د لاسرسۍ وړ لېنکونه

تازه خبر
جمعه ۱۷ زمری ۱۳۹۹ کابل ۰۲:۲۵

خبرونه

ګورجستان واي روسي ځواکونو د جنوبي اوسيتيا پولى سره يو کلى بيا نيولى دى

ګورجستان واي روسي ځواکونو د جنوبى اوسيتيا پولى ته نزدى سرحدي کلى بيا تر خپل کنټرول لاندى راوستى دى.

د ګورجستان د کورنيو چارو وزارت ويلي روسى ځواکونو پرون له پيروي سرحدي کلي څخه ددغه هيواد پوليس پر شا کړي او سيمه ئ په خپل واک کى اخستى ده.

په سيمه کى د ډزبندي لپاره ميشت د اروپاۍ اتحادئ سوله ساتي ماموريت له روسي ځواکونو غوښتي چى د ګورجستان له دغه سرحدي کلى څخه په شا شي.

د ورځې تازه خبرونه دلته ولولئ

ولسمشر غني د سولې مشورتي جرګې په اړه د امریکا د ملاتړ هرکلی وکړ

ولسمشر غني

د افغانستان ولسمشر محمد اشرف غني د سولې مشورتي لویې جرګې له دایرېدو د امریکا د ملاتړ هرکلی وکړ.

ښاغلي غني نن د جرګې په پرانیستونکې وینا کې وویل مهمه ده امریکا هغه څه چې دوی ته ویلي و نن یې افغان ولس ته هم په ښکاره اعلان وکړ.

هغه زیاته کړه: "زه د امریکا متحده ایالتونو د لویې جرګې په هکله د نن ورځې له اعلامیه څخه هرکلی کوم چې په هغه کې د افغانستان د راتلونکي لپاره د مطلوب هدف د سولې د تامین، اقتصادي پرمختیا او زموږ د اوسني ټولنې د ارزښتونو څخه ملاتړ اعلان شوی دی."

د امریکا د بهرنیو چارو وزارت په یوه خبرپاڼه کې د جرګې رابلل ستایلي او ویلي یې دي، دوی پوهېږي چې ګډونوال به یې د پاته طالب زندانیانو پر خوشې کېدو مصلحت وکړي.

د افغانستان د سولې لپاره د امریکا ځانګړی استازی زلمی خلیلزاد هم ویلي مشورتي لویه جرګه یو تاریخي فرصت دی چې د سولې د مخامخ خبرو په وړاندې وروستی خنډ لرې کړي.

زلمي خلیلزاد نن سهار پر خپله ټویټرپاڼه ولیکل چې له جرګې نه یوه مثبته نتیجه ترلاسه کول د تاوتریخوالي د کمښت او د بین الافغاني خبرو د ژر تر ژره پیل په معنا ده.

غني: د سولې مشورتي جرګه سختې پرېکړې مخ کې لري

د سولې مشورتي جرګې عمومي تصویر

ولسمشر محمد اشرف غني نن د سولې مشورتي لویه جرګې په پرانیستونکې وینا کې وویل چې دا جرګه سختې پرېکړې مخ کې لري.

هغه وویل د طالبانو ۴۰۰ بندیان چې جرګه به‌یې د خلاصون په اړه بحث کوي درنې دوسیې لري او دی یې د خوشې کولو صلاحیت نه‌لري.

افغان ولسمشر وویل یوازې دوه لارې موجودې دي.

هغه زیاته کړه: "طالبانو ژمنه کړې که دغه ۴۰۰ زندانیان خوشې شي دوی به په درې ورځو کې دولت سره مخامخ مذاکرات پيل کړي او د مذاکراتو اوله موضوع به د تلپاتې اوربند په سر موافقې ته رسېدل وي، په عین حال کې یې تهدید کړی که دا (بندیان) خوشې نه‌شي نه‌یوازې جنګ او تاوتریخوالي ته دوام ورکوي، بلکې لا یې زیاتوي."

د طالبانو د سیاسي دفتر ویاند سهیل شاهین نن ازادي راډیو ته وویل چې ۴۰۰ طالب بندیان باید د مستقیمو خبرو د ژر پیل لپاره د دې جرګې له دایرېدو پرته خوشې شوي وی.

