د لاسرسۍ وړ لېنکونه

تازه خبر
جمعه ۹ غبرګولی ۱۳۹۹ کابل ۱۱:۵۴

افغانستان

د امریکا د کانګرس یو پلاوي له ولسمشر کرزي سره وکتل

د امريكا د كانګرس يو پلاوى، چې له افغان چارواكو سره د ليدنې په هدف كابل ته راغلى له ولسمشر كرزي سره يې په بيلابيلو برخو كې د ودې او پرمختګ په اړه خبري كړې.

د افغانستان د جمهوري رياست مطبوعاتي دفتر خبر وركړى، چې د ماكس باكيس په مشرۍ د امريكا د كانګرس دې پلاوي تيره ورځ ناوخته له جمهوررييس كرزي او يوشمېر نورو دولتي چارواكو سره د ارګ په ماڼۍ كې وليدل.

په خبر كې ويل شوي، چې د دواړو خواوو ترمنځ د افغان ځواكونو د روزنې، د پوهنې د پراختيا او د تروريزم او نشه يي موادو په وړاندې د مبارزې په اړه خبرې شوي.

د امريكا د كانګرس دې پلاوي له افغانستان سره په بيلابيلو برخو كې د مرستې په دوام ټينګار كړى.

د ورځې تازه خبرونه دلته ولولئ

اروپايي ټولنې د طالبانو لخوا د تاوتریخوالو په دوام خواشينې ښودلې

د اروپايي ټولنې د بهرنۍ پالیسۍ مشر جوزیپ بوریل 

د اروپايي ټولنې د بهرنۍ پالیسۍ مشر جوزیپ بوریل د طالبانو له خوا د تاوتریخوالي په دوام خواشیني ښودلې.

هغه د اروپايي ټولنې د بهرنیو چارو کمېسیون غونډې ته په وینا کې د افغانستان اړوند مسایل هم یاد کړل چې یو یې د تاوتریخوالي او بریدونو دوام و.

هغه زیاته کړه: "په خواشیني سره چې د طالبانو له خوا تاوتریخوالی دوام لري، د تاوتریخوالي د کمولو لپاره تر بل هر وخت ډېره سخته اړتیا شته، افغانستان او خلک یي دایمي اوربند ته اړتیا لري."

هغه زیاته کړه چې له افغانستان سره د اروپايي ټولنې راتلونکې مرستې او همکارۍ په دې تړلي دي چې له دغه هېواد سره د مرستو د تجدید تر غونډې پورې چې تمه ده نومبر میاشت په جینیوا کې وشي ښکېلې خواوې څومره د تاوتریخوالي کمولو او د ښځو او ماشومانو په برخه کې د شته لاسته راوړنو خوندي کولو ته ژمن پاتې کېږي.

نن د پښتو ژبې نړیواله ورځ ده

ارشیف

نن د مې ۲۹ چې د غبرګولی نهمه کېږي د پښتو ژبې نړیواله ورځ ده.

دا ورځ هر کال همدا وخت په افغانستان، پاکستان او ځینو نورو هېوادونو کې پښتانه فرهنګیان او عام خلک لمانځي.

سږ کال د کرونا ویروس وبا فرهنګیان او پښتانه اړ کړي چې له لویو غونډو تېر شي خو په خواله رسنیو یې د دې ژبې په مناسبت مبارکي ورکړې او ټینګار یې کړی چې د ودې لپاره یې باید زیات کار وشي.

د کابل پوهنتون د پښتو ادبیاتو استاد او د ازادي راډیو د پښتو تعلیمي پروګرامونو مسوول محبوب شاه محبوب د دې ورځې په مناسبت وايي: "موږ همدا نن یو انلاین سیمینار لرو د پښتو ژبې د پرمختګونو او د خنډونو په اړه چې د پښتو ژبې په وړاندې کوم کوم خنډونه موجود دي، دا البته په اروپا کې دایر شوی خو موږ ټول پکې انلاین برخه لرو، همدارنګه موږ یو شمېر ځوانان نن مازیګر یوه غونډه لرو په دې تړاو، یو کیک پرې کوو او غواړو خلکو ته وښیو په خواله رسنیو کې چې د پښتو ورځ باید ونمانځو او د پښتو ژبې د ژوندي پاتې کېدو لپاره کار وکړو."

افغان سیاستوالو هم په خواله رسنیو د دې ورځې په مناسبت د مبارکۍ پیغامونه لیکلي.

