د لاسرسۍ وړ لېنکونه

تازه خبر
سه شنبه ۱ چنګاښ ۱۴۰۰ کابل ۰۶:۴۹

افغانستان

م.م: افغان دولت او مخالفین دې د ملکي خلکو ژوند له پامه ونه غورځوي

د افغانستان لپاره د ملګرو ملتونو ځانګړي استازي په هيواد كې د جګړو له ښكيلو خواوو غوښتي، چې د ملكي خلكو ژوند ته ډيره پاملرنه وكړي.

سټيفن ډيمسټورا نن د يوې اعلاميې په خپرولو سره ويلي، چې د ملكي خلكو ساتنه بايد د ښكيلو خواوو له لومړيتوبونو څخه وي.

دا څرګندونې په داسې حال كې كيږي، چې نړيوالو ځواكونو د روانې اونۍ د دوشنبې په ورځ په كندهار كې د ملكي كسانو د سورلۍ په موټر ډزې وكړې چې له امله يې څلور تنه ووژل شول او اتلس نور ټپيان شول.

د افغانستان لپاره د ملګرو ملتونو د سرمنشي ځانګړي استازي د كندهار د دې پيښې په اړه له تحقيقاتو هركلى كړى او د ملكي تلفاتو د مخنيوي په اړه يې د بهرنيو ځواكونو دعمومي قومندان جنرال ميك كرېسټل لارښود ستايلى دى.

د ورځې تازه خبرونه دلته ولولئ

د میدان وردګو امنیه قوماندان: جغتو ولسوالۍ سقوط شوه

د افغانستان په نقشه کې د میدان وردګ نقشه

د میدان وردګو امنیتي چارواکي وايي، د دې ولایت جغتو ولسوالۍ د وسله والو طالبانو لاس ته لویدلې.

د دغه ولایت امنیه قوماندان سمنوال مصطفي مایار نن سې شنبه (د چنګاښ ۱مه) ازادي راډيو ته تائید کړه چې د جغتو ولسوالۍ تېره شپه د طالبانو لاس ته لویدلې.

دی وايي: "په جغتو ولسوالۍ کې زموږ د ټولو امنیتي ارګانو سرتیري موجود وو، خو په خواشینۍ سره چې هلته د دښمن نفوذي کسان وو او په دې بریالي شول چې دا خلګ تسلیمۍ ته مجبور کړي، په خواشینۍ سره باید ووایم چې تېره شپه دا ولسوالۍ سقوط شوه."

نوموړی وايي، په یاده ولسوالۍ کې ۲۳ ملي پولیس، ۴ د ملي امنیت سرتیري او ۱۳ د ملي اردو سرتیري موجود وو چې طالبانو ته تسلیم شوي دي.

مایار وايي، په ولسوالۍ کې ټول نظامي تجهیزات هم د وسله والو طالبانو لاسونو ته لویدلي دي.

د وسله والو طالبانو ویاند ذبیح الله مجاهد هم د یادې ولسوالۍ د سقوط پخلی کړی او ویلي یې دي چې ټول سرتیري ورته تسلیم شوي او مهمات هم د دوی لاسونو ته ورغلي دي.

ننګرهار کې د سوداګریزو اسنادو یو واحد مرکز پرانیستل شو

ارشیف، د جلال اباد ښار

په ننګرهار کې د سوداګریزو اسنادو یو واحد مرکز پرانیستل شو چې په دې سره به سوداګرو ته ګڼې اسانتیاوې رامنځ ته شي.

د صنعت او سوداګرۍ وزارت ویاند فواد احمدي نن سې شنبه (د چنګاښ ۱مه) ازادي راډیو ته وویل چې دغه مرکز د ننګرهار ولایت په ګمرک کې د هېواد د صادراتي توکو د اسنادو په پروسو کې د اسانتیاوو برابرولو په موخه د حکومت د پراختیایي بودجې څخه د درې میلیونه افغانیو په لګښت رامنځته شوی دی.

نوموړي وویل چې د دې مرکز پرانیسته به د سوداګرو ډېری ستونزې هوارې کړي او د اسنادو د مراحلو د بهیر وخت به هم یوې دقیقې ته را کم کړي.

