د لاسرسۍ وړ لېنکونه

تازه خبر
جمعه ۲۸ غبرګولی ۱۴۰۰ کابل ۱۱:۰۸

خبرونه

په خوست کې درې ماينونه کشف شول

د افغان او ايتلافي ځواكونو چارواكي وايي چې د خوست ولايت د يعقوبيو په ولسوالي كي يي دري ماينونه كشف او شنډ كړيدي

د يعقوبيو د ولسوالي د جنايي څانګي مشر مير علم ګل ازادي راډيو ته وويل چې دغه ماينونه يي مخكي له دي چې كومه ناوړه پيښه رامنځته كړي شنډ كړيدي

طالبان ادعا كوي چې په يعقوبيو ولسوالي كي يي د ملي اردو يو موټر الوځولي دي او پكي سپاره سرتيري يي ټول وژلي دي خو دولتي چارواكي د طالبانو دغه ادعاوي ردوي

د ورځې تازه خبرونه دلته ولولئ

کابل کې د یوې وسله‌والې نښتې له کبله ۲ تنه ووژل شول

ارشیف، کابل کې یو شمېر پولیس

د کابل امنیه قوماندانۍ وايي په کابل کې د وسله‌والې نښتې له کبله لږترلږه ۲ کسان وژل شوي دي.

دغې قوماندانۍ نن په یوه اعلامیه کې ویلي، پېښه ماسپښین د کابل ښار دهمزنګ سیمې د برېښنا شرکت مخې ته شوې او ۲ کسان په دې منځ کې ټپیان شوي دي.

اعلامیه وايي، یوه پوځي تن چې په دې نښته کې دخیل و، تر نیول کېدو وروسته ادعا کړې، پر دغو کسانو یې ځکه ډزې کړي چې غوښتل یې د ده وسله او پیسې غلا کړي.

پولیسو څېړنې پیل کړې دي.

چارواکي: پچیراګام کې د پاکستاني اتباعو په ګډون ۳۵ وسله‌وال طالبان ووژل شول

ارشیف، ننګرهار کې د افغان ځواکونو عملیات

د ننګرهار مطبوعاتي دفتر وايي، په پچیراګام ولسوالۍ کې د پاکستاني اتباعو په ګډون ۳۵ وسله‌وال طالبان وژل شوي دي.

دغه دفتر نن رسنیو ته ویلي، په وژل شویو کې د وسله‌والو ۲ تنه سرګروپان هم شامل دي او ۶ نور ټپیان دي.

د ننګرهار مطبوعاتي دفتر نن تر دې مخکې په جلا اعلامیه کې ویلي، د رحمت‌الله په نوم بل پاکستانی وګړی چې په هسکه مېنه ولسوالۍ کې له ولسي پاڅونوالو سره په وسله‌واله نښته کې وژل شوی و، پاکستان ته د لېږد لپاره د سرې میاشتې رضاکارانو ته وسپارل شو.

وسله‌والو طالبانو د دغو موضوعاتو په اړه څه نه‌دي ویلي.

د اروپا ملتونو فوټپال جام؛ چک جمهوریت-کروېشیا او انګلستان-سکاټلنډ لوبه کوي

د اروپا د ملتونو فوټپال جام یا «یورو ۲۰۲۰» یوه سیالۍ

د اروپا د ملتونو فوټپال جام یا «یورو ۲۰۲۰» د سیالیو په لړ کې نن چک جمهوریت د کروېشیا او انګلستان د سکاټلنډ په وړاندې د فوټبال مسابقه کوي.

سویډن او سلواکیا هم په خپلو کې مسابقه لري.

د دغو مسابقو په لړ کې تېره شپه بلجیم ډنمارک ته دوه د یو په وړاندې ماتې ورکړه، اوکراین هم په همدې نتیجه د شمالي مقدونیا په وړاندې بریا خپله کړه، هالنډ بیا اتریش ته دوه د صفر په وړاندې ماتې ورکړه.

د اروپا د اتلولیو جام مسابقې چې په پام کې وه تېر میلادي کال وشي، خو د کرونا وبا له کبله وځنډول شوې.

دفاع وزارت: د هلمند ګرشک ولسوالۍ له وسله‌والو طالبانو تصفیه شوه

هلمند کې افغان ځواکونه

د افغانستان دفاع وزارت وايي، د هلمند ګرشک ولسوالۍ له وسله‌والو طالبانو تصفیه او په بشپړ ډول د افغان امنیتي او دفاعي ځواکونو په کنټرول کې ده.