د سولې مشورتي لویه جرګه نن د درېیو ورځو په مخ پیل شوې چې مشري یې د ملي مصالحې عالي شورا رئیس عبدالله عبدالله ته سپارل شوې ده.

امریکا کې په یوه ورځ کرونا ویروس له ۲۰۰۰ ډېر کسان مړه کړي

ارشیف

امریکا په تېرو دریو میاشتو کې د لومړي ځل لپاره په یوه ورځ کې د کویډ۱۹ ناروغۍ له کبله د څه باندې دوه زره کسانو مړینه ثبت کړه.

امریکا چې وروستیو اونیو کې د کرونا ویروس پېښې په کې مخ په زیاتېدو وې، پرون په ۲۴ ساعتونو کې د څه باندې ۵۸۰۰۰ نویو پیښو او له کبله یې د ۲۰۶۰ کسانو د مړینې شمېر ثبت کړ.

په یوه شپه او ورځ کې د مړینې دا شمېر په تېرو دریو میاشتو کې دومره نه و ختلی، وروستی ځل د مې په ۷مه نېټه په ۲۴ ساعتونو کې څه باندې دوه زره امریکایان کویډ ۱۹ مړه کړي وو.

په ټوله نړۍ کې په کرونا وبا د اخته شویو کسانو شمېر نژدې ۱۹ میلیونو ته ورسېد، تراوسه له دې کبله ۷۱۲۰۰۰ کسان مړه شوي دي.

خلیلزاد: لویه جرګه د سولې د مخامخ خبرو پر وړاندې وروستی خنډ لرې کوي

زلمی خلیلزاد

د افغانستان د سولې لپاره د امریکا ځانګړی استازی وايي، مشورتي لویه جرګه یو تاریخي فرصت دی چې د سولې د مخامخ خبرو په وړاندې به وروستی خنډ لرې کړي.

زلمي خلیلزاد نن سهار پر خپله ټویټرپاڼه ولیکل چې له جرګې نه یوه مثبته نتیجه ترلاسه کول د تاوتریخوالي د کمښت او د بین الافغاني خبرو د ژر تر ژره پیل په معنا ده.

خلیلزاد هیله څرګنده کړې چې د جرګې ګډونوال خپلو بحثونو کې بریالي شي او له ګډونوالو یې غوښتنه کړې چې د هغو کسانو په وړاندې ودرېږي چې اوسنی حالت غواړي او سولې ته د رسېدو لاره پیچلې کوي.

د امریکا د بهرنیو چارو وزارت هم په یوه خبرپاڼه کې د جرګې رابلل ستایلي او ویلي یې دي، دوی پوهېږي چې ګډونوال به یې د پاته طالب زندانیانو پر خوشې کېدو مصلحت وکړي.

دا جرګه چې نن د دریو ورځو په مخه پيلېږي، شاوخوا درې زره کسان په کې برخه اخلي.

ټرمپ د ټیک ټاک او ويچټ له مالکانو سره د معاملو د بندیز اجرایي حکم صادر کړ

د امریکا ولسمشر ډونالډ ټرمپ

د امریکا ولسمشر ډونالډ ټرمپ د ټیک ټاک او ويچټ شبکو له چینایي مالکانو سره د معاملو د بندیز اجرایي حکم صادر کړ.

دغه بندیز د راتلونکو پنځه څلویښتو ورځو په موده کې پیلېږي.

ټرمپ د ټیک ټاک له مالک ‌سره د معاملو د بندیز لامل د ملي امنیت په اړه اندېښنې وښودې.

په دې اړه حکم کې ویل شوي، د لنډو ویډیو اپلیکیشن ټیک ټاک ملي امنیت ته یو ګواښ ګڼل کېږي او باید د مالک په وړاندې یې تاوتریخجن چلند وشي.

په حکم کې راغلي، ويچټ شبکه هم په اتومات ډول د کاروونکو معلومات ترلاسه کوي.

تر دې وړاندې د امریکا سنا هغه لایحه په قاطع اکثریت سره تصویب کړه چې د حکومت مامورین پر دولتي وسایلو د لنډو ویډیوګانو د شریکولو د نامتو چینايي شبکې ټیک ټوک له لیدو منع کوي.

