د مخالفو ګوندونو غړي وايي، د قیرغیزستان په شمال لویدیځ کې د تیرې ورځې له شخړو او مظاهرو راپدیخوا نه ولسمشر باقیف لیدل شوی او نه يې هم څرګندونې کړي دي او د سیاسي مخالفانو په وینا نوموړی د هیواد بل لوی ښار اووش ته تللی دی.
په عین حال کې صدراعظم دانیار اوسینوف هم خپله استعفې وړاندې کړې ده.
د اپوزوسیون مشر تیمر ساریف وویل، په بیشکیک کې د بهرنیو چارو د پخواني وزیرې روسا اوتنبایوا په مشری نوی حکومت تشکیل شوی دی.
د ازادي راډیو د قیرغیزي څانګې د راپور له مخې د اپوزوسیون مشر د چهار شنبې په شپه پر دولتي تلویزون څرګند شو، څو خلکو ته یقین ورکړي چې د ولس واک او د حکومت چارې یې په لاس کې اخستي دي.
د راپورونو له مخې په قیرغیزستان کې امنیتي وضیعت کړکیچن دی او د دغه هېواد له یو شمیر برخو څخه د شوکو او غلاو راپورونه هم رسیدلي دي.
دا دراماتیک تحولات له هغو سختو شخړو او پراخو مظاهرو یوه ورځ وروسته رامنځته شوي، چې د پولیسو او قهر جنو مظاهرو کونکو تر منځ د قیرغیزستان د ولسمشرۍ د ماڼۍ مخ ته ترسره شول.
راپورونه وايي، کله چې پرون مظاهره کونکو د دولتي تلویزون په کنټرول کې واخست د اپوزوسیون مشر د تلویزون له لارې پر حکومت د واک پریښودو غږ وکړ.
د قیرغیزستان د روغتیا وزارت وايي، په پرونیو شخړو کې ۴۰ تنه وژل شوي خو مخالف ګوندونه وايي، تر سلو زیات کسان مړه شوي دي.
د اپوزوسیون مشر ویلي، ټول سیاسي بندیان چې د مظاهرو له پیل مخکې نیول شوي ول خوشي کړی شوي دي.
د ملګرو ملتونو سرمنشي ویلي، هغه ته په قیرغیزستان کې وروستي تاوتریخوالي ټکان ورکړی او بل خوا په واشنګټن کې د بهرنیو چارو د وزارت ویاند وویل، امریکا وضیعت څاري او هېواد يې د قیرغیزستان له خلکو سره ولاړ دی.
په عین حال کې د اروپايي ټولنې د بهرنیو اړیکو مشرې او د روسیې صدراعظم په قیرغیزستان کې د وروستي تاوتریخوالي په اړه اندیښنه څرګنده کړې او دواړو د وضیعت د اراموالي غوښتنه کړې ده.