د لاسرسۍ وړ لېنکونه

تازه خبر
سه شنبه ۲۹ سلواغه ۱۳۹۸ کابل ۰۵:۲۳

خبرونه

چين امريکا ته د تل لپاره پور نه ورکوي

چين نن خبردارئ ورکړ چي د امريکا متحده ايالاتو ته به د تل لپاره د پيسو پور نه ورکوي. وروستي ارقام ښيي چي چين د امريکا د حکومتي بانډ يا بانکي تضميونونو ستر پيرونکئ دئ.
د چين انګليسي ژبي ورځپاني په خپلي سرمقالي کي ويلي دا چي چين د امريکا حکومتي بانډونه يا بانکي تضميونونه پيري دا بايد داسي ونه انګيرل شي چي متحده ايالات د روان مالي بحران څخه د وتلو لپاره پدي کار سره ځانته لار پاکوي.
د چين دولتي انګليسي ژبي ورځپاڼي دا خبره پداسي حال کي کړي چي د امريکا د خزاني وزارت په رپوټ کي ويلي چين د امريکا د خزاني زيات بانکي ضمانتونه يا بانډونه پيري.

د ورځې تازه خبرونه دلته ولولئ

د ملکي تلفاتو د دوام په اړه د میدان وردګ د مشرانو خبرداری

په کابل کې د میدان وردګ یو شمېر مشرانو اعتراضیه غونډه.

د میدان وردګو قومي مشران د ملکي تلفاتو دوام ته په کتو په دې برخه کې د حکومت د پاملرنې غوښتونکي شول.

دغه یو شمېر قومي مشران په جګړه کې ملکي تلفات "د بشریت په وړاندې جنایت" بولي او خبرداری ورکوي، که حکومت‌یې مخنیوی ونه‌کړي خلک به لاس په کار شي.

دوی د سې شبنې په ورځ «۱۳۹۸ کال د سلواغې ۲۹» په کابل کې په یوه اعتراضیه غونډه کې د جګړې ښکېلې خواوې د ملکي تلفاتو مسؤل وبلل.

یو تن اعتراض کوونکی رحیم ستار وايي: "نور بمبار بس دی، د خدای روی ته وګورئ، دلته یوازې حکومت نه، بلکې په طالبانو هم غږ کوو چې نور د خلکو صبر پای ته رسېدلی، په دې اړه مو څو ځله ولسمشر سره خبرې کړي، منلې یې ده چې د ملکیانو وژل جنایت دی، نو ولې مخنیوی نه‌کوي."

د میدان ورګ ولایت دغو اعتراض کوونکو مشرانو وویل، په دغه ولایت کې د جګړو زیاتره قربانیان ښځې او ماشومان دي.

دا اعتراضیه غونډه داسې مهال کېږي چې په افغانستان کې د ملګرو ملتونو مرستندویه ادارې (یوناما) هم په افغانستان کې د ملکیانو ژوند ته د نه‌پاملرنې له امله اندېښنه ښودلې ده.

په ورته وخت کې د افغانستان دفاع وزارت د ملکي تلفاتو لامل طالبان بولي او وايي، طالبان ملکي خلک سپر ګرځوي او دا کار د ملکي کسانو د خوندیتوب په برخه کې د دغه وزارت د نوې طرحې د عملي کېدو په وړاندې لوی خنډ دی.

خو طالبانو تل دا ادعاوې رد کړې دي.

اوکراين له چين نه کیف ته خپل وګړي لېږدوي

دوه تنه اوکرایني وګړي چې مخکې له چین څخه خپل هېواد ته راستانه شوي. بوریسپیل نړیوال هوايي میدان February 4, 2020

اوکراين تر يوې اوونۍ ځنډ وروسته نن په پام کې لري چې چين ته يوه الوتکه ولېږي چې خپل ۴۹ وګړي او ٢٥ بهرنيان را انتقال کړي.

په کيف کې د اوکراين د روغتيا وزير ويکتور لياشکو پرون وويل چې دغه مسافر به د هوبې ولايت له مرکز ووهان ښار څخه ولېږدول شي.

ووهان د کرونا وايروس د خپرېدو عمده مرکز دى.

چينايي چارواکي وايي په دې وايروس ١٨٨٦ نور کسان اخته شوي او ٩٨ نور کسان‌يې په نتيجه کې مړه شوي دي.