له هغې ډلې د افغانستان د افغانستان د ملي مصالحې عالي شورا رییس عبدالله عبدالله په خپل فیسبوک د پښتو ژبې د ورځ مبارکي لیکلې.

د بهرنیو چارو سرپرست وزیر حنیف اتمر په خپل ټوېټر لیکلي چې د پښتو ژبې ټولو ویونکو ته مبارکي وایي او د ده په خبره د افغانستان هره ژبه د دغه هېواد د فرهنګ او تمدن په بډاینه کې خورا مهم رول لري.

عامې روغتیا وزارت: د محدویتونه او سپارښتنو نه مراعتول به ناورین رامنځته کړي

وحیدالله مجروح

د افغانستان د عامې روغتیا وزارت ګواښ کوي که خلک طبي سپارښتنې او لګیدلي محدودیتونه مراعات نه کړي کرونا ویروس به انساني ناورین رامنځته کړي.

دا خبره د یاد وزارت مرستیال ډاکتر وحیدالله مجروح نن په یوه ویډیويي پیغام کې کړې ده.

هغه ویلي چې هره ورځ سلګونه مثبتې قضیې ثبتیږي خو مهمه ده چې خلک د کرونا ویروس د مخنیوي لپاره له روغتیاپالانو سره همکاري وکړي.

هغه زیاته کړه: "په تېر ۲۴ ساعتونو کې په افغانستان کې ۹۸۵ سمپلونو ټیسټ شوي چې له منځه یې ۶۲۳ مثبت واقعات تثبیت شوي، ۱۱ کسان له کرونا مړه شوي، ۵۰ کسان روغ شوي، په دې سره مجموع په افغانستان کې ۱۳۶۵۹ مثبت واقعا تر اوسه ثبت شوي، د خلکو په همکاري موږ کولای شو چې کرونا ماته کړو که د خلکو مرسته نه وي له ټولو هڅو سره سره به له یوه انساني ناورین سره مخ شو."

په افغانستان کې د کرونا ویروس څه باندې دولس نیم سوه ناروغان بېرته ښه شوي هم دي.

د عامې روغتیا وزارت وایي چې خلک باید ماسکونه وکاروي، ټولنیزه فاصله رعایت کړي او له غونډو او مجلسونو ډډه وکړي.

افغانستان کې پر کرونا ویروس د اخته کسانو شمېر ۱۳۶۵۹ ته لوړ شو

په تازه ثبت شوو پېښو کې ۲۷۱ په کابل، ۱۷۹ په هرات، ۶۷ ننګرهار، ۲۳ بلخ او ۱۳ لغمان کې ثبت شوې دي.

د افغانستان د عامې روغتيا وزارت وايي، په تېرو ۲۴ ساعتونو کې په هېواد کې د کرونا ۶۲۳ نورې مثبتې پېښې ثبت شوې دي چې ډېرې یې په کابل کې دي.

د عامې روغتيا وزارت له خوا رسنیو ته نن په استول شوي پيغام کې ويل شوي چې له نوېو مثبتو پېښو ثبت سره په هېواد کې پر کرونا ویروس د اخته کسانو شمېر ۱۳۶۵۹ ته لوړ شو.

تر اوسه له دې ناروغۍ ۱۲۵۹ کسان بېرته روغېدلي او ۲۴۶ نور یې مړه کړي دي.

په تازه ثبت شوو پېښو کې ۲۷۱ په کابل، ۱۷۹ په هرات، ۶۷ ننګرهار، ۲۳ بلخ او ۱۳ لغمان کې ثبت شوې دي.

چارواکي: د اختر په مناسبت برقراره شوې ارامه وضعه دوام لري

ارشیف

د افغانستان د ملي امنیت شورا وايي، له ځینو سیمو د نا امنیو له راپورونو سره سره د اختر په مناسبت برقراره شوې ارامه وضعه لا هم دوام لري.

دا خبره د امنیت شورا ویاند جاوید فیصل نن په خپله ټوېټر پاڼه لیکلې ده.

جاوید فیصل ویلي اوربند یو پېچلی عملیاتي مسئولیت دی چې د پېښو د مخنیوي په خاطر ډېرو مثمرو او مداومو همغږیو ته اړتیا لري او دا هڅې به روانې وي.

طالبانو د اختر په مناسبت دری ورځنی اوربند اعلان کړی و او افغان ولسمشر اشرف غني هم د طالبانو د دغه اقدام په غبرګون د اوربند د اعلان تر څنګ د ۲۰۰۰ طالب بندیانو د خلاصولو امر وکړ.

