د لاسرسۍ وړ لېنکونه

تازه خبر
جمعه ۹ غبرګولی ۱۳۹۹ کابل ۰۴:۰۲

نړۍ

اوتنبایوا: د مناس هوايي اډې په اړه د پخواني حکومت پرېکړې ته وفاداره یو

د امریکا د بهرنیو چارو وزیرې تېره ورځ د قیرغیزستان د اپوزوسیون له مشرې روضا اوتنبایوا سره، چې د دغه هیواد د موقتې ادارې د رهبرۍ ادعا کوي تلیفوني خبرې وکړې.

د بهرنیو چارو د وزارت ویاند فلیب کرولي وویل، اوتنبایوا میرمن کلینټن ته تاید کړه، چې د قیرغیزستان موقت حکومت به دغلته د امریکايي پوځي اډې په اړه د پخواني حکومت پرېکړې ته وفاداره اوسي.

په قیرغیزستان کې له مناس هواي اډې څخه امریکايي ځواکونه په افغانستان کې نړیوالو ځواکونو ته اکمالات کوي.

د امریکا د بهرنیو چارو وزارت وايي، خپل یو استازۍ به قیرغیزستان ته واستوي څو د میرمن کلینټن او اوتنبایوا تر منځ پر تیلیفون شوې پریکړې وڅاري.

په یوه بل پرمختګ کې د اروپا د همکارۍ او امنیت د شورا یوه غړي وویل، په قیرغیزستان کې موقت حکومت د روان بحران د حل لپاره له واکه لرې کړای شي مشر سره خبرې کړي دي.

د ورځې تازه خبرونه دلته ولولئ

محمد باقر قالیباف د ایران پارلمان مشر وټاکل شو

محمد باقر قالیباف

د ایران پارلمان د تهران پخوانی ښاروال محمد باقر قالیباف د پارلمان د مشر په توګه وټاکه.

قالیباف چې د فبرورۍ پارلماني انتخاباتو کې یې تر ټولو ډېرې رایې له پلازمېنې تهران څخه ترلاسه کړې وې، یو وخت د سپاه پاسداران د هوایي ځواکونو د قوماندان په توګه هم پاتې شوی دی.

د ایران د پارلمان موقت مشر رضا تقوي نن د ښاغلي قالیباف ټاکنه داسې اعلان کړه: "محمد باقر قالیباف د ۲۳۰ رایو په اخیستلو سره د یوه کال لپاره د پارلمان د مشر په توګه وټاکل شو."

ویل کېږي نوموړی له دې کبله چې د ایران ستر مذهبي مشر ایت‌الله علي خامنه‌یي ته ډېر وفادار دی، نو دې ته لار پرانیستل شوه چې د پارلمان مشر شي.

امریکا کې د کرونا ویروس له کبله د مړو شمېر تر ۱۰۰ زرو واوښت

ارشیف

په امریکا متحده ایالاتو کې د کرونا ویروس له کبله د مړو شمېر تر ۱۰۰ زرو واوښت.

سره له دې چې په امریکا کې د کارونو د بیا پرانیستلو او لګېدلي محدودیتونو د کمېدو چارې دوام لري، خو دغه ویروس له تېرو درېیو میاشتو راهیسې دغه هېواد سخت ځپلی دی.

د جانز هاپکنز پوهنتون شمېرې ښیي چې د چهارشنبې په ورځ په امریکا کې یو میلیون او ۷۰۰ زره کسان په کرونا ویروس اخته شوي او له همدې ویروس څخه تر پرون پورې ۱۰۰ زره او ۴۷ تنه مړه شوي دي.

د رسمي شمېرو له مخې دا مهال په امریکا کې د کرونا ویروس د قربانیانو شمېر په کوریا او ویتنام کې د دې هېواد د جګړو تر تلفاتو ډېر دی.

په همدې حال کې د امریکا ولسمشر ډونالد ټرمپ چې په لومړي سر کې یې د دې ویروس شدت او اهمیت کم ښوده، اوس د محدودیتونو پر کمولو ټینګار کوي.