له دې سره د چين په قلمرو کې د کرونا وايروس له امله د مړو شمېر ١٩٠٠ او په دې وايروس د اخته کسانو تأييد شوې پېښې ٧٢ زره ٥٠٠ ته ورسېدې.

لياشکو ويلي يوازې هغه وګړي انتقالېږي چې د کرونا وايروس نښې په‌کې ونه‌ليدل شي.

ده وويل چې دغه کسان به اوکراين ته تر ستنېدو وروسته د ۱۴ ورځو لپاره قرنطين وي.

د اوکراين د روغتيا وزير ويلي، ضرورت نه‌شته چې خلک وارخطا شي يوازې به روغ کسان اوکراين ته راوستل کېږي.

په چين کې د اوکراين سفارت له تېرې سې شنبې د مسافرو د انتقال اعلان کړى و، خو په تېرو اوو ورځو کې دا پروسه دوه وارې وځنډېده.

د ژورنالېستانو خوندیتوب کمېټه د عزیز میمون وژونکو ته سزا غواړي

د پاکستان وژل شوی ژورنالېست عزیز میمون

د ژورنالېستانو د خونديتوب نړيوالې کمېټې له پاکستاني چارواکو غوښتنه وکړه چې د يوه ژورنالېست د وژنې عاملانو ته سزا ورکړي.

د عزيز ميمون مړى چې غاړه‌يې په مزو تړل شوې وه، تېره يکشنبه د سند ايالت په مهرپور سيمه کې وموندل شو.

په لومړنيو راپورونو کې ويل شوي وو چې دغه ژورنالېست اول خفک شوى، بيا يې مړى يوه کانال ته اچول شوى دی.

په نيويارک کې دېره د ژورنالېستانو د خونديتوب کمېټې په خپله پرونۍ اعلاميه کې ويلي په‌کار ده د دغه قتل په باب په چټکۍ عدالت تأمين شي.

د اعلاميې په حواله د پاکستان چارواکي په وار وار د خبريالانو په باب د عدالت په تأمين کې پاتې راغلي دي.

وژل شوي ژورنالېست کاوش ټلوېزيوني شبکې او کاوش ورځپاڼې ته کار کاوه چې په سندي ژبه خپرونې کوي.

د بې‌سرحده خبريالانو د ادارې په حواله، ميمون روان ميلادي کال لومړى ژورنالېست دى چې په پاکستان کې وژل کېږي.

دغه اداره وايي تېر کال څلور پاکستاني ژورنالېستان او بلاګ‌ګران د دوى د راپورونو په تړاو وژل شوي دي.

خېبر پښتونخوا کې چاودنې یو پولیس وژلی

د خېبر پښتونخوا نقشه

پاکستاني چارواکي وايي په خېبر پښتونخوا کې نن د سړک غاړې بم په چاودنه کې يو پوليس وژل شوى او ٣ نور ټپيان شوي دي.

ويل شوي چې د دې بمي چاودنې هدف د پوليسو يو موټر و.

دغه پوليس د دې لپاره ګمارل شوي وو چې په سيمه کې د ګوزڼ يا پوليو ضد واکسين د کمپاين امنیت وساتي.

چاودنه د خېبر پښتونخوا په کالوچي ښارګوټي کې شوې ده چې ډيورند کرښې ته څېرمه پروت دى.

که څه هم د دې چاودنې مسؤليت چا نه‌دى منلى، خو طالبان زيات وخت د ګوزڼ ضد واکسين پر کارکوونکو دا ډول حملې کوي.

دوى ادعا لري چې دغه واکسين د کوچنيانو د شنډولو لپاره د غرب يوه توطئه ده.

د پوليسو يوه افسر واحد خان رسنيو ته ويلي امنيتي ځواکونه په سيمه کې په حمله کوونکو پسې تلاشي کوي.

د هغه په خبره د چاودنې په وخت کې د واکسين د کمپاين کوم کارکوونکى له پوليسو سره مل نه‌و.

دبۍ کې د افغانستان د کرنیزو محصولاتو نندارتون

دبۍ کې د افغانستان د کرنیزو محصولاتو د نندارتون یوه څنډه

په دبۍ کې د افغانستان د کرنیزو محصولاتو نندارتون پرانیستل شو.