د دغه وزارت مرستیال ویاند فواد امان نن په یوه ټویټ کې ویلي، په ځمکنیو او هوايي عملیاتو کې وسله‌والو ته درنه مرګ­‌ژوبله اوښتې ده.

تر دې مخکې دفاع وزارت په دوو اعلامیو کې په دې ولسوالۍ کې د ۲۷ وسله‌والو د وژل کېدو او ۳۵ نورو د ټپي کېدو ادعا کړې وه.

هاخوا د هلمند د ولایتي شورا رئیس عطا الله افغان ازادي راډیو ته ویلي چې نن تر غرمې مخکې د ګرشک ولسوالۍ بازار، د امنیه قوماندانۍ او ملي امنیت ودانۍ د وسله‌والو له‌خوا نیول شوي دي.

وسله‌والو طالبانو هم د دې ولسوالۍ د نیولو ادعا کړې ده.

بل‌خوا د هلمند ځینو فعالانو د «ګرشک ولسوالۍ وژغورئ» په نوم په ټولنیزو شبکو کې یو کمپاین پیل کړی او له حکومته‌یې غوښتنه کړې چې د دې ولسوالۍ د امنیت د ښه کېدو لپاره ګامونه واخلي.

د قرغزستان د صدراعظم پخوانی مرستیال د اداري فساد په تور ونیول شو

د قرغزستان د صدراعظم پخوانی مرستیال طاهربېګ سرپاشیف

د قرغزستان د صدراعظم پخوانی مرستیال طاهربېګ سرپاشیف د اداري فساد په تور نیول شوی دی.

پر اداري فساد دغه څېړنه د کومتور په نوم د سرو زرو د یوه کان د پروژې په باب پیل شوې وه.

د قرغزستان د ملي امنیت دولتي کمېټې ویلي، سرپاشیف پرون پنجشنبه نیول شوی دی.

دغه کمېټه وايي، د صدراعظم پخوانی مرستیال سرپاشیف په دې تورن دی چې د کاناډا سنټیرا ګولډ (Centerra Gold) په نوم د شرکت په ګټه‌یې لابي کړې ده او داسې قانوني لارې چارې یې ورته برابرې کړې وې چې دغه شرکت وکړای شي د کان د ساحې په شااوخوا کې د پرتو غرونو په لوړه ارتفاع کې هم کار وکړای شي.

د قرغزستان چارواکي وايي، دغه کار د دې سبب شوی چې دوو طبیعي یخچالونو ته چاپېریالي زیانونه واوړي.

په نورو کسانو کې چې د دې قضیې په تړاو په وروستیو کې نیول شوي، پخوانی صدراعظم عمربېګ بابانوف، د ولسمشر د دفتر پخوانی رئیس دانیار ناریمبایف او د پارلمان ګڼ اوسني یا پخواني غړي شامل دي.

د اسرائیل جټ الوتکو بیا په غزه کې ځیني اهداف په نښه کړل

ارشیف، غزه کې د اسرائیل له لوري یو شمېر بمبار شوې سیمې

د اسرائیل جټ الوتکو روانه اوونۍ د دوهم وار لپاره په غزه کې ځیني اهداف په نښه کړل.

دا وروسته له هغې چې د فلسطین وسله‌والو د اسرائیل پر جنوبي سیمو اور شیندونکي بالونونه وویشتل.

پرون او تېره شپه د بالونونو د ویشتلو او هوايي حملو په نتیجه کې هغه نازک اوربند چې د اسرائیل او د غزې د حماس ترمنځ شوی و، له خطر سره مخامخ شوی دی.

تېره میاشت د مصر په منځګړیتوب د اوربند له ټینګښت سره د دواړو لورو ترمنځ ۱۱ ورځنۍ سخته جګړه پای ته ورسېده.

د اسرائیل پوځ وايي د اور شیندونکو بالونونو د ویشتلو په ځواب کې یې د حماس ډلې اړوند پوځي مرکزونه او د راکټو توغولو ساحه یې ویشتلې ده.

د غور شهرک او تولک ولسوالیو بیا نیولو لپاره یو 'تجربه‌کار جنرال' ورولېږل شو

ارشیف، غور کې د افغان ځواکونو عملیات

د غور والي وايي له وسله‌والو طالبانو د شهرک او تولک ولسوالیو د بېرته نیولو لپاره یو تجربه‌کار جنرال د پوځي عملیاتو د مشرۍ لپاره ورلېږل شوی دی.