د صنعت او سوداګرۍ وزات چارواکي وایي چې په ننګرهار ولایت کې د صادراتي محصولاتو د پروسې د بهیر، د یو واحد مرکز د جوړولو موخه د هېواد د صادراتو د زیاتوالي لپاره د لازمو اسانتیاوو برابرول دي.

د چارواکو په وینا چې ورته واحد مرکزونه په کابل او کندهار ولایت کې هم جوړ شوي دي.

د بدخشان د شورابک د برښنا بند کارونه بشپړ شوي

د شورابک بند

د بدخشان د شورابک د برښنا بند کارونه بشپړ شوي او ډېر ژر به ګټې اخېستنې ته وسپارل شي.

د اوبو ملي ادارې ویاند نظام الدین خپلواک نن سې شنبه (د چنګاښ ۱مه) ازادي راډیو ته وویل چې دا بند د جرمني د ۴۵ میلیونه یورو په لګښت جوړ شوی چې په درېیو توربینونو سره ۷.۵ مېګا واټه برښنا تولیدوي او د فیض اباد ښار ۲۵ زره کورنیو ته برښنا رسوي.

نوموړي وویل چې د دې بند چارې د ٥ کلونو په موده کې بشپړې شوي دي.

افغان حکومت تر دې وړاندې د کمال خان په ګډون یو شمېر نور بندونه هم ګټې اخېستنې ته سپارلي دي.

افغانستان د برښنا تولیدولو او اوبو زېرمه کولو لپاره د بندونو جوړولو مناسب طبیعي شرایط لري، خو د اوبو د نه مدیریت له امله د دغه هېواد نږدې اویا سلنه اوبه ګاونډیو هېوادونو ته بهېږي.

۲۰۵ اتل قول اردو: افغان ځواکونه د ارزګان د چورې له پوځي اډې ووتل

ارشیف، افغان ځواکونه

د ارزګان چارواکو د چورې ولسوالۍ له یوازینۍ پوځي اډې څخه د افغان ځواکونو د وتلو خبر ورکړی چې له دې سره د راپورونو له مخې دا ولسوالۍ عملاً د طالبانو لاسته لوېدلې.

په جنوب کې ۲۰۵ اتل قول اردو په یوه بیان کې ویلي چې د نظامي شورا د پرېکړې له مخې د ملکي او پوځي تلفاتو د مخنیوي لپاره یې دا اډه تخلیه کړې ده او پرسونل او تجهیزات یې له چورې ولسوالی څخه ترینکوټ ته انتقال شوي.

خبرپاڼه زیاتوي چې دې اډې د امنیت په ټینګښت کې کوم موثریت نه لاره.

د چورې ولسوالي له شااوخوا دوو اونیو راهیسي طالبانو محاصره کړي وه. پرون له دې مخکې د دې ولایت خاص ارزګان ولسوالۍ هم سقوط وکړ.

په روانه میاشت کې دا د ارزګان څلورمه ولسوالۍ ده چې د طالبانو لاسته لویږي او اوس د دې ولایت یوازې دوه ولسوالۍ- دهراود او چهارچیني پاتې دي چې هلته هم یوازې یو-یو کمپ د دولتي ځواکونو په ولکه کې دی.

هاخوا ناتایید شوي راپورونه وايي چې طالبانو د کندز ولایت علي اباد ولسوالۍ هم نیولې ده.

سیمه ییزو چارواکو په دې اړه د معلوماتو لپاره د ازادي راډیو تماسونو ته ځواب ونه وایه، خو د کندز د ولایتي شورا یوه غړي امرالدین ولي ازادي راډیو ته وویل چې د علي اباد ولسوالۍ د سقوط خبر سم دی.

وسله والو طالبانو په دې اړه څه نه دي ویلي.

ملي اردو: افغان پوځیانو بېرته د بلخ ولسوالي په خپل کنټرول کې راوسته

ارشیف، افغان ځواکونه د عملیاتو پر مهال

د افغانستان په شمال کې د ملي اردو چارواکو ویلي چې افغان پوځیانو بېرته د بلخ ولسوالي په خپل کنټرول کې راوسته.

د بلخ ولایت په بلخ ولسوالۍ باندې پرون دوشنبه (د غبرګولي ۳۱مه) د سختو نښتو راپورونه ورکړل شوي وو او طالبانو ادعا کړې وه چې دا ولسوالي یې نیولې.