د کرنې او مالدارۍ وزارت ویاند اکبر رستمي نن ازادي راډيو ته وویل، په دې نندارتون کې چې تېره ورځ ناوخته پیل شوی ۱۵۰ هېوادونو ګډون کړی.

نوموړي وویل، افغانستان په یاد نندارتون کې د افغاني محصولاتو ۲۶ غرفې لري.

هغه زیاته کړه: "له نېکه‌مرغه افغانستان په دې نندارتون کې فعاله حضور لري، دغه نندارتون درې ورځې نور هم دوام کوي، د ګلفوود نندارتون د کرنې وزارت د امریکايي پراختیايي ادارې او د سوداګرۍ وزارت په مرسته جوړ شوی."

په دې درې ورځني نندارتون کې د افغانستان کرنیزې توکي طبي بوټي، وچې او تازه مېوې او غالۍ نندارې ته اېښودل شوي دي.

د کرنې وزارت وايي، له دې نندارتون څخه هدف دا دی څو افغاني تولیداتو ته نړیوال بازار پیدا کړي.

ارګ: ولسمشر د سولې په تړاو پوځي او ملکي چارواکو سره بحثونه پیل کړي

ولسمشر غني له والیانو سره به بحث کې.

ارګ د ولسمشر اشرف غني له‌خوا له پوځي او ملکي چارواکو سره د سولې په اړه د سلامشورو د پیل خبر ورکوي.

ارګ پرون ماښام په یوه خبرپاڼه کې وویل چې ولسمشر غني د جرمني په مونیخ ښار کې په نړیواله امنیتي غونډه کې له ګډون وروسته له راستنېدو سره سم د سولې د فرصتونو او د هغې پر وړاندې د پرتو ګواښونو په اړه د هېواد له والیانو سره خبرې وکړې.

خبرپاڼه د ولسمشر غني له قوله وايي، افغانستان د یوې نوې پروسې پر لور پر مځ ځي څو دایمي سولې ته د رسېدو فرصتونه برابر شي.

ولسمشر غني والیانو ته ویلي چې د افغان امنیتي دفاعي ځواکونو وړتیاوې پیاوړې شوي او په تعرضي حالت کې دي.

ښاغلی غني زیاتوي چې د سولې د هڅو مشري افغان حکومت کوي او د حکومت مرکچي پلاوی به له طالبانو سره په خبرو کې د ټولو افغانانو اساسي حقونه په پام کې وساتي.

ارګ په یوه جلا خبرپاڼه کې د قول اردوګانو له قوماندانانو سره پر همدې موضوع د ولسمشر غني د خبرو جزئیات هم ورکړي.

افغان ولسمشر په دې غونډه چې تېر ماښام په ارګ کې جوړه شوه د پوځ قوماندانانو ته وویل، د افغان ځواکونو د سرښندنو په نتیجه کې طالبان د تشدد کمولو ته چمتو شول او زیاته‌یې کړه، افغان ځواکونه دا توان لري چې د سولې د احتمالي خطرونو مخه ونیسي.

چارواکي: کندهار او ارزګان کې ۶ وسله‌والو ته مرګ ژوبله اوښتې

ارشیف

په کندهار او ارزګان کې له افغان ځواکونو سره په جګړو کې شپږو وسله‌والو ته مرګ ژوبله اوښتې ده.

په کندهار کې د ملي اردو د ۲۰۵ اتل قول اردو ویاند خواجه يحيی علوي ازادي رادیو ته وویل د ملا هارون د ګروپ دوه غړي تېره شپه د کندهار د میوند ولسوالۍ د جرخشک په سيمه کې وژل شوي دي او يو بل‌یې ټپي دی.

د اتل قول اردو ویاند همدراز وایي چې پرون له افغان ځواکونو سره په نښته کې د ارزګان ولایت د دهراوود ولسوالۍ په زرتاله سيمه کي هم يو وسله‌وال وژل شوی او دوه نور ټپيان دي.

ښاغلي علوي په دې عملیاتو کې افغان ځواکونو ته د اوښتو زیانونو یادونه ونه‌کړه او طالبانو هم تر اوسه په دې اړه څه نه‌دي ویلي.

