د لاسرسۍ وړ لېنکونه

تازه خبر
سه شنبه ۱ چنګاښ ۱۴۰۰ کابل ۰۶:۵۷

افغانستان

سیما سمر: بیلابېل قومونه باید د سولې په جرګه کې ګډون ولري

د افغانستان د بشري حقونو د خپلواك كميسيون چارواكي، د سولې په مشورتي جرګه كې د خلكو د پراخ ګډون غوښتونكي شول.

د دغه كميسيون مشره ډاكټر سيما ثمر نن په كابل كې په درې ورځني غونډه كې چې په هېواد كې د سولې لپاره د هڅو په نامه جوړه شوې وويل، چې په دې جرګه كې بايد چې د هېواد بېلابېلو قومونو ته بلنه وركړل شي.

په پام كې ده، چې د سولې مشورتي جرګه، په افغانستان كې د سولې او ثبات د ټينګښت په هدف د روان كال د غويي په دولسمه نېته په كابل كې جوړه شي.

افغان چارواكو ډاډ وكړى، چې په دې جرګه كې به د افغانستان بېلابېل قومونو ته بلنه وركړل شي.

د ورځې تازه خبرونه دلته ولولئ

د اشرف غني مشورتي ناسته؛ 'سوله د افغانستان دولت لومړیتوب دی'

د افغان ولسمشر محمد اشرف غني په مشرۍ د هېواد له یو شمېر سیاسي او جهادي مشرانو سره مشورتي غونډه

د افغان ولسمشر اشرف غني په مشرۍ د هېواد له یو شمېر سیاسي او جهادي مشرانو سره په هغه مشورتي غونډه کې چې نن په ارګ کې جوړه شوې وه، ټینګار وشو چې د سولې پروسه د افغانستان د دولت لومړیتوب دی او مخ په وړاندې ګامونه به‌یې د تفاهم او اجماع په رڼا کې اخیستل کېږي.

په دې اړه د ولسمشرۍ په ټویټرپاڼه کې ویل شوي چې په دې غونډه کې د امریکا متحده ایالاتو ته د افغان ولسمشر او مل پلاوي د سفر په اړه هم مشوره وشوه او هغه مهم وبلل شو.

د امریکا ولسمشر جو بایډن افغان ولسمشر اشرف غني او د افغانستان د ملي مصالحې عالي شورا رئیس عبدالله عبدالله ته واشنګټن ته د ورتلو بلنه ورکړې. د سپینۍ ماڼۍ د خبرپاڼې له مخې دغه کتنه به د راروانې جمعې په ورځ ترسره شي.

ښاغلي عبدالله د ولسمشر بایډن د دې بلنې هرکلی کړی دی.

عبدالله د دې شورا په ټویټرپاڼه کې ویلي چې دې د امریکا او افغانستان د اړیکو او په افغانستان کې د عادلانه او تلپاتې سولې د رامنځته کېدو په اړه رغنیزو غونډو او بحثونو ته سترګې په لاره دی.

سپینې ماڼۍ په خپره کړې خبرپاڼه کې له افغانستان سره د خپلو ډیپلوماتیکو، اقتصادي او بشري همکاریو ډاډ ورکړی او هم‌‌یې ټینګار کړی چې افغانان باید د جګړې د ختمولو په هدف با مفهومه خبرې وکړي.

په خبرپاڼه کې دغه‌راز ویل شوي چې متحده ایالات به د سولې د روانې پروسې بشپړ ملاتړ ته دوام ورکړي.

ولسمشر بایډن افغان ولسمشر غني او د ملي مصالحې عالي شورا مشر عبدالله داسې مهال سپینې ماڼۍ ته وربولي چې د پرېکړې له مخې یې له افغانستانه د امریکایي ځواکونو د ایستلو بهیر ګړندی پر مخ ځي.

بایډن ویلي چې د روان کال د سپټمبر تر ۱۱مې به دغه بهیر بشپړ شي، خو یو شمېر امریکایي چارواکو ویلي چې ښایي دغه بهیر تر ټاکلي وخت مخکې یعنې د راتلونکې جولای میاشتې تر نیمایي بشپړ شي.