دا مهال د امریکا په ټولو ۵۰ ایالتونو کې په بېلابېلو سطحو محدودیتونه کم شوي او کارونه بېرته پرانیستل شوي دي.

په ټوله نړۍ کې په کرونا ویروس د اخته کسانو شمېر ۵ میلیونه او ۶۵۰ زره تنه دي همدې ویروس تر اوسه په نړۍ کې ۳۵۰ زره کسان مړه کړي دي.

پومپیو: له ایران سره د ملکي اټمي همکاریو معافیت پای ته رسېږي

د امریکا د بهرنیو چارو وزیر مایک پومپیو

د امریکا بهرنیو چارو وزیر وایي، له ایران سره د روسیې، چین او اروپایي کمپنیو د ملکي اټمي همکاریو پر سر وضع شوی معافیت پای ته رسېږي.

مایک پومپیو پرون د مې په ۲۷مه وویل، ایران د اټمي پروګرام په اړه خپلې یو شمېر ژمنې ماتې کړي، نو ځکه پرې د دې معافیت دوام توجیه کېدای نه‌شي.

دا د نړۍ له قدرتونو سره د ایران د اټمي تړون وروستۍ لاسته راوړنې دي چې د له‌منځه تلو په حال کې دي.

ښاغلي پومپیو ویلي، د ایران اټمي هڅې به پر دغه هېواد فشارونه زیات کړي او دغه رژیم به له نړیوالې ټولنې نه نور هم منزوي یا ګوښه شي.

د ایران لپاره د امریکا ځانګړي استازي براین هوک خبریالانو ته ویلي، ایراني چارواکي دوه لارې مخته لري، دوی به یا له امریکا سره خبرو ته رامخته کېږي او یا به هم د خپلې اقتصادي ماتې غم خوري.

د امریکا استازو جرګې پر چینايي چارواکو د بندیز لګولو لایحه تصویب کړه

د امریکا د استازو جرګه

د امریکا د استازو جرګې په مطلق اکثریت داسې لایحه تصویب کړه چې له ډونالد ټرمپ نه غواړي د اویغور مسلمانانو د ځپلو لپاره په چینایي چارواکو بندیزونه ولګوي.

دغه لایحه چې د همدې میاشتې په سر کې سنا هم پاس کړې، پر هغو چینایي چارواکو د بندیزونو غوښتنه کوي چې د لږکیو اویغور مسلمانانو د ځورولو تورونه پرې پورې دي.

د استازو جرګې مشرې نانسي پلوسي ویلي، د بېجنګ دا وحشیانه کړنې چې د اویغور مسلمانانو په ضد یې کوي، د ټولې نړۍ جمعي وجدان ته بې‌احترامي ده.

د امریکا د استازو جرګې دا لایحه اوس د ولسمشر ډونالد ټرمپ توشېح ته وړاندې کېږي، هغه له دې وړاندې ویلي چې پر چین د دې لپاره د بندیزونو پر لګولو غور کوي چې په هانګ کانګ کې یې د ملي امنیت اړوند خپل قانون تحمیل کړی دی.

ملګرو ملتونو او د بشري حقونو ملاتړو بنسټونو چین تورن کړی چې شااوخوا یو میلیون اویغور مسلمانان او نور لږه‌کي یې د اجباري کارونو یوه کمپ کې راټول کړي، خو چین له دوی نه د ناوړه ګټې اخیستنې تورونه رد کړي دي.

د چچنیا مشر د خپل روغتیايي وضعیت په اړه خپاره شوي راپورونه رد کړل

د چچنیا مشر رمضان قدیروف

د چچنیا مشر رمضان قدیروف وایي، صحت‌یې لکه څرنګه چې راپورونه خپاره شوي هغسې نه‌دی، بهتره دی.

قدیروف په کرونا ویروس اخته شوی دی. ده پرون په یوه مرکه کې چې په انستاګرام کې یې په ژوندۍ بڼه له خپل مرستیال احمد دوداییف سره کوله وویل چې دی بېخي ښه دی.

تر دې یوه ورځ مخکې په پلازمېنه ګروزني کې د غونډې پر مهال د قدیروف پر ښي لاس په ټلوېزیون کې د پیچکارۍ کنول ښکارېده.