بېلېنګکټ: د چچنیايي بېلتون‌پالو مخکېنی مشر روسیې وژلی

د چچنیايي بېلتون‌پالو پخوانی قوماندان زلیم خان خانګوشویلي

د څېړنیز ژورنالیزم ډله 'بېلېنګکټ' وايي په برلین کې د چچنیايي بېلتون‌پالو د پخواني قوماندان زلیم خان خانګوشویلي د قتل په اړه د دوی څېړنې ښيي چې دا برید د روسیې د امنیتي خدماتو فدرال ادارې کړی دی.

بېلېنګکټ له یوې میاشتې څېړنو وروسته په یو راپور کې ویلي دي چې د دوی د موندنو له مخې د خانګوشویلي د قتل د تیاريو څارنه د روسیې د امنیتي خدماتو فدرال ادارې د افسرانو لپاره د خیریه ټولنې مشر ادوارد بیندرسکي کوله.

خانګوشویلي د ۲۰۱۹ کال د اګسټ په ۲۳مه نېټه په رڼا ورځ د برلین په یوه پارک کې ووژل شو او وروسته له دې چې د جرمني حکومت وویل د شواهدو پر بنسټ د دې وژنې امر یا د روسیې حکومت او یا د چچنیا سیمه‌ییزو چارواکو ورکړی، نو د برلین او مسکو په اړیکو کې کړکېچ راغی او دواړو هېوادونو د ځوابي اقداماتو په ترڅ کې د یو بل ډيپلوماتانو ته د وتلو امر وکړ.

مسکو د نوموړي په وژنه کې لاس لرل رد کړي دي، خو یو شمېر شنونکي د خانګوشویلي او د بریتانیا په سالزبري ښار کې د روسیې د استخباراتو پر پخواني غړي سرګي سکریپال د ۲۰۱۸ کال کیمیاوي حمله دواړه د روسیې د امنیتي خدماتو فدرال ادارې ​کار بولي.

له البانیا سره د نړیوالو مرستندویانو له یو میلیارد ډالرو زیاته ژمنه

د اروپایي کمېسیون مشره اورزولا فن دیرلاین

د اروپایي کمېسیون مشره وایي نړیوالو مرستندویانو له البانیا سره د تېر کال د قوي زلزلې د ورانیو د رغولو لپاره د یو میلیارد او ۲۵۰ میلیونه ډالرو مرستې ژمنه کړې ده.

اورزولا فن دیرلاین پرون په بروکسل کې د مرستندویه نړیوال کنفرانس په پای کې په یوه ټویټ کې دا د البانیا د خلکو لپاره ښه خبر وباله ویې‌ویل چې دغه مرستې له هغې اندازې چې دوی د البانیا د بیارغونې لپاره هدف ټاکلی و، زیاتې دي.

هغې وویل، د دغو مرستو ۴۳۳ میلیونه ډالره‌یې د اروپایي ټولنې غړو ژمنه کړې ده.

د تېر کال په نومبرکې په البانیا کې یوې زورورې زلزلې د دې هېواد د ادریاتیک سمندرګي د سواحلو ودانۍ په بشپړه توګه ونړولې چې له امله‌یې ۵۱ کسانو خپل ژوند له لاسه ورکړ او شاوخوا ۱۷ زره کسان هم بې‌کوره شول.

البانیا اټکل کړی و چې دغې زلزلې به څه باندې یو میلیارده ډالره زیان پېښ کړی وي.

روغتیا نړیوال سازمان په چین کې پر کرونا د اخته کسانو شمېر تأیید کړ

په چین کې په کرونا وایروس یو شمېر اخته کسان

د روغتیا نړیوال سازمان مشر په چین کې پر کرونا وایروس د اخته شویو کسانو شمېر چې پرون‌یې چینایي چارواکو خبر ورکړی و، تأیید کړ.

"تِدروز ادهانم گبریأسوس" دوشنبې په جنوا کې په یوه خبري غونډه کې وویل چې په چین کې ۷۰ زره او ۶۳۵ کسان په دغه وایروس اخته شوي او ۱۷۷۲ تنه‌یې هم له امله مړه شوي دي.

هغه له چین څخه بهر پر کرونا وایروس د اخته شویو کسانو د شمېر په اړه وویل: "له چين څخه بهر د روغتیا نړیوال سازمان په ۲۵ هېوادونو کې د دغه وایروس د ۶۹۴ مثبتو پېښو او د ۳ تنو د مړه کېدو راپورونه ترلاسه کړي دي."