له کله چې دغه بهیر د مې له میاشتې راهیسې پیل شوی، وسله‌والو طالبانو په افغانستان کې حملې زیاتې کړې دي.

چارواکي: د ارزګان ولایت خاص ارزګان ولسوالۍ طالبانو نیولې

ارشیف، ارزګان کې د افغان ځواکونو عملیات

د ارزګان چارواکي وایي، افغان امنیتي ځواکونه د دې ولایت له خاص ارزګان ولسوالۍ راوتلي او ولسوالي طالبانو نیولې ده.

د ارزګان د والي له دفتره په خپره شوې خبرپاڼه کې په دې اړه زیات جزئیات نه‌دي ورکړل شوي، خو یوازې دومره ویل شوي چې د افغان ځواکونو موجودیت په دې ولسوالۍ کې اغېزمن نه‌و.

په ولسي جرګه کې د ارزګان ولایت د خلګو استازي قدرت‌الله رحیمي بیا ازادي راډیو ته وویل چې په دغه ولسوالۍ کې مېشت ټول سرتېري د مرکزي او ولایتي ادارې د نه‌پاملرنې له امله تېره شپه وسله‌والو طالبانو ته تسلیم شوي دي.

ښاغلی رحیمي زیاتوي: "هلته ټول سرتېري تېر ماښام طالبانو ته تسلیم شوي، د ملي اردو په کمپ کې پاتې پولیس هم طالبانو ته تسلیم شوي. لامل يې دا دی چې هغوی نارې وهلې چې له موږ سره مرسته وکړئ، خو حکومت‌یې غږ وانه‌ورېد."

په روانه میاشت کې د ارزګان ولایت دا درېیمه ولسوالۍ ده چې د وسله‌والو طالبانو لاس ته لوېږي. له دې وړاندې ګېزاب او چنارتو ولسوالۍ طالبانو نیولې وې.

د خوست هوايي ډګر ته نړیوال پروازونه پیل شول

د خوست هوایي ډګر ته له دوبۍ لومړنی نړیوال پرواز

د خوست هوایي ډګر ته لومړنی نړیوال پرواز له دوبۍ څخه ترسره شو.

د افغانستان د ملکي هوايي چلند ادارې لوی سلاکار احمدالله فیضي ازادي راډیو ته وویل، له دوبۍ څخه د اریانا افغان هوایي شرکت الوتکې په دې پرواز کې ۹۰ تنه مسافرین خوست ته ولېږدول شول.

د خوست په ګډون د لویې پکتیا په لسګونه زره اوسېدونکي له څو لسیزو راهیسې د خلیج په هېوادونو کې اوسي او کاروبارونه سرته رسوي.

د خوست اوسېدونکي د دغه هوایي ډګر پرانیستلو ته ډېر خوښ دي.

یو یې هم اسماعیل افغان دی چې په دې لومړني پرواز کې له دوبۍ بېرته وطن راغلی.

نوموړي ازادي راډیو ته خپل احساس داسې بیان کړ: "۳۱، ۳۲ کاله مې په اماراتو کې مساپري کړې، خو دا چې په دومره لنډ وخت کې ترخپل کلي رارسېږم، داسې د خوښۍ احساس مې په ټول عمر کې نه‌دی کړی. الله تعالی دې افغانستان امن کړي."

د خوست د نړیوال هوايي ډګر مشر عبدالصمد تڼیوال وايي، د دې هوايي ډګر د ټولو برخو کار بشپړ شوی او دا مهال سل سلنه ملي او نړیوالو پروازونو ته چمتو دی.

د ده په وینا، د خوست هوايي ډګر به په نږدې راتلونکي کې د افغان ولسمشر له‌خوا رسماً پرانیستل شي او له دې ځایه به منظم ملي او نړیوال پروازونه پیل شي.

د افغانستان د فوټبال ملي ټیم کپټان د بحرین له ال حاله ټیم سره یوځای شو

د افغانستان د فوټبال د ملي ټیم کپټان فرشاد نور

د افغانستان د فوټبال د ملي ټیم کپټان فرشاد نور د یوه کال قرارداد له مخې د بحرین له ال حاله ټیم سره یوځای شو.

