د لاسرسي لېنکونه

تازه خبر
شنبه ۲۷ تله ۱۳۹۸ کابل ۰۱:۴۰

"د افغانستان جګړه په جنګېدو نه ارزي"


د افغانستان لس کلنه جګړه په امریکا کې اوس څو محدود پلویان لري، خو یو وختې هغه جګړه بلل کېده چې امریکايي چارواکو به ویل، باید دوام ورکړل شي.

وروسته له دې چې د ناټو ځواکونو د یکشنبې په ورځ هغه سرتېری چې په پنجوايي ولسوالۍ کې یې پر ملکي وګړو دزې کړې وې ونیو جمهوري غوښتونکو او دیموکراتانو یوځل بیا په یوه خوله تر 2014 کاله او حتی له هغه مخکې له افغانستانه د امریکايي ځواکونو پر وتلو ټینګار وکړ.

په سنا کې د اکثریت دیموکراتانو مشر هري ریډ وویل چې امریکايي پوځیان په افغانستان کې تر سخت فشار لاندې دي. ده زیاته کړه، د افغانستان جګړه هېڅ یوې مخکینۍ جګړې ته چې امریکایان پکې ښکېل وو، نه ده ورته. سناتور ریډ وویل، موږ لکه څنګه چې ولسمشر ویلي، له دې هېواده وځو او دا سم کار دی.

ډېر شمېر جمهوري غوښتونکي د 2008 کال برعکس چې له عراقه په بېړه د امریکایي ځواکونو له وتلو سره مخالف وو، اوس له افغانستان سره د خپلو ژمنو دوام ته چندان لېوال نه دي.

د امریکا د ولسمشرۍ په انتخاباتو کې یو جمهوري غوښتونکی کاندید نیوټ ګېنګریچ وايي، له هغې سیمې سره چې افغانستان پکې پروت دی په سلوک کې کومه ژوره نیمګړتیا شته چې وضع د دې پرځای چې ښه شي، په خرابېدو ده. ګنګریچ زیاته کړه، موږ د خپلو ښځو او نارینه وو ژوند د هغه ماموریت لپاره په خطر کې اچولی چې که یې سپینه راباندې وایئ، شونی نه دی.

د هغې نظرپوښتنې له مخې، چې د امریکا ABC خبري آژانس او واشنګټن پوست ورځپاڼې کړې او نتایج یې د یکشنبې په ورځ خپاره شول په سلو کې 60 امریکایانو ویلي دي چې د افغانستان جګړه په جنګېدو نه ارزي او په سلو کې 55 امریکایانو ویلي، اکثریت افغانان له هغه څه سره مخالف دي چې امریکا غواړي په افغانستان کې یې ترسره کړي.

د افغانستان د کړکېچ پراختیا د سپینې ماڼۍ د جګپوړوسلاکارانو لپاره دا پوښتنه پیدا کړې ده چې آیا ولسمشر اوباما به د روان کال په مني کې د انتخاباتو په درشل کې د 2014 کال ترپایه افغان ځواکونو ته د امنیتي مسوولیتونو د سپارلو په مقصد پر ناټو فشار راوړي کنه.
XS
SM
MD
LG