په شمال کې د ۲۰۹ شاهین قول اردو ویاند حنیف رضايي ازادي راډیو ته په یوه پیغام کې وویل: "د بلخ ولسوالي هم بېرته د افغان پوځیانو کنټرول کې راغله. د لومړنیو راپورونو له مخې د افغان کمانډویانو او طالبانو په نښتو کې ۳۱ طالبان وژل شوي دي."

رضايي نه دي ویلي چې افغان پوځیانو ته څومره مرګژوبله اوښتې؟

هاخوا طالبانو پرون ادعا کړې وه چې په بلخ ولسوالۍ سربېره یې د کشنده، دولت اباد او شولګرې ولسوالۍ هم نیولي دي.

طالب جنګیالیو ان د مزارشریف ښار له دروازو سره هم عکسونه اخیستي و چې بېرته دفاع وزارت وویل، د ښار له دروازو طالبان وتښتېدل.

غني: عثمان کاکړ افغانستان کې د پردیو د لاسوهنو سخت مخالفت کاوه

عثمان کاکړ

افغان ولسمشر محمد اشرف غني ویلي، عثمان کاکړ په افغانستان کې د سولې د بهیر د ملاتړ ترڅنګ تل د پردیو د لاسوهنو سخت مخالفت کاوه.

ښاغلي غني دا خبرې د پښتون ملتپال عثمان کاکړ د مړینې په تړاو په یوه اعلامیه کې کړي.

هغه زیاته کړې چې عثمان کاکړ د ظلم پر ضد غږ پورته کړی و او مړینه یې د افغان ولس لپاره لویه ضایعه ده.

عثمان کاکړ د پښتونخوا د عوامي ملي ګوند د بلوچستان ایالتي مشر او د پاکستان پخوانی سناتور و چې د سختو ټپونو له امله څو ورځې د کراچۍ په اغاخان روغتون کې بستر او بلآخره یې پرون دوشنبه (د غبرګولي ۳۱مه) ساه ورکړه.

د عثمان کاکړ زوی خوشال کاکړ د ازادې اروپا مشال راډیو ته ویلي چې پلار یې وژل شوی: " دا مخکې له مخکې پلان شوې کیسه ده. لکه چې لالا 'عثمان کاکړ په عثمان لالا هم مشهوره و' یوه کس نیولی دی او بل پرې په سر وار کړی دی. نو پر لالا باندې یې وار کړی، حمله یې پرې کړې او لالا یې شهید یې کړ."

د عثمان کاکړ په مړینې باندې په افغانستان، پاکستان او د نړۍ په نورو سیمو کې ګڼو مېشتو افغانانو خواشیني ښودلې او د هغه مړینه یې د افغان ملت لپاره یوه لویه ضایعه یاده کړې.

د یوه افغان وګړي د وژنې په قضیه کې ۴ چکي سرتیري تورن ګڼل شوي

ارشیف، یو شمېر چکي سرتیري

څلور چکي سرتیري د یوه افغان وګړي د وژنې په قضیه کې تورن ګڼل شوي دي. چکي رسنیو پرون د رسپېکټ مجلې په حواله په دې اړه راپورونه خپاره کړي.

د راپورونو له مخې د وحیدالله په نوم دغه افغان د ۲۰۱۸ کال په اکتوبر کې د توماش پروخازکا په نوم یو چکی سرتیری په هلمند کې وواژه او دوه نور یې ټپيان کړل.

د رسپېکټ مجلې لیکلي چې تر برید وروسته وحیدالله ځان تسلیم کړ او د امریکایي، چکي او افغان پوځیانو له خوا په تحقیقاتو کې سخت ووهل شو چې لږ وروسته یې په روغتون کې یې ساه ورکړه.

دوه چکي سرتیري په تاوتریخجنو ګواښونو او بې اطاعتۍ تورن شوي او دوه نور هم له دندې په سرغړونې باندې.

د چک د برنو ښار یوه څارنوال هاینک اولما فرانس پرېس ته ویلي چې دا جنایي قضیه څېړي.

