د لاسرسۍ وړ لېنکونه

تازه خبر
پنجشنبه ۱۵ غبرګولی ۱۳۹۹ کابل ۰۴:۱۲

نړۍ

پولینډ کې د دې هېواد د ولسمشر د جسد په خښېدو کې اختلاف پیدا شوی

په پولینډ کې د دې پلان پر سر اختلافات پيدا شوي، چې د الوتکې د راپریوتو په پیښه کې وژل شوی ولسمشر او د هغه میرمن به د دغه هیواد په ستره هدیره کې چې د پولیڼد پخواني پاچایان او ملي اتلان ښخ دي خاورو ته وسپارل شي.

د پولینډ یوې مخکښې ورځپاڼې دا پلان عاجلانه او جذباتي پریکړه بللې ده د پولینډ د اوسکار جایزې ګټونکې یوه فیلمي ډایریکټر هم د دغې پریکړې مخالفت کړی او ویلي، چې د پولینډ ولسمشر عادي او ښه انسان و، خو دې ته هیڅ دلیل نشته چې هغه دې د پولیڼد د شاهانو او اتلانو تر څنګ خاورو ته وسپارل شي.

د ورځې تازه خبرونه دلته ولولئ

د مصالحې شورا له جوړېدو د اروپايي اتحادیې، بریتانیا او اسټرالیا هرکلی

د اروپا بیرغونه

د اروپايي اتحادیې یو شمېر غړو هېوادونو، بریتانیا او اسټرالیا په افغانستان کې د ملي روغې جوړې لپاره د عالي شورا د جوړېدو هرکلی کړی دی.

په کابل کې د دغو هېوادونو سفارتونو نن د جون په ۴مه، په ګډه اعلامیه کې ویلي چې دوی هیله لري چې په دې پسې به د افغانانو ترمنځ د سولې او روغې جوړې لپاره د خبرو د پیل نېټه اعلان شي.

په بیان کې ویل شوي چې دا مهمه ده چې د افغانستان حکومت او طالبان اوس په مذاکرو کې د ښځو پر رښتیني ګډون ټینګار وکړي. هغوی همداراز غوښتنه کړې چې حکومت او طالبان باید ښځې د سولې پروسې په ټولو اړخونو کې لکه د شوراګانو رهبري، د مذاکرو په ډلګیو، د مشورې په شوراګانو او د تخینکي چارو په ځانګړو ډلو کې شاملې کړي.

بیان کې ویل شوي چې هېڅ هېواد د خپلو وګړو د نیمايي برخې له مشارکته پرته بریالیتوب ته نه‌شي رسېدلائ.

روسیې سوریې ته‌ د نورو 'مېګ-۲۹' جټ الوتکو استول ومنل

د روسیې جنګي الوتکه

روسیې منلې چې سوریې ته‌یې نورې 'مېګ-۲۹' جټ الوتکې استولې دي.

دا اعلان یوه ورځ وروسته تر هغه کېږي چې د امریکا پوځ روسیه تورنه کړه چې دغه هېواد د سوریې له لارې لیبیا ته جنګي الوتکې لېږدوي او هلته د هغو جنګیالیو ملاتړ کوي چې د خلیفه حفتر په ملاتړ د حکومت په ضد جنګېږي.

په دمشق کې د روسیې سفارت پرون پر خپله ټویټرپاڼه ولیکل، د دفاعي همکاریو په ترڅ کې د جنګي الوتکو یوه بله برخه سوریې ته ورسېده.

د سوریې سنا خبري اژانس ویلي، دغه الوتکې به د سوریې پر هوا مأموریت کې برخه اخلي.

روسیه چې سوریه کې د بشار الاسد ملاتړ کوي، د لوېدیځ له خو تورنه ده چې سوریه کې یې د پوځي مأموریت پر مهال ملکیان وژلي او جنګي جرمونه‌یې ترسره کړي.

د جورج فلوید د وژلو قضیه کې ۳ نور پولیس هم شامل کړل شول

ارشیف

امریکایي څارنوالانو د یوه تور پوستي د وژلو په قضیه کې هغه درې نور پولیس هم شامل کړل چې د جورج فلوید د وژل کېدو په سیمه کې ولاړ وو.

