي دي.

د دغې خونې مرستیال توریالي غوثي نن ازادي راډيو ته وویل چې د هرات تولیدي فابریکو دغه غنم له بیلابیلو ولایتونو اخيستې دي.

هغه زیاته کړه: "فابریکو دغه غنم له غور، بادغیس، فراه، نیمروز او هلمند څخه د هرات فابریکو اخیستي دي چې دا کار د بزګرانو له هرکلي سره مخ شوي."

نوموړي وویل چې دغه اقدام د بزګرانو د هڅونې او د دوی د اقتصادي پیاوړتیا لامل شوی.

د هرات د سوداګرۍ او صنایعو خونه وايي، تر دې وړاندې اوړه له قزاقستان او پاکستان څخه راتلل چې په ګرانه بیه پلورل کېده.

دوو لاسي بمي چاودنو ۴ سرتېري او ۱ ملکي وګړی ټپي کړي

ارشیف

د افغانستان د کورنیو چارو وزارت وايي، نن کابل کې د دوو لاسي بمونو د غورځولو له امله د ملي اردو څلور سرتېري او یو ملکي وګړی ټپي شوي دي.

د کورنیو چارو وزارت ویاند نصرت رحیمي په یوه تازه ټویټ کې ویلي، نن سهار شاوخوا ۷:۳۰ بجې د کابل نولسمې حوزې اړوند د نظامي روزنیز مرکز ته نږدې دوه لاسي بمونه غورځول شوي دي.

دغه نظامي مرکز د کابل څرخي پله سیمه کې موقعیت لري.

رحیمي له دې وړاندې په ټویټ کې لیکلي و چې دوو پرلپسې انتحاري چاودنې وشوې.

تېره چهارشنبه د کابل قصبې سیمه کې د موټربم چاودنې له امله د زده کوونکو په ګډون لږترلږه ۱۲ کسه ووژل شول.

په دې برید کې د یوه خصوصي امنیتي شرکت کاروان تر برید لاندې راغلی و.

د دواړو پېښو مسئولیت تر اوسه کومې چا یا ډلې پر غاړه نه ده اخیستی.

نور راوښيه

XS
SM
MD
LG