د لاسرسۍ وړ لېنکونه

تازه خبر
جمعه ۲۸ غبرګولی ۱۴۰۰ کابل ۰۴:۲۵

نړۍ

ایران په سلو کې ۲۰ یورانیم غني کوي

د ایران ولسمشرمحمود احمدي نژاد امر کړی چې ایران دې په لوړه درجه د شل فیصده یورانیمو غني کول پیل کړي .

د ایران د اتومي ادارې ريیس علي اکبرصالحي پرون دولتي تلویزیون ته وویل چې دا هیواد به د دوشنبې په ورځ یعنې نن د ملګروملتو د اتومي انرژۍ نړیوالې څارونکې ادارې ته د ایران د دې پلان په باب خبر ورکړي چې غواړي په سلو کې شل یورانیم په لوړه درجه غني کړي.

علي اکبر صالحي وویل په لوړه درجه د یورانیمو د غني کولو پروسه به د سې شنبې په ورځ پیل شي .

د ایران د اتومي ادارې ريیس زیاته کړه چې د دغو موادوپروسس به سبا د نظنز په اتومي بټۍ کې پیل شي .

د امریکا دفاع وزیر رابرت ګېټس د ایران دا اعلان مایوسوونکی بللی او پر ایران یې د زیاتو بندیزونو د لګولو ملاتړ وکړ.

د جرمني دافاع وزیر کارل ګوتنبرګ هم پرون پر ایران د زیاتو بندیزونو غوښتنه وکړه ځکه چې د هغه په وینا نور د نړیوالې ټولنې زغم پای ته رسېدلی دی .

د ورځې تازه خبرونه دلته ولولئ

د قرغزستان د صدراعظم پخوانی مرستیال د اداري فساد په تور ونیول شو

د قرغزستان د صدراعظم پخوانی مرستیال طاهربېګ سرپاشیف

د قرغزستان د صدراعظم پخوانی مرستیال طاهربېګ سرپاشیف د اداري فساد په تور نیول شوی دی.

پر اداري فساد دغه څېړنه د کومتور په نوم د سرو زرو د یوه کان د پروژې په باب پیل شوې وه.

د قرغزستان د ملي امنیت دولتي کمېټې ویلي، سرپاشیف پرون پنجشنبه نیول شوی دی.

دغه کمېټه وايي، د صدراعظم پخوانی مرستیال سرپاشیف په دې تورن دی چې د کاناډا سنټیرا ګولډ (Centerra Gold) په نوم د شرکت په ګټه‌یې لابي کړې ده او داسې قانوني لارې چارې یې ورته برابرې کړې وې چې دغه شرکت وکړای شي د کان د ساحې په شااوخوا کې د پرتو غرونو په لوړه ارتفاع کې هم کار وکړای شي.

د قرغزستان چارواکي وايي، دغه کار د دې سبب شوی چې دوو طبیعي یخچالونو ته چاپېریالي زیانونه واوړي.

په نورو کسانو کې چې د دې قضیې په تړاو په وروستیو کې نیول شوي، پخوانی صدراعظم عمربېګ بابانوف، د ولسمشر د دفتر پخوانی رئیس دانیار ناریمبایف او د پارلمان ګڼ اوسني یا پخواني غړي شامل دي.

د اسرائیل جټ الوتکو بیا په غزه کې ځیني اهداف په نښه کړل

ارشیف، غزه کې د اسرائیل له لوري یو شمېر بمبار شوې سیمې

د اسرائیل جټ الوتکو روانه اوونۍ د دوهم وار لپاره په غزه کې ځیني اهداف په نښه کړل.

دا وروسته له هغې چې د فلسطین وسله‌والو د اسرائیل پر جنوبي سیمو اور شیندونکي بالونونه وویشتل.

پرون او تېره شپه د بالونونو د ویشتلو او هوايي حملو په نتیجه کې هغه نازک اوربند چې د اسرائیل او د غزې د حماس ترمنځ شوی و، له خطر سره مخامخ شوی دی.

تېره میاشت د مصر په منځګړیتوب د اوربند له ټینګښت سره د دواړو لورو ترمنځ ۱۱ ورځنۍ سخته جګړه پای ته ورسېده.

د اسرائیل پوځ وايي د اور شیندونکو بالونونو د ویشتلو په ځواب کې یې د حماس ډلې اړوند پوځي مرکزونه او د راکټو توغولو ساحه یې ویشتلې ده.