د میناسوتا ایالت لوی څارنوال کېټ اېلسون پرون وویل، دغه پولیس د دغه تور پوستي د وژنې په ملاتړ تورن شوي او د نیولو حکم‌یې ورکړل شوی دی.

څارنوالانو د دریک چاوین د سزا په قضیه کې هم پرمختګ کړی دی، دا هغه پولیس دی چې د وژل شوي افریقایي‌الاصله امریکایي په مرۍ پښه ږدي او مرګ ته‌یې رسوي.

مظاهره‌چیانو د څارنوالانو د نوي ګام هرکلی کړی، خو د نژادي تبعیض په وړاندې پیل شوې مظاهرې د اتمې ورځې لپاره هم دوام درلود.

راپورونه وایي چې د مظاهره‌چیانو غصه لومړنیو ورځو ته په کتو، اوس یو څه کمه شوې او اکثرو ځایونو کې د امنیتي ځواکونو تر څار لاندې مظاهره کوي.

امریکا د چین مسافر وړونکو الوتکو ته د ورتګ اجازه نه‌ورکوي

ارشیف

د امریکا متحده ایالاتو پرېکړه کړې ده چې د جون له ۱۶مې وروسته به د چین مسافر وړونکو الوتکو ته اجازه ورنه‌کړي چې امریکا ته ورشي، دا فشار د دې لپاره دی چې پیکنګ امریکایي الوتکې چین ته نه‌پرېږدي.

په متحده ایالاتو کې د کرونا تر خپرېدو وروسته چین د امریکایي الوتکو پروازونه وځنډول.

د امریکا ټرانسپورت وزارت د چهارشنبې په ورځ وویل چې پیکنګ د دواړو هېوادونو ترمنځ د الوتنو له موافقې سرغړونه کړې ده.

وروسته تر دې چې پیکنګ د امریکا د دوو هوایي شرکتونو غوښتنه رد کړه چې چین ته الوتنې بیا پیل کړي، واشنګتن پرېکړه وکړه چې خپلې خاورې ته د چین الوتنې منع کړي.

یونایټډ ایرلاینز او دلتا ایرلاینز چې د کال په پيل کې یې چین ته د کرونا ویروس له امله خپلې الوتنې ځنډولې وې له پیکنګ څخه غوښتي چې بېرته به دا میاشت خپلې الوتنې پيل کړي.

د کرونا تر خپرېدو مخکې په اوونۍ کې د امریکا او چین ترمنځ ۳۲۵ پروازونه کېدل.

د امریکا ټرانسپورت وزارت وایي، د امریکایي الوتنو له درېدو سره د چین د هوایي چلند شرکتونو د فبرورۍ تر میاشتې په اوونۍ کې ۲۰ او د مارچ تر نیمایي ۳۴ پروازونه د دواړو هېوادو ترمنځ په اوونۍ کې کول.

'کراچۍ کې د لوېدلې الوتکې پیلوټ لارښوونو ته پاملرنه نه‌وه کړې'

په کراچۍ ښار کې غورځېدلې الوتکه

د پاکستان ملکي هوایي اداره وایي، د هغې الوتکې پیلوټ د کنټرول برجونو لارښوونو ته پاملرنه نه‌وه کړې چې الوتکه‌یې په کراچۍ ښار کې وغورځېده.

د پاکستان هوایي چلند (پي‌ای‌اې) ایربس الوتکه د مې په ۲۲مې له لاهوره کراچۍ ته روانه وه چې هوایي ډګر ته نږدې ولوېده. په دې پېښه کې ۹۷ کسان ووژل شول او دوه تنه وژغورل شول.

د پاکستان ملکي هوایي ادارې (پي‌ای‌اې) ته په یوه لیک کې څرګنده کړې ده چې کله الوتکه د کراچۍ په ۱۰۰ کیلومترۍ کې وه پيلوټ ته ویل شوي و چې الوتکه‌یې ډېر جګه ده، خو هغه ویلي و چې دی په اسانۍ سره الوتکه کېنولی شي.

د دې الوتکې د تور بکس معلومات په فرانسه کې څېړل کېږي. د پاکستان د ملکي هوایي چارو وزیر غلام سرور ویلي دي چې د پېښې ابتدایي راپور به د جون په ۲۲مه پارلمان ته وړاندې کړي.