تېره اوونۍ روسي رسنیو وویل چې ۴۳ کلن قدیروف مسکو ته راغلی دی او د کرونا ویروس له امله بستر شوی دی.

قدیروف ولسمشر ولادیمیر پوتین ته ډېر وفاداره دی او دی د قفقاز په شمال کې له بشري حقونو څخه په پراخو سرغړونو تورن دی.

امریکا په لیبیا کې د روسي جنګي الوتکو د موجودیت تفصیلات خپاره کړل

د روسیې جنګي الوتکې

د امریکا متحده ایالاتو پوځ نور تفصیلات د دې په اړه وړاندې کړي چې له ادعا سره سم روسیې په لیبیا کې پوځي جټ الوتکې ځای پر ځای کړې دي.

روسي چارواکي په دوامدار شکل په لیبیا کې د خپلو جنګي الوتکو او هوایي ځواکونو موجودیت ردوي.

واشنګټن وایي، مسکو جټ الوتکې د دې لپاره ځای پر ځای کړې دي چې له هغو روسي پلوو سره مرسته وکړي چې د یوه جنګسالار مرسته کوي او دا کس د لیبیا له هغه حکومت سره په جګړه دی چې نړیوالو په رسمیت پېژندلی دی.

له ادعا سره سم لیبیا ته د روسیې الوتکو له تګ سره به د لیبیا په ختیځ کې د خلیفه حفتر د ځواکونو او د حکومتي ځواکونو ترمنځ پر جګړه ډېر تأثیر پرېوځي. د لیبیا د ملي وفاق حکومت نړیوالو په رسمیت پېژندلی دی.

په دې جګړې کې ګڼ هېوادونه ښکېل شوي دي، روسیه، فرانسه، اردن او متحده عربي امارات د خلیفه حفتر ملاتړ کوي.

ترکیه چې لیبیا ته‌یې په جنورۍ میاشت کې ځواکونه او بې‌پيلوټه الوتکې واستولې د قطر او ایټالیا ترڅنګ د لیبیا د حکومت ملاتړ کوي.

ملګرو ملتونو لیبیا ته د وسلو پر لېږلو بندیز لګولی دی.

په افریقا کې د امریکایي ځواکونو مرکزي قوماندانۍ د سې شنبې په ورځ ویلي و چې روسیې جېټ الوتکې له سوریې لېږلې دي.

سپېس اېکس خصوصي کمپنۍ خپله سفینه نړیوال فضايي سټېشن ته استوي

د سپېس اېکس سفینه

سپېس اېکس لومړنۍ خصوصي کمپنۍ ده چې نن د مې ۲۷مه له انسانانو سره خپله سفینه نړیوال فضایي سټېشن ته استوي.

که دا کار بریالی شي دا به فضایي اکتشافاتو ته د خصوصي کمپنیو د لاسرسي یوه مهمه لاسته راوړنه وي.

له اوو لسیزو راهیسې دې کار ته یوازې ځواکمن هېوادونه لاسرسی لري.

د کرو ډراګن (Crew Dragon) په نوم د سپېس اېکس دا فضایي بېړۍ نن د پراګ په وخت ۰۴:۳۳ دقیقې له فلوریدا څخه فضا ته توغول کېږي.

په دې سفینه کې به د ناسا دوه ستور مزلي سپاره وي.

تمه ده دا سفینه د مې پر ۲۸مه نړیوال فضایي سټېشن ته ورسېږي او هلته به تر اګسټ میاشتې پورې پاتې شي.

ټاکل شوې د امریکا متحده ایالاتو ولسمشر ډونالد ټرمپ د دې سفینې د توغولو په مراسمو کې ګډون وکړي.

۲ روسي جنګي الوتکو مدیترانه کې د امریکا یوې الوتکې ته خنډ جوړ کړی

د امریکا او روسیې الوتکې

د امریکا متحده ایالاتو سمندري ځواکونو ویلي چې دوه روسي 'سو-۳۵' جنګي جټ الوتکو په مدیترانه سمندرګي کې د امریکا د بحري ګزمې د یوې الوتکې په وړاندې خنډ جوړاوه.