د افغانستان د فوتبال فدراسیون د فېس‌بوک پاڼې له مخې نور به له دغه ټیم سره د بحرین د غوره لیګونو په سیالیو کې برخه اخلي.

نوموړی د افغانستان او هند ټیمونو ترمنځ وروستۍ برخلیک ټاکونکې لوبه کې ټپي شوی و.

افغانستان دغه لوبه له هند سره مساوي کړه او د اسیایي جام لوبو بل دور ته‌یې لاره وموندله.

د میمنې ښار پر پوستو او د پشتونکوټ پر سبز سیمې بریدونه په شا وتمبول شول

ارشیف، فاریاب کې د افغان ځواکونو عملیات

د فاریاب امنیتي چارواکي وایي چې د میمنې ښار پر امنیتي پوستو او د دې ولایت د پشتون کوټ ولسوالۍ پرسبز سیمې یې د طالبانو بریدونه په شا تمبولي دي.

د دې ولایت د امنیه قوماندانۍ ویاند عبدالکریم یورش رسنیو ته نن وویل چې د طالبانو د تېرې شپې په بریدونو کې د ملا شاکر په نوم د دې ډلې د یوه سیمه‌ییز قوماندان په ګډون ۴ وسله‌وال وژل شوي دي.

طالبانو چې د راپورونو له مخې تېره ورځ میمنه محاصره کړې وه، تر اوسه د دغې ادعا په اړه څه نه‌دي ويلي.

دفاع وزارت: د تخار خواجه غار او بنګي ولسوالۍ بېرته له طالبانو ونیول شوې

ارشیف، تخار کې د افغان ځواکونو عملیات

د افغانستان دفاع وزارت وایي، په تخار ولایت کې خواجه غار او بنګي ولسوالۍ یې بېرته له طالبانو نیولې دي.

د دې وزارت مرستیال ویاند فواد امان ازادي راډیو ته وویل: "د افغان امنیتي او دفاعي او د ولسي پاڅون کوونکو د تېرې شپې د عملیاتو په پایله کې خواجه غار او بنګي ولسوالۍ په بشپړ ډول له وسله‌والو طالبانو تصفیه شوې او زموږ امنیتي ځواکونه په‌کې ځای پر ځای شول."

طالبانو تر اوسه د دغې ادعا په اړه څه نه‌دي ویلي، خو د دې ډلې ویاند ذبیح‌الله مجاهد په یوه ټویټ کې ادعا کړې چې د تخار د خواجه بهاوالدین ولسوالۍ یې په بشپړه توګه نیولې ده.

حکومت تر اوسه د دې ولسوالۍ د سقوط خبره نه‌ده تأیید کړې.

د بلخ دولت‌اباد ولسوالۍ هم د 'وسله‌والو طالبانو' لاس ته ولوېده

ارشیف، بلخ کې د افغان ځواکونو عملیات

د بلخ ولایت دولت‌اباد ولسوالۍ هم طالبانو ونیوله.

د دولت‌اباد ولسوال جلال‌الدین قاري‌زاده ازادي راډیو ته د دې ولسولۍ د سقوط خبره تأیید کړه او ویې‌ویل طالبانو تېره شپه دا ولسوالۍ ځکه ونیوله چې د امنیتي ځواکونو شمېر په‌کې کم و او هم شاهین قول اردو په‌کې د موجوده ځواکونو هوایي ملاتړ ونه‌شو کړای.

تر اوسه کومې بلې رسمي سرچینې دا خبر نه‌دی تأیید کړی.

دا له پرون راهیسې درېیمه ولسوالي ده چې په بلخ کې یې طالبان نیسي.

نن سهار د دغه ولایت د شولګرې ولسوالۍ هم د وسله‌والو طالبانو له‌خوا ونیول شوه.

د شولګرې امنیه قوماندان سید عارف اقبالي دغه موضوع تأیید کړې ده.

وسله‌والو طالبانو تېر ماښام د شولګرې ولسوالۍ او قوماندانۍ پر ودانیو ډله‌ییز بریدونه وکړل.

قوماندان وايي چې تر ۱۲ ساعته جګړې وروسته وسله‌والو د ولسوالۍ مرکز ونیوه.

ویل شوي په دې نښته کې افغان امنیتي ځواکونو ته مرګ‌ژوبله اوښتې، خو دقیق شمېر یې نه‌دی څرګند.