ملي دفاع وزارت: پکتیا کې طالبانو او افغان ځواکونو ته مرګ ژوبله اوښتې

ارشیف

د افغانستان د ملي دفاع وزارت تایید کړه چې په پکتیا کې د وسله والو طالبانو په برید سره ۱۴ افغان سرحدي ځواکونه وژل شوي او ۳ نور ټپیان دي.

د دغه وزارت په یوه اعلامیه کې راغلي چې وسله والو طالبانو بېګاه شپه په ډنډ پټان ولسوالۍ کې د افغان سرحدي ځواکونو پر پوسته برېد کړی و.

دفاع وزارت وايي چې طالبانو ته هم مرګژوبله اوښتې.

د طالبانو د مرګ ژوبلې په اړه د ۲۰۳ تندر قول اردو ویاند ایمل مومند نن جمعه ازادي راډیو ته وویل: "پکتیا ولایت د ډنډ پټان ولسوالۍ اړوند د سیف الله په نوم زموږ د ملي امنیتي ځواکونو یوه پوسته ده سرحد ته نږدې چې په دې باندې وسله والو طالبانو ډله ییز برید کړی، ۱۸ تنه وسله وال طالبان د سره صلیب د وینا په اساس وژل شوي او همدارنګه ۹ نور ټپیان شوي دي خو بدبختانه زموږ ملي امنیتي ځواکونو ته هم مرګ ژوبله اوښتې ده."

وسله والو طالبانو د دغه برید په اړه کومه تبصره نه ده کړې.

تر دې مخکې هم د پروان په غوربند کې وړمه شپه د طالبانو په برید سره ۷ افغان سرتېري وژل شوي او اخوا په لویدیځ ولایت فراه کې د افغان پولیسو په پوستې باندې د طالبانو په برید سره ۷ تنه پولیس افسر وژل شوي.

افغان چارواکو بیا ویلي چې په زابل کې یې ۱۸ وسله وال طالبان او په فراه کې یې اته وسله وال طالبان وژلي.

د افغان پوځیانو او وسله والو طالبانو تر منځ په وروستیو دوو ورځو کې دا نښتې داسې وخت شوي چې د اوربند د تمدید هڅې کیږي او هم وسله والو طالبانو د بندیانو د خلاصون لپاره یو پلاوی کابل ته استولی.

د افغانستان او استرالیا کرکټ ملي لوبډلې ټېسټ لوبه کوي

افغان ملي لوبډله

ټاکل شوې چې د افغانستان د کرکټ ملي لوبډله به د روان کال په نومبر میاشت کې د استرالیا د ملي لوبډلې پر وړاندې ټېسټ لوبه ترسره کړي.

د افغانستان کرکټ بورډ په یوې خبرپاڼې کې ویلي چې دا ټېسټ لوبه به د اسټرالیا په کوربه توب د نومبر په ۲۱مه نېټه پیل او د همدې میاشتې تر ۲۵مې نېټې پورې به دوام وکړي.

د افغانستان د کرکټ بورډ اجراییه رییس لطف الله ستانکزي هیله ښودلې چې تر هغې به د کرونا ناروغۍ خطر کم شي او دا لوبه به ترسره شي.

د ستانکزي په وینا دا ټېسټ لوبه به د افغانستان د کرکټ ټیم لپاره یوه ښه تجربه وي.

افغانستان تر اوسه په ټېسټ سیالیو کې له بنګله دېش، ایرلنډ، هندوستان او ویسټ انډيز سره مخ شوی دی چې له لومړیو دوه لوبډلو یې بریا خپله کړې، خو له وروستیو دوو یې بیا ماتې منلې ده.

افغانستان کې په کرونا ویروس د اخته کسانو شمېر له ۱۳ زور واوښت

د افغانستان عامې روغتیا وزارت وایي په تېرو ۲۴ ساعتونو کې په دې هېواد کې شاوخوا ۵۸۰ تنه په کرونا ویروس اخته شوي دي.

د دغه وزارت مرستیال وحید مجروح نن په کابل کې خبریالانو ته په دې اړه تازه جزئیات ورکړل.

ښاغلي مجروح وویل: "په تېرو ۲۴ ساعتونو کې په افغانستان کې د ۱،۰۷۲ تنو سمپلونه اخیستل شوي دي چې په دې کې ۵۸۰ تنه‌یې مثبت تشخیص شوي. زموږ اته تنه هېوادوال وفات شوي له همدې ناروغۍ څخه او ۶۵ تنه بېرته روغ شوي دي. په ټوله کې په افغانستان کې ۱۳ زره او ۲۶ مثبتې پېښې لرو."