په عین حال کې جاپاني چارواکو پرون اعلان وکړ چې په «ډایموند پرنسېس» تفریحي کښتۍ کې نور ۹۹ کسان پر کرونا وایروس اخته شوي چې په دې سره په دغه کښتۍ کې چې د جاپان په سواحلو کې ولاړه ده، دننه پر دغه وایروس د اخته کسانو شمېر ۴۵۴ ته رسېدلی دی.

د دغې کښتۍ سورلۍ او عمله په قرنطین کې دي.

افغانستان کې د واورو له امله د بندو لارو د پرانیستو هلې ځلې

چارواکي وايي غزني، دایکنډي او غور کې ځینې لارې تر اوسه بندې دي.

د افغانستان د ټرانسپورټ وزارت وایي، د هغو لارو د پرانیستو لپاره‌یې هلې ځلې چټکې کړي چې په دې وورستیو کې د واورو له امله بندې شوې دي.

د دې وزارت مرستیال ویاند محمد اشرف حق‌شناس تېر ماښام ازادي راډیو ته وویل چې عملیاتي ټیمونو یې ډېرې لارې پرانیستي، خو په غزني، دایکنډي او غور کې ځینې لارې تر اوسه هم بندې دي.

نوموړي دغه‌راز وویل چې په غور کې د دولت وسله‌والو مخالفینو د دوی عملیاتي ټیمونو د هڅو مخه ډب کړې ده.

هغه زیاته کړه: "وسله‌وال مخالفین زموږ عملیاتي او د واورې د توږلو ټیمونو ته اجازه نه‌ورکوي چې لویه لاره پاکه کړي، د دې ولایت مخورو له مخالفینو سره غونډه لرله ترڅو هغوی ته قناعت ورکړي چې پرېږدي زموږ ټیمونه د غور ولایت دغه لویه لاره له واورو پاکه کړي."

ښاغلي حق‌شناس دغه‌راز وویل چې د سالنګ لویه لاره چې په دې وروستیو کې د واورو له امله بنده وه، اوس د ټرافیکو پر مخ بېرته پرانیستل شوې ده.

کیف په ایران کې د غورځېدلې الوتکې د قربانیانو یاد څلی جوړ کړ

په کیف کې د قربانیانو لپاره جوړ شوی یاد څلی.

اوکرایني چارواکو د کیف په نړیوال هوایي ډګر کې د اوکراین د هوایي شرکت د را غورځېدلې الوتکې د قربانیانو په یاد له یوه یادګاري څلي پرده پورته کړه.

د دې شرکت بوینګ ۷۳۷ الوتکه د جنورۍ په ۸مه د تهران له هوایي ډګره له پورته کېدو څو دقیقې وروسته د ایران د ځواکونو پر توغندیو رانسکوره شوه او ټوله ۱۷۶ سورلۍ یې ووژل شوې.

ایراني چارواکو له دغې غمیزې درې ورځې وروسته دا ومنله چې ځواکونو یې سهواً دغه الوتکه په ډزو رانسکوره کړې ده.

د کیف په نړیوال هوایي ډګر کې د دغه یاد څلي د پرانیستلو په مراسمو کې د دې پېښې د قربانیانو د کورنیو غړو او د اوکراین د بهرنیو چارو وزیر او یو شمېر نورو جګپوړو چارواکو ګډون کړی و.

د افغانستان، بریتانیا، کاناډا، جرمني، ایران او سویډن چې اتباع‌یې په دې پېښه کې وژل شوي، استازو هم په دې مراسمو کې برخه اخیستې وه.

تر اوسه د دغې پېښې په اړه څېړنه نه‌ده بشپړه شوې او ایراني چارواکو هم له دې ډډه کړې چې د دغې الوتکې د معلوماتو د ثبتولو توربکس د څېړنې لپاره اوکراین یا کوم بل هېواد ته وسپاري.

د هرات د انجیل ولسوالۍ د محکمې رئیس وژل شوی

د افغانستان په عمومي نقشه کې هرات ولایت.

د هرات امنیتي چارواکي وایي، د دې ولایت د انجیل ولسوالۍ د محکمې رئیس تېر ماښام ناپېژانده وسله‌والو په ډزو وواژه.

د هرات د امنیه قوماندانۍ ویاند عبدالاحد ولي‌زاده ازادي راډیو ته وویل چې دا پېښه تېر ماښام شاوخوا شپږ نیمې بجې د انجیل ولسوالۍ په شیدایي سیمه کې شوې ده.