د چک جمهوریت پوځیان د ناټو په چوکاټ کې افغانستان ته تللي وو

د اشرف غني مشورتي ناسته؛ 'سوله د افغانستان دولت لومړیتوب دی'

د افغان ولسمشر محمد اشرف غني په مشرۍ د هېواد له یو شمېر سیاسي او جهادي مشرانو سره مشورتي غونډه

د افغان ولسمشر اشرف غني په مشرۍ د هېواد له یو شمېر سیاسي او جهادي مشرانو سره په هغه مشورتي غونډه کې چې نن په ارګ کې جوړه شوې وه، ټینګار وشو چې د سولې پروسه د افغانستان د دولت لومړیتوب دی او مخ په وړاندې ګامونه به‌یې د تفاهم او اجماع په رڼا کې اخیستل کېږي.

په دې اړه د ولسمشرۍ په ټویټرپاڼه کې ویل شوي چې په دې غونډه کې د امریکا متحده ایالاتو ته د افغان ولسمشر او مل پلاوي د سفر په اړه هم مشوره وشوه او هغه مهم وبلل شو.

د امریکا ولسمشر جو بایډن افغان ولسمشر اشرف غني او د افغانستان د ملي مصالحې عالي شورا رئیس عبدالله عبدالله ته واشنګټن ته د ورتلو بلنه ورکړې. د سپینۍ ماڼۍ د خبرپاڼې له مخې دغه کتنه به د راروانې جمعې په ورځ ترسره شي.

ښاغلي عبدالله د ولسمشر بایډن د دې بلنې هرکلی کړی دی.

عبدالله د دې شورا په ټویټرپاڼه کې ویلي چې دې د امریکا او افغانستان د اړیکو او په افغانستان کې د عادلانه او تلپاتې سولې د رامنځته کېدو په اړه رغنیزو غونډو او بحثونو ته سترګې په لاره دی.

سپینې ماڼۍ په خپره کړې خبرپاڼه کې له افغانستان سره د خپلو ډیپلوماتیکو، اقتصادي او بشري همکاریو ډاډ ورکړی او هم‌‌یې ټینګار کړی چې افغانان باید د جګړې د ختمولو په هدف با مفهومه خبرې وکړي.

په خبرپاڼه کې دغه‌راز ویل شوي چې متحده ایالات به د سولې د روانې پروسې بشپړ ملاتړ ته دوام ورکړي.

ولسمشر بایډن افغان ولسمشر غني او د ملي مصالحې عالي شورا مشر عبدالله داسې مهال سپینې ماڼۍ ته وربولي چې د پرېکړې له مخې یې له افغانستانه د امریکایي ځواکونو د ایستلو بهیر ګړندی پر مخ ځي.

بایډن ویلي چې د روان کال د سپټمبر تر ۱۱مې به دغه بهیر بشپړ شي، خو یو شمېر امریکایي چارواکو ویلي چې ښایي دغه بهیر تر ټاکلي وخت مخکې یعنې د راتلونکې جولای میاشتې تر نیمایي بشپړ شي.

له کله چې دغه بهیر د مې له میاشتې راهیسې پیل شوی، وسله‌والو طالبانو په افغانستان کې حملې زیاتې کړې دي.

چارواکي: د ارزګان ولایت خاص ارزګان ولسوالۍ طالبانو نیولې

ارشیف، ارزګان کې د افغان ځواکونو عملیات

د ارزګان چارواکي وایي، افغان امنیتي ځواکونه د دې ولایت له خاص ارزګان ولسوالۍ راوتلي او ولسوالي طالبانو نیولې ده.

د ارزګان د والي له دفتره په خپره شوې خبرپاڼه کې په دې اړه زیات جزئیات نه‌دي ورکړل شوي، خو یوازې دومره ویل شوي چې د افغان ځواکونو موجودیت په دې ولسوالۍ کې اغېزمن نه‌و.

په ولسي جرګه کې د ارزګان ولایت د خلګو استازي قدرت‌الله رحیمي بیا ازادي راډیو ته وویل چې په دغه ولسوالۍ کې مېشت ټول سرتېري د مرکزي او ولایتي ادارې د نه‌پاملرنې له امله تېره شپه وسله‌والو طالبانو ته تسلیم شوي دي.

