د لاسرسي لېنکونه

تازه خبر
شنبه ۲ لیندۍ ۱۳۹۸ کابل ۰۴:۳۹

افغانستان

یو شمیر حکومتي کارکوونکي له اداري فساد سره د مبارزې په برخه کې همکاري نه کوي

له فساد سره د مبارزې عالي اداره د یو شمیر حکومتي ادارو کارکوونکي په دې تورنوي چې له فساد سره د مبارزې په برخه کې همکاري نه کوي.

دغه څرګندونې نن د دغې ادارې مشر ډاکتر عزیز الله لودین د کابل ولایت د لوړ پوړو کارکوونکو د شتمنیو د ثبت په غونډه کې وکړې خو نوموړي د دغو کسانو نومونه وانه خیستل.

″زه فکر نه کوم چې ادارې دې همکاري ونه کړي، مثلا کله چې زه لوی څارنوال ته ټیلفون کوم چې مونږ یوه ځآی ته ګډ پلاوی لیږو نو ژر خپل استازی رالیږي.
خو په ادارو کې ځینې کسان شته چې اداري او سیاسي فضا ته له پاملرنې پرته په دې برخه کې ځینې څرګندونې کوي.″

له دې وړاندې هم دغې ادارې یو شمیر حکومتي ادارې او حکومتي کارکوونکي په دې تورن کړي وو چې له فساد سره د مبارزې په برخه کې لازمه همکاري نه کوي.

د ورځې تازه خبرونه دلته ولولئ

حکومت: د مزار شريف- تاشکند ترمنځ الوتنې به د هېواد له اقتصاد سره مرسته وکړي

د افغانستان د ملکي هوايي چلن اداره هيله ښيي چې د مزار شريف او د ازبکستان د تاشکند ترمنځ الوتنې پيل شي.

د دې ادارې وياند ازادۍ راډيو ته وويل، د افغانستان او ازبکستان د هوايي چلن ادارو استازو ترمنځ د موافقې لاسليک دغو الوتنو ته زمينه برابره کړې ده.

قاسم رحيمي نن ازادۍ راډيو ته وويل:

”د افغانستان د ملکي هوايي چلن ادارې وړاندوينه دا ده چې د ازبکستان په ګډون د سيمې له بېلابېلو هېوادونو سره د هوا له لارې د مسافرو تګ راتګ کولاى شي، د افغانستان په اقتصادي وده کې فوق العاده اغېزناک رول ولري.“

د ښاغلي رحيمي په خبره د مزار شريف او تاشکند ترمنځ د الوتنو د پيل لپاره موافقه د روانې اوونۍ په لومړيو کې لاسليک شوې ده.

لا معلومه نه ده چې د مزار شريف او تاشکند ترمنځ به دغه الوتنې کله پيلېږي او په اوونۍ کې به څو الوتنې وي.

دا مهال کام اير هوايي شرکت د کابل او تاشکند ترمنځ په اوونۍ کې دوې الوتنې لري.

حکومت وايي بنديان د جګړې د بندېدو په خاطر تبادله شوي دي

انس حقاني حافظ عبدالرشيد

جمهوري رياست وايي د افغانستان حکومت د جګړې د بندېدو په نيت د امريکايي پوهنتون له دوو استادانو سره د طالبانو درې مهم غړي تبادله کړي دي.

د جمهوري رياست وياند صديق صديقي، نن په کابل کې يوه کنفرانس ته وويل:

”دا واقعاً له زړورتيا ډک تصميم و چې د خلکو د غوښتنې برخلاف و او خلک ورباندې خوښ نه وو. خو ولسمشر د جګړې د بندېدو او د سولې د راتګ لپاره دغه لوى هوډ وکړ.“

ولسمشر محمد اشرف غني د لړم/عقرب پر ٢١ مه، د افغانستان د امريکايي پوهنتون د دوو استادانو کيوين کينګ او تيموتي ويکس د ازادۍ په بدل کې د طالبانو د درېيو غړو انس حقاني، مالي خان او حافظ عبدالرشيد د خوشې کېدو اعلان وکړ.

که څه هم دغه تبادله څو ورځې وځنډېده، تر هغو چې تېره دوشنبه دواړو لوريو د هغې د بشپړېدو خبر تائيد کړ.

دغه دوه استادان د ٢٠١٦میلادي کال په اګست مياشت کې په کابل کې تښتول شوي وو.

ننګرهار کې د بېلابېلو جرمونو په شک ٦٥ کسان نيول شوي دي

ننګرهار والي

د ننګرهار چارواکي وايي ٦٥ کسان د غلا، وژنې او د نشه يي موادو د کار و بار په شک نيول شوي دي.

تر دې مخکې د ننګرهار اوسېدونکو د غلا، هدفي وژنو او د نشه يي موادو د کار و بار له زياتېدو شکايت کړى دى.