هغه زیاته کړه: "د انجیل د محکمې رئیس عبدالرحیم جومات ته د لمانځه لپاره تللی و چې کله راوځي ناپېژانده وسله‌وال چې پر موټرسایکل سپاره وو، پرې ډزې کوي چې په خواشینۍ سره هغه په شهادت رسېږي."

تر اوسه د دې پيښې مسؤلیت چا یا کومې ډلې نه‌دی اخیستی.

د هرات امنیه قوماندان جنرال امین‌الله امرخېل وايي چې د ترلاسه شویو استخباراتي او کشفي معلوماتو له مخې د دولت وسله‌والو مخالفینو د دې ولایت د څارنوالۍ او محکمې د کارکوونکو په وړاندې ګواښونه زیات کړي چې دوی یې د مخنیوي لپاره د اقداماتو په ترڅ کې مسؤل قضایي چارواکي هم خبر کړي چې له احتیاطه کار واخلي.

ټاکنو کمېسیون: په ۳-۴ ورځو کې د ټاکنو وروستۍ پایلې اعلانوو

که د ټاکنو لومړنۍ پایله په خپل حال پاتې شي، اشرف غني به د بلې پنځه کلنې دورې لپاره د ولسمشر په توګه وټاکل شي.

د افغانستان د ټاکنو خپلواک کمېسیون وایي د جنجالي رایو د بیا تفتیش او شمېرلو بهیر بشپړ شوی او په درې یا څلورو ورځو کې به د ولسمشرۍ د ټاکنو وروستۍ پایله اعلان کړي.

د دې کمېسیون ویاند ذبیح‌الله سادات تېر ماښام ازادي راډیو ته وویل چې د ټاکنو خپلواک کمېسیون د ټاکنیزو شکایتونو پرېکړې، د شکایتونو د کمېسیون د همکارانو، د سیاسي ګوندونو، څارونکو بنسټونو او د ټاکنیزو ټیمونو په حضور کې عملي کړې او د دې کمېسیون دارالانشأ په خپل وروستي راپور کار کوي.

هغه زیاته کړه: "د ټاکنو خپلواک کمېسیون دارالانشأ ته دنده وسپارل شوه چې خپل راپور د دې کمېسیون له مشرتابه سره شریک کړي او ان‌شاءالله تر درې څلورو راتلونکو ورځو پورې به د افغانستان د ولسمشرۍ د ټاکنو وروستۍ پایله اعلان شي."

د دغو ټاکنو د لومړنۍ پایلې له مخې افغان ولسمشر محمد اشرف غني په سلو کې څه باندې ۵۰ رایې ګټلي او ورپسې د هغه سیال اجرائیه رئیس عبدالله عبدالله دی چې په سلو کې یې څه کم ۴۰ رایې خپلې کړې دي.

که د ټاکنو لومړنۍ پایله په خپل حال پاتې شي، اشرف غني به د بلې پنځه کلنې دورې لپاره د ولسمشر په توګه وټاکل شي.

هانګ کانګ کې غلو د تشناب کاغذ غلا کړي

په چین کې د تشناب کاغذ

په چړو سمبالو غلو په هانګ کانګ کې د تشناب کاغذ یوه لویه پنډه غلا کړې ده.

دا په داسې حال کې ده چې دغه ښار کې د کرونا وایروس د خپرېدو له وېرې په مارکېټونو کې د سودا اخیستل ستونزمن شوي او دکانداران هم نه‌شي کولای خلکو ته د اړتیا وړ توکي برابر کړي.

پولیسو ویلي، دغو درې غلو د ۲۶۰ ډالرو په ارزښت ۶۰۰ لولې کاغذ تشناب غلا کړي چې وروسته‌یې دوه کسان نیول شوي او غلا شوي توکي بېرته ترې اخیستل شوي دي.

په هانګ کانګ کې چې د کرونا وایروس ۵۷ مثبتې پېښې ثبت شوي، خلک هڅه کوي چې د اړتیا وړ توکي لکه کاغذ تشناب، وریجې، په ډبیو کې ساتل شوي خواړه، وچ توکي او د لاس وینځلو مایع زېرمه کړي.

دغلته د مارچ تر نیمایي ښوونځي رخصت شوي او اکثره مأمورین له کورونو کار کوي.

نور راوښيه

XS
SM
MD
LG