د امریکا سمندري ځواکونو ویلي چې پرونۍ پېښې ۶۵ دقیقې دوام درلود چې پر مهال‌یې دوو روسي پیلوټانو د امریکا 'پې–۸ اې' دواړو وزرو ته نږدې پرواز کاوه او د دې الوتکې د مانور وړتیا یې کمه کړې وه.

د دې ځواکونو یوې برخې چې په ایټالیا کې مېشته ده ویلي دا ډول کړنې به بالقوه هوايي شخړې زیاتې کړي.

دا درېیم وار دی چې د روسيې پیلوټان د امریکا د سمندري ځواکونو کشفي الوتکې تعقیب او جنجال ورته جوړوي.

درېیمه تېل وړونکې ایرانۍ کښتۍ ونزوئلا ته ورسېده

ونزوئلا ته رسېدلې تېل وړونکې ایرانۍ کښتۍ

د ایران درېیمه تېل وړونکې کښتۍ ونزوئلا ته ورسېده.

د کښتۍ تعقیب کوونکي معلومات د ریفینیتو اکان شرکت ټول کړي او ښيي چې د ایران په بیرغ سمباله درېیمه کښتۍ سې شنبه په ځايي وخت د ونزوئلا د ځانګړي اقتصادي زون او ځمکنیو اوبو ته ننوتله.

د روېټرز په وینا د پیټونیا تېل وړونکې کښتۍ د سې شنبې په سهار وختي د کیریبین بحیرې ته ننوتله او د نورو تېل وړونکو ټانکرونو فارچون او فوریسټ ورته لار یې تعقیب کړه.

د فارچون تېل وړونکې کښتۍ د دوشنبې په ورځ د ۴۳ میلیون بنزین بوشکو سره د ایل پالیتو بندر ته ورسېده او د ونزوئلا د تېلو د وزیر له‌خوا یې تود هرکلی وشو.

د ونزوئلا د تېلو وزیر په دغه هېواد کې د تېلو د کموالي د کړکېچ په جریان کې د ایران له دې ملاتړه مننه وکړه.

د فوریسټ تېل وړونکې کښتۍ هم د سې شنبې په ورځ د ایل پالیتو په بندر کې اړخ ولګاوه ترڅو خپل مالونه بار کړي.

د خامنه‌یي استازی خوزستان ته د ټپيانو پوښتنې ته ورغلی

د ایران ستر مذهبي مشر ایت‌الله علي خامنه‌یي

د ایران د ستر مذهبي مشر ایت‌الله علي خامنه‌یي استازی سید عبدالنبي موسوي فرد په خوزستان ولایت کې د ټپيانو پوښتنه وکړه.

خلکو په خوزستان ولایت کې د څښلو د اوبو په خاطر تېره اوونۍ اعتراض کړی وو چې ځيني يې امنیتي ځواکونو ټپيان کړل.

د ایران نیمه دولتي فارس خبري اژانس د مې په ۲۵مه نېټه یوه وېډيو خپره کړې ده چې په‌کې موسوي فرد د یوه ځوان په کور کې لیدل کېږي چې د پلاستیکي مرمۍ له کبله سخت ټپي شوی و.

په وېډيو کې موسوي فرد وايي، د معذرت غوښتلو په پار د دې کس کور ته ورغلی دی.

د دې ټپي کس عکسونه پر ټولنیزو رسنیو خپاره شوي دي.

دی د غیزانیه سیمې اوسېدونکی دی او د مې میاشتې په ۲۳مه نېټه د څښلو د اوبو د قطع کېدو په خاطر د خوزستان د والي د دفتر مخې ته په اعتراض راوتلی و.

روښانه نه‌ده چې د اعتراض کوونکو د تیت کولو په هدف د امنیتي ځواکونو په اوښلن ګاز او پلاستیکي مرمیو څومره کسان ټپيان شول.

پولیسو ادعا کړې چې اعتراض کوونکو پر افسرانو په لرګیو او ډبرو حمله وکړه.