د نورم او سټنډرډ ملي ادارې د رئیس دوسیه محکمې ته استول شوې

آرشیف

د افغانستان لویه څارنوالي وايي، د نورم او سټندرډ د ملي ادارې د عمومي رئیس دوسیه له څېړنو وروسته محکمې ته استول شوې ده.

د دې ادارې مشر شاوخوا درې اونۍ مخکې له یوه نړیوال شرکت څخه د یولک ډالره بډو د اخیستو په تور ونیول شو.

د لویې څارنوالۍ ویاند جمشید رسولي تېره شپه آزادۍ راډیو ته وویل چې د نورم او سټنډرډ د ملي ادارې دوه مرستیالان او د پروژو مدیر هم په دې قضیه کې په لاس لرلو تورن دي.

ښاغلي رسولي زیاته کړه: "د څېړنو په پای کې تورن کسان د ۱۲ لکه امریکايي ډالرو په غوښتنه تورن وپېژندل شول او دوسیه یې محکمې ته واستول شوه."

د ښاغلي رسولي په وینا د نورم او سټنډرډ د ملي ادارې مالي او اداري مرستیال تراوسه نه دی نیول شوی خو لویې څارنوالۍ یې د نیولو امر کړی دی.

یو استرالیايي شرکت د افغانستان کانونو کې پانګونو ته لیوالتیا ښودلې

ولسمشر غني د فورڅیکو میتل ګروپ د کمپنۍ مشر اندریو فوریست سره د خبرو پرمهال.

افغانستان جمهوري ریاست وايي چې د آسټرالیا یوه لوی شرکت د افغانستان د کانونو او د تجدید وړ انرژۍ په برخو کې پانګونو ته لېوالتیا ښودلې.

ارګ پر خپله رسمي ویبپاڼه په یوه بیان کې چې پرون پنجشنبې خپور شو، دا خبر ورکړی دی.

په بیان کې راغلي چې د فورڅیکو میتل ګروپ د کمپنۍ مشر اندریو فوریست له ولسمشر اشرف غني سره د ویډیو کنفرانس له لارې په خپله پرونۍ کتنه کې وویل چې د ده کمپنۍ په سیمه کې د وسپنې د تولید، د کانونو د اېستلو او د تجدید وړ انرژۍ د تولید په برخو کې پراخه تجربه لري او په هغو هېوادونو کې چې د دې ډول انرژۍ د تولید ظرفیت لري پانګونه کوي.

د جمهوري ریاست بیان زیاتوي چې ولسمشر غني په افغانستان کې د کانونو او د تجدید وړ انرژۍ او په تېره له لمر او اوبو څخه د برېښنا د تولید په برخو کې د دې کمپنۍ مشر ته معلومات ورکړل.

د ارګ په بیان کې راغلي دي چې ښاغلي فوریست په افغانستان کې په یادو شویو برخو کې پانګونو ته چمتووالی څرګند کړ او ویې ویل چې ډېر ژر به افغانستان ته یو پلاوی واستوی څو د ګډ کار د پیل په برخه کې څېړنې پیل کړي.

د کارپوهانو په اند افغانستان د اوبو او برېښنا د بندونو د جوړولو لپاره مناسبه اراضي لري او همداراز د کانونو لویې زېرمې لري چې د متحدایالاتو د جیولوژۍ د سروې د ادارې د اټکل له مخې ارزښت یې درې تریلیون ډالرو ته رسېږي.

پاکستان د کویډ۱۹ له امله لګول شوي محدودیتونه لرې کوي

آرشیف

پاکستان وايي چې د کرونا ویروس د مخنیوي لپاره ډېر لګول شوي محدودیتونه به لیرې کړي.

د پاکستان د پلان، پراختیا او ځانګړو نوښتونو وزیر اسدعمر پرون وویل چې ټول رستورانتونه، پارکونه، تیاترونه، سینماګانې او د عامه ترانسپورت وسایل به له راتلونکې دوشنبې ورځې، د اګست له لسمې نېټې څخه فعالیت پیل کړي.

د پاکستان حکومت ویلي چې د سرپټو لوبغالو بیا پرانیستو او د هغو ټورنمنټونو او سپورتي لوبو پیل ته به اجازه ورکړي چې لوبغاړي تماس نه پکې کوي.

