د لاسرسي لېنکونه

تازه خبر
جمعه ۲۴ لړم ۱۳۹۸ کابل ۱۲:۲۷

خبرونه

د یونان "نوی ډیموکراسي ګوند" د ایتلافي حکومت د جوړولو خبرې کوي

د یونان محافظه کار ګوند ( نوې ډیموکراسي) په پارلماني انتخاباتو کې له بریالیتوب سره سم، د یوه ایتلافي حکومت د جوړولو لپاره خبرې پیل کړې دی.

دې ګوند ویلي دي، چې له نړیوالو پور ورکونکو سره خبرو او جوړجاړي ته په درناوي به پرمخ ځي.

رپوټونه وايي، چې د دې ګوند له بریالي کیدو سره سم په اروپايي او اسیايي مارکیټونو کې د ایرو نرخ لوړ شو .

د یونان د نوې ډیموکراسي ګوند مشر نن وویل ، چې دا هیواد نور یوه قیقه وخت هم نه شي ضایع کولای .

ده وویل، چې په بیړني ډول د سپما د پلان د عملي کولو لپاره د اروپايي اتحادیې ۱۳۰ ملیاردي پور ته اړتیا ده.

ده وویل، چې د دې ګوند بری په اروپايي اتحادیه کې د پاتې کیدو لپاره د یونانیانو لیوالتیا څرګندوي.

د اروپايي اتحادیې مشر هرمن وان رومپوي ویلي دي، چې له یونان سره مرستې ته تیار دی .

″اوس باید د حل لپاره موجود پروګرام عملي کړو . موږ د یونانیانو د اقتصادي ودې او د کارونو د زیاتولو لپاره پردې پلان حساب کولای شو. موږ دې هدف ته د رسیدو لپاره دیونان له خلکو سره مرستې ته تیار یو . ″

د یونان په پارلماني انتخاباتو کې بل عمده ګوند سریزا ویلي وو، چې د سپما او اصلاحاتو له پلان سره به مخالفت ته دوام ورکوی.

د ورځې تازه خبرونه دلته ولولئ

کرکټ: افغانستان ویسټ انډیز ته لومړۍ شل اووریزه لوبه وبایلله

ارشیف

د افغانستان د کرکټ ملي لوبډلې د ویسټ انډیز پر وړاندې د درېیو شل اووریزو سیالیو د لړۍ لومړۍ لوبه د ۳۰ منډو په توپیر وبایلله.

دا لوبه پرون د نومبر په ۱۴مه د هندوستان د لکنوو ښار په لوبغالي کې وشوه. ویسټ انډیز لوبه پیل کړه او افغانستان ته یې د ۵ لوبغاړو په سوځېدو د ۱۶۵ منډو هدف وټاکه.

افغان لوبغاړو د پام وړ لوبه ونه کړه. حضرت الله ځاځي په ۲۹ بالونو ۲۳، اصغر افغان په ۲۱ بالونو ۲۵، نجیب الله ځدراڼ په ۲۲ بالونو ۲۷ او فرید احمد په ۱۵ بالونو ۲۴ منډې وکړې.

افغان لوبډلې مخکې له ویسټ انډیز سره درې یو ورځنۍ لوبې هم کړي چې درې واړه یې بایللې دي. د دواړو لوبډلو ترمنځ دوهمه او دریمه شل اووریزه لوبه به د شنبې او یکشنبې په ورځو وي.

اندرابي: داعش ډلې افغانستان کې ماته خوړلې ده

د کورنیو چارو وزارت سرپرست مسعود اندرابي

د ننګرهار ولایت اچین ولسوالي او یوشمېر نورې سیمې د داعش ډلې ځالې ګڼل کېدې، خو د کورنیو چارو سرپرست وزیر مسعود اندرابي د یکشنبې په ورځ وویل چې داعش ډلې په افغانستان کې ماتې خوړلې ده.

د ننګرهار ولایت په شېرزاد ولسوالۍ کې د طالبانو اړوند یو زندان او یو کلینیک د دولتي ځواکونو په عملیاتو کې ویجاړ شوي دي.

د ننګرهار د والي ویاند عطاوالله خوږیاڼي ازادي راډیو ته وویل: "د عملیاتو پرمهال په زندان او کلینیک کې څوک نه و، نو ځکه څوک نیول شوي یا ازاد شوي نه دي، خو مخکې هغه کسان چې دوی نیول یا به یې ځورول له همدې زندانه به یې کار اخیست."

طالبانو تراوسه په دې اړه څه نه دي ویلي.

د ښاغلي خوږیاڼي په خبره، په شېرزاد ولسوالۍ کې د طالبانو پرضد عملیات له دوو اونیو راهیسې روان دي.

سټولټنبرګ: ناټو د افغانستان د امنیتي ځواکونو مرستې ته دوام ورکوي

سټولټنبرګ داسې مهال دا خبرې وکړې چې کې په داسې حال کې چې د امریکا د بهرنیوچارو وزیر مایک پومپیو په څنګ کې ولاړ و.

د ناټو عمومي منشي وايي، دغه تړون د افغانستان له دفاعي او امنیتي ځواکونو سره مرسته کوي او روزي یې، ترڅو دا خبره یقیني کړي چې د اسلامي دولت (داعش) ډله بیا هېڅکله په افغانستان کې ځاله نه کوي.

یینس سټولټنبرګ پرون (نومبر ۱۴مه) د داعش ډلې پرضد ائتلاف کې د شاملو ۳۰ هېوادونو د چارواکو په ګډون په واشنګټن کې په یوه غونډه کې وویل، ناټو او متحده ایالاتو موافقه کړې چې د دوستو هېوادونو د پوځي ځواکونو د وړتیا لوړولو لپاره به هڅو ته دوام ورکوي، ترڅو د تروریزم پرضد مبارزه کې پیاوړي شي.

د ناټو عمومي منشي د داعش ډلې د مشر ابوبکرالبغدادي وژل کېدل یو مهم پرمختګ وباله او زیاته یې کړه چې دا ډله به هغه ځای بیا هېڅکله ترلاسه نه کړي چې په سوریه او عراق کې له ماتې وروسته یې په افغانستان کې ځان ته موندلی و.

ګرجستان کې خلکو د پارلمان د پرېکړې پرضد اعتراض وکړ

معترضانو په تېر دوبي کې د انتخاباتو په قانون کې د اصلاحاتو غوښتنه کړې وه.

زرګونو کسانو پرون د ګرجستان په پلازمېنه تبلیسي کې د پارلمان د هغې پرېکړې پر وړاندې اعتراض وکړ چې د انتخاباتو په قانون کې یې د اصلاحاتو وړاندیز رد کړ.

د انتخاباتو په قانون کې د اصلاحاتو غوښتنه معترضانو په دوبي کې کړې وه، خو وکیلانو پرون د نومبر په ۱۴مه په اساسي قانون کې د متناسب انتخاباتي سیسټم طرحې ته د اړتیا وړ ۱۱۳ رایې ورنه کړې او په دې توګه یې رد کړه.

د اپوزیسیون پلویان او فعالان وروسته په تبلیسي کې د پارلمان مخې ته راټول شول، د ښار عمومي لاره یې بنده کړه او د حکومت د استعفی او د نویو پارلماني انتخاباتو غوښتنه یې وکړه.

پولیسو قهرجن مظاهره چیان هغه مهال په ربړي ګولیو وویشتل او اوبه یې پرې وشیندلې چې هغوی پارلمان ته د ننوتو هڅه وکړه او په دې ترڅ کې له ۲۴۰ زیات کسان ټپیان شول.

کلیفورنیا کې د ښوونځي دوه زده کوونکي په ډزو ووژل شول

په دې ډزو مشکوک زده کوونکی چې ټپی دی، نیول شوی او ډاکټران وايي چې حالت یې نازک دی.

یوه شپاړس کلن هلک پرون د امریکا متحده ایالتونو په کلیفورنیا کې په یوه لېسه کې دوه زده کوونکي په ډزو ووژل او درې نور یې ټپیان کړل.

چارواکي وايي، دا پېښه پرون په سانتا کلاریتا ښارګوټي کې د درسي ساعت له پیلېدو څو دقیقې مخکې رامنځته شوه.

په دې ډزو مشکوک زده کوونکی چې ټپی دی، نیول شوی او ډاکټران وايي چې حالت یې نازک دی.

د پولیسو یوه چارواکي ویلي، یوه ۱۶ کلنه نجلۍ او یو ۱۴ کلن هلک چې په دې ډزو کې ټپي شوي وو، وروسته په روغتون کې ساه ورکړه. دوه نجونې چې یوه یې ۱۵ کلنه او بله ۱۴ کلنه ده او یو ۱۶ کلن هلک په ډزو کې ټپیان شوي دي.

ولادیمیر پوتین: ډونالد ټرمپ سره د لیدو پلان نه لرم

روسیې د امریکا ولسمشر ډونالد ټرمپ ته بلنه ورکړې چې راتلونکی مې په نهمه پر فاشیزم د بریا کلیزې په مناسبت مسکو کې په جوړېدونکو مراسمو کې ګډون وکړي.

د روسیې ولسمشر ولادیمیر پوتین وايي، له خپل امریکایي سیال ډونالد ټرمپ سره د لیدو هېڅ کوم پلان نه لري، خو هیله مند دی چې د امریکا ولسمشر پر فاشیزم د بري کلیزې په مناسبت راتلونکی کال مسکو ته سفر وکړي.

پوتین په یوه خبري غونډه کې د فاشیزم پرضد د امریکا ونډه د پام وړ وبلله او ویې ویل، د مې نهمې بریا د نمانځنې په مناسبت غونډه کې د ټرمپ ګډون مناسب کار دی.

ښاغلي پوتین زیاته کړه: "فکر کوم د هغه هېواد د مشر راتګ به ډېر پرځای او مناسب کار وي چې د نازیزم پرضد جګړه کې یې د پام وړ برخه اخیستې. که څه هم دا زموږ کار نه دی، که د امریکا ولسمشر دلته راشي، موږ به حتما په مسکو کې سره وګورو او خبرې به وکړو."

پوتین په داسې حال کې ټرمپ ته د مسکو د سفر بلنه ورکوي چې له روسیې سره د امریکا او د هغه د متحدانو اړیکې د اوکراین او سوریې د کړکېچونو او یو لړ نورو مسایلو له کبله ترینګلې دي.

ولسمشر ټرمپ تېره اونۍ وویل چې پر فاشیزم د بریا د کلیزې په مراسمو کې د ګډون لپاره د پوتین د بلنې په اړه غور کوي، خو ده زیاته کړه چې دا مناسبت له یو مهم سیاسي فصل سره هم مهاله دی او ځکه ډاډه نه دی چې ګډون به په کې وکړي.

روسیې د سوریې هغه ښار کې د هلیکوپټرو بېس جوړ کړی چې امریکایان ترې ووتل

آرشیف

روسیې نن د نومبر په ۱۴مه اعلان وکړ چې د سوریې په شمال ختیځ کې یې په هغه ښار کې د هلیکوپټرو بیس جوړ کړی چې تېره میاشت امریکایې سرتېري ترې ووتل. دا ښار قمیشلي نومیږي.

زویزدا ټلویزیوني چینل چې د روسیې د دفاع وزارت اړوند دی، د پوځي هلیکوپټرو انځورونه خپاره کړي چې دغه مرکز ته رسیدلي دي.

دا مرکز د پانڅیر په نوم له ځمکې څخه هوا ته په ویشتونکو توغندویي سیستمونو باندې ساتل کیږي.

په رسېدلو هلیکوپټرو کې دوه ام‌ای-۳۵ ډوله جنګي او یوه ام‌ای-۸ ډوله پوځي ترانسپورتي هلیکوپټره ده.

د دغه ټلویزیون یوه نطاق دا یوه تاریخي شېبه وبلله او ویې ویل: "سر له همدې ورځې به زموږ د هوایې چلند ډلې په دایمي توګه د قمیشلي ښار په هوایې ډګر کې عملیات کوي."

روسیې تر دې وړاندې د سوریې او ترکیې ترمنځ پولو ته نزدې سیمو کې په پوځي هلیکوپټرو ګزمې پیل کړې، ترڅو په سیمه کې روسي پولیس خوندي کړي.

عراق کې حکومت ضد اعتراضونه؛ څلور کسان وژل شوي او لسګونه ټپیان دي

دا مرګ ژوبله د تحریر څلورلاري ته نژدې په خیلاني سیمه کې رامنځته شوې، هغه ځای چې له اوونیو راهیسې د اعتراضونو شاهد دی.

عراقي چارواکي وایې، په پلازمېنه بغداد کې د امنیتي ځواکونو او حکومت ضد مظاهره کوونکو ترمنځ نښتو کې نن څلور تنه وژل شوي او ۶۲ نور ټپیان شوي دي.

دا خبره روغتیایي او امنیتي چارواکو د نوم نه ښودلو په شرط کړې ده.

دا مرګ ژوبله د تحریر څلورلاري ته نژدې په خیلاني سیمه کې رامنځته شوې، هغه ځای چې له اوونیو راهیسې د اعتراضونو شاهد دی.

دغه اعتراضونه تر ډېره په پلازمېنه بغداد او نورو جنوبي شیعه مېشتو سیمو کې شوي دي.

د اکټوبر له لومړۍ نېټې څخه چې لسګونو زرو کسانو دا اعتراضونه پیل کړل، تراوسه لږ تر لږه ۳۲۰ تنه وژل شوي او زرګونه نور ټپیان شوي دي.

مظاهره کوونکي پر پراخو درغلیو، بیکارۍ او د حکومت له خوا پر کمزورو لومړنیو خدماتو انتقاد لري.

ټرمپ د ترکیې له خوا د روسي اس-۴۰۰ توغندويي دفاعي سیسټم پېرل جدي ستونزه وبلله

ټرمپ او اردوغان په یوه خبري کنفرانس کې راڅرګند شول

د امریکا ولسمشر ډونالډ ټرمپ وایې، د ترکیې له خوا د روسې "اس ۴۰۰" د توغندیو دفاعي سیستم پیرل یوه جدي ستونزه رامنځته کوي او هیله یې وښوده چې دا ستونزه هواره شي.

ولسمشر ټرمپ پرون (نومبر ۱۳مه) له خپل ترکي سیال رجب طیب اردوغان سره د لیدو پر مهال دا موضوع یاده کړه. ښاغلي ټرمپ دا لیدنه ډېره عالي او رغوونکې وبلله.

د ترکیې او امریکا ولسمشران داسې مهال په واشنګټن کې سره ګوري چې د دواړو هېوادونو اړیکي چې پخوا ښې وې، اوس ترینګلې شوې دي.

دا اړیکي هغه مهال لا خرابي شوې چې انقرې د سوریې په شمال ختیځ کې د کردانو پر وړاندي پراخ پوځي عملیات پیل کړل. امریکا په سوریه کې د کرد ملېشو ملاتړ کوي.

ولسمشر ټرمپ هغه مهال له خپل ترکي سیال څخه په یوه غیرډیپلوماتیک لیک کې غوښتي وو چې د ډېرې وینې توییدنې مخه ونیسي.

واشنګټن وایې اس ۴۰۰ توغندویې دفاعي سیستم د ناټو د دفاعي وسایلو سره مطابقت نه لري.

د ترکیې ولسمشر هم د اس ۴۰۰ راکټونو د پېرلو موضوع د هواري لپاره له امریکا سره د خبرو پر اړتیا ټینګار وکړ او ویې ویل چې انقره چمتو ده امریکایې پټرویټ راکټونه هم وپیري، خو که مطلوب شرایط ورته وړاندې شي.

په خوست کې چاودنې یو ماشوم وژلی او دوه کسان‌یې ټپیان کړي

د افغانستان په جنوب ختیځ ولایت خوست کې سیمه‌ییز چارواکي وايي، د صبریو او یعقوبیو ولسوالۍ کې د ماین چاودنې یو ماشوم وژلی او دوه کسان‌یې ټپیان کړي دي.

د خوست د صبریو او یعقوبیو ولسوال عبدالحی ځاځي ازادي راډیو ته وویل چې چاودنه نن سهار (عقرب ۲۳مه) د دې ولسوالۍ په یوه بازار کې شوې ده.

هغه وویل: "د سهار لسو بجو شااوخوا یو بم چې په موټرسایکل کې ځای پر ځای شوی وو، د ملکي خلکو له موټر سره چاودلی دی. په دې پېښه کې دوه ملکيان ټپیان دي چې د درملنې لپاره روغتون ته لېږل شوي او یو نهه کلن ماشوم وژل شوی دی."

تر اوسه چا د دې چاودنې مسؤلیت نه‌دی منلی.​

ایران کې د موټرو ټکر کې ۲۸ افغان کډوال مړه شوي

ارشیف

د ایران په جنوب ختیځ کې د دوو موټرو د ټکر له کبله ۲۸ افغان کډوال مړه شوي دي.

د ایران نیمه دولتي خبري اژانس ایلنا راپور ورکړی چې ۲۱ نور کسان په دې پېښه کې ټپیان شوي دي.

دا پېښه نن سهار وختي (عقرب ۲۲مه) د سیستان او بلوچستان ولایت په خاش ښارګوټي کې شوې ده.

دا سیمه تر ډېره په غیر قانوني ډول د افغان کډوالو د قاچاق لپاره کارول کېږي.

د ناخوندي نقلیه وسایطو، کمزورې بېړنیو خدماتو او هم د ټرافیکي قوانینو د نه‌مراعاتولو له کبله ایران د نړۍ په سطح تر ټولو بده ټرافیکي سابقه لري.

په ایران کې هر کال په اوسط ډول شااوخوا ۱۷۰۰۰ کسان ټرافیکي پېښو کې مړه کېږي.

"د لومړنیو پایلو په اعلان کې ځنډ د ټاکنو کمېسیون نیمګړتیا نه‌ده"

د ټاکنو کمېسیون یوه ویاند ذبیح الله سادات

د افغانستان د انتخاباتو خپلواک کمېسیون د ولسمشرۍ انتخاباتو د لومړنیو پایلو د ځنډ پړه د یو شمېر نوماندانو، له کمېسیون سره پر همکارو کمپنیو او ځینو نورو بنسټونو اچوي.

د دغه کمېسیون یوه ویاند ذبیح‌الله سادات نن (عقرب ۲۳مه) ازادي راډیو ته وویل: "د خلکو اندېښنې پر ځای دي او حق لري چې انتقاد وکړي، خو بل اړخ ته که وګورئ، موږ په دې انتخاباتو کې ټکنالوژي وکاروله د دې لپاره اړونده کمپنۍ معرفي شوې وه. که هغه کمپنۍ خپل مسؤلیتونه پر وخت نه‌شي ترسره کولای، یا هم د کاندیدانو له لوري پوره همکاري نه‌کېږي او د پروسې پر وړاندې خنډ جوړېږي؛ نو دا د کمېسیون نیمګړتیا نه، بلکې د هغو نهادونو نیمګړتیا ده چې په لوی لاس غواړي دا پروسه نوره هم وځنډېږي."

یو شمېر کابل ښاریانو اندېښنه وښوده چې د انتخاباتو کمېسیون ورځ تر بلې د پایلو ځنډولو سره د خلکو باور زیانمنوي.

دا دوهم ځل دی چې د ولسمشرۍ انتخاباتو د لومړنیو پایلو اعلان ځنډېږي .

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

دغه کمېسیون پرون ناوخته وویل چې د تخنیکي ستونزو او نورو مسایلو له کبله نه‌شي کولای پر ټاکلي وخت دا پایلې اعلان کړي.

د ۱۳۹۹ مالي کال بودجه د افغانستان کابینې تصویب کړې

د افغانستان د مالیې وزارت وايي، د راتلونکي ۱۳۹۹ مالي کال د بودجې مسوده جوړه او د کابینې له‌خوا تأیيد شوې.

د دې وزارت ویاند شمعروز خان مسجدي د پنجشنبې په ورځ (عقرب ۲۳مه) ازادي راډيو ته وویل، د ۱۳۹۹ مالي کال ټوله بودجه ۴۲۸ میلیارده او ۳۸۰ میلیونه افغانۍ ده.

د ښاغلي مسجدي په خبره، په دې کې ۲۸۹ میلیارده‌یې عادي او ۱۳۹ میلیارده او ۲۷۹ میلیونه‌یې پراختیايي بودجه ده.

هغه وویل، دغه بودجه متوازنه، ځواب ویونکې او د ټولنې د لومړیتوبونو په نظر کې نیولو سره ترتیب شوې ده.

ټاکل شوې دغه بودجه نن یا راتلونکې اوونۍ مشرانو جرګې ته واستول شي.

افغانستان او وېسټ انډیز کرکټ لوبډلې نن ۲۰ اوره لوبه کوي

افغانستان او وېسټ انډیز تر دې وړاندې درې یو ورځنۍ (پنځوس اوره) سیالۍ درلودې چې د نومبر په ۶مه پيل شوې، خو افغانستان درې واړه لوبې وبایللې.

د افغانستان د کرکټ ملي لوبډله به نن د نومبر په ۱۴مه، له وېسټ انډیز سره د درېیو ۲۰ اوره سیالیو لړۍ پیل کړي.

دا سیالۍ د هند په لکهنوو ښار کې کېږي.

افغانستان او وېسټ انډیز تر دې وړاندې درې یو ورځنۍ (پنځوس اوره) سیالۍ درلودې چې د نومبر په ۶مه پيل شوې، خو افغانستان درې واړه لوبې وبایللې.

د افغانستان د لوبډلې د غوراوي پلاوي مشر انډي مولز د اکټوبر په ۲۶مه اسوشیټېډ پرس ته ویلي و چې د نړیوال جام په سیالیو کې تر سختې ماتې وروسته، په هند کې دا سیالۍ افغانستان ته ډېرې مهمې دي.

د ۲۰ اوره مسابقو دوهمه لوبه به د نومبر په ۱۶مه او درېیمه به‌یې د نومبر په ۱۷مه وي.

ورپسې دواړه لوبډلې یوه ټېسټ لوبه هم لري.

انډي مولز ویلي و چې د ټسټ مېچ لوبغاړي او نېټه به د ۲۰ اوره سیالیو په پای کې اعلان کړي.

سلواکیا کې د موټرو ټکر کې ۱۳ کسان مړه شوي او ۲۰ ټپیان دي

ارشیف

د سلواکیا په لوېدیځ کې د یوې بار وړونکې لارۍ او د مسافر وړونکي بس په ټکر کې ۱۳ کسان وژل شوي او ۲۰ نور زخمیان شوي دي.

په سلواکیا کې د اوروژنې ادارې ویاندې کترینا کریزانووا ویلي چې دا پېښه پرون د نومبر په ۱۳مه، د هغه هېواد د پلازمېنې، براتیسلاوا ختيځ لور ته شوې ده.

هغې د سلواکیا سلوېنسکا راډیو ته ویلي، "په دې پېښه کې موږ ته د ۱۳ کسانو د وژل کېدو او د ۲۰ کسانو د زخمي کېدو معلومات رارسېدلي دي، خو ممکن د قربانیانو شمېر تر دې زیات وي."

د پېښې علت او د قربانیانو هویت نه‌دی څرګند شوی.​

د ولسمشرۍ ټاکنو د لومړنیو پایلو د ځنډ په اړه نن د ټاکنو کمېسیون معلومات ورکوي

په پام کې وه دغه پایلې د میزان په ۲۷ اعلان شي، خو د تخنیکي ستونزو له امله د عقرب ۲۳مې ته وځنډېدې.

د افغانستان د ټاکنو خپلواک کمېسیون به نن د نومبر په ۱۴مه، د جمهوري ریاست د ټاکنو د ابتدايي پایلو په اعلان کې د بیا ځنډ په اړه معلومات وړاندې کړي.

د دغو ټاکنو لومړنۍ پایلې باید نن اعلان شوې وی، خو د ټاکنو خپلواک کمېسیون پرون اعلان وکړ چې د ابتدایي پایلو اعلان‌یې ځنډولی دی.

د دغه کمېسون یوه ویاند عبدالعزیز ابراهیمي پرون رسنیو ته وویل، د تخنیکي ستونزو او نورو مسئلو له امله دا کار له ټاکلي مهالوېش سره سم نه‌شي کېدلائ.

دا دوهم وار دی چې د میزان ۶مې ولسمشرۍ انتخاباتو لومړنۍ پایلې ځنډېږي.

په پام کې وه دغه پایلې د میزان په ۲۷مه اعلان شي، خو د تخنیکي ستونزو له امله د عقرب ۲۳مې ته وځنډېدې.

د ټاکنو کمېسون مسئولینو ژمنه کړې چې نن (عقرب ۲۳مه) به د دې ځنډ په اړه جزئیات له خبریالانو سره شریک کړي.

د پاکستان اپوزېسیون د حکومت د پرځولو لپاره 'بي' پلان اعلان کړ

پاکستان کې د اپوزېسیون حکومت ضد مظاهره

په پاکستان کې د عمران خان د حکومت مخالفو اعتراض کوونکو پرون (چهارشنبه) اعلان وکړ چې د پلازمېنې اسلام‌اباد په لویه لار کې د دوو اوونیو اعتراضي پلتۍ پای ته رسوي، خو د هېواد نورې لارې بندوي.

دا اعتراضونه د ازادۍ د مارش په نوم د اکټوبر له ۲۷ څخه د کراچۍ له جنوبي ښاره د جمعیت علمای اسلام ګوند د مشر مولانا فضل‌الرحمن په لارښوونه پیل شول.

دوی د صدراعظم عمران خان حکومت په انتخاباتو کې په درغلۍ او د هېواد د اقتصاد په خرابولو تورنوي، خو حکومت د دوی تورونه ردوي.

پرون مولانا فضل‌الرحمن خپلو پلویانو ته وویل چې خپلو کورونو ته لاړ شي او بي (B) پلان پیل کړي.

ټاکل شوې ده چې اعتراض کوونکي د پاکستان په لویو لارو کې پلتۍ ووهي او د تګ راتګ مخه ونیسي.

ټرمپ له اردوغان سره ولیدل

(ښی-کیڼ) د ترکیې ولسمشر رجب طیب اردوغان او د امریکا ولسمشر ډونالد ټرمپ

د امریکا د متحده ایالاتو ولسمشر، ډونالد ټرمپ پرون چهارشنبه د ترکیې له ولسمشر رجب طیب اردوغان سره وکتل.

امریکا او ترکیه دواړه د ناټو غړي هېوادونه دي.

په وروستیو کلونو کې د دواړو اړیکې ترینګلې شوې دي.

خو ولسمشر ډونالد ټرمپ پرون د رجب طیب اردوغان تود هرکلی وکړ.

د امریکا د متحده ایالاتو ولسمشر ډونالد ټرمپ وویل چې په دې کتنه کې به پر دوو مهمو مسئلو چې د واشنګټن او انقرې اړیکې یې کړکېچنې کړې دي، بحث وشي چې یوه‌یې د سوریې په شمال کې د کردانو پر سیمو د ترک ځواکونو حمله او بله‌یې له روسیې د دفاعي سیستمونو اخیستل دي.

ترکیې د روان کال په دوبي کې د روسیې «اس-۴۰۰» توغندويي دفاعي سیستم تر لاسه کړ.

واشنګټن له دې سره مخالفت کړی او ویلي یې دي چې د روسیې د توغندويي ضد دفاعي سیستم له هغو سیستمونو سره اړخ نه‌لګوي چې د ناټو غړي هېوادونه‌یې لري.

روسیه کې یوه محصل پر نورو محصلانو ډزو کې یو تن وژلی درې ټپیان کړي

د روسیې د امور سیمې په مرکز بلاګوفیشچینسک (Blagoveshchensk) ښار کې نن (پنجشنبه) د یوه محصل له لوري په ډزو یو تن ووژل شو او درې نور ژوبل شول.

تاس خبري اژانس او نورې سیمه‌ییزې خبري رسنۍ وايي، ژوبل شوي کسان چې عمرونه‌یې ۱۷، ۱۹ او ۲۰ کلن دي، روغتون ته رسول شوي او د دوو جراحي عملیات شوي دي.

راپورونه وايي، کله چې پولیس امور (Amur) پوهنتون ته ورسېدل، وسله‌وال حمله کوونکي له دوهم پوړ څخه پرې ډزې وکړې.

حمله کوونکی د پولیسو په ځوابي ډزو ووژل شول.

د انتخاباتو خپلواک کمېسیون: د رأیو بیاشمېرنه ودرول شوه

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

د افغانستان د انتخاباتو خپلواک کمېسیون وايي، د ولسمشریزو انتخاباتو د رأیو د بیاشمېرنې او تفتیش بهیر ودرول شو.

د دغه کمېسیون یوه ویاند عبدالعزیز ابراهیمي ازادي راډیو ته وویل، دغه بهیر د ځینو سیاسي احزابو، نوماندانو او مدني ټولنو اعتراضونو او اندېښنو ته د رسېدنې په هدف ودرول شو.

ښاغلی ابراهیمي زیاتوي چې دغه بهیر د کمېسیون تر راتلونکي هدایت درېدلی، د هغو محلونو د تفتیش او بیاشمېرنې بهیر چې د رأیو صندوقونه‌یې پرانیستي دي او د تفتیش او څېړنې لاندې دي، له دغه امر مستثنی دی.

د انتخاباتي شکایتونو کمېسیون هم د دغه بهیر له درېدو هرکلی کوي.

د دغه کمېسیون کمېشنر او ویاند محمد قاسم الیاسي ازادي راډیو ته وویل، د ولسمشرۍ انتخاباتو د رأیو د تفتیش او بیاشمېرنې بهیر باید له یو یا دوو ورځو زیات وخت ونه‌نیسي.

غزه کې د اسرائیلو هوايي برید دوه فلسطینیان وژلي

اسرائیلو پرون د فلسطین د اسلامي جهاد ډلې یو لوړپوړی قوماندان په غزه کې وواژه.

په غزه کې د اسرائیلو په نویو هوایي بریدونو کې چې نن سهار (نومبر ۱۳مه) شوي، دوه نور فلسطینیان وژل شوي.

په دې سره پر فلسیطنیانو د اسرائیل د دوو ورځنیو بریدونو د تلفاتو شمېر ۱۲ ته ورسېد.

فلسطیني ملېشو په متقابل اقدام کې نن لا ډېر توغندي پر اسرائیل ویشتلي، خو د اسرائیل له لوري د مرګ ژوبلې راپور نه‌دی ورکړل شوی.

دا بریدونه وروسته له هغه پیل شوي چې اسرائیلو پرون د فلسطین د اسلامي جهاد ډلې یو لوړپوړی قوماندان په غزه کې وواژه.

اسرائیل وایي بها ابوالعطا پر اسرائیل د څو بریدونو په پلان کې ښکېل وو او د لا نورو بریدونو نیت‌یې هم درلود.​

طالبان: خوندي ځای ته د طالب بندیانو رسېدو پورې برمته استادان نه‌خوشې کوو

ذبیح‌الله مجاهد چې ځان د طالبانو ویاند بولي ازادي راډیو ته په یوه استولي پیغام کې دا خبره کړې ده.

طالبان وایي تر هغه به د افغانستان-امریکايي پوهنتون دوه تښتول شوي استادان خوشې نه‌کړي چې انس حقاني او دوه نور طالبان چې پرون‌یې د افغانستان حکومت د خوشې کولو اعلان وکړ، یوه خوندي ځای ته انتقال شوي نه‌وي.

ذبیح‌الله مجاهد چې ځان د طالبانو ویاند بولي نن (عقرب ۲۲مه) ازادي راډیو ته په یوه استولي پیغام کې دا خبره کړې ده.

ولسمشر محمد اشرف غني پرون د امریکايي پوهنتون د دغو استادانو د خوشې کولو په بدل کې له بګرام زندان څخه د انس حقاني او د طالبانو ډلې دوو نورو غړو عبدالرشید عمري او مالي خان د ازادولو اعلان وکړ.

ښاغلي غني وویل، دغه پرېکړه‌یې له نړیوالو شریکانو او په ځانګړې توګه له امریکا سره په مشوره او له طالبانو سره د سولې مخامخ خبرو پیلېدو په هدف کړې ده.

تر اوسه څرګنده نه‌ده چې د طالبانو دغه بندیان اوس چېرته دي، خو تېره ورځ یوې سرچینې چې نه‌یې غوښتل نوم‌یې واخیستل شي، ازادي راډیو ته وویل چې دا کسان د بګرام له زندان څخه لېږدول شوي دي.​

شمالي وزیرستان کې چاودنې ۳ پاکستاني پوځیان وژلي

ارشیف

افغان پولې ته څېرمه د خېبر پښتونخوا په شمالي وزیرستان قبایلي ولسوالۍ کې چارواکي وايي چې پر پاکستانیو پوځیانو بمي چاودنې دوی ته مرګ ژوبله اړولې ده.