یو شمېر اروپايي هېوادونه پر خپلو پولو پرانیستلو غور کوي

ارشیف

د اروپایي ټولنې یو شمېر هېوادونه پر خپلو پولو پرانیستلو غور کوي.

دا وروسته له هغه چې په اروپا کې د کرونا ویروس مثبتې پېښې کمې شوې دي.

خو د روغتیا نړیوال سازمان خبرداری ورکړی چې که محدودیت په چټکۍ سره لیرې شي، د کرونا ویروس د دوهمې څپې خطر شته.

اسپانیه له هغو هېوادونو ده چې د کرونا ویروس تر ټولو زیات زیان‌یې تجربه کړی دی. دې هېواد د پولو پرانیستلو په برخه کې د اروپايي ټولنې د دریځ ملاتړ کړی دی.

جرمني غواړي د اروپايي ټولنې د ۲۶ هېوادونو له پولو د سیلانیانو د تېرېدو په برخه کې خبرداری د جون په ۱۵مه لیرې کړي.

ډنمارک هم له نورو نوردیک هېوادونو سره پر خپلو پولو محدودیت کم کړی دی.

روسیې پرون د مې په ۲۶مه، نېټه د ۱۷۴ کسانو د مړینې خبر ورکړی دی.

په ټوله نړۍ کې تر پنځه نیمو میلیونو زیات کسان په کرونا ویروس اخته شوي دي.

د مړو شویو شمېر هم ۳۴۶،۰۰۰ ته رسېدلی دی.

روسیه نازي جرمني ته د ماتې ورکولو ۷۵مه کلیزه لمانځي

د روسیې بیرغ

روسیه به په دوهمه نړیواله جګړه کې نازي جرمني ته د ماتې ورکولو ۷۵مې کلیزه راتلونکې میاشت ولمانځي.

روسیه دا مراسم په داسې حال کې جوړوي چې په دغه هېواد کې د کرونا ویروس مثبتې پېښې اوس هم د ثبتېدو په حال کې دي.

د روسیې ولسمشر ولادیمير پوتين د جون ۲۴مه، د یادو مراسمو نوې نېټه اعلان کړې او دفاع وزیر سرګي شوېګو ته‌یې امر کړی چې چمتووالی دې ونیسي.

روسیې پخوا دا ورځ چې د بریا ورځ بلل کېږي، د مې په ۹ لمانځله.

خو پوتین په اپرېل میاشت کې دا مراسم وځنډول.

که څه هم په روسیه کې د کرونا ویروس نوې پېښې کمې شوي، خو دا هېواد په ټوله نړۍ کې درېیم هېواد دی چې تر ټولو زیاتې مثبتې پېښې يې ثبت کړې دي.

په روسیه کې ۳۶۲،۰۰۰ کسان په کرونا ویروس اخته شوي او تر ۳،۸۰۰ زیات نور مړه شوي دي.

لوفت هانزا هوايي شرکت سره د جرمني حکومت ۹،۸ میلیارده ډالره مرسته

فرانکفورت هوايي ډګر کې د لوفت هانزا هوايي شرکت الوتکې

د جرمني حکومت له لوفت هانزا سره ۹،۸ میلیارده ډالره مرسته کړې ترڅو دا هوایي چلند د کرونا ویروس له امله د رامنځته شویو اقتصادي ستونزو سربېره خپلو فعالیتونو ته ادامه ورکړي.

د جرمني اقتصاد وزارت او لوفت هانزا هوایي چلند پرون د دې مرستې خبر ورکړ.

اروپایي ټولنه او سهم ورکوونکي هم باید د دې مرستې تأیید وکړي.

د جرمني خزانې وزیر اولاف شولز ویلي دي چې پر لوفت هانزا شرکت پانګونه موقتي ده.

د نړۍ د ډېرو هوایي شرکتونو په څېر لوفت هانزا هم اکثر مسافر وړونکې الوتنې د کرونا ویروس د خپرېدو له وېرې ځنډولې دي.