روسیه کې ایکولوژیک بحران؛ سایبریا کې بېړنی حالت اعلان شو

په دوو دریابونو 'Daldykan' او 'Ambarnaya' کې د وینې په څېر سرې اوبه روانې دي.

د روسیې د سایبریا په نوریلسک سیمه کې پرون (د جون ۰۲مه) بېړنۍ حالت اعلان شو.

د مې میاشتې په ۲۹مه نېټه د ډیزل تېلو یوه نل‌لیکه د سیمې په دریاب کې وشلېده او له کبله‌یې تقریباً ۲۰ زره لیتره ډیزل د دریاب په اوبو ګډ شوو.

د ډیزل تېلو دا نل‌لیکه د سایبریا په صنعتي ښار، نوریلسک کې چې د ارکتیک پر کړۍ پروت دی، د حرارتي برېښنا د تولید د یوې کارخانې وه.

په نړۍ کې د وحشي ژوو سره د مرستې ادارې هغه عکسونه چې د سټلایټ کمرو په مرسته اخیستل شوي، خپاره کړي او په‌کې لیدل کېږي چې په دوو دریابونو 'Daldykan' او 'Ambarnaya' کې د وینې په څېر سرې اوبه روانې دي.

د چاپېریال پېژندونکي اندېښنه لري چې ډیزل تېلو زهرجنه برخه لکه بنزول، ایتول بنزین او تولین په اسانۍ له اوبو سره ګډېدلائ شي او ښايي په سیمه کې ولاړو اوبو ته د زهرجنو موادو د رسېدو مخنیوی ګران کار وي.

چاپېریال پېژندونکو د سیمې طبیعت ته ممکن زیان (ایکولوژیک بحران) بللی دی.

امریکا کې خوشې شوی ایرانی عالم تهران ته ورسېد

سیروس عسکري

د ایران دولتي خبري اژانس، ایسنا په حواله ایرانی عالم، سیروس عسکري چې د ایران د شریف پوهنتون استاد او په امریکا کې زنداني شوی و، نن د جون په ۳مه، تهران ته ورسېد.

سیروس عسګري ۵۹ کلن دی او په ۲۰۱۶ میلادي کال کې د امریکا له اوهایو پوهنتونه د یوې څېړنیزې پروژې د تجارتي رازونو د غلا په تور ونیول او بیا زنداني شو، خو هغه پر ځان لګېدلي تورونه رد کړي او د تېر کال د نومبر په میاشت کې تبرئه شوی و.

امریکا او ایران تېر کال د ډسمبر په میاشت کې چیني‌الاصله امریکايي څېړونکی ژیاو وانګ او ایراني عالم مسعود سلیماني سره تبادله کړل، خو د امریکا متحده ایالاتو او ایران دواړو دا خبر رد کړی چې سرویس عسکري تبادله شوی دی.

د امریکا له نیویارکه تر لاس انجلسه ګرځ‌بندیز اعلان شو

نیویارک

د امریکا په متحده ایالاتو کې له نیویارک تر لاس انجلسه ګرځ‌بندیز اعلان شوی دی.

ولسمشر ډونالډ ټرمپ پر والیانو فشار زیات کړی چې د ملي ګارد ځواکونه په زیات شمېر کې په کار واچوي او د داسې مظاهرو مخنیوی وکړي چې تشدد او چور او تالان په کې شوی دی.

په امریکا کې یوه پولیس د مارچ په ۲۶مه تور پوستی امریکايي سړی، جورج فلوید ووژل او له هغه راهیسې د امریکا په مختلفو ښارونوکې مظاهرې کېږي.

ډونالډ ترمپ تردې وړاندې خبرداری ورکړ چې که والیان د ملي ګارد زیات غړي موظف نه کړي، د امریکا پوځ به د وضعیت د کنټرول لپاره ور واستوي.

په واشنګټن کې زغره والو موټرو، پوځیانو او پولیسو پرون پر لارو او سرکونو مورچې نیولې وې، خو سره له دې چې د ماښام له اوو بجو ګرځ‌بندیز و، یو شمېر مظاهره‌چیان راوتلي وو.