د هرات چارواکي: پر چشت او ګلران ولسوالیو د طالبانو حملې په شا وتمبول شوې

ارشیف، هرات کې د طالبانو ضد د افغان ځواکونو عملیات

د هرات چارواکي د دې ولایت پر چشت او ګلران ولسوالیو د طالبانو د حملو د په شا تمبولو خبر ورکوي.

د هرات د والي ویاند جیلاني فرهاد نن ازادي راډیوته وویل چې افغان امنیتي ځواکونو پر ګلران ولسوالۍ د طالبانو د تېرې شپې برید په شا وتمباوه چې په نتیجه کې یې د نوموړي په وینا پنځه وسله‌وال مړه او پنځه نور ټپیان شول.

نوموړی په چشت ولسوالۍ کې پر افغان امنیتي ځواکونو د طالبانو په برید کې هم د پنځو وسله‌والو د وژلو او درې نورو د ټپي کېدو خبره کوي.

ښاغلي فرهاد وویل، په دواړو ولسوالیو کې په نښتو کې افغان ځواکونو ته تلفات نه‌دي رسېدلي، خو یوازې یو پولیس په چشت ولسوالۍ کې د یوه ماین په چاودنه کې وژل شوی دی.

وسله‌والو طالبانو تر اوسه د دغې ادعا په اړه څه نه‌دي ويلي.

عبدالله عبدالله د جو بایډن له‌خوا واشنګټن ته د بلنې هرکلی وکړ

د افغانستان د ملي مصالحې عالي شورا مشر عبدالله عبدالله

د افغانستان د ملي مصالحې عالي شورا مشر عبدالله عبدالله د امریکا د ولسمشر جو بایډن له‌خوا واشنګټن ته د بلنې هرکلی کړی دی.

عبدالله د دې شورا په ټویټرپاڼه کې ویلي چې دی د امریکا او افغانستان د اړیکو او په افغانستان کې د عادلانه او تلپاتې سولې د رامنځته کېدو په اړه رغنیزو غونډو او بحثونو ته سترګې په لاره دی.

افغان ولسمشر اشرف غني تر اوسه د بایډن د دغې بلنې په اړه څرګندونې نه‌دي کړي.

سپېنې ماڼۍ پرون په یوه بیان کې وویل چې راروانه جمعه به ولسمشر جو بایډن د خپل افغان سیال اشرف غني او د افغانستان د ملي مصالحې د عالي شورا د رئیس عبدالله عبدالله کوربه وي.

د سپينې ماڼۍ په بیان کې ویل شوي چې له واشنګټن څخه د افغان لوړپوړو چارواکو کتنه به د متحده ایالاتو او افغانستان ترمنځ د دوامداره مشارکت څرګندونه وکړي.

په بیان کې دغه‌راز ویل شوي چې امریکا د افغانستان ترڅنګ ولاړه ده څو یقیني کړي چې دا هېواد هېڅکله بیا د ترهګرو په امن ځاله بدل نه‌شي چې ترې امریکا وګواښل شي.

سپینې ماڼۍ له افغانستان سره د خپلو ډیپلوماتیکو، اقتصادي او بشري همکاریو ډاډ ورکړی او هم‌‌یې ټینګار کړی چې افغانان باید د جګړې د ختمولو په هدف با مفهومه خبرې وکړي.

په بیان کې دغه‌راز ویل شوي چې متحده ایالات به د سولې د روانې پروسې بشپړ ملاتړ ته دوام ورکړي.

ولسمشر بایډن افغان ولسمشر غني او د ملي مصالحې عالي شورا مشر عبدالله داسې مهال سپینې ماڼۍ ته وربولي چې د پرېکړې له مخې یې له افغانستانه د امریکایي ځواکونو د ایستلو بهیر ګړندی پر مخ ځي.

بایډن ویلي چې د روان کال د سپټمبر تر ۱۱مې به دغه بهیر بشپړ شي، خو یو شمېر امریکایي چارواکو ویلي چې ښایي دغه بهیر تر ټاکلي وخت مخکې یعنې د راتلونکې جولای میاشتې تر نیمایي بشپړ شي.