د ننګرهار والي شاه محمود مياخېل رسنيو ته وويل، دغه کسان د پوليسو له خوا نيول شوي دي:

”په تیره اونۍ کې دوي ۶۵ تنه نیولي دي، چې په دوي کې قاتلین، غله، د ځمکو غاصبین او نور شامل دي. له دغو کسانو سره پولیسو وسلې او تقریبا ۳۴۸ کیلو ګرامه بیلابیل نشه يي توکي نیولي، چې د دغو موادو په تور هم پنځه تنه نیول شوي او دا لاسته راوړنې يې په شپږو عملیاتو کې درلودې.“

بلخوا د ننګرهار امنيه قوماندان ډګرمن اېمل نيازي ويلي له نيول شويو کسانو سره به د قانون په چوکاټ کې چلند کېږي.

امريکا په افغانستان کې د هندوستان پراخه پانګونه وستايله

د امريکا متحدو ايالتونو ويلي په افغانستان کې د هندوستان د پام وړ پانګونې ملاتړ کوي.

د امريکا د بهرنيو چارو وزارت يوې چارواکې نانسي ايزو جکسن (Nancy Izzo Jackson) چې د افغانستان د برخې مسووليت ور ترغاړې دى، پرون په واشنګټن کې يوه کنفرانس ته وويل:

”د امريکا متحد ايالتونه په افغانستان کې د هندوستان د پام وړ پانګونې او همکارۍ هرکلى کوي.“

هغې په هغه کنفرانس چې په افغانستان کې د هندوستان پر رول متمرکز و، ويلي:

”موږ به په افغانستان کې د يوې باعزته لاسته راوړنې لپاره د هڅو ملاتړ ته دوام ورکړو، چې د افغانستان پر راتلونکي زموږ پانګونه خوندي کوي.“

هندوستان له ٢٠٠١م کال راهيسې د افغانستان په ملاتړ کې فعال رول لوبولى دى.

دغه هېواد د افغانستان د ملي شورا د ودانۍ د جوړولو تر څنګ په تېرو ١٨ کلونو کې د افغانستان پر بيارغونې ٣ مليارد ډالره لګولي دي.

د مزار شريف او تاشکند ترمنځ الوتنې پيلېږي

د افغانستان او ازبکستان د هوايي چلن ادارې چارواکو له مزار شريف څخه تاشکند ته د پروازونو پر پيل موافقه وکړه.

د ازبکستان تريند خبري اژانس نن جمعه د ازبکستان د ټرانسپورت وزارت په حواله ليکلي، دا موافقه په مزار شريف کې د مذاکرو پر مهال شوې ده.

د راپور په حواله دغه منظمې الوتنې به د کام ايير هوايي شرکت له خوا کېږي، خو د تنظيم او تخنيکي پروسې چارې به يې په ډسمبر کې عملي شي.

کام ايير هوايي شرکت له کابل څخه تاشکند ته خپلې الوتنې د ٢٠١٧م کال په ډسمبر مياشت کې پيل کړې، چې په اوونۍ کې دوه وارې ترسره کېږي.

اروپايي ټولنې افغانستان سره خپلې بیړنۍ مرستې ډېرې کړې

اروپايي کمیسیون پرون په یوه بیان کې ویلي چې په افغانستان کې د بشري وضعیت له خرابۍ وروسته یې دا اقدام کړی دی.

اروپايي ټولنې له افغانستان سره خپلې بېړنۍ مرستې ۷۷ میلیون یورو ته لوړې کړې دي.

اروپايي کمیسیون پرون په یوه بیان کې ویلي چې په افغانستان کې د بشري وضعیت له خرابۍ وروسته یې دا اقدام کړی دی.

په بیان کې راغلي چې څلوېښت میلیونه یورو اضافي مرسته به د بېړنیو روغتیايي خدماتو، د استوګنځایونو، د څښلو د پاکو اوبو د برابرولو او د ښځو او ماشومانو د ساتنې پر چارو ولګول شي.

د اروپايي ټولنې د بشري مرستو ناظم کرستوس ستیلیانیدس ویلي دي چې افغانان د سږني کال له پیله نه یوازې د حکومت او وسله والو مخالفینو ترمنځ د جګړو، بلکې د درنو سېلابونو له کبله هم زیانمن شوي دي.

قطر: د افغانستان امریکايي پوهنتون استادانو راخوشې کولو کې دوحې مهم رول لوبولی

د قطر د بهرنیو چارو وزارت ویلي دوحه په افغانستان کې د سولې د ټينګښت او د جګړې د پای ته رسولو لپاره د ددغه هېواد د حکومت او طالبانو له خوا د ښه نیت د دې اقدام هرکلی کوي.

د قطر د بهرنیو چارو وزارت وايي چې دوحې د افغانستان امریکايي پوهنتون د دوو استادانو د خوشې کولو په هڅو کې یې مهم رول لوبولی دی.

طالبانو د سه شنبې په ورځ (عقرب/لړم ۲۸مه) د حقاني شبکې د مشر د ورور انس حقاني په ګډون د خپلو درېیو جګپوړو غړو په بدل کې امریکایی کیون کینګ او استرالیايی ټیموټی ویکس چې په ۲۰۱۶ کال کې په کابل کې تښتول شوي وو، خوشې کړل.

