د روسیې دفاع وزارت وایي چې هوایي مدافع سیستم یې نن د روسیې په اتو سیمو کې د اوکراین پنځوس بې پیلوټه الوتکې نسکورې کړي دي.

د بلګورود والي وېچیسلاف ګلادکوف په ټیلګرام کې لیکلي چې د بلګورود په یوه کلي کې دوه تنه د رالوېدلو ټوټو له امله مړه شوې دي.

اوکراین په دې اړه څه نه دي ویلي.

اخوا د اوکراین هوایي ځواکونو نن خبر ورکړ چې روسیي پوځیانو د بلګورود له سیمې او تور سمندرګي څخه اووه توغندي نن د اوکراین په لور ویشتلي دي.

د اوکراین د هوایي ځواک په وینا، دوه روسي توغندي یې شنډ کړي او د روسیې د جاسوسۍ درې بې پيلوټه الوتکې یې هم نسکورې کړي دي.

د حماس ډلې سیاسي مشر اسماعیل هنیه نن د ترکیې له ولسمشر رجب طیب اردوغان سره ګوري.

حماس ته اروپایي ټولنه او د امریکا متحد ایالتونه د ترهګرې ډلې په سترګه ګوري.

د هنیه او اردوغان دا لیدنه کتنه په داسې وخت کې کېږي چې په منځني ختیځ کې کړکېچ اوج ته رسېدلی، اسراییل پر ایران برید وکړ او په غزه کې د اسراییلي پوځیانو عملیات روان دي.

اخوا د ایران پر قلمرو له پرونیو حملو وروسته چې ګومان کېږي اسراییلو به کړې وي د ملګرو ملتونو سرمنشي ویلي چې هر راز ځوابي حملې غندي.

د ملګرو ملتونو سرمنشي په ایران کې پرونیو حملو ته، چې پړه یې د اسراییلو غاړې ته غورځول شوې د اشارې په ترڅ کې ویلي چې هغه وخت رارسېدلی چې په منځني ختیځ کې د غچ اخیستنې خطرناکه لړۍ نوره نو ودرول شي.

انټونیو ګوټېرېش پرون پر خپله ایکس پاڼه ولیکل چې دی د غچ اخیستنې هرراز اقدام غندي.

هغه له نړیوالې ټولنې وغوښتل چې د تاوتریخوالي د مخنیوي لپاره چې د ده په وینا ښايي په ټوله سیمه او نوره نړۍ کې د ورانوونکو عواقبو باعث شي، له یوبل سره همکاري وکړي.

د افغانستان د ازادۍ جبهې ادعا کوي چې په کابل کې یې تېر ماښام درې طالبان وژلي او دوه نور یې ټپیان کړي دي.

دې جبهې تېره شپه یوه خبرپاڼه کې لیکلي، چریکیانو یې تېر ماښام د یو پلان شوي اوپراتیفي عملیاتو پر مهال د کابل ښار اړوند دویمې ناحیې حربي فابریکې قراول کې د طالبانو هغه وسله‌وال په نښه کړل چې د دې فابریکې په انګړ کې راغونډ شوي وو.

د افغانستان د ازادۍ جبهې ادعا کړې چې دې طالب وسله‌والو غوښتل چې د ملکي خلکو د کورونو پلټنې لپاره امېد سبز ښار ګوټي ته ولاړ شي.

تر اوسه د طالبانو حکومت د کابل امنیه قوماندانۍ په دې اړه لا څه نه‌دي ویلي.

د عوامي نېشنل ګوند ایالتي مشر ایمل ولي خان په پاکستان تور لګولی چې یوځل بیا غواړي د پیسو ګټلو لپاره په افغانستان کې خپل پخوانی سیاست تکرار کړي.

هغه چې پرون مازدیګر یې په چهارسده کې رسنیو سره خبرې کولې، ادعا وکړه چې د اسلام له نامه په ګټې دې سیاست ۵۰ کاله کېږي چې افغان قوم له تباهۍ سره مخ کړی دی.

هغه وویل: "له بده مرغه کوم ګام چې اوس موږ بیا پورته کوو او ادارې یې پر بنسټ پیسې پیدا کوي، دې کې هیڅ دوه رایې نه‌شته چې جهاد څنګه و او څه دی، مګر اوس موږ یوځل بیا د پیسو لپاره هغه څه بیا تکراوو. موږ یو مسلمان هېواد او یو مسلمان قوم، یعنې زما خپل قوم، پښتون افغان قوم تباه کړ. پنځوس کاله پوره شول چې هغه قوم د هغې تباهۍ زیان اوس هم ګالي."

ایمل ولي خان له دې وړاندې هم پاکستان تورن کړی چې له طالبانو په ملاتړ سره یې په افغانستان کې د بنسټونو له‌منځه‌وړو سره مرسته کړې ده.

د پاکستان حکومت تر اوسه د ایمل ولي خان څرګندونو ته غبرګون نه‌دی ښودلی.

د افغانستان د بشري حقونو لپاره د ملګرو ملتونو ځانګړی راپورتر وايي، تعلیم ته لاسرسی هغه اساسي حق دی چې باید په ټوله نړۍ کې یې ساتنه وشي.

ریچارډ بینېټ پر ایکس شبکې په یوه بیان کې له هغه آنلاین هشتګ سره چې (د تعلیم آزادي او تعلیم د ټولو لپاره) تر عنوان لاندې پیل شوی، د ګډون له کبله خوښي څرګنده کړې او ویلي یې دي چې د زده کړو د سیستم له منځه وړل او یا پر هغه محدودیت لګول د منلو وړ نه دي.