په ایران کې د ۱۴۰۰ کال ولسمشرۍ ټاکنې

ایران کې د ولسمشرۍ ټاکنو کې د رأی ورکونې بهیر

په ایران کې نن د ۱۴۰۰ کال ولسمشرۍ ټاکنې روانې دي.

د رأی ورکونې مرکزونه په پلازمېنه تهران او نورو ښارونو کې د سهار له اوو پرانیستل شوي.

د ایران مذهبي رهبر علي خامنه‌ای د رأی‌ګیري په لومړنیو شېبو کې رایه ورکړه او خلک‌یې په ټاکنو کې ګډون ته وهڅول.

محسن رضایي میر قائد، ابراهیم رئیسي، امیر حسین قاضي‌زاده هاشمي او عبدالناصر همتي د دې دورې له کاندیدانو دي.

د ایران د کورنیو چارو وزارت ویلي چې دې ټاکنو ته له ۵۹ ملیونو زیات کسان د رأی ورکونې په شرایطو برابر دي.

د نظر پوښتنو له مخې بیا په دې ټاکنو کې د خلکو د ګډون کچه له ۳۷ تر ۴۷ فیصده بلل شوې.

ایران کې داسې وخت د ۱۳م دور ولسمشرۍ ټاکنې ترسره کېږي چې ګڼو خلکو، سیاسي فعالانو او بهر مېشتو ګروپونو په دې ټاکنو کې د نه‌ګډون غږ پورته کړی.

په ایران کې د ۱۳۹۸ کال د لړم د مظاهره‌چیانو په لویه کچه ځپل او د اوکرایني الوتکې نسکورول هغه لویې پېښې وې چې په حکومت باندې یې د خلکو باور تر ډېره زیانمن کړ.

الکسي ناوالنۍ: ولادیمیر پوتین "داسې دروغجن دی چې خپل دروغ نه‌شي درولی

د مسکو رژیم مخالف زنداني الکسي ناوالنۍ

د مسکو رژیم مخالف زنداني الکسي ناوالنۍ ویلي، د روسیې ولسمشر ولادیمیر پوتین "داسې دروغجن دی چې خپل دروغ نه‌شي درولی".

ناوالنۍ پرون پر خپل انسټاګرام ولیکل چې پوتین باید د رواني ستونزو درملنه وکړي، هغه ستونزه چې د ده په ټکو په واک کې د اوږدې مودې له کبله ورته پيدا شوې ده.

نوموړی دا تور داسې مهال لګوي چې پوتین د امریکا له ولسمشر جو بایډن سره تر ملاقات وروسته خبریالانو ته وویل، ناوالنۍ تېره اګسټ میاشت کې د محکمې له‌خوا پر هغه لګول شوي الزامات له پامه غورځولي دي.

ناوالنۍ پرون د روسیې له خلکو وغوښتل چې د سپټمبر میاشتې په پارلماني ټاکنو کې ګډون وکړي چې حاکم ګوند د رأی ورکونې په ځیرک سیستم سره چې د دوی پلویانو جوړ کړی، له واکه لیرې کړي.

ایران کې نن د ولسمشرۍ ټاکنې ترسره کېږي

ارشیف، ایران کې د ولسمشرۍ ټاکنو لپاره چمتووالی او تبلیغات

په ایران کې نن د ولسمشرۍ ټاکنې ترسره کېږي، د ازادي راډیو فردا څانګې د چارواکو په حواله ویلي چې دغلته رأی ورکونه د سهار په ۷ بجې پیلېږي او د شپې تر ۱۲ بجو به دوام ولري.

د ایران ولسمشر حسن روحاني چې د ولسمشرۍ دوهمه دوره‌یې په بشپړېدو ده، پرون له خلکو وغوښتل چې له ګېلو او نهیلیو سره سره ټاکنو کې ګډون وکړي.

د ایران ولسمشریزو ټاکنو ته پنځه نوماندان ولاړ دي او غالب ګومان دا دی چې د ایران د قضائیه قوې سخت‌دریځی مشر ابراهیم رئیسي به د حسن روحاني ځای ونیسي.

بایډن او پوتین: د نظرونو له اختلافونو سره-سره په خبرو کې پرمختګ شوی

د امریکا او روسیې ولسمشرانو جوبایډن او ولادمیر پوتین

د امریکا او روسیې ولسمشرانو جوبایډن او ولادمیر پوتین ویلي، د نظرونو له ژورو اختلافونو سره-سره په خبرو اترو کې یې پرمختګ کړی دی.

دوی همدا راز ویلي چې په جنیوا کې یې په خپله لومړنۍ مخامخ غونډه کې د وړو مسالو په اړه د نظر یووالی درلود.