د بلخ شولګره ولسوالۍ د 'وسله‌والو طالبانو' له‌خوا ونیول شوه

ارشیف، بلخ کې د افغان ځواکونو عملیات

د بلخ ولایت د شولګرې ولسوالۍ امنیه قومانداني وايي چې دغه ولسوالۍ نن سهار د وسله‌والو طالبانو له‌خوا ونیول شوه.

د شولګرې امنیه قوماندان سید عارف اقبالي دغه موضوع تأیید کړې ده.

وسله‌والو طالبانو تېر ماښام د شولګرې ولسوالۍ او قوماندانۍ پر ودانیو ډله‌ییز بریدونه وکړل.

قوماندان وايي چې تر ۱۲ ساعته جګړې وروسته وسله‌والو د ولسوالۍ مرکز ونیوه.

ویل شوي په دې نښته کې افغان امنیتي ځواکونو ته مرګ‌ژوبله اوښتې، خو دقیق شمېر یې نه‌دی څرګند.

جو بایډن راروانه جمعه د محمد اشرف غني او عبدالله عبدالله کوربه دی

د افغانستان جمهور رئیس محمد اشرف غني او د ملي مصالحې عالي شورا د رئیس عبدالله عبدالله

سپېنې ماڼۍ ویلي راروانه جمعه به ولسمشر جو بایډن د خپل افغان سیال محمد اشرف غني او د ملي مصالحې عالي شورا د رئیس عبدالله عبدالله کوربه وي.

د سپينې ماڼۍ په بیان کې راغلي چې واشنګټن ته د افغان لوړپوړو چارواکو سفر به د متحده ایالاتو او افغانستان ترمنځ د دوامداره مشارکت څرګندونه وکړي.

په اعلامیه کې راغلي چې امریکا د افغانستان ترڅنګ ولاړه ده څو یقیني کړي چې دا هېواد هېڅکله بیا د ترهګرو په امن ځاله بدل نه‌شي چې ترې امریکا وګواښل شي.

سپینې ماڼۍ له افغانستان سره د خپلو ډیپلوماتیکو، اقتصادي او بشري همکاریو ډاډ ورکړی او هم‌یې ټینګار کړی چې افغانان باید د جګړې د ختمولو په هدف با مفهومه خبرې وکړي.

امریکا ویلي د سولې د روانې پروسې بشپړ ملاتړ ته به دوام ورکړي.

افغان ولسمشر او د ملي مصالحې عالي شورا رئیس داسې وخت امریکا ته ځي چې د بهرنیو ځواکونو د وتلو له پيل سره هم‌مهاله په افغانستان کې جګړو زور اخیستی او په دې نږدې درېیو میاشتو کې د طالبانو او افغان پوځیانو ترمنځ د نږدې ۳۰ ولسوالیو د لاس په لاس کېدو راپورونه ورکړل شوي.

سیمه‌ییزو چارواکو ویلي په تخار، فاریاب، جوزجان، سمنګان، فراه او پکتیا کې لږترلږه شپږ نورې ولسوالۍ یوازې په تېر یوه اوونۍ کې د وسله‌والو طالبانو لاس ته لوېدلي.

هالند کې لسګونه افغانانو د افغانستان د روانې جګړې خلاف لاریون وکړ

ارشیف، د ننګرهار مرکز جلال‌اباد ښار کې پر یوه موټر د چاودنې سیمه

په هالند کې مېشتو لسګونه افغانانو پرون د افغانستان د روانې جګړې په خلاف یو لاریون وکړ.

د لاریون ګډونوالو د افغانستان ګاونډی هېواد پاکستان تورناوه چې د روانې جګړې تر شا لوی لاس لري.

د امستردام په (دم سکوایر) کې د دې لاریون یوې تنظیموونکې سایره نورزۍ وویل: "پاکستان له هرې وسیلې څخه کار اخیستی تر څو په افغانستان کې جګړه اوږده وساتي او زموږ افغانان په خپله خاوره کې د خپل ولس په وړاندې استمعالوي."

پاکستاني چارواکو بیا ویلي چې افغانان او افغان حکومت دې نور د دوی له ملامتولو لاس واخلي.

