د لاسرسۍ وړ لېنکونه

تازه خبر
چهارشنبه ۱۵ زمری ۱۳۹۹ کابل ۱۱:۵۶

خبرونه

په افغانستان کي ائتلافي ځواکونه وايي دوي دپکتيا د ځدرانو په اولسي کي دجلال الدين حقاني د ډلي نهه کسه دعملياتو په ترڅ کي نيولي دي .

دي ځواکونو په خپلي خپري کړي اعلاميي کي ويلي : دا عمليات د هغه ياغيانو پرضد شوي چې د اسلامي جهادي اتحاد سره يي همکاري درلوده او له بهرنيو مخالفو وسله والو سره يي د پکتيا په ولايت کي مرسته کوله .

د ورځې تازه خبرونه دلته ولولئ

د پاکستان نوې نقشه؛ د هند کنټرول لاندې کشمیر د پاکستان خاوره یاده شوې

ارشیف

د پاکستان حکومت د دغه هېواد یوه نوې سیاسي نقشه ترتیب کړې چې په‌کې د هند تر کنټرول لاندې کشمیر د پاکستان خاوره یاده شوې ده.

د پاکستان صدراعظم عمران خان سې شنبه د بهرنیو چارو له وزیر شاه محمود قریشي سره په لیدنه کې خلکو ته ویلي چې نوې ملي نقشه د کابینې له‌خوا تصویب شوې او له دې وروسته به د یاد هېواد نوې رسمي نقشه وګرځي.

دا کار د جمو کشمیر د نیمه کورواکۍ د ورختمولو په اړه د هند د حکومت د پرېکړې د یو کلن کېدو په مناسبت شوی.

هند د ۲۰۱۹ کال د اګسټ په پنځمه د جمو کشمیر سیمې او لداخ سره جلا کړې او واک‌یې نوې ډهلي ته وسپاره.

دا کار په کور دننه د کشمیر د خلکو او د هند د مخالفو ګوندونو له غبرګون او په بهر کې هم د پاکستان، بنګله‌دېش او یو شمېر نورو هېوادونو له کلک مخالفت سره مخ شو.

هندوستان د پاکستان له‌خوا د یوې نوې سیاسي نقشې ترتیب یو بې‌ځایه کار بللی دی.

هندي چارواکو ویلي د پاکستان دا کار نه قانوني اعتبار لري او نه نړیوالو ته د منلو وړ دی.

دفاع وزارت: افغانستان ته د داعش د جنګیالیو د انتقال مسؤل ونیول شو

د افغان ځواکونو له‌خوا نیول شوی د داعش غړی

د افغانستان دفاع وزارت وایي دغه هېواد ته د داعش یا اسلامي دولت ډلې د جنګیالیو د انتقال مسؤل‌یې نیولی دی.

دفاع وزارت نن په یوه مطبوعاتي اعلامیه کې ویلي چې د داعش یو مهم غړی محمد سعید بېګا شپه په کونړ کې د عملیاتو پر مهال نیول شوی.

د اعلامیې له مخې د داعش دغه مسؤل له بهره د داعش یا اسلامي دولت ډلې غړي او د هغوی کورنۍ افغانستان ته راوستلې.

د دفاع وزارت په اعلامیه کې زیاته شوې چې د محمد سعید په نوم د داعش دا نیول شوی غړی په جلال‌اباد ښار کې د وروستي ترهګریز برید یو طراح و.

د روانې اوونۍ په پیل کې د افغانستان د ملي امنیت عمومي ریاست اعلان وکړ چې د دوی ځواکونو په ننګرهار کې د داعش یا اسلامي دولت ډلې د استخباراتو عمومي مسؤل اسدالله اورکزی وواژه.

اورکزی د پاکستان د اورکزۍ اجنسۍ د اخېل سیمې اوسېدونکی و چې د داعش په قصاب مشهور و او په سیمه کې یې د داعش د اړیکو مسؤلیت په غاړه درلود.

د نړیوال بانک اجرائیه بورډ د 'ملي دسترخوان' پروګرام تصویب کړ

د نړیوال بانک لوګو

د نړیوال بانک اجرائیه بورډ د سې شنبې په ورځ د افغانستان لپاره د ملي دسترخوان پروګرام تصویب کړ.

دا پروګرام د ۲۱۰ میلیونه ډالرو په لګښت د نړیوال بانک د نړیوالې پراختیا اداره تمویلوي.

د نړیوال بانک د وېب‌پاڼې د معلوماتو له مخې په دې پروګرام کې د ۲۸۰ میلیونه ډالرو فنډ شامل دی چې له افغان کورنیو سره د کرونا ویروس پر وړاندې مالي مرسته وکړي. د دې ترڅنګ ۱۰۰ میلیونه ډالره د کرنې په برخه کې او خوراکي موادو د عرضې پروګرام ته ورکول کېږي.