د مظاهره چیانو شمېر د نورو ورځو به پرتله کم و او داسې ګڼل کېږي چې ښايي وضعیت د سړېدو په حال کې دى.

برلین کې د روسیې او اوکراین ترمنځ د لانجې په تړاو خبرې شوي

دیمیتري کولیبا او د هغه جرمنی سیال هایکو ماس د پاریس د تړون په هر څه ژر تطبیق سلا شوي.

د اوکراین د بهرنیو چارو وزیر دیمیتري کولیبا پرون برلین ته تللی و او هلته یې له روسیې سره د اوکرایین په لانجه او نورو مسایلو خبرې کړي.

دیمیتري کولیبا او د هغه جرمنی سیال هایکو ماس د پاریس د تړون په هر څه ژر تطبیق سلا شوي.

د پاریس تړون د روسیې او اوکراین د کړکېچ د سړولو په هدف تېر ډېسېمبر د جرمني او فرانسې په منځګړیتوب لاسلیک شو.

روسیې کریمیا ټاپووزمه چې د اوکراین د خاورې برخه وه له ځان سره الحاق کړه او اوس هم روس پلوه بیلتون پال د اوکرایین په ختیځ کې له اوکراییني عسکرو سره جنګ کوي.

د پاریس له تړون سره سره بیا هم د روسې او اوکرایین د اړیکو د ښه کېدو څرک نه لیدل کېږي.

د اوکراین په ختیځ کې له ۲۰۱۴ میلادي کال راهیسې چې د جګړو په نتیجه کې شاوخوا ۱۳ زره کسان وژل شوي دي.

یواځې د سږ کال په ۶ میاشتو کې پنځوس اوکراییني عسکر وژل شوي.

امریکا یو ایرانی ساینسپوه له دې هېواده شړلی

ایرانی ساینسپوه سیروس عسګري

ایراني چارواکي وايي ایرانی ساینسپوه سیروس عسګري د امریکا له متحدو ایالتونو اخراج او ایران ته روان شوی دی.

دوی دا نه مني، چې د عسګري خوشې کېدل دې د واشنګټن او تهران ترمنځ د بندیانو د تبادلې د موافقې یوه برخه وي.

عسګري چې د ایران د شریف صنعتي پوهنتون استاد دی، په امریکا کې نیول شوی و.

هغه په ۲۰۱۶ میلادي کال کې د امریکا د اوهایو ایالت د پوهنتون له یوې تحقیقاتي پروژې د تجارتي اسرارو د پټولو په هڅې تورن کړای شو.

نهه پنځوس کلن عسګري، چې پر ځان لګول شوي تورونه رد کړي، په نومبر میاشت کې له تورونو سپین اعلان شو.

د ایران د بهرنیو چارو وزیر محمد جواد ظریف پرون سې شنبه د خپل انسټاګرام په حساب کې د عسګري خوشې کېدل یو ښه خبر وباله.

هغه د امریکا متحد ایالتونه د څو نورو ایراني ساینسپوهانو په برمته کولو هم تورن کړ.

بلخوا د ایران د بهرنیو چارو وزارت ویاند عباس موسي ویلي، ټاکل شوې عسګري نن چهارشنبه (د جون درېیمه) ایران ته ورسېږي.

د امریکا متحدو ایالتونو د تېر کال په ډېسېمبر میاشت کې د یوه چینايي اصله امریکايي څېړونکي ژیائو وانګ په بدل کې د مسعود سلیماني په نوم یو ایرانی ساینسپوه تبادله کړی و.

د خبریالانو خوندیتوب کمېټه: امریکا دې د رسنیزو فعالانو نښه کول ودروي

له تېرې جمعې د امریکا په متحدو ایالتونو کې د مطبوعاتو له ازادۍ لږ تر لږه ۱۲۵ سرغړونې ثبت شوي دي.

د خبریالانو د خوندیتوب کمېټې له امریکايي چارواکو غوښتنه کړې، چې د اعتراضونو په اړه د راپور ورکولو پر مهال د ژورنالیستانو او د رسنیو د کارکوونکو په نښه کول بند کړي.

دغې کمېټې له امریکايي چارواکو دا هم غوښتي چې د ګرځ بندیز پر مهال دې رسنۍ مستثنی وګڼل شي.