خو د لویو مسالو پرسر اختلاف سبب شوی چې د دوو هېوادونو اړیکې له سړې جګړې را وروسته تر بل هر وخت سړې شي.

د خلیج شورا: د ایران اټمي خبرو کې دې د دوی توغندويي پروګرام شامل شي

د خلیج د همکارۍ شورا

د خلیج د همکارۍ شورا د ایران په اټمي خبرو کې د دغه هېواد د توغندويي پروګرام د شاملېدو غوښتنه وکړه.

دې شورا پرون چهارشنبه (د غبرګولي ۲۶مه) اعلان وکړ چې د ایران له اټمي پروګرامه د دغه هېواد د توغندو د جوړولو پروګرام بېلول به خطرناکه وي.

د خلیج د همکارۍ شورا د سعودي عربستان په پلازمېنه ریاض کې په خپله غونډه کې د ویانا په خبرو اترو کې د دغو موضوعاتو د شاملېدو په اړه د نړیوالو قدرتونو د پاملرنې غوښتنه وکړه.

ایران له فرانسې، بریتانیا، جرمني، چین، روسیې، اروپايي اتحادیې او امریکا سره د روانې اوونۍ د شنبې په ورځ په ویانا کې د خبرو شپږم پړاو پیل کړ.

امریکا ویلي، که ایران خپلې هغه ژمنې عملي کړي چې په اټمي موافقه کې یې کړي، دې موافقې ته بېرته ستنېږي.

امریکا په ۲۰۱۵ میلادي کال له دې موافقې ووته او پر ایران یې بندیزونه سخت کړل.

هاخوا د فرانسې د بهرنیو چارو وزارت وایي، د ایران د ۲۰۱۵ میلادي کال اټمي تړون د احیا لپاره د تهران او لویدیځو قدرتونو ترمنځ په خبرو کې د پام وړ اختلافات تراوسه په خپل حال پاتې دي.

دې وزارت پرون په یوه خبرپاڼه کې وویل چې خبرې ستونزمنې شوي او دې ته اړتیا ده چې زړورې پرېکړې وشي ځکه چې وخت ډېر نشته.

تر دې یوه ورځ مخکې د اټمي انرژۍ د نړیوالې ادارې رییس رافایل ګروسي ویلي و چې د ایران د اټمي تړون د احیا لپاره باید انتظار وایستل شي چې په ایران کې نوی ولسمشر وټاکل شي.

ټاکل شوې چې سبا جمعه د ایران د ولسمشرۍ انتخابات ترسره شي او تمه ده چې نوی ولسمشر به تر دوو میاشتو پورې خپله کابینه وټاکي.

اروپايي اتحادیه به د بلاروس ۷۸ تنه او ۷ موسسې تحریم کړي 

هغه الوتکه چې بلاروسي چارواکو په زوره ښکته کولو ته اړ ایستې وه.

د اروپايي اتحادیې سفیرانو پرون چهارشنبه (د غبرګولي ۲۷مه) موافقه وکړه چې ۷۸ تنه او ۷ موسسې به د بلاروس له لوري د راین ایر د سپرلیو د الوتکې د جبري کښته کولو په تړاو تحریم کړي.

اروپايي دیپلوماتانو وویل،۷ تنه د دې الوتکې د کوزولو په پېښه کې د مسقیم لاس لرلو په خاطر او ۷۱ نور د مخالفانو پرضد د بلاروس د حکومت د پراخو ځپونکو اقداماتو په خاطر تحریم شوي دي.

بلاروس د مې په ۲۲مه د راین ایر یوه الوتکه چې له اتنه ویلنیوس ته روانه وه، د جنګي الوتکې په وسیله په زوره کښته کړه او یو مخالف خبریال رومان پروتاسویچ یې ورڅخه کښته او بندي کړ.

د دې اقدام په ځواب کې اروپايي اتحادیې د بلاروس پر فضا د الوتکو د تګ راتګ د درولو ترڅنګ د اروپايي اتحادیې د غړیو هېوادونو هوايي ډګرونو ته د بلاروس د الوتکو پر تګ راتګ بندیز ولګاوه.

مکنزي سکاټ ۲ میلیارده او ۷۰۰ میلیونه ډالره مرستندویو ټولنو ته ورکوي

د امازون د بنسټګر پخوانۍ مېرمن مکنزي سکاټ

د امازون د بنسټګر پخوانۍ ماندینې مکنزي سکاټ اعلان وکړ چې دوه میلیارده او ۷۰۰ میلیونه ډالره مرستندویو ټولنو او هغې موسسې ته ورکوي چې د جنسیتي برابرۍ په برخه کې کار کوي.