ښاغلی رحیمي زیاتوي: "هلته ټول سرتېري تېر ماښام طالبانو ته تسلیم شوي، د ملي اردو په کمپ کې پاتې پولیس هم طالبانو ته تسلیم شوي. لامل يې دا دی چې هغوی نارې وهلې چې له موږ سره مرسته وکړئ، خو حکومت‌یې غږ وانه‌ورېد."

په روانه میاشت کې د ارزګان ولایت دا درېیمه ولسوالۍ ده چې د وسله‌والو طالبانو لاس ته لوېږي. له دې وړاندې ګېزاب او چنارتو ولسوالۍ طالبانو نیولې وې.

د خوست هوايي ډګر ته نړیوال پروازونه پیل شول

د خوست هوایي ډګر ته له دوبۍ لومړنی نړیوال پرواز

د خوست هوایي ډګر ته لومړنی نړیوال پرواز له دوبۍ څخه ترسره شو.

د افغانستان د ملکي هوايي چلند ادارې لوی سلاکار احمدالله فیضي ازادي راډیو ته وویل، له دوبۍ څخه د اریانا افغان هوایي شرکت الوتکې په دې پرواز کې ۹۰ تنه مسافرین خوست ته ولېږدول شول.

د خوست په ګډون د لویې پکتیا په لسګونه زره اوسېدونکي له څو لسیزو راهیسې د خلیج په هېوادونو کې اوسي او کاروبارونه سرته رسوي.

د خوست اوسېدونکي د دغه هوایي ډګر پرانیستلو ته ډېر خوښ دي.

یو یې هم اسماعیل افغان دی چې په دې لومړني پرواز کې له دوبۍ بېرته وطن راغلی.

نوموړي ازادي راډیو ته خپل احساس داسې بیان کړ: "۳۱، ۳۲ کاله مې په اماراتو کې مساپري کړې، خو دا چې په دومره لنډ وخت کې ترخپل کلي رارسېږم، داسې د خوښۍ احساس مې په ټول عمر کې نه‌دی کړی. الله تعالی دې افغانستان امن کړي."

د خوست د نړیوال هوايي ډګر مشر عبدالصمد تڼیوال وايي، د دې هوايي ډګر د ټولو برخو کار بشپړ شوی او دا مهال سل سلنه ملي او نړیوالو پروازونو ته چمتو دی.

د ده په وینا، د خوست هوايي ډګر به په نږدې راتلونکي کې د افغان ولسمشر له‌خوا رسماً پرانیستل شي او له دې ځایه به منظم ملي او نړیوال پروازونه پیل شي.

د افغانستان د فوټبال ملي ټیم کپټان د بحرین له ال حاله ټیم سره یوځای شو

د افغانستان د فوټبال د ملي ټیم کپټان فرشاد نور

د افغانستان د فوټبال د ملي ټیم کپټان فرشاد نور د یوه کال قرارداد له مخې د بحرین له ال حاله ټیم سره یوځای شو.

د افغانستان د فوتبال فدراسیون د فېس‌بوک پاڼې له مخې نور به له دغه ټیم سره د بحرین د غوره لیګونو په سیالیو کې برخه اخلي.

نوموړی د افغانستان او هند ټیمونو ترمنځ وروستۍ برخلیک ټاکونکې لوبه کې ټپي شوی و.

افغانستان دغه لوبه له هند سره مساوي کړه او د اسیایي جام لوبو بل دور ته‌یې لاره وموندله.

د میمنې ښار پر پوستو او د پشتونکوټ پر سبز سیمې بریدونه په شا وتمبول شول

ارشیف، فاریاب کې د افغان ځواکونو عملیات

د فاریاب امنیتي چارواکي وایي چې د میمنې ښار پر امنیتي پوستو او د دې ولایت د پشتون کوټ ولسوالۍ پرسبز سیمې یې د طالبانو بریدونه په شا تمبولي دي.

د دې ولایت د امنیه قوماندانۍ ویاند عبدالکریم یورش رسنیو ته نن وویل چې د طالبانو د تېرې شپې په بریدونو کې د ملا شاکر په نوم د دې ډلې د یوه سیمه‌ییز قوماندان په ګډون ۴ وسله‌وال وژل شوي دي.

طالبانو چې د راپورونو له مخې تېره ورځ میمنه محاصره کړې وه، تر اوسه د دغې ادعا په اړه څه نه‌دي ويلي.