دا څرګندونې داسې مهال کېږي چې طالبانو پر افغانستان له واکمنېدو وروسته په تېرو څه باندې دوه نیمو کلونو کې د نجونو پرمخ د منځنیو ښوونځیو، لېسو او پوهنتونونو دروازې بندې کړي او پر ډېری ښځو یې د کار بندیز لګولی دی.

چین له هغو افغان کډوالو سره د مرستې ژمنه کړې چې له نورو هېوادونو څخه په جبري ډول افغانستان ته استول کېږي.

د طالبانو د حکومت د بهرنیو چارو وزارت مرستیال ویاند حافظ ضیااحمد پرون د وري ۳۱مه باختر خبري آژانس ته چې طالبان یې اداره کوي وویل چې د دواړو هېوادونو د بهرنیو چارو وزارتونو د سیاسي معینیتونو ترمنځ په درېیمه غونډه کې د چین حکومت ژمنه وکړه چې په جبري ډول له ایستل شویو افغان کډوالو سره به سل میلیون ین مرسته وکړي او د زړه د ناروغانو د درملنې او د تعلیمي بورسیو یا سکالرشیپونه د بیا پیل امکانات به برابر کړي.

دا ژمنه داسې مهال کېږي چې له پاکستانه د افغان د وګړو د پناه غوښتنې د سند یااې‌سي‌سي ACC کارتونو د لرونکو کسانو د ایستلو دوهم پړاو د اپریل له پنځلسمې نېټې څخه پیل شوی دی.

د پاکستان حکومت په لومړي پړاو کې چې تېرکال پیل شو، شاوخوا ۵ لکه افغان کډوال چې د پاکستاني چارواکو په وینا قانوني اسناد یې نه درلودل، وایستل.

په افغانستان او پاکستان کې د تېرې یوې اوونۍ درنو وریاوو او سېلابونو په دواړو هېوادونو کې اقتصادي تاسیساتو او کرنیزو ځمکو ته درانه زیانونه او همداراز انساني تلفات اړولي دي.

د برتانیا چاپ ګارډین ورځپاڼې د خبر له مخې په دې پېښو کې په دواړو هېوادونو کې لږترلږه ۱۳۵ کسان مړه شوي دي.

په دې ډله کې هغه ۲۱ بزګران هم شامل دي چې په پنجاب ایالت کې د غنمو له کروندو د درمندونو د اخیستو پرمهال د تالندې د راپرېوتو په پېښه کې مړه شول.

د راپور له مخې همداراز زرګونه کورونه یا په بشپړ ډول ویجاړ شوي او یا زیانمن شوي دي.

همداراز په دواړو هېوادونو کې د کورونو د چتونو د راپرېوتو راپورونه هم ورکړل شوي دي.

د چارواکو په وینا، په افغانستان او پاکستان کې شاوخوا سل هکتاره ځمکه او زرګونه څاروي هم له منځه تللي دي.

د راسل بینټلي په نوم یو امریکايي وګړی د اوکراین په دونېڅک سیمه کې چې د روسیې په ولکه کې ده، په حق رسېدلی دی.

د روسیې د آرټيRT دولتي تلوېزیون مشرې مارګاریتا سیمونیان پرون پر ایکس شبکې په یوه بیان کې ولیکل چې بینټلي د روسیې له سپوتنیک خبري شبکې سره همکاري کوله، خو هغې د نوموړي د مړینې د څرنګوالي په اړه څه نه دي ویلي.

د دونېڅک سیمې پولیسو تېره اوونۍ په یوه بیان کې وویل، ۶۴ کلن بینټلي چې ځان یې په اوکراین کې د روسیې تر ملاتړ لاندې ځواکونو پلوي باله او د روسیې دولتي رسنیو د جګړې د خبریال په توګه معرفي کاوه د اپرېل په اتمه لادرکه شوی دی.

د امریکا د استازو جرګې د دواړو ګوندونو په ګډون د یوه بېساري اقدام په ترڅ کې له اوکراین، اسراییلو او ټایوان سره د ۹۵ میلیارد ډالره مرستې لایحه پرون تصویب کړه.

د رایو د اخیستو پرمهال د ډیموکرات ګوند غړو وکیلانو د جرګې له جمهوریپال مشر مایک جانسن سره مرسته وکړه چې د ۹۴ مخالفو رایو پر وړاندې په ۳۱۶ مثبتو رایو په مټ دا لایحه تصویب کړي.

تمه ده چې د مرستو دا بسته به د وروستي تصویب لپاره د مشرانو جرګې یا سنا ته واستول شي.

د امریکا د متحدو ایالتونو د بهرنیو چارو وزیر انټوني بلېنکن نن ویلي چې واشنګټن په هېڅ تهاجمي عملیاتو کې لاس نه لري.

هغه نن دا څرګندونې، په ایټالیا کې پر ایران د اسراییل د بې پېلوته الوتکو د احتمالي حملې په باب د پوښتنې په ځواب کې وکړې.

د امریکا د بهرنیو چارو وزیر د هغې ادعا په اړه چې اسراییل د ایران په وړاندې تر خپل دغه اقدام مخکې واشنګټن ته اطلاع ورکړې وه، له څه ویلو ډډه وکړه.

د ایران ځینو مخکښو قوماندانانو پر اصفهان ښار د نن سهار د هغې حملې چې ویل کېږي، اسراییل کړې، خبرونه رد کړل.

تر دې مخکې د امریکا ځینو رسنیو د دې حملې خبر ورکړ او د ایران یوه جګپوړي چارواکي له رویټرز خبري اژانس په خپرو کې دا حمله په یو ډول تایید کړې وه.

د ایران د پوځ عمومي قوماندان عبدالرحیم موسوي بیا ویلي د نن سهار د چاودنې علت پر یوه مشکوک شي د هوايي مدافع د دستګاه ډزې وې او په پېښه کې کوم زیان نه دی اوښتی.