عبدالظاهر فیض­زاده ازادي راډیو ته وویل، د جنرال نور الله قادري په نوم دغه پوځي مشر چې پرون دغه ولایت ته رسېدلی، کولای شي دغه ولسوالۍ بېرته تصفیه کړي.

ښاغلی فیضزاده زیاتوي: "موږ ته له کابله د سوق او ادارې د بهترۍ لپاره جنرال قادري چې مخکې د ۲۰۷ ظفر قول اردو قوماندان او اوس د بګرامۍ فرقې قوماندان دی، د دفاع وزارت له‌خوا رالېږل شوی دی. له خلکو او حکومت سره ارتباطات ټینګ شوی او ډېر ژر به شهرک او تولک ولسوالۍ بېرته ونیول شي."

والي وايي دوی تېره اوونۍ د ملکیانو د خوندیتوب لپاره د ساغر ولسوالۍ له مرکز څخه هم خپل پوځیان شاته کړي چې هغه ولسوالۍ به هم بېرته تصفیه شي.

د غور والي عبدالظاهر فیض­زاده زیاتوي چې په چهارسده، پسابند او لعل و سرجنګل ولسوالیو کې دا مهال جګړې روانې دي.

د افغانستان دفاع وزارت: هلمند کې ۲۷ وسله‌وال طالبان ووژل شول

ارشیف، هلمند کې د افغان ځواکونو عملیات

د افغانستان دفاع وزارت ادعا کوي چې په هلمند ولایت کې په دوو جلا پېښو کې ۲۷ وسله‌وال طالبان وژل شوي دي.

دغه وزارت په یوه اعلامیه کې د ګرشک ولسوالۍ په «سیمنیار دښته» سیمه کې پرون د هوايي او ځمکنیو ځواکونو په عملیاتو کې د سرې قطعې د ۱۶ غړو په ګډون د ۱۹ وسله‌والو طالبانو د وژلو او ۱۲ نورو د ټپي کولو ادعا وکړه.

وزارت په بله اعلامیه کې پرون په ګرشک ولسوالۍ د ۸ وسله‌والو د وژلو او ۲۳ نورو د ټپي کولو ادعا کړې ده.

بل‌خوا د هلمند ځینو فعالانو د «ګرشک ولسوالۍ وژغورئ» په نوم په ټولنیزو شبکو کې یو کمپاین پیل کړی او له حکومته‌یې غوښتنه کړې چې د دې ولسوالۍ د امنیت د ښه کېدو لپاره ګامونه واخلي.

افغانستان او قزاقستان د پوځي همکاریو یوه موافقه لاسلیک کړه

د افغانستان د ملي امنیت سلاکار حمدالله محب او د قزاقستان دفاع وزیر نورلان یرمکبایوف ترمنځ د پوځي همکارۍ د موافقې لاسلیک غونډه

د افغانستان د ملي امنیت سلاکار حمدالله محب د قزاقستان له دفاع وزیر نورلان یرمکبایوف سره د پوځي همکاریو یوه موافقه لاسلیک کړه.

د ملي امنیت شورا ویاند رحمت‌الله اندړ نن رسنیو ته وویل، په دې موافقه کې په بېلابېلو برخو کې همکارۍ شاملې دي.

ښاغلی اندړ زیاتوي: "په پوځي برخه کې ګډ تمرینونه، د دفاعي سیاستونو په موخه هر کال دوه طرفه ناسته، طبي همکاري، د تجهیزاتو عصري کېدل، تخنیکي او لوژستیکي ملاتړ، جګړه‌ییزه روزنه او د پوځي اطلاعاتو په برخه کې همکاري شامله ده."

بل‌خوا د افغانستان د سولې لپاره د امریکا ځانګړي استازي زلمي خلیلزاد تېره اوونۍ قزاقستان ته د خپل سفر په لړ کې دغه هېواد افغانستان د سولې په پروسه کې همکارۍ ته هڅولی و.

ملګري ملتونه: تېر کال نړۍ کې نږدې ۳ ملیونه وګړي له خپلو کورونو بې‌ځایه شوي

ارشیف، کندهار کې یو شمېر بې‌ځایه شوي

د کډوالو په چارو کې د ملګرو ملتونو عالي کمېشنري (UNHCR) وايي، تېر میلادي کال د افغانستان په ګډون په نړۍ کې نږدې ۳ ملیونه وګړي له خپلو کورونو بې‌ځایه شوي دي.