اغلې سکاټ چې د نړۍ تر ټولو شتمنه ښځه ده، د ټولنیزو شبکو له لارې د دغه خبر د اعلانولو ترڅنګ ویلي دا پیسې چې دې بښلي؛ د مرستو ترلاسه کوونکو ته د مثبتو فعالیتونو لار هواروي.

مکنزي سکاټ تردې وړاندې په ۲۰۲۰ میلادي کې هم د خپلو شتمنیو ۶ میلیارده ډالره د کرونا ځپلیو د مالي مرستو پروګرام، د تور پوستو تعلیمي مرکزونو، د جنسیتي مساوات په برخه کې فعالو موسسو او پوهنتونونو ته بخښلي وو.

د فوربس مجلې پر اساس د مکنزي سکاټ شتمني ۶۰ میلیارد ډالرو ته رسېږي.

دا پیسې یې په ۲۰۱۹ میلادي کې له خپل مېړه جېف بیزوس څخه د طلاق پر سر له جوړ جاړي وروسته ترلاسه کړې.

فرانسه: د ایران د اټمي تړون خبرو کې د پام وړ اختلافات لا شته

ارشیف، د ایران پر اټمي تړون د نړیوالو قدرتونو ترمنځ خبرې

د فرانسې د بهرنیو چارو وزارت وایي، د ایران د ۲۰۱۵ میلادي کال اټمي تړون د احیا لپاره د تهران او لویدیځو قدرتونو ترمنځ خبرو کې د پام وړ اختلافات تراوسه په خپل حال پاتې دي.

دې وزارت پرون چهارشنبه (د غبرګولي ۲۶مه) په یوه خبرپاڼه کې وویل چې خبرې ستونزمنې شوې او دې ته اړتیا ده چې زړورې پرېکړې وشي، ځکه چې وخت ډېر نشته.

تر دې یوه ورځ مخکې د نړیوالې اټمي انرژۍ د ادارې رییس رافایل ګروسي ویلي چې د ایران د اټمي تړون د احیا لپاره باید دې منتظر شو چې په ایران کې نوی ولسمشر وټاکل شي.

ټاکل شوې چې سبا جمعه د ایران د ولسمشرۍ انتخابات ترسره شي او تمه ده چې نوی ولسمشر به تر دوو میاشتو پورې خپله کابینه وټاکي.

درې چینایي ستورمزلي د فضایي اډې پر لور روان شول

ارشیف، عکس تزئیني بڼه لري

درې چینایي ستورمزلي یا فضا نوردان نن په یوه فضایي بیړۍ کې د چین د فضایي اډې پر لور روان شول.

دغه درې ستورمزلي به چې دوه یې تجربه لرونکي دي، درې میاشتې د چین د فضایي اډې په تیانهي نومې برخه کې چې د دې اډې اصلي برخه ده، تېرې کړي.

دوی به په دې فضایي اډه کې څېړنې کوي، نوي وسایل به ازمویي او راتلونکي کال به له دې اډې سره د دوو نوېو مودولونو یا خونو د یوځای کېدو لپاره تیاری نیسي.

د شینزو ۱۲ په نوم د دوی د سپرلۍ فضایي بېړۍ چې د چین له شمال لویدیځ د جیوکوان له فضایي مرکزه د یوه توغندي په وسیله توغول شوې وه، د یوه لنډ واټن له وهلو وروسته ترې جلا شوه او له مهال ویش سره سم د ځمکې مدارته ننوته.

چین په پام کې لري چې په راتلونکي یو نیم کال کې ۱۱ نور فضایي ماموریتونه هم ترسره کړي، څو د تیانګونګ فضایي بیړۍ د نصبولو کار بشپړ کړي.

له غزې توغول شوي اور بلوونکو بالونونه؛ اسراییل د اور وژنې هڅې کوي

ارشیف

اسراییلي چارواکو پرون چهارشنبه (د غبرګولي ۲۶مه) ناوخته وویل چې اطفاییه د هغو څلورو لګېدلو اورونو د وژلو هڅې کوي چې له غزې راغلیو اور بلوونکو بالونونو لګولي دي.

د اسراییل او حماس ډلې ترمنځ کړکېچ وړمه شپه وروسته ترهغه زیات شو چې له غزې د اور اچوونکو بالونو تر پېښې وروسته د اسراییل نوي حکومت په ځواب کې په غزه کې بمباري وکړه او ویې ویل چې د حماس وسله وال مرکزونه یې په نښه کړل.