اسدعمر چې په پاکستان کې د کرونا پرضد د مبارزې د هڅو مشري کوي خبریالانو ته دا خبره هم وکړه چې د سیمې د نورو هېوادونو پرتله د پاکستان په وضعیت کې د پام وړ ښېګڼه راغلې ده.

هغه زیاته کړه چې د دې هېواد ښوونځي او پوهنتونونه به د سېپټېمبر په پنځلسمه نېټه پیل شي.

د پاکستان د حکومت د رسمي شمېرنو له مخې په جون میاشت کې د کویډ۱۹ ناروغۍ له کبله په دې هېواد کې د مړینو ورځنی شمیر ۱۵۰ تنو ته رسېده خو په دې شمېرو کې اوس کموالی راغلی او پرون په یوه ورځ کې د ۲۱ کسانو د مړینې خبر ورکړل شو.

په پاکستان کې په کویډ۱۹ د اخته کسانو شمیر له ۲۸۰ زرو اوښتی او په دې ناروغۍ تراوسه له شپږ زرو زیات کسان مړه شوي دي.

فرانسې د بیروت د وروستۍ پېښې په تړاو د نړیوالو څېړنو غوښتنه کړې

مکرون بیروت کې د چاودنې سیمه ته تللی.

د فرانسې ولسمشر ایمانویل مکرون د لبنان په پلازمېنه بیروت کې د وروستۍ خونړۍ چاودنې په اړه د نړیوالو څېړنو غوښتنه کړې.

مکرون پرون د اګست په شپږمه په داسې حال کې بیروت ته ولاړ چې د لبنان د روغتیا وزارت وویل د چارشنبې ورځې په لویه چاودنه کې لږترلږه ۱۳۷ کسان وژل شوي، لسګونه تري تم دي او لږترلږه پنځه زره کسان ټپیان شوي دي.

د بیروت ښاروال ویلي چې دې چاودنې تر درې لکو پورې کسان د لندې مودې لپاره بې کوره کړي دي.

ښاغلی مکرون وویل چې د دې پېښې په اړه روښانه او شفافو نړیوالو څېړنو ته اړتیا شته څو هېڅ شی پټ پاتې نه شي او شکونه لیرې شي.

د مکرون د سفر پرمهال مسوولو چارواکو په سیمه کې د دې چاودنې د عواملو د نښو نښانو د موندلو هڅه کوله.

د لومړنیو څېړنو تمرکز د امونیم نایتریټ سرې پر هغه زېرمه دی چې له څو کلونو راهیسې په دې بندر کې په غیرمصوونه طریقه ساتل شوې ده.

له امونیت نایتریت څخه د چاودېدونکو موادو د جوړولو لپاره هم کار اخیستل کېږي.

امریکا کې پر دولتي وسایلو د ټیک ټاک شبکې د ګټنې د منع لایحه تصویب شوه

آرشیف

د متحدایالاتو سنا هغه لایحه په قاطع اکثریت سره تصویب کړه چې د حکومت مامورین پر دولتي وسایلو د لنډو ویډیوګانو د شریکولو د نامتو چینايي شبکې ټیک ټاک له لیدو منع کوي.

دا اقدام یوه وروسته له هغه کېږي چې د بهرنیو چارو وزیر مایک پومپیو وویل، امریکا به هڅه وکړي چې د چین پر ځانګړو اپلیکېشنونو او مخابراتي شرکتونو بندیز ولګوي.

پومپیو د چین ټکنالوژي چې حکومت یې ملاتړ کوي د متحدایالاتو د ملي امنیت او د وګړو د شخصي معلوماتو لپاره ګواښ وباله.

جمهوري غوښتونکي سناتور جاش هاولي چې د دې لایحې طرح یې وړاندې کړې وه، په یوه بیان کې وویل چې دی په دې برخه کې د دواړو ګوندونو د همکارۍ له کبله خوښ دی.

ولسمشر ډونالډ ټرمپ د چین پر ټکنالوژۍ خپلې حملې زیاتې کړې دي او د تېرې جولای میاشتې په ۳۱مه یې د ټیک ټاک د بندېدو غوښتنه وکړه.

هغه وروسته بیا وویل چې دی به مایکروسافټ امریکايي شرکت ته اجازه ورکړي چې د سېپټېمبر تر ۱۵مې نېتې پورې ټیک ټوک وپېري.