دغې ادارې نن په خپل کلني راپور کې ویلي، له کرونا وبا سره سره دغه کسان د جګړو، ناامنیو، مجازاتو او له بشري حقونو د سرغړونو له کبله له خپلو مېنو کډې کولو ته اړ شوي دي.

ملګرو ملتونو د نړۍ له رهبرانو غوښتنه کړې چې د زیاتېدونکي بې‌ځایه کېدو د مخنیوي لپاره اقدامات وکړي.

د کډوالو په چارو کې د ملګرو ملتونو د عالي کمېشنرۍ په حواله، ۷۰ فیصده بې‌ځایه شوي کسان د افغانستان، سوریې، ونزوئلا، جنوبي سوډان او میانمار دي.

د افغانستان د کډوالو او راستنېدونکو چارو وزارت درې ورځې مخکې ازادي راډیو ته ویلي و، یوازې د روان لمریز کال له پیله په بېلابېلو ولایتونو کې نږدې ۱۸ زره کورنۍ د جګړو له امله له خپلو مېنو بې‌ځایه شوي دي.

کابل کې د امریکا سفارت '۱۱۴ کارکوونکي' په کرونا وبا اخته شوي او یو مړ دی

کابل کې د امریکا سفارت

په کابل کې د امریکا سفارت ۱۱۴ کارکوونکي په کرونا وبا اخته شوي او له ډلې یې یو تن مړ شوی دی.

دا خبر اسوشیټېډ پرس په کابل کې د امریکا سفارت د یادداشت په حواله راپور کړې.

د امریکا سفارت ویلي چې په کرونا وبا اخته کارکوونکي یې قرنطین کړي او نور یې له سفارت ایستلي دي.

په دې سره د سفارت د نږدې ټولو چارو د درېدو راپورونه ورکړل شوي ځکه مخکې هم د سفارت د کارکوونکو شمېر د امنیتي ګواښونو په سبب کم شوی و.

په کابل کې د امریکا سفارت شارژدافیر راس وېلسن ویلي چې "باید د وبا د خپراوي مخه ونیسو او یو بل خوندي کړو."

په افغانستان کې د کرونا د درېیمې څپې له امله په دې وبا د اخته خلکو شمېر ورځ تر بلې زیاتېږي او ورسره د مړینو کچه هم زیاته شوې.

د عامې روغتیا وزارت د پرونیو شمېرو له مخې نږدې ۹۹ زره کسان په کرونا وبا اخته شوي. د ورځنیو مثبتو پېښو چټکتیا ته په کتو وېره شته چې دا شمېر نن له یو لک واوړي.

اخوا د کرونا له لاسه د ټولو مړو شویو خلکو شمېر تر پرونه ۳،۹۴۳ ته رسېدلی و.

پامیر قول اردو: د بغلان د دهنه غوري ولسوالۍ یوې بلې سیمې ته انتقال شوه

ارشیف، بغلان کې د افغان ځواکونو عملیات

په شمال کې د افغان پوځ چارواکي وايي د بغلان د دهنې غوري ولسوالۍ د لنډمهال لپاره یوې بلې سیمې ته انتقال شوې.

دا خبره د پامیر ۲۱۷ قول اردو په یوه اعلامیه کې کړې ده.

د اعلامیې له مخې د بغلان ولایت پوځي شورا د پرېکړې په اساس د سیمې خلکو ته د زیان رسېدو د مخنیوي، د لارو د بندښت او د اکمالاتو په وخت نه‌رسېدلو له کبله د دهنه غوري امنیتي ځواکونه یوې بلې مناسبې سیمې ته تللي دي.

افغان چارواکو ویلي له دې کاره‌یې هدف دا دی چې له شته ځواکونو سمه ګټه پورته شي او یو وار بیا د سیمو د تصفیې لپاره عملیات ترسره کړي.

خو د طالبانو ویاند ذبیح‌الله مجاهد بیا په یوه اعلامیه کې ادعا کړې چې د دهنه غوري له ولسوالۍ افغان پوځیان وتلي او اوس د پلخمري په قلعه خواجه کې د دوی له‌خوا کلا بند شوي.