د معلوماتو له مخې د 'کووېډ-۱۹' پر مهال له افغان کورنیو سره د مرستې پروژه به د کلیو او پراختیا وزارت، د سیمه‌ییزو ارګانونو خپلواکه اداره او د کابل ښاروالۍ تطبیقوي.

د کرنې او خوراکي موادو په برخه کې پروګرام به د کرنې او مالدارۍ وزارت تطبیقوي.

دا په داسې حال کې ده چې شااوخوا دوه اوونۍ مخکې ولسي جرګې د ملي دسترخوان پروګرام طرحه رد کړه چې ګواکي دا پروګرام د پراختیايي پورژو له بودجې تمویلېږي، خو د ولسي جرګې د دې پرېکړې په غبرګون کې د ولسمشر ویاند صدیق صدیقي ویلي وو چې نړیوال بانک دا پروګرام تمویلوي.

ولسمشر محمد اشرف غني د چنګاښ په ۲۸مه په ټول هېواد کې له بې‌‌وزلو خلکو سره د مرستې لپاره د 'ملي دسترخوان' په نوم پروګرام اعلان کړی وو.

د ایران پولیس: ۱۹ تنه د طالبانو د بیرغ ښکاره کولو په خاطر ونیول شول

د طالبانو بیرغ

د ایران پولیس وايي چې وروسته له هغه‌یې ۱۹ کسان نیولي چې د تهران یوه پارک ته‌يې له ځان سره د طالبانو بیرغ وړی وو.

د تهران د پولیسو رئیس حسین رحیمي ایسنا خبري اژانس ته وویل، دا کسان د جمعې په ورځ ملت پارک ته د اختر په ورځ د طالبانو له بیرغ سره تللي وو.

ده وویل: "له بده مرغه یو شمېر کسانو په دې ځای کې د طالبانو د بیرغ ښکارولو اقدام وکړ."

رحیمي وویل چې افغانان هر کال د اختر مراسم په دې پارک کې لمانځي.

د ایران پولیسو ویلي چې له نیول شویو څخه پنځو کسانو بیرغونه جوړ کړي وو او عکسونه او وېډيوګانې يې رسنیو ته ایستلې وې.

ایران پاته کسان غیر قانوني کډوال یاد کړي او په وینا یې له ایرانه د ایستل کېدو په حال کې دي.

افغانستان کې دولتي او خصوصي پوهنتونو نن پرانیستل کېږي

ارشیف، یو شمېر افغان محصلین

په افغانستان کې د دولتي او خصوصي پوهنتونونو تر تړل کېدو څلور میاشتې وروسته نن د چهارشنبې په ورځ د زمري په پنځمه پوهنتونونه بېرته پرانیستل کېږي.

جمهوري ریاست ویلي چې په دې اړه د کابینې په غونډه کې پرېکړه وشوه.

چارواکو په افغانستان کې د کرونا ویروس د خپرېدو له کبله د تېر کال په کب میاشت کې پرېکړه وکړه چې پوهنتونونه او ښوونځي دې وتړل شي.

تر اوسه څرګنده نه‌ده چې ایا ښوونځي به پرانیستل شي که نه.

د ولسمشر ویاند صدیق صدیقي پرون وویل چې د ښوونځیو د پرانیستل کېدو په اړه پرېکړه به د کابینې په بله غونډه کې وشي.

میدان وردک کې د کرکټ د لوبغالي د جورېدو چارې پیل شوې

ارشیف

د افغانستان کرکټ بورډ په میدان وردک ولایت کې د کرکټ د یوه لوبغالي د جوړېدو چارې پیل کړې.

د کرکټ بورد د وېب‌پاڼې د معلوماتو له مخې دا لوبغالی به پر ۴،۴۰۰۰ متر مربع ځمکه جوړېږی او د څلورو زرو تماشاچیانو ځای به ولري.

د معلوماتو له مخې د دې لوبغالي چارې به په یونیم کال کې بشپړې او له لوبغالي به ګټه اخیستل پیل شي.

د چمن-سپين بولدک لاره بېرته وتړل شوه

د چمن او سپین بولدک لار

د چمن او سپين بولدک لاره له پرانیستل کېدو څو ساعته وروسته بېرته وتړل شوه.

د چمن یوه چارواکي ذکاوالله دراني د سې شنبې په ورځ ازادي راډیو ته وویل چې د سې شنبې په مازيګر پنځه بجې دا لاره يو ځل بيا تر نامعلومې مودې وتړل شوه.

د ده په خبره د افغان او پاکستاني چارواکو ترمنځ به يو ځل بيا غونډه کېږي او له هغه وروسته به په دې اړه پرېکړه کېږي، خو ده ونه‌ويل چې دا غونډه