چین په ۲۰۱۷ کال کې هغه قانون نافذ کړ چې له مخې یې کمپنۍ د دې هېواد د استخباراتو په ملاتړ او له هغو سره په همکاري مکلفې بلل شوي.

د فرانسې ولسمشر بېروت ته ورسېد

د فرانسې ولسمشر امانوئل مکرون

د فرانسې ولسمشر امانوئل مکرون نن د لبنان پلازمېنې بېروت ته ورسېد.

نوموړي د وړمې ورځې د درنې چاودنې ځپل شویو لبنانیانو ته په وینا کې وویل چې هېواد به‌یې له لبنان سره خپلو همکاریو ته دوام ورکړي، خو د دې هېواد پر چارواکو یې ټینګار وکړ چې د فساد مخه ونیسي او اصلاحاتو ته زمینه برابره کړي.

د نویو راپورونو له مخې د بېروت د وړمې ورځې په چاودنه کې چې د بېروت بندر په یوه ډیپو کې د امونیم نایتریت کیمیاوي سرې له کبله شوې ده، د وژل شویو کسانو شمېر ۱۳۷ تنو ته رسېدلی، شاوخوا ۵،۰۰۰ کسان ټپیان دي او لسګونه کسان لا هم تري تم دي.

د رسنیو د راپور له مخې، شاوخوا ۲،۷۰۰ ټنه امونیم نایتریت چې د چاودنې وړتیا لري، احتمالاً کلونه مخکې دغه بندر کې له یوې بېړۍ نیول شوي وو او په ناخوندي ډول ساتل کېدل.

د بېروت حکومت وایي په دې پېښه کې ۳۰۰ زره کسان بې‌کوره شوي او د زیان کچه‌یې شاوخوا درې میلیارده ډالره ته رسېږي.

هڅې روانې دي چې د دې چاودنې اصلي علت پیدا شي.

پاکستان: افغان ځواکونو زموږ پر پوستو بریدونه کړي

یو پاکستانی سرتېری

پاکستان ادعا کوي چې افغان سرحدي پولیسو له ډیورند کرښې هاخوا د پاکستاني ځواکونو پر پوستو بریدونه کړي، یو پاکستاني سرتېری یې وژلی او دوه نور یې ټپیان کړي دي.

د پاکستان د بهرنیو چارو وزارت په یوې اعلامیه کې ویلي چې دا پېښه د چهارشنبې په ماسپښین د خیبر پښتونخوا د کوز دیر په بنشاهي سیمه کې شوې ده.

اعلامیه زیاتوي چې دا ډول اقدامات د دواړو هېوادونو ترمنځ همکاري او همغږي زیانمنوي.

تر اوسه افغان حکومت د دې ادعا په اړه څه نه‌دي ویلي، خو تر دې وړاندې افغان حکومت برعکس پاکستاني ځواکونه په ورته اقداماتو او د افغان حکومت د مخالفو وسله‌والو ‌ډلو په ملاتړ تورن کړي دي چې اسلام‌اباد رد کړي.

پکتیا، کاپیسا او بدخشان کې ۱۹ تنه وژل شوي

ارشیف، د افغان ځواکونو عملیات

لږ تر لږه ۱۹ تنه په پکتیا، کاپیسا او بدخشان ولایتونو کې د طالبانو په بریدونو او له حکومتي ځواکونو سره په نښتو کې وژل شوي دي.

په وژل شویو کې وسله‌وال طالبان، پولیس او ملکي وګړي شامل دي.

د پکتیا امنیه قوماندانۍ وایي نن سهار په احمدخېلو ولسوالۍ کې لومړی د ماین چاودنه وشوه او بیا د افغان ځواکونو او طالبانو ترمنځ نښتو کې ۷ طالبان وژل شوي دي.

د دغې سرچینې په خبره اووه نور طالبان نن د پکتیا په څمکنیو ولسوالۍ کې د جګړې پر مهال ووژل شول. پولیس او عامو وګړو ته په دې جګړو کې زیان نه‌دی رسېدلی.

له کاپیسا څخه ا منیتي سرچینو نن ازادي راډیو ته تأیید کړه چې طالبانو د ملي پاڅون د یوه سیمه‌ییز قوماندان پر کور یرغل وروړوی، په خپله قوماندان سیف‌الدین له خپلو درېیو ساتونکو او هم د کورنۍ درې ښځینه غړي یې وژل شوي دي.