په ایران کې د ۱۴۰۰ کال ولسمشرۍ ټاکنې

ایران کې د ولسمشرۍ ټاکنو کې د رأی ورکونې بهیر

په ایران کې نن د ۱۴۰۰ کال ولسمشرۍ ټاکنې روانې دي.

د رأی ورکونې مرکزونه په پلازمېنه تهران او نورو ښارونو کې د سهار له اوو پرانیستل شوي.

د ایران مذهبي رهبر علي خامنه‌ای د رأی‌ګیري په لومړنیو شېبو کې رایه ورکړه او خلک‌یې په ټاکنو کې ګډون ته وهڅول.

محسن رضایي میر قائد، ابراهیم رئیسي، امیر حسین قاضي‌زاده هاشمي او عبدالناصر همتي د دې دورې له کاندیدانو دي.

د ایران د کورنیو چارو وزارت ویلي چې دې ټاکنو ته له ۵۹ ملیونو زیات کسان د رأی ورکونې په شرایطو برابر دي.

د نظر پوښتنو له مخې بیا په دې ټاکنو کې د خلکو د ګډون کچه له ۳۷ تر ۴۷ فیصده بلل شوې.

ایران کې داسې وخت د ۱۳م دور ولسمشرۍ ټاکنې ترسره کېږي چې ګڼو خلکو، سیاسي فعالانو او بهر مېشتو ګروپونو په دې ټاکنو کې د نه‌ګډون غږ پورته کړی.

په ایران کې د ۱۳۹۸ کال د لړم د مظاهره‌چیانو په لویه کچه ځپل او د اوکرایني الوتکې نسکورول هغه لویې پېښې وې چې په حکومت باندې یې د خلکو باور تر ډېره زیانمن کړ.

د غني او جانسون خبرې؛ بریتانیا په افغانستان کې د سیاسي جوړجاړي ملاتړ کوي

ارشیف، د افغانستان ولسمشر محمد اشرف غني د ټیلیفوني خبرو پر مهال

د بریتانیا صدراعظم بورېس جانسون وایي، هېواد یې په افغانستان کې د سولې لپاره د خبرو له لارې د سیاسي جوړجاړي ملاتړ کوي.

ښاغلي جانسون د سولې د هڅو او یو شمېر نورو مسایلو په تړاو یې پرون له افغان ولسمشر محمد اشرف غني سره ټیلیفوني خبرې کړې دي.

د بریتانیا د بهرنیو چارو وزارت په یوه اعلامیه کې ویلي چې صدراعظم جانسون د افغانستان د یوې باثباته او ډیموکراتیکې راتلونکې د ملاتړ لپاره د خپل هېواد په ژمنو ټینګار کړی.

بل لور ته د افغانستان ولسمشرۍ ماڼۍ وایي چې محمد اشرف غني په دې ټیلیفوني خبرو کې د سولې په ټینګښت کې د بریتانیا ونډه کلیدي بللې ده.

د ارګ په اعلامیه کې دغه‌راز راغلي چې د بریتانیا صدراعظم د افغان امنیتي او دفاعي ځواکونو او د سولې پروسې د ملاتړ ډاډ ورکړی دی.

الکسي ناوالنۍ: ولادیمیر پوتین "داسې دروغجن دی چې خپل دروغ نه‌شي درولی

د مسکو رژیم مخالف زنداني الکسي ناوالنۍ

د مسکو رژیم مخالف زنداني الکسي ناوالنۍ ویلي، د روسیې ولسمشر ولادیمیر پوتین "داسې دروغجن دی چې خپل دروغ نه‌شي درولی".

ناوالنۍ پرون پر خپل انسټاګرام ولیکل چې پوتین باید د رواني ستونزو درملنه وکړي، هغه ستونزه چې د ده په ټکو په واک کې د اوږدې مودې له کبله ورته پيدا شوې ده.

نوموړی دا تور داسې مهال لګوي چې پوتین د امریکا له ولسمشر جو بایډن سره تر ملاقات وروسته خبریالانو ته وویل، ناوالنۍ تېره اګسټ میاشت کې د محکمې له‌خوا پر هغه لګول شوي الزامات له پامه غورځولي دي.

ناوالنۍ پرون د روسیې له خلکو وغوښتل چې د سپټمبر میاشتې په پارلماني ټاکنو کې ګډون وکړي چې حاکم ګوند د رأی ورکونې په ځیرک سیستم سره چې د دوی پلویانو جوړ کړی، له واکه لیرې کړي.

نور راوښيه

XS
SM
MD
LG