له تېرې جمعې د امریکا په متحدو ایالتونو کې د مطبوعاتو له ازادۍ لږ تر لږه ۱۲۵ سرغړونې ثبت شوي دي.

په نیویارک کې دېره د خبریالانو د خوندیتوب کمېتې ویلي، دا سرغړونې د هغو ژورنالیستانو په وړاندې شوي، چې د یوه تورپوستي سړي جورج فلوید د مړینې په اعتراض د روانو مظاهرو په اړه یې راپورونه ورکول.

د کمېټې د پروګرامونو مشر کارولس مارتینز دي لا سیرنا وویل، د دندې پر مهال د خبریالانو په وړاندې د پولیسو له خوا سختو او کله- کله د تاوتریخجنو اقداماتو دوام ډارولي یو.

د هغو دوو فوټوژورنالیستانو یادونه هم کړې، چې په لاس انجلس کې د کار پر مهال د مې پر ۲۹مه ونیول شول.

تر خوشې کېدو یوه ورځ مخکې د ګډوډیو په پارولو تورن شوي وو.

دغه کمېټه وايي پولیسو پر لسګونو نورو ژورنالیستانو اوښلن ګاز کارولي او په ربړۍ مرمۍ یې ویشتلي دي.

روسیه: یوه نظامي پریډ کې د ګډون لپاره د امریکا دفاع وزیر بلل شوی

مارک ایسپر

د روسیې دفاع وزیر سرګي شویګو خپل امریکايي سیال مارک ایسپر ته د روسیې په یوه نظامي پرېډ کې د ګډون بلنه ورکړې ده.

د روسیې دفاع وزارت ویلي، شویګو پرون سې شنبه ناوخته له ایسپر سره په ټېلیفوني مکالمه کې هغه ته په دغو مراسمو کې د ګډون بلنه ورکړه.

د روسیې دفاع وزارت نه دي ویلي، چې ایسپر د شویګو بلنه منلې ده که څنګه.

د دویمې نړیوالې جګړې پر مهال، د نازي جرمني د ماتې د پنځه اویایمې کلیزې د لمانځنې په مناسبت پوځي پرېډ به د مسکو په سره میدان کې جوړ شي.

که څه هم روسیه هر کال دغه مراسم د مې میاشتې پر نهمه جوړوي، خو سږ کال د کورونا وبا له کبله په ځنډ جوړېږي.

د ایران پارلمان یو غړی: د نومبر میاشتې په مظاهرو کې ۲۳۰ تنه وژل شوي

د ایران د پارلمان د ملي امنیت او بهرنیو چارو د کمېټې مشر مجتبی ذالنور

د ایران پارلمان یو مهم غړي څرګنده کړې چې د نومبر په میاشت کې په دې هېواد کې د حکومت ضد مظاهرو پر مهال ۲۳۰ کسان وژل شوي دي.

دا خبر د ایرنا دولتي خبري اژانس ورکړی دی. دا لومړنی ځل دی چې د ایران د پارلمان یو غړی د تېرو اعتراضونو پر مهال د مرګ‌ژوبلې شمېرې وړاندې کوي.

د تېر کال د نومبر په میاشت کې په ایران کې د تېلو د بیو لوړېدل د حکومت پر ضد د پراخو اعتراضونو سبب شول.

په ایران کې کې د ۱۹۷۹ میلادي کال د اسلامي انقلاب راهیسې، د تېر کال د نومبر څلور ورځني اعتراضونه تر ټولو پراخ او له تاوریخوالي سره مل ګڼل کېږي.

د ایرنا خبري اژانس د راپور په حواله د ایران د پارلمان د ملي امنیت او بهرنیو چارو د کمېټې مشر مجتبی ذالنور ویلي، په دې اعتراضونو کې ۲۳۰ کسان وژل شوي چې په پنځو کې یو یې د امنیتي ځواکونو غړی و.

د نوموړي په وینا په وژل شویو کې له څلورو یو تن له لارویانو و چې اعتراضونو کې یې لاس نه‌درلود او یو شمېر یې له نږدې واټن څخه په سر او سینې په مردکیو لګېدلي وو.