له سیاسي سقوط څخه وېره لرونکو ته د هانګ کانګ مشرې ډاډ

د هانګ کانګ مشره کاري لام

د هانګ کانګ مشرې، هغو نړیوالو پانګه‌والو ته چې د چین د نوي امنیتي قانون د انفاذ له کبله د دې سیمې له سیاسي سقوط څخه وېره لري، ډاډ ورکړی او ویلي یې دي چې دا قانون یوازې محدود شمېر قانون ماتوونکي په نښه کوي.

د هانګ کانګ مشرې کاري لام (Carrie Lam) نن خبریالانو ته وویل، دا ادعاوې چې ګنې د دې ښار ازادي په خطر کې ده، بې‌بنسټه دي او زیاته‌یې کړه د هانګ کانګ د خلکو ازادۍ او اساسي ارزښتونه به د قانون د حاکمیت په رڼا کې خوندي وي، قضا به خپلواکه وي او خلک به‌یې له بېلابېلو ازاديو برخه‌من وي.

پولیسو د یکشنبې په ورځ د دې قانون زرګونه مخالف مظاهره‌چیان د اوښکې بهوونکي ګاز په وسیله خواره کړل او داسې نښتې په‌کې وشوې چې په څو میاشتو کې یې ساری نه‌و لیدل شوی.

د هانګ کانګ د پولیسو مشر جان لي پرون وویل چې دا ښار د تشدد په سیوري کې کېوتی دی او د زیاتېدونکي ترورېزم پر ضد د مبارزې لپاره یوه نوي قانون ته اړتیا لري.

پیکېنګ د مې په ۲۱مه هغه طرح وړاندې کړه چې له مخې یې په هانګ کانګ کې د چین د ملي امنیت قانون نافذېږي.

دا قانون په هانګ کانګ کې د میلیونونو کسانو په ګډون د چین د نفوذ پر ضد د ډیموکراسۍ د پلویانو له پروسږنو څو میاشتنیو پراخو اعتراضونو وروسته پر خیانت، بېلتون‌پالنې، ورانکارۍ، بغاوت او بهرنیو لاسوهنو بندیز لګوي.

د کرونا د نوې څپې د احتمالي خپرېدو په اړه د روغتیا سازمان خبرداری

د کرونا ویروس ټسټ اخیستنه

د روغتیا نړیوال سازمان په ځینو هېوادونو کې د کرونا ویروس د مخنیوي لپاره د محدودیتونو له تدریجي نرمېدو وروسته خبرداری ورکړی چې که دا محدودیتونه ژر لیرې شي، نو ښايي په نړۍ کې د 'کووېډ-۱۹' ناروغۍ نوې څپه خپره شي.

په روانه اوونۍ کې اروپايي هېوادونو د ژوند د عادي کولو په مقصد یو لړ اقدامات وکړل.

په دې ترڅ کې ایسلنډ په کلپونو کې محلفونو ته بیا اجازه ورکړه، اسپانیا د سمندر غاړې راژوندۍ کړې او جرمني د بدني روزنې کلپونه، جیمونه او د لامبو حوضونه، روغتیايي لارښوونو ته په پام سره پرانیستل.

په داسې حال کې چې اکثر هېوادونه لاهم د کرونا ویروس له لومړۍ څپې سره لاس ګرېوان دي د روغتیا نړیوال سازمان د بېړنیو چارو مشر مایک راین پرون دوشنبه خبرداری ورکړ چې کرونا ویروس د لاتینې امریکا، جنوبي اسیا او افریقا په ځینو برخو کې لاهم د سرایت په حال کې دی.

ښاغلي راین وویل وبا اکثرا په څو څپو کې خپرېږي، نو په همدې دلیل 'کووېډ-۱۹' ناروغي ښايي د روان کال په پای کې هغو سیمو ته بیا راوګرځي چې ترې ورکه شوې وه، خو ښاغلي راین زیاته کړه چې که د لومړۍ څپې پر مهال لګول شوي محدودیتونه په چټکۍ سره لیرې شي، نو دا امکان شته چې په دې ویروس د اخته کسانو شمېر همدا اوس زیات شي.

نور راوښيه

XS
SM
MD
LG