تېره میاشت تر ۱۱ ورځنۍ جګړې وروسته اوربند وشو او د وړمې شپې هوایي برید تردې اوربند وروسته لومړی یو و.

په ورته وخت کې اسراییلي پوځيان وایي چې د لویدیځې غاړې په رام الله کې یې یوه فلسطینۍ مېرمن وروسته تردې وویشته چې پر پوځیانو یې برید وکړ، خو د دې ښځې یوه خپل ویلي دي چې دې ښځې سهواً لاره غلطه کړې وه.

حماس د وړمې ورځې د بالونو د برید په اړه ویلي دي چې دا د سې شنبې په ورځ د اسراییل له لوري په ختیځ بیت المقدس کې د لاریون په ځواب کې شوی دی.

د ایران انتخابات؛ مهر علیزاده له کاندیداتورۍ لاس واخیست

پخوانی مرستیال ولسمشر ۶۴ کلن محسن مهر علیزاده

د ایران د ولسمشرۍ د انتخاباتو یوه اصلاح غوښتونکي نوماند له کاندیداتورۍ لاس واخیست.

ایراني رسنۍ وايي چې پخوانی مرستیال ولسمشر ۶۴ کلن محسن مهر علیزاده نن چهارشنبه (د غبرګولي ۲۶مه) د انتخاباتي کمپاین په وروستۍ ورځ له کاندیداتورۍ د تېرېدو اعلان وکړ.

نوموړی یو له دوو اصلاح غوښتونکو څخه دی چې د ایران د روان جون د ۱۸مې یعنې د راتلونکې جمعې د ورځې انتخاباتو ته د کاندید په توګه تأیید شوی و.

اوس پنځه کاندیدان پاتې دي او غالب ګومان دا دی چې د ایران د قضاییه قوې سخت دریځی مشر ابراهیم ريیسي به د حسن روحاني ځای ونیسي.

له بلې خوا د ایران ۱۱۰ تنو سیاسي او مدني فعالانو نن چهارشنبه له ایرانیانو څخه وغوښتل چې د جمعې د ورځې انتخابات بایکاټ کړي.

دوی په یوه ګډه لاسلیک کړې اعلامیه کې خلکو ته په خطاب کې ویلي چې په فرمایشي او نمایشي انتخاباتو کې چې د دوی په وینا د بد او بدتر ترمنځ انتخاب دی، ګډون ونه کړي.

په امریکا کې د 'الزایمر' واکسین د ازموینې پایلې بریالۍ وې

دا واکسین نیورو ساینس په نوم شرکت جوړ کړی

په امریکا کې د الزایمر یا هېرې د واکسین د کلنیکي ازموینې د دوهم پړاو پایلې بریالۍ وې.

دا واکسین نیورو ساینس په نوم شرکت چې د الزایمر یا هېرې د ناروغۍ د درملنې په برخه کې فعالیت کوي جوړ کړی دی.

نیور ساینس په وروستیو کې د دې ناروغۍ د مخنیوي لپاره خپل واکسین وازمایه چې نتیجه یې تر ډېره بریالۍ وه.

اوس دا واکسین په ۸ هېوادونو کې پر ۱۹۶ رضاکارانو ازمویل شوی دی.

لومړنۍ نتیجې ښيي چې واکسین منفي عوارض نه لري او د ناروغ په بدن کې داسې انټي باډي رامنځته کوي چې د یو ډول پروتین د جوړېدو سبب کېږي چې د الزایمر له ښه کېدو سره مرسته کوي.

بریتانیا: له ایران سره اټمي هوکړه کې د بریالیتوب تضمین نشته

د بریتانیا د بهرنیو چارو وزیر ډومینیک راب

د بریتانیا د بهرنیو چارو وزیر وايي، له ایران سره د اټمي موافقې په برخه کې له څرګندو پرمختګونو سره سره لا هم په خبرو کې د بریالیتوب تضمین نه شته.

ډومینیک راب پرون سې شنبه (د غبرګولي په ۲۵مه) د خپل هېواد پارلمان ته په خبرو کې وویل، د ایران اسلامي جمهوریت په منظم ډول د اټمي موافقې د ګډ اقدام جامع پروګرام ته ژمن نه دی.

نوموړی وايي، بریتانیا له خپلو اروپايي شریکانو، امریکا او روسیې سره همکاري کوي، خو په وینا یې اړتیا ده چې ایران په بشپړ ډول د اټمي هوکړې ټولې ژمنې پر ځان تطبیق کړي.

نور راوښيه

XS
SM
MD
LG