د عامې روغتیا وزارت د شمېرو له مخې په ټوله‌ییز ډول په افغانستان کې له کرونا ویروس څخه ۲۳۵ تنه مړه شوي او ۱،۲۰۹ تنه بېرته روغ شوي دي.

د عامي روغتیا وزارت مسؤلین یو ځل بیا پر افغانانو ټینګار کوي چې که په کور پاتې نه‌شي او د دغه وزارت سپارښتنې جدي ونه‌ګڼي د بشري بحران احتمال شته.

د طالبانو یوه تخنیکي ډله کابل ته راغلې

طالب پلاوی

د افغانستان د ملي امنیت شورا وایي طالبانو یوه تخنیکي ډله کابل ته لېږلې، څو د دوی د زندانیانو پر تبادلې کار وکړي.

په دې ډله کې درې تنه شامل دي.

دا خبره د ملي امنیت شورا نن پنجشنبه پر خپله ټویټرپاڼه کړې ده.

تر دې وړاندې هم د طالبانو یوه بله تخنیکي ډله د طالب بندیانو د خوشې کېدو چارو د څارنې لپاره کابل ته تللې وه.

افغان حکومت تر اوسه دوه زره طالب بندیان خوشې کړي دي.

د امریکا متحده ایالاتو او طالبانو ترمنځ د سولې تړون له مخې باید افغان حکومت ۵،۰۰۰ طالب بندیان او طالبانو بیا د حکومت زر تنه بندیان خوشې کړي وی او بیا د مارچ پر ۱۰مه بین‌الافغاني مذاکرات باید شوي وی، خو لا تر اوسه د بین‌الافغاني مذاکراتو برخلیک معلوم نه‌دی.

چارواکي: طالبانو د غازي‌اباد ولسوالۍ پر امنیتي پوستو برید کړی

ارشیف

کونړ کې چارواکي واييتېره شپه وسله‌والو طالبانو د غازي‌اباد ولسوالۍ پر امنیتي پوستو برید کړی چې په نتیجه کې يې څلور پولیس ټپیان شوي او یو شمېر وسله‌والو طالبانو ته هم مرګ‌ژوبله رسېدلې ده

د کونړ امنیه قوماندان ډګروال محمد یوسف مظلوم‌یار د پنجشنبې په ورځ ازادي راډیو ته وویل: "د دښمن له‌خوا نه په غازي‌اباد ولسوالۍ کې تهاجمي حمله ترسره شوې ده، په مخامخ جګړه کې زموږ څلور پولیس سر سري ټپیان شوي دي. د دښمن حمله په شا تمبول شوې ده، هغوی ته هم مرګ‌ژوبله اوښتې، خو کره شمېره نه‌شته. تازه دمي ځواکونه هلته رسېدلي دي، اوس حالت ارام دی."

د لوګر د ولایتي شورا رئیس حسیب‌الله ستانکزي هم ویلي چې په محمد اغې ولسوالۍ کې د افغان ځواکونو او وسله‌والو طالبانو ترمنځ نښتو کې یو افغان سرتېری او یو طالب وژل شوی دی.

نوموړي نن سهار ازادي راډیو ته وویل چې افغان سرتېري د وسله‌والو طالبانو پر کمین برابر شول.

تر اوسه وسله‌والو طالبانو په دې اړه څه نه‌دي ویلي.

نړیوال بانک د افغانستان ملي پروژې تمویلوي

نړیوال بانک

نړیوال بانک د افغانستان ملي پروژې چې د ښاري میثاق پروګرام تر چوګات لاندې وي، تمویلوي.

د افغانستان ولسمشرۍ ماڼۍ څخه په یوې خپره شوې اعلامیه کې ویل شوي چې ولسمشر محمد اشرف غني تېر ماښام د نړیوال بانک له چارواکو سره د وېډ‌يو کنفرانس له لارې په دې اړه خبرې کړې دي.

په دې وېډیو کنفرانس کې همدا شان له بزګرانو سره د کرنيزو محصولاتو د ښه تولید، افغان بزګرو ته د اصلاح شوي تخمونو د وېش او د اوبو لګونې پر معیاري سیستم هم بحث شوی چې د اعلاميې له مخې نړیوال بانګ ورته د ملاتړ لپاره ټټر وهلی.