د دغه هېواد د بهرنیو چارو وزیر شاه محمود قریشي تازه په یوه مرکه کې دا رد کړې چې ګنې هېواد یې په خپله خاوره کې طالبانو ته ځای ورکړی. هغه ویلي له طالبانو سره تماسونه د دې لپاره دي چې د سولې د خبرو لپاره اسانتیا رامنځته شي.

د هالند لاریون په یوه پرېکړه‌لیک پای ته ورسېد چې ګډونوالو یې ویل د هالند پارلمان او د بشري حقونو نورو نړیوالو بنسټونو ته به‌یې لېږي څو هغوی متوجې کړي چې په افغانستان کې روانه جګړه بندېدو ته اړتیا لري.

کابل کې د جګړې او تاوتريخوالي له کبله د ماشومانو د زيانمنېدو ملي بحث وشو

کابل کې په یوه وسله‌واله حمله کې یوه ټپي شوې ماشومه

په کابل کې د جګړې او تاوتريخوالي له کبله د ماشومانو د زيانمنېدو یو ملي بحث ترسره شو.

د سولې په چارو کې د دولت وزارت چې د دغه بحث کوربه و وايي هدف دا دی چې په ماشومانو باندې د جګړې او تاوتريخوالي د تأثیراتو په اړه د نړیوالو پام جلب او په حل لارو تمرکز وشي.

د سولې په چارو کې د دولت وزیر سید سعادت منصور نادري دې ملي بحث ته په وینا کې وویل چې "طالبان باید په ډاګه کړي چې دوی د ماشومانو ژوند، حقونو او راتلونکي ساتنې ته ژمن دي او د جګړې او تاوتريخوالي له ناوړه پايلو څخه د ماشومانو ساتنې لپاره د اسلامي او ملي اخلاقو پيروي کوي".

په افغانستان کې روانې جګړې د ښکېلو خواو سربېره له افغان ملکیانو هم درنه قرباني اخلي.

د یوناما د یوه راپور په اساس د ۲۰۲۱ کال په لومړۍ ربع کې نږدې ۴۵۰ افغان ماشومانو ته مرګ‌ژوبله رسېدلې چې د تېر کال د همدې مودې په نسبت ۲۳ فیصده زیاتوالی ښيي.

افغانستان: تمه ده پاکستان به طالبان د سولې بامفهومه خبرو ته وهڅوي 

د افغانستان د بهرنیو چارو وزارت ویاند ګران هېواد 

د افغانستان د بهرنیو چارو وزارت وايي، تمه لري چې پاکستان به له خپل نفوذه په استفادې طالبان د سولې بامفهومه خبرو ته وهڅوي.

د دغه وزارت ویاند ګران هېواد نن یکشنبه (د غبرګولي ۳۰مه) رسنیو ته په لېږلي ویډیويي پیغام کې دا خبره کړې ده: "موږ متیقن یو چې د پاکستان دولت، د معنا داره مذاکرو د پیل، سولې او د سولې بهیر د بریا لپاره د طالب مشرانو هڅونې او نفوذ ته مؤثر وسایل په لاس کې لري."

تر دې مخکې د پاکستان د بهرنیو چارو وزیر شاه محمود قریشي ویلي و، د طالبانو مشران په پاکستان کې نه بلکې په افغانستان کې دي.

سرچینه: وسله والو جلال اباد کې یوه ښځینه پولیسه وژلې

د جلال اباد ښار

په ننګرهار کې یوه سرچینه وايي، په مرکز جلال اباد کې وسله والو نن یکشنبه (د غبرګولي ۳۰مه) یوه ښځینه پولیسه په ډزو ووژله.

د ننګرهار امنیه قومانداني پېښه تاییدوي، خو په دې اړه نور جزییات نه ورکوي.

یوې سرچینې چې نه یې غوښتل نوم یې واخیستل شي، ازادي راډیو ته وویل، دغه پولیسه د سرحدي لوا وه.

د دې پېښې مسوولیت چا نه دی منلی.

څو میاشتې مخکې هم د جلال اباد په درېیمه ناحیه کې د بصیرې په نوم یوه ښځینه پولیسه د وسله والو په حمله کې وژل شوې وه.

نور راوښيه

XS
SM
MD
LG