د اطلاعاتو او کلتور د وزارت مشاور واحد نظري وویل، دوي د هېواد له کابو پنځه ویشتو ولایتونو مشهور سیمه ایز سندرغاړې، هنر مندان او سازغږوونکې دغه سیمینار ته بللې، تر څو د دوي، نظریات، انتقادونه او ستونزې یو له بل سره شریکې او داسې لارې چارې غوره کړي چې د هېواد اصیله سیمه ایزه موسیقي بیرته را ژوندی شي:
«زموږ پر فرهنګ، فرهنګي تیری روان دی، موږ غواړو په کابل او ولایتونو کې د محلي موسیقۍ هنرمندان او سازغږوونکو ولټوو، راټول یي کړو، یو مرکز ورته جوړ کړو، یو قانون ورته تصویب کړو، ترڅو د دوي ستونزې وڅیړو، د مرستې لارې ورته اوارې کړو او بیرته یي فعال کړو، ترڅو ملي موسیقۍ چې زموږ رنګ او بوي لري بیرته را ژوندی کړو.»
په جوړ شوي سیمینار کې، د موسیقۍ د متخصصینو له خوا د دې موسیقۍ پر تاریخ، ودې، ستونزو او زوال، په لسګونوعلمي مقالې هم ولوستل شوې.
د افغانستان د هنرمندانو د اتحادیي ريیس حیات ګردیزي وویل دا د دولت او نورو بهرنیو بنیادونو کار دی، چې هنرمندانو سره مرستې وکړي
سندرغاړو ویل، ستونزو دومره بوخت ساتلي چې نږدې ده ، له زده کړې ښکلي فن او هنر څخه لاس واخلي.
دوي ویل ، دولت له دوي او د دوي د هنر د خوندي کېدو لپاره مخکې له دې هم ژمنې کړي، خو پوره کړي یي نه دي، دوي هیله ښوده چې دولت دا ځل په دې لاره کې عملي ګامونه واخلي.