د ولسمشرۍ ماڼۍ له لوري په خپره شوې اعلامیه کې دغه‌شان ویل شوي چې ولسمشر په دې ملي پروژو کې له نړیوال بانک څخه د ځنګلونو جوړولو او ورڅخه د ساتنې په برخه کې هم د همکارۍ غوښتنه کړې ده.

افغان حکومت د سره زرو د قاچاق مخنیوي په هدف تعرفه راکمه کړه

ارشیف

افغان حکومت د سره زرو د قاچاق د مخنیوي په هدف په دې محصول تعرفه راکمه کړې ده.

د افغانستان د مالیې وزارت ویاند شمروز خان مسجدي نن ازادي راډ‌يو ته وویل دغه ګام‌یې د سرو زرو د قاچاق د مخنیوي او د دې محصول سوداګرۍ د رسمیت پېژندلو په هدف کړی.

د نوموړي په خبره، افغان حکومت له دې وروسته په ګمرکونو کې له طلا څخه په کلني ډول ۶۰۰ ډالره تعرفه اخلي.

د ښاغلي مسجدي په وینا اوس‌مهال په بازارونو کې د یو کیلو طلا قیمت له ۲۵ څخه ۱۰ زره ډالرو ته رالوېدلی.

د افغانستان د مالیې وزارت د معلوماتو له مخې پخوا د سرو زرو يا طلا ګمرکي تعرفه پرته له مالیې څخه د ۱۶ فیصده نه نیولې تر ۱۸ فیصده پورې وه چې دغې چارې د قاچاق زمینه هم برابره کړې وه.

فاریاب کې یوې ټرافیکي پېښې ۱۰ تنه وژلي او ۵ ټپیان دي

د فاریاب ولایت نقشه

په فاریاب کې یوې ټرافیکي پېښې ۱۰ تنه وژلي او ۵ نور یې ټپیان کړي دي.

د فاریاب د پولیسو ویاند عبدالکریم یورش ازادي راډیو ته وویل چې دغه پېښه نن سهار په دولت‌اباد ولسوالۍ کې د دوو موټرو د ټکر له امله رامنځته شوې.

ښاغلی یورش وایي، وژل شویو او ټپیانو کې ښځې او ماشومان هم شامل دي.

ټپیان د فاریاب روغتون ته لېږدول شوي دي.

پر بین‌الافغاني خبرو د افغانستان، امریکا او ازبکستان استازو ټینګار

د افغانستان، امریکا او ازبکستان استازو وېډیو کنفرانس

د افغانستان، امریکا متحده ایالاتو او ازبکستان استازو د بین‌الافغاني خبرو پر ژر پیلېدو ټینګار وکړ.

د افغانستان د بهرنیو چارو سرپرست وزیر محمد حنیف اتمر، د ازبکستان د بهرنیو چارو وزیر عبدالعزیز کاملوف او د امریکا متحده ایالاتو د بهرنیو چارو وزارت مرستیال ډېوېډ هیل د وېډیو کنفرانس له لارې پر افغان سوله خبرې وکړې.

د دې درې اړخیزې غونډې په اړه د امریکا متحده ایالاتو د بهرنیو چارو وزارت په بیان کې راغلي دي، موافقه وشوه چې بین‌الافغاني خبرې ژر پيل شي ترڅو په‌کې پر سرتاسري اوربند او د افغانستان د راتلونکې لپاره د لارې پر یوې سیاسي نقشې بحث وشي.

د غونډې برخه‌والو د اختر د درې ورځني اوربند د ادامې هیله کړې او ټینګار شوی دی چې بیا امنیتي وضعیت تر اوربند مخکې وخت ته ستون نه‌شي.

د کرونا له خپرېدو وروسته د افغانستانه او ایران ترمنځ لومرۍ الوتنه

ارشیف

د کرونا ویروس تر خپرېدو وروسته له افغانستانه لومړۍ الوتکه چې مسافر لېږدوي ایران ته ورسېده.

د ایران ایرنا اژانس په مشهد کې د خراسان رضوي هوایي ډګر د رئیس محمود امینتي باني په وینا خبر ورکړ چې وروسته له نږدې درې میاشتو دا الوتکه چې ۱۴۶ مسافر په‌کې وو د چهارشنبې په ورځ د خراسان رضوي پر هوایي ډګر کېناسته.

په افغانستان کې د لومړي ځل لپاره کرونا د هغو کډوالو په منځ کې خپره شوه چې له ایرانه افغانستان ته ستانه شوي وو.

نور راوښيه

XS
SM
MD
LG