ذالنور ادعا کړې چې امنیتي ځواکونو له اعتراض کوونکو څخه ډیر واټن درلود او دا کسان د امنیتي ځواکونو په ډزو نه‌دي لګېدلي.

نوموړی وايي، یو زیات شمېر کسان پر داسې مردکیو لګېدلي چې په ایران کې یې کارول معمول نه‌دي.

په دې اعتراضونو کې تر ۲،۰۰۰ زیات کسان ټپیان شوي هم وو.

د بخښنې نړیوال سازمان د دې اعتراضونو پر مهال د وژل شویو شمېر ۳۰۴ تنه بللی دی او هغوی چې له مسئلې خبر دي وايي، د ۱۲ ماشومانو په شمول په دې اعتراضونو کې ۴۰۰ کسان وژل شوي دي.

امریکا بیا د وژل شویو کسانو شمېر زر تنه بللی دی.

ټرمپ او پوتین د ۷ سترو صنعتي هېوادونو د جوړېدو په اړه خبرې وکړې

د امریکا ولسمشر ډونالډ ټرمپ او د روسیې ولسمشر ولادیمیر پوتین

کرملېن وايي د امریکا ولسمشر ډونالد ټرمپ پرون دوشنبه له خپل روسي سیال ولادیمیر پوتین سره په ټلیفوني خبرو کې د سږني کال په وروستیو کې د روسیې په ګډون د اووه سترو صنعتي هېوادونو د پراخې سرمشریزې د جوړېدو لپاره د خپل وړاندیز په اړه معلومات ورکړل.

په داسې حال کې چې ټوله نړۍ د کرونا له وبا سره لاس او ګرېوان ده، ټرمپ تېره اوونۍ وویل، د 'G7' سرمشریزه به چې د راروانې جولای میاشتې لپاره‌یې پلان کړې وه، د روان کال تر مني پورې وځنډوي او په دې غونډه کې به روسیې، اسټرالیا، جنوبي کوریا او هند ته هم د ګډون بلنه ورکړي.

کرملېن په یو بیان کې ویلي چې ټرمپ پوتین ته د خپلو نظریو یادونه وکړه، خو په دې اړه‌یې نور جزئیات نه‌دي ورکړي او دا یې هم نه‌دي ویلي چې پوتین د ټرمپ بلنه ومنله که نه.

سپینې ماڼۍ د ټرمپ او پوتین ټیلیفوني خبرې تأیید کړي او ویلي یې دي چې دواړو مشرانو د 'G7' د سرمشریزې د جوړېدو پر څرنګوالي خبرې وکړې.

د عدلي طب پایلې: جورج فلوید د خفه کېدو په نتيجه کې مړ شوی

ارشیف

د تور پوستي امریکايي جورج فلوید د عدلي طب نتیجه ښيي چې دی د غاړې خفه کېدو په نتيجه کې مړ شوی.

د دې سړي مړینې په ټوله امریکا کې له تېرو شپږ ورځو راهیسې اعتراضونه راپارولي دي.

مایک بایډن له امریکايي ډاکترانو یو دی چې د جورج فلوید د مړي معاینات‌یې کړي. ده د دوشنبې په ورځ په یوه خبري کنفرانس کې وویل چې دا سړی پر غاړې او ملا د فشار په نتيجه کې د منیاپولیس ښار د پولیسو له لاسه مړ شوی دی.

پولیسو ۴۶ کلن جورج فلوید د میناسوتا ایالت په منیاپولیس ښار کې د یوه دکان مخې ته توقیف کړی وو. د مې په ۲۵مه نېټه اخیستل شوې وېډیو ښکاروي چې فلوید پړ مخې پر ځمکه پروت دی او سپین پوستي پولیس افسر ډيریک شاوین د فلويد پر غاړه خپل ځنګون ايښی دی.

فلوید وايي چې ساه نه‌شي اخیستلی او زارۍ کوي چې پولیس‌یې له غاړې ځنګون لیرې کړي.

۴۴ کلن شاوین له هغه وروسته په قتل تورن وپېژندل شو.

د فلوید د مړینې په اعتراض کې پراخ لاریونونه پيل شول چې په ځينو ځایو کې په تاوتریخوالي واوښتل.

نور راوښيه

XS
SM
MD
LG