ویل کېږي په متقابلو نښتو کې طالبانو ته هم مرګ‌ژوبله اوښتې، خو دقیق شمېر یې معلوم نه‌دی. هاخوا له بدخشانه هم راپورونه وایي چې افغان ځواکونو په جرم ولسوالۍ کې پر امنیتي پوستو د طالبانو د بریدونو مخه ونیوله او د جګړو پر مهال یو طالب وژل شوی، درې نور ټپیان شوي دي.

د ټولو پېښو په اړه طالبانو تبصره نه‌ده کړې.

د ننګرهار د بهسودو کرکټ لوبغالي د رغونې کار پیل شو

ارشیف

افغان کرکټ بورډ وايي د ننګرهار د بهسودو کرکټ لوبغالي د رغونې کار پیل شو.

د افغان کرکټ بورډ سرپرست اجرائیه رئیس نظیم جار عبدالرحیمزي په یو خبري کنفرانس کې وویل چې د دغه لوبغالي د لومړني پړاو رغنیزې چارې درې میاشتې وخت نیسي.

ښاغلي عبدالرحیمزي وویل: "د دغه لوبغالي په لومړي پړاو کې د لوبغالي د ډکون چارې شاملې دي چې اړوند شرکت به‌یې د نقشې ایستلو چارو له پای ته رسولو وروسته د درې میاشتو په موده کې بشپړ کړي او د ډکون چارې به‌یې پای مومي. همدارنګه باید وویل شي چې دوهم پړاو چارې به‌یې هم ډېر ژر د تدارکاتي لړۍ له بشپړېدو وروسته پیل شي چې په‌کې د دېوال او لوبغالي د چمن او نورې اړوند کارونه شامل وي."

د ننګرهار د بهسودو د کرکټ لوبغالی چې د ځمکې د انتقال په برخه کې يې ستونزې موجودې وې کرکټ بورډ وايي اوس‌يې له ډېرو هلو ځلو وروسته د ځمکې د انتقال پروسه پای ته ورسېده او ډېر ژر به د یاد لوبغالي ټولې چارې بشپړې شي.

دا په داسې حال کې ده چې کرکټ بورډ دوه ورځې وړاندې په ميدان وردګ ولایت کې هم د کرکټ د یوه لوبغالي د جوړولو چارې پیل کړې دي.

په دې اړه د کرکټ بورډ په یوه خپره شوې اعلامیه کې راغلي دي چې یاد لوبغالی په ۲۲ جریبه ځمکه کې جوړېږي چې د نورو اسانتیاوو ترڅنګ به د نږدې ۴ زره نندارچیانو د ځایېدو ظرفیت هم ولري.

هرات کې د کانکور ازموینه پیل شوه

هرات کې د کانکور ازموینې لړۍ

نن په هرات کې د کانکور ازموینه پیل شوه.

د افغانستان د ازموینو د ملي کمېټې مسؤلین وایي په دې ازموینه کې څه باندې ۱۳ زره زده‌کوونکي برخه لري.

د افغانستان د ازموینو د ملي ادارې سرپرست عبدالقدیر خموش ډاډ ورکړی چې د بایومتریک سیستم په کارولو سره تر ډېره د تقلب‌کاریو مخه نیول شوې ده.

له سیمې د ازادي راډیو خبریال له مسؤلینو سره تر خبرو وروسته وویل چې په هرات کې په دې ازموینه کې د کرونا وبا د خطر په پام کې نیولو سره ځانګړي روغتیایي تدابیر په پام کې نیول شوي.

په ټول افغانستان کې د کانکور ازموینې سږکال د کرونا ویروس د خورېدو د مخنیوي له کبله ځنډنۍ شوې.

تر اوسه یوازې په ۱۷ ولایتونو کې دا ازموینه اخیستل شوې ده.

د افغانستان د ازموینو د ملي ادارې د شمېرو له مخې په ټول هېواد کې تر ۲۰۰ زره ډېر زده‌کوونکي په کانکور ازموینه کې ګډون کوي چې له دې څخه ۱۲۵ زره کسان د لوړو زده‌کړو مؤسسو ته جذبېږي.

نور راوښيه

XS
SM
MD
LG