دفاع وزارت: د تخار خواجه غار او بنګي ولسوالۍ بېرته له طالبانو ونیول شوې

ارشیف، تخار کې د افغان ځواکونو عملیات

د افغانستان دفاع وزارت وایي، په تخار ولایت کې خواجه غار او بنګي ولسوالۍ یې بېرته له طالبانو نیولې دي.

د دې وزارت مرستیال ویاند فواد امان ازادي راډیو ته وویل: "د افغان امنیتي او دفاعي او د ولسي پاڅون کوونکو د تېرې شپې د عملیاتو په پایله کې خواجه غار او بنګي ولسوالۍ په بشپړ ډول له وسله‌والو طالبانو تصفیه شوې او زموږ امنیتي ځواکونه په‌کې ځای پر ځای شول."

طالبانو تر اوسه د دغې ادعا په اړه څه نه‌دي ویلي، خو د دې ډلې ویاند ذبیح‌الله مجاهد په یوه ټویټ کې ادعا کړې چې د تخار د خواجه بهاوالدین ولسوالۍ یې په بشپړه توګه نیولې ده.

حکومت تر اوسه د دې ولسوالۍ د سقوط خبره نه‌ده تأیید کړې.

د بلخ دولت‌اباد ولسوالۍ هم د 'وسله‌والو طالبانو' لاس ته ولوېده

ارشیف، بلخ کې د افغان ځواکونو عملیات

د بلخ ولایت دولت‌اباد ولسوالۍ هم طالبانو ونیوله.

د دولت‌اباد ولسوال جلال‌الدین قاري‌زاده ازادي راډیو ته د دې ولسولۍ د سقوط خبره تأیید کړه او ویې‌ویل طالبانو تېره شپه دا ولسوالۍ ځکه ونیوله چې د امنیتي ځواکونو شمېر په‌کې کم و او هم شاهین قول اردو په‌کې د موجوده ځواکونو هوایي ملاتړ ونه‌شو کړای.

تر اوسه کومې بلې رسمي سرچینې دا خبر نه‌دی تأیید کړی.

دا له پرون راهیسې درېیمه ولسوالي ده چې په بلخ کې یې طالبان نیسي.

نن سهار د دغه ولایت د شولګرې ولسوالۍ هم د وسله‌والو طالبانو له‌خوا ونیول شوه.

د شولګرې امنیه قوماندان سید عارف اقبالي دغه موضوع تأیید کړې ده.

وسله‌والو طالبانو تېر ماښام د شولګرې ولسوالۍ او قوماندانۍ پر ودانیو ډله‌ییز بریدونه وکړل.

قوماندان وايي چې تر ۱۲ ساعته جګړې وروسته وسله‌والو د ولسوالۍ مرکز ونیوه.

ویل شوي په دې نښته کې افغان امنیتي ځواکونو ته مرګ‌ژوبله اوښتې، خو دقیق شمېر یې نه‌دی څرګند.

د هرات چارواکي: پر چشت او ګلران ولسوالیو د طالبانو حملې په شا وتمبول شوې

ارشیف، هرات کې د طالبانو ضد د افغان ځواکونو عملیات

د هرات چارواکي د دې ولایت پر چشت او ګلران ولسوالیو د طالبانو د حملو د په شا تمبولو خبر ورکوي.

د هرات د والي ویاند جیلاني فرهاد نن ازادي راډیوته وویل چې افغان امنیتي ځواکونو پر ګلران ولسوالۍ د طالبانو د تېرې شپې برید په شا وتمباوه چې په نتیجه کې یې د نوموړي په وینا پنځه وسله‌وال مړه او پنځه نور ټپیان شول.

نوموړی په چشت ولسوالۍ کې پر افغان امنیتي ځواکونو د طالبانو په برید کې هم د پنځو وسله‌والو د وژلو او درې نورو د ټپي کېدو خبره کوي.

ښاغلي فرهاد وویل، په دواړو ولسوالیو کې په نښتو کې افغان ځواکونو ته تلفات نه‌دي رسېدلي، خو یوازې یو پولیس په چشت ولسوالۍ کې د یوه ماین په چاودنه کې وژل شوی دی.

وسله‌والو طالبانو تر اوسه د دغې ادعا په اړه څه نه‌دي ويلي.

نور راوښيه

XS
SM
MD
LG