د قطر د بهرنیو چارو وزارت په یوه بیان کې چې تېره شپه خپور شو ویلي چې دغه هېواد په افغانستان کې د سولې د ټينګښت او د جګړې د پای ته رسولو لپاره د افغان حکومت او طالبانو له خوا د ښه نیت د دې اقدام هرکلی کوي.

چارواکو ویلي چې کېنګ او ویکس جرمني ته رسېدلي او هلته د امریکا په یوه پوځي روغتون کې تر علاج لاندې دي.

اسوشېټډ پرس خبري آژانس د یوه امریکايي چارواکي له قوله چې نوم یې نه دی یاد شوی خبر ورکوي چې په جرمني کې د امریکا او استرالیا سفیرانو پرون له دغو دوو استادانو سره د امریکا په یوه پوځي اډه کې ولیدل.

د افغانستان حکومتي مشرانو د احمد وحید مژده وژنه غندلې

ښاغلی مژده پرون ماښام (عقرب ۲۹مه) د کابل په دارالامان سیمه کې په داسې حال کې چې جومات ته پر لاره وو، دوو موټرسایل سپرو له خوا په ډزو ووژل شو.

د افغانستان ولسمشر محمد اشرف غني او اجرائیه رئیس عبدالله عبدالله د لیکوال او سیاسي کارپوه احمد وحید مژده وژل غندلي. ښاغلی مژده پرون (عقرب ۲۹مه) په کابل ښار کې د وسله والو کسانو په ډزو ووژل شو.

د ارګ په خبرپاڼه کې چې نن له غرمې وروسته خپره شوې، ولسمشر محمد اشرف غني امنیتي چارواکو او عدلي ادارو ته سپارښتنه کړې چې د مژده وژنه وڅېړي او عاملین یې مجازات کړي.

اجرائیه رئيس عبدالله عبدالله پرون، د هغه پر وژل کېدو خواشیني څرګنده کړه او هغه یې یو تروریسي عمل وباله.

ښاغلی مژده پرون ماښام د کابل په دارالامان سیمه کې په داسې حال کې چې جومات ته پر لاره وو، دوو موټرسایل سپرو پرې برید وکړ. بریدګر د هغه تر وژلو وروسته له سیمې وتښتېدل.

احمد وحید مژده سیاسي کارپوه او د طالبانو د رژیم پخوانی چارواکی و. د طالبانو له رژیم ړنګېدو راهیسې نوموړي په کابل کې ژوند کاوه.

هغه به ترډېره په رسنیو کې د دولت د منتقدینو په توګه راڅرګندېده او په افغانستان کې د بهرنیو پوځیانو د حضور مخالف و. پر هغه د طالبانو د نظر پلوی شخص ګڼل کېده.

طالبانو هم په یوه اعلامیه کې د ښاغلي مژده وژنه غندلې او هغه یې د استخباراتي کړیو کار بللی.

طالب ویاند ذبیح الله مجاهد په یوې اعلامیې کې ویلي چې وحیده مژده د یو پیاوړي اسلامي نظام د ټینګښت لپاره مبارزه کوله او ادعا یې کړې چې په دې لاره کې یې هڅې د وژنې سبب شوي دي.

افغانستان کې په ټولنیزو رسنیو کې ګڼو ژورنالیستانو، مدني فعالانو او سیاستوالو هم د وحید مژده وژنه غندلې ده.

تر اوسه هیچا پر نوموړې د برید مسولیت پر غاړه نه دی اخیستی.

سټولټنبرګ: د افغانستان په ټاکنو کې هېڅکله مداخله نه کوو

د ناټو تړون عمومي منشي ینس سټولټنبرګ

د ناټو تړون عمومي منشي په افغانستان کې د ډیموکراتیک حق ترلاسه کولو لپاره په تېرو ولسمشریزو ټاکنو کې د خلکو ګډون ستایلی او ویلي یې دي چې دوی هېڅکله په ټاکنو کې مداخله نه کوي.

د ناټو عمومي منشي ینس سټولټنبرګ پرون، د نومبر په ۲۰مه، خبریالانو ته په افغانستان کې د ټاکنو په تړاو د روانو لانجو په اړه وویل چې دوی له افغانستان سره همکارۍ ته متعهد دي، د ټاکنو لپاره یې د امنیت په تامین کې همکاري کړې خو په ټاکنیزو چارو کې لاسوهنه نه شي کولای.

ښاغلي سټولټنبرګ دا مهمه وګڼله چې انتخاباتي کمېسونونه د رأیو د تفتیش او بیا شمېرنې بهیر بشپړ کړي او پایلې اعلان کړي.

د افغانستان د ټاکنو خپلواک کمېسون ویلي چې د راییو د تفتیش او بیا شمېرنې بهیر به د دې اونۍ تر پایه بشپړ کړي او راتلونکې اونۍ به د ټاکنو ابتدايي پایلې اعلان کړي.

حمدالله محب د ګډو ګټو لرونکو هېوادونو ناسته کې د افغانستان پر وضعیت خبرې کړي

د افغانستان د ولسمشر د ملي امنیت سلاکار حمدالله

د افغانستان د ولسمشر د ملي امنیت سلاکار حمدالله محب د ګډو ګټو لرونکو خپلواکو هېوادونو د امنیتي مشرانو په غونډه کې د افغانستان پر امنیتي وضعیت خبرې کړې دي.

دغه غونډه پرون د نومبر په ۲۰مه، په مسکو کې جوړه شوې وه.

د ګډو ګټو لرونکو خپلواکو هېوادونو د وېبپاڼې په حواله، د دې سازمان د ملي امنیت شورا مشرانو پر هغو تهدیدونو او امنیتی خطرونو خبرې وکړې چې د دې سازمان غړي هېوادونه ورسره مخامخ کېدلائ شي.

د حمدالله محب او نورو د خبرو جزئیات نه دي په ډ اګه شوي.

په پرونۍ غونډه کې د ګډو ګټو لرونکو خپلواکو هېوادونو ترمنځ د همکارۍ پر پراختیا خبرې شوي، ترڅو په اغېزناک ډول د غړو هېوادونو په سرحدي سیمو کې د بهرنیو تروریستانو د فعالیت او تګ راتګ مخنیوی وکړي.

د قزاقستان د ولسمشر د ملي امنیت سلاکار پرون د بهرنیو ګواښونو او همدا راز د سوریې او افغانستان د وضعیت په اړه خپل رپوټ نورو ته وړاندې کړ.

سیاسي کارپوه احمد وحید مژده کابل کې ناپيژاندو وسله والو وواژه

احمد وحید مژده

د افغانستان د کورنیو چارو وزارت ویلي، سیاسي کارپوه احمد وحید مژده نن ماښام د ناپېژاندو وسله والو له خوا په ډزو وژل شوی دی.

ددغه وزارت ویاند نصرت رحیمي وايي، نوموړی نن (عقرب/لړم ۲۹مه) په داسې حال کې چې د لمانځه ادا کولو لپاره د مسجد پر لور روان و، د موټر سایکل سپرو له خوا د کابل په دارلامان سیمه کې په نښه شو.

ښاغلي رحیمي ویلي چې موضوع د پولیسو تر تعقیب لاندې ده، خو تراوسه یې په تړاو څوک نه دي نیول شوي.

احمد وحید مژده سیاسي کارپوه او د طالبانو د رژیم پخوانی چارواکی و. د طالبانو له رژیم ړنګېدو راهیسې نوموړي په کابل کې ژوند کاوه.

هېچا د ښاغلي مژده د وژلو مسئولیت نه دی منلی.

سروې: طالبان د نړۍ تر ټولو مخکښه وژوونکې ډله ده

ارشیف

یوه نوې سروې ښیې چې طالبان تیرکال تر ټولو وژونکې ډله وه.

د سروې له مخې په سوریې او عراق کې د تاوتریخوالي په کمېدو په افغانستان کې تروریستي بریدونه ډیر شوي دي.

په ۲۰۱۹ میلادي کال کې د تروریزم نړیوال انډکس چې د آسترالیا په سیدنې ښار کې د مېشت د سولي او اقتصاد انسټېټیوټ لخوا خپور شو ، ښیي په ۲۰۱۸ میلادي کال کې افغانستان کې د ټولو وژنو یو اویا ۷۱ سلنه د طالبانو له خوا شوي دي.

دا شمېره د ټولې نړۍ د تروریستي پېښو د قربانیانو ۳۸ فیصده جوړوي.

طالبان تېر کال تر داعش وسله والې ډلې چې تر ټولو لویه وژونکې ډله وه، مخکې شول.

د سولې او اقتصاد انسټېټیوټ د راپور پر اساس تېر کال د داعش ډلې له خوا د وژل شویو مجموعي شمېر ۷۰ فیصده راټیټ شوی او ۱۳۲۸ تنو ته رسېږي.

د دغه راپور له مخې په ټوله نړۍ کې تېرکال د تروریستي بریدونو د قربانیانو شمېر ۱۵۹۵۲ تنو ته ورسېد.

کابل کې د سوک وهنې سیالۍ پای ته ورسېدې

ارشیف

په کابل کې د سوک وهنې منتخبې سیالۍ نن پای ته ورسېدې.

د سوک وهنې په دغو سیالیو کې ۲۸۴ لوبغاړو ګډون کړی وو.

یادې سیالۍ په مرکز کابل کې له تېرو ۷ ورځو راهیسې په بېلابېلو وزنونو کې روانې وې.

د سوک وهنې فدراسیون مسوولین وايي، دوی له ۲۸۴ لوبغاړو څخه ۲۰ تنه د کابل د سوک وهنې منتخبې لوبډلې ته غوره کړي دي.

دغه سیالۍ هر کال د هېواد د سوک وهنې ملي فدراسیون له لوري د غوره لوبغاړو د پیژندلو په هدف ترسره کېږي.

خوست کې چاودنې ټرافیک وژلی

ارشیف

په خوست ښار کې چاودنې یو ټرافیک وژلی او ۳ نور يې ټپیان کړي دي.

نن د چارشنبې په ورځ غرمه مهال د خوست ښار په مجاهد څلور لاري کې د ځای پر ځای شوي ماین چاودنه کې یو ټرافیک وژل شوی او دوه ټرافیکان او یو ملکي وګړی ټپیان شوي دي.

د خوست د امنیه قومدانۍ ویاند حیدر عادل مشال راډیو ته وویل، چې وژل شوی ټرافیک غني شاه نومیږي چې د موټرو د لایسنس مدیر و.

ده وویل، په دې پېښه کې دوه نور ټرافیکان او یو ملکی وګړي ټپیان شوي دي.

د امنیې قوماندانۍ ویاند دا هم وویل، چې ماین د ښار په ګلدان کې ځای پر ځای شوی وو.

بلخوا د خوست د عامې روغتیا ریاست چارواکي بیا د ټپیانو شمېر څلور کسه ښيي.

د عامې روغتیا ریاست مرستیال ډاکټر ګل محمدالدین محمدي وايي، د پېښې له ځایه د یو وژل شوي ټرافیک مړی، همدارنګه څلور ټپیان روغتونونو ته لیږدول شوي، چې درې يې ترافیک او یو ملکي وګړی دی.

تر اوسه د پيښې مسؤلیت کوم چا پر غاړه نه دی اخیستی.

راتلونکی کال له ۵۰ زره ډېرو ښځو ته د کرنیزو پروګرامونو لړۍ پیلیږي

ارشیف

د افغانستان د کرنې او مالدارۍ وزارت په پام کې لري چې راتلونکي کال کې له۵۰ زرو ډېرې مېرمنې د کرنیزو پروګرامونو تر پوښښ لاندې راولي.

د دغه وزارت ویاند اکبر رستمي نن ازادي راډيو ته وویل، د کرنې وزارت هڅه کوي چې په راتلونکي کال کې په ۲۵ زرو میرمنو کورنۍ باغچې وویشي.

نوموړي دغه شان وویل، تېرکال د افغانستان په بېلابېلو ولایتونو کې ۵۴ زره میرمنې د کرنې او مالدارۍ وزارت له پروګرامونو چې د چرګانو او مچیو د ساتنې، شنو خونو، باغونو او د میوو او سبزیجاتو د پروسس پروګرامونه په کې شامل و برخمنې شوې دي.

ښاغلی رستمي وايي،د دې پروګرامونو له جوړولو هدف دا دی چې د کرنې او کورني تولیداتو د پرختیا په برخه د ښځو وړتیاوې زیاتې شي.

مالیې وزارت: د افغانستان اقتصادي وده ۳ سلنه لوړه شوې

د نړیوال بانک د شمېرو له مخې اوس هم د افغانستان ۶۰ سلنه لګښتونه پر نړیوالو مرستو ولاړ دي.

د افغانستان اقتصادي وده په روان ۱۳۹۸مالي کال کې ۳ سلنې ته لوړه شوې ده.

د افغانستان مالیې وزارت ویاند شمعروز خان مسجدي نن ازادي راډيو ته وویل، چې د افغانستان د اقتصادي ودې مهم دلایل د سیمې له هېوادونو سره د هوایي دهلیزونو رامنځته کېدل دي، چې صادرات ورسره ښه او د کرنې په برخه کې هم وده رامنځته شوې.

هغه زیاته کړه: "خوشبختانه کوم راپورونه چې مونږ لرو په بيلابيلو سکټورونو کې د پراختیا له امله د افغانستان اقتصادي وده ۳ سلنه لوړه شوې چې دا په تېرو څلورو کلونو په پرتله تر ټولو لویه اقتصادي پراختیا ده."

د یادولو وړده، چې د ۱۳۹۹ لمریز مالي کال لپاره اقتصادي وده د ۳.۴ سلنې په شاوخوا کې ټاکل شوې، چې د ۱۳۹۸ لمریز کال په پرتله ۰،۵ سلنه ښوول شوې ده.

د اقتصادي چارو پوه میرویس افغان وایي، د نړیوالو اوسني مالي ملاتړ ته په کتو په ۱۳۹۸ لمریز مالي کال کې ۳ فیصده اقتصادي وده لږ ده او باید د افغانستان په کورنیو سرچینو ډېر کار وشي.

د نړیوال بانک د شمېرو له مخې اوس هم د افغانستان ۶۰ سلنه لګښتونه پر نړیوالو مرستو ولاړ دي.

باور دا دی، که افغان حکومت مالي چارې رڼې کړي، اقتصادي وده به نوره هم زیاته شي.

چارواکي کندهار او ارزګان کې د ۲۸ وسله والو د وژنې ادعا کوي

AFGHANISTAN -- Afghan policemen stand guard at a checkpoint ahead of parliamentary election in Kandahar, October 18, 2018

افغان ځواکونو کندهار او ارزګان کي د لسګونه وسله والو د مرګ ژوبلي ادعا کوي.

د ګډو افغان ځواکونو پوځي عمليات په سوېل کې د ۲۰۵ اتل قول اردو د پوځي چارواکو تر قومندې لاندې د کندهار په میوند او د روزګان په ګيزاب ولسوالۍ کې ترسره شوي دي.

د ۲۰۵ اتل قول اردو ویاند خواجه يحي علوي ازادي رادیو ته وویل چې په دغه عملیاتو کې د کمانډو ځواکونو ترڅنګ افغان هوایي ځواک هم برخه اخستې وه.

نوموړی وایي، د افغان ځواکونو په دغو عملياتو کې د کندهار په میوند کې ۱۹ وسله وال وژل شوي او ۱۴ نور ژوبل شوي او همدراز د ارزګان په ګيزاب کې ۴ وسله وال وژل شوي او ۴ نور ژوبل شوي دي.

علوي وایي، په دغو عملياتو کې د وسله والو ۴۸ کړۍ ماينونه او وسلې هم د افغان ځواکونو لاسته ورغلي دي.

طالب وسله والو تر اوسه په دې اړه رسنيو ته څه نه دي ویلي.

د یو بل خبر له مخې افغان ځانګړو ځواکونو تېره شپه د کندهار په خاکريز ولسوالۍ کې پوځي عمليات ترسره کړي دي.

د کندهار د والي ویاند احمد بهير احمدي ازادی راډیو ته وویل چې په دغو عملياتو کې پنځه وسله وال وژل شوي او پنځه نور ژوبل شوي دي.

په دې اړه هم طالب وسله والو تر اوسه رسنيو ته څه نه دي ویلي.

لوګر کې د هیلکوپټر راغورځېدو پېښه کې دوه امریکايي سرتېري وژل شوي

ارشیف

د امریکا دوه پوځیان په افغانستان کې د هیلکوپټر د را غورځیدو په پيښه کې وژل شوي دي.

په افغانستان کې دیره امریکایي ځواکونو نن په یوه خپره کړې خبرپاڼه کې ویلي، په دې اړه چې د دغه هیلکوپټر د راغورځېدو علت څه و، څېړنه کوي.

د خبرپاڼې له مخې لومړنۍ څیړنې ښیي چې دغه هیلکوپټر د دښمن په ډزو نده را نسکوره شوې.

په دې اړه نورجزئیات نه دي ورکړل شوي خو د طالبانو ویاند ذبیح الله مجاهد په خپله ټویټرپاڼه کې ادعا کړې چې د امریکا شینوک ډوله هیلکوپټر دوی د لوګر په څرخ ولسوالۍ کې رانسکوره کړې او په کې ټول پوځیان یې وژلي دي.

خو د افغانستان دفاع وزارت د طالبانو دغه ادعا ردکړې ده.

د دې وزارت ویاند فواد امان نن په یوه خپره کړې خبرپاڼه کې ویلي چې دغه هیلکوپټر د دښمن په ډزو نده رانسکوره شوې.

هغه همداشان ویلي چې افغان ځواکونو ته زیان نه دی رسېدلی.

وسله وال طالبان پرته له دې چې شواهد وښیي تل د هیلکوپټر او د بې پیلوټه الوتکو د رانسکوریدو ادعاوې کوي.

د روان کال له پیل راهیسې په افغانستان کې د جګړو په تړاو پېښو کې ۱۹ امریکایي پوځیان وژل شوي دي.

په اوس وخت کې شاوخوا دیارلس زره امریکایي ځواکونه په افغانستان کې دېره دي او د دې ترڅنګ د ناتو د نورو اروپایي غړیو هېوادونو زرګونه سرتېري د دې تړون د غوڅ ملاتړ په ماموریت کې دنده ترسره کوي.

د روانې میاشتې په پیل کې د امریکا د وسله والو ځواکونو لوی درستیز جنرال مارک میلي اټکل کړی چې امریکایي ځواکونه چې اتلس کاله په افغانستان کې حضورلري، د څو نورو کلونو لپاره هم په دې هېواد کې پاتې شي.

"نږدې دوه دریمه برخه افغان ماشومان جګړې اغیزمن کړي"

ارشیف

نږدې دوه دریمه برخه افغان ماشومان په افغانستان کې روانې جګړې اغیزمن کړي دي.

دا خبره په بریټانیا کې میشتې سیف د چیلډرین مرستندویه مؤسسې کړې ده.

سیف د چیلډرن پرون په خپاره کړي راپور کې پر ماشومانو د جګړې د اغېزو د مختلفو بڼو یادونه کړې او ویلي یي دي چې د کورنۍ د غړي د له لاسه ورکولو، د جګړې یا د بریدونو د پېښو د لیدلو یا په جګړه کې د ټپي کېدو له لارې ماشومان اغیزمن شوي دي.

په دغه راپور کې چې په څلورو ولایتونو کې له اوو سوو لویانو او ماشومانو سره د مرکو پر بنسټ چمتو شوی ویل شوي چې د ماشومانو ډېره برخه یې لکه له ژور خفګان او اندېښنو څخه کړیږي او د درملنې لپاره یې ضروري خدمتونو ته لاس رسۍ هم نه لري.

میندو او پلرونو چې ورسره مرکې شوي ویلي چې ماشومان ښوونځي ته په لاره ویریږي.

د افغانستان لپاره د ملګروملتونو د مرستندویه ماموریت یوناما له خوا د وروستي درې میاشتني خپور شوي راپور له مخې تیرکال افغانستان د افغان ماشومانو لپاره له کله چې یوناما له ۲۰۰۹ میلادي کال راهیسې د جګړې د زیانونو په اړه د راپور ورکولو لړۍ پیل کړې، تر ټولو خونړی کال و.

د دغه راپورله مخې ۹۲۷ ماشومان وژل شوي او ۲۱۰۰ نورټپیان شوي و.

چارواکي: کونړ کې داعش ډله جدي ګواښ نه شي پېښولى

ارشیف

د کونړ ولايت چارواکي وايي په دغه ولايت کې د داعش په نوم وسله وال کوم جدي ګواښ نه شي پېښولى.

د افغانستان ولسمشر محمد اشرف غني پرون د کونړ څنګلور ولايت ننګرهار په مرکز جلال اباد کې وويل، چې په دې ولايت کې داعش ډله په بشپړ ډول له منځه تللې ده.

خو په ولسي جرګه کې د کونړ د خلکو استازي نعمت اله کرياب پرون وويل، چې د داعش ډلې وسله والو د کونړ په ځينو ولسواليو کې امنيتي خطر رامنځته کړى دى.

د کونړ د والي مرستيال ګل محمد بيدار تېر ماښام ازادۍ راډيو ته وويل، د داعش وسلوال دومره جدي ګواښ نه دى.

بیدار زیاته کړه: "جدي ګواښ يې په دې نه ګڼو، يو خو دا دى چې دوى په لرې پرتو سيمو او ځنګلونو کې دي چې کله مو عمليات تنظيم کړي او د دوى پر وړاندې مو اقدام کړى، دوى ته مو زیانونه اړولي او دوى تښتېدلي دي، ژمى دى، هوا هم يخه ده، دوى يوازې پټنځايونه ګوري چې ژوندي پاتې شي، د پرمختګ او ګواښ پېښولو وړ نه دي."

د ننګرهار والي تېره يکشنبه ازادۍ راډيو ته ويلي وو، چې په دې ولايت کې د داعش ډلې تر ٦٠٠ زيات غړي دولت تسليم شوي دي.

هغو وسله والو چې ځانونه په افغانستان کې د داعش د خراسان څانګې غړي بولي، په افغانستان کې د ځينو خونړيو بریدونو مسؤليت منلى دى.

قطر لوبډلې افغان لوبډلې ته په فوټبال کې ماته ورکړې

د قطر د فوټبال ملي لوبډلې پرون د افغانستان لوبډلې ته يو د صفر پر وړاندې ماته ورکړه.

دغه سيالي نړيوال او د اسيايي هېوادونو جام ته د لار موندنې لپاره د سیالیو په لړ کې وشوه.

دغه سیالي تېره شپه د تاجکستان د پلازمېنې دوشنبې په مرکزي لوبغالي کې وشوه.

د فوټبال نړيوال فډراسيون (فيفا) د امنيتي دلايلو له مخې د افغانستان په کوربه توب د سیالیو لپاره د تاجکستان ډګرونه غوره کړي دي.

د افغانستان د فوټبال ملي لوبډلې تر اوسه په E ګروپ کې پنځه سیالۍ کړې دي.

له بنګله دېش څخه يې لوبه ګټلې، له هندوستان سره مساوي شوې، خو د قطر او عمان په وړاندې يې ماتې خوړلې ده.

افغانستان په خپل ګروپ کې، د ٢٠٢٢میلادي کال نړيوال جام او په ٢٠٢٣میلادي کال کې د اسيايي هېوادونو جام ته د لار موندنې لپاره په دریم کتار کې دى.

سټولټنبرګ: افغانستان لا هم ناټو لپاره تر ټولو ستر ماموريت ګڼل کېږي

ارشیف

د ناټو سرمنشي وايي، افغانستان لا هم د ناټو پوځي تړون لپاره تر ټولو ستر ماموريت ګڼل کېږي.

ينس سټولټنبرګ پرون سې شنبه په بروکسل کې په يوه خبري کنفرانس کې وويل، چې ناټو په افغانستان او عراق کې د اسلامي دولت ډلې د بيا ټوکېدلو په مخنيوي کې مهم رول لوبولى دى.

هغه وايي: "د افغانستان ماموريت چې لا هم زمونږ تر ټولو پراخ پوځي عمليات ګڼل کېږي لا دوام لري، چې د ټروريزم پر وړاندې پر مبارزه متمرکز دى، څو ډاډ ترلاسه شي چې افغانستان بيا د تروريستانو په خوندي ځاله بدل نه شي، د ناټو په نړيوال تړون کې ټول متحدان او شريکان د داعش ډلې ماتې ته ژمن دي."

د ناټو سرمنشي دا خبرې په بروکسل کې د ناټو تړون د بهرنيو چارو وزيرانو تر غونډې يوه ورځ مخکې کړې دي.

تمه کېږي د دغو چارواکو په نننۍ غونډه کې د ناټو تړون غړو هېوادونو د اجنډا پر وروستي کولو او د کتنو پر پروګرام بحث وشي.

د ډسمبر مياشتې پر دريمه او څلورمه به د ناټو په هغه سر مشريزه کې چې په لندن کې جوړېږي، د بحثونو په اجنډا کې د افغانستان موضوع هم شامله وي.

د افغانستان او ويسټ انډيز د کرکټ څلور ورځنۍ تمريناتي سیالي کوي

ارشیف

د افغانستان او ويسټ انډيز د کرکټ ملي لوبډلې نن په خپلو کې څلور ورځنۍ تمريناتي سیالي کوي.

د هندوستان په لکنو کې دغه سیالي د افغانستان په وخت نن د سهار اته بجې پيلېږي.

د کرکټ بورډ وياند فريد هوتک نن چهارشنبه په دې اړه ازادي راډيو ته وويل: "نن د افغانستان او ويسټ انډيز د کرکټ ملي لوبډلو ترمنځ څلور ورځنۍ تمريناتي لوبه کېږي، دا تمريناتي لوبه ده، تر دې وروسته د افغانستان په کوربه توب د افغانستان او ويسټ انډيز ترمنځ د نومبر په ٢٧مه ټيسټ لوبه پيلېږي، چې د ډسمبر تر لومړۍ نېټې به دوام وکړي."

د هندوستان په لکنو کې د افغانستان او ويسټ انډيز ترمنځ درې پنځوس اووره او درې شل اووره سیالۍ هم شوې دي.

د پنځوس اووره سیالیو لړۍ ويسټ انډيز، خو د شل اووره سیالیو لړۍ افغانستان ګټلې ده.

"د افغانستان امریکايي پوهنتون خوشي شوی امریکایی استاد تر درملنې لاندې دی"

کېون کېنګ (ښی) او ټیموټي وېکس نن په زابل کې طالبانو له بنده خوشي کړل. د دوی په بدل کې د افغانستان حکومت درې طالبان ازاد کړل.

د طالبانو له بنده د خوشي شوي امریکايي استاد کېون کېنګ کورنۍ رسنیو ته په یوې بیانیه کې ویلي چې ښاغلی کېنګ اوسمهال له امریکايي چارواکو سره تر درملنې لاندې دی او امریکا کې له خپلې کورنۍ سره بېرته یوځای کېدو ته ځان چمتو کوي.

په دغه بیانیه کې چې ازادي راډیو ته استول شوې، د هغه خور سټیفاني میلر د خپل ورور پر خوشي کېدو او دا چې بېرته خپل کور ته ورګرځي خوښي ښوولې ده.

د ښاغلي کېنګ کورنۍ په دغې بیانیې کې د افغانستان له حکومت، ولسمشر اشرف غني، ولسمشر ډونالد ټرمپ، د امریکا د بهرنیو چارو له وزیر مایک پامپیو، د امریکا د ملي امنیت سلاکار رابرټ اوبراین، د افغانستان د سولې لپاره د امریکا له ځانګړي استازي زلمي خلیلزاد او نورو هغو کسانو څخه چې د کېون کېنګ په خوشي کېدو کې ښکېل وو، مننه کړې ده.

عمران خان د افغانستان امریکايي پوهنتون د دو استادانو خوشي کېدو هرکلی وکړ

د پاکستان صدراعظم عمران خان

د پاکستان صدراعظم عمران خان د افغانستان امریکايي پوهنتون د دوو استادانو د خوشې کېدو هرکلی وکړ.

ښاغلي خان په خپله ټویټرپانه د ښکېلو خواوو چې دغه کار یې ممکن کړی ستاینه کوي او وايي چې پاکستان د افغانستان د جګړې له پاره د یوې سیاسي حل‌لارې د موندلو په هدف د خپلې پالېسۍ د یوې برخې په توګه، د دغو استادانو د خوشې کېدو اسانتیا برابره کړې ده.

عمران خان زیاتوي، موږ هیله‌من یو چې دغه ګام د ټولو ښکېلو لورو د ډاډ لامل شي، څو د سولې بهیر بیا ورغوي.

د عمران خان په دغه ټویټ کې راغلی چې پاکستان به د سولې بهیر لپاره د اسانتیاوو برابرولو ته ژمن پاتې شي.

نور راوښيه

XS
SM
MD
LG