د پاکستاني پوځ مطبوعاتي څانګې د سې شنبې په ورځ ناوخته په دې اړه رسنیو ته په ورلېږلي بیان کې ویلي: "په شمالي وزیرستان کې د پاکستاني پوځیانو پر موټر بمي چاودنه شوې چې لږ تر لږه ۳ پوځیان په‌کې وژل شوي او ۱ په‌کې ټپي شوی دی."

بیان کاږي، د پوځیانو پر موټر هغه مهال چاودنه شوې چې په سیمه کې یې ګزمه کوله.

د پوځ مطبوعاتي څانګه وايي، امنیتي ځواکونه تر پېښې وروسته سیمې ته رسېدلي، شااوخوا ځایونه‌یې محاصره کړي او تلاشي عملیات‌یې هم کړي دي.

شمالي وزیرستان کې افغان پولې ته څېرمه پرته قبایلي سیمه ده چې ویل کېږي یو مهال کې د تحریک طالبان پاکستان او نورو کورنیو او بهرنیو ترهګرو ډلو مرکزونه وو چې بیا وروسته په‌کې پاکستاني پوځ پراخ پوځي عملیات وکړل.

په دې وروستیو کې په دغه سیمه کې پر پاکستاني ځواکونو پر داسې مهال بریدونه زیات شوي چې د پاکستان پوځ ادعا کوي، په قبایلي سیمو کې یې د پوځي عملیاتو پر مهال ترهګر او د هغوی مرکزونه له‌منځه وړي دي.

د یادونې وړ ده چې په شمالي وزیرستان کې پر پاکستاني پوځیانو د تازه برید مسؤلیت لا کومې وسله‌والې ډلې پر غاړه نه‌ده اخیستی.

د ترکیې او امریکا ولسمشران واشنګټن کې سره ګوري

ارشیف

تمه ده چې د ترکیې ولسمشر رجب طیب اردوغان نن په واشنګټن کې د امریکا د متحده ایالاتو له ولسمشر ډونالد ټرمپ سره وګوري.

رجب طیب اردوغان پرون واشنګټن ته ولاړ.

د ترکیې ولسمشر تر دې مخکې په ۲۰۱۶ میلادي کال کې واشنګټن ته تللی و چې بیا د ده ساتونکو د کردي مظاهره کوونکو پر یوې ډلې د ترکیې د سفیر کور ته نږدې حمله وکړه.

اردوغان په داسې وخت کې د امریکا متحده ایالاتو ته سفر کړی دی چې د ناټو د دغو دوو غړو هېوادونو اړیکې چې له ۷۰ کلونو راهیسې ښې وې، کړکېچن شوې دي.

رجب طیب اردوغان واشنګټن ته تر تګ مخکې د دې سفر په اړه د دوشنبې په ورځ په انقره کې ویلي و چې دا سفر په داسې وخت کې کوي چې د ترکیې او د امریکا د متحده ایالاتو اړیکې ښې نه‌دي.

کلېنټن د روسیې د نفوذ په اړه د بریتانیا حکومت په وروستۍ پرېکړه انتقاد وکړ

هېلري کلېنټن د بريتانيا د حکومت دغه پرېکړه"نه توضيح کېدونکې او شرموونکې" هم وبلله.

د امريکا د جمهوري رياست د تېرو ټاکنو کانديدې هېلري کلېنټن د بريتانيا د حکومت پر وروستۍ پرېکړه انتقاد وکړ.

د بريتانيا حکومت پرېکړه کړې چې د دغه هېواد پر سياستونو د روسيې د نفوذ په اړه پارلماني راپور به نه‌خپروي.

خو هېلري کلېنټن د بريتانيا د حکومت دغه پرېکړه "نه توضيح کېدونکې او شرموونکې" وبلله.

مېرمن کلېنټن چې د امريکا د جمهوري رياست د ٢٠١٦م کال په ټاکنو کې بريالۍ نه‌شوه، دا څرګندونې پرون په يوه مرکه کې کړې دي.

هغې ويلي، د بريتانيا ولس اړتيا لري چې د ډسېمبر پر ١٢مه په عمومي ټاکنو کې تر برخې اخيستو مخکې، د پارلمان د استخباراتي او امنيتي کمېټې پر موندنو پوه شي.

د مېرمن کلېنټن دا تبصره په داسې حال کې خپرېږي چې د بريتانيا د اپوزېسيون کارګر ګوند ويلي چې پر دوى دوه انټرنټي حملې شوې دي.

په پام کې وه د بريتانيا د پارلمان راپور د امنيتي ادارو له‌خوا خپور شي، خو د صدراعظم بورېس جانسون دفتر يې په عامه خپرېدل تصويب نه‌کړل.

حکومت ويلي، د ملي امنيت ملحوظاتو ته په پام سره دغه راپور نور وخت اړتيا لري چې تر خپرېدو مخکې بيا وکتل شي.

نور راوښيه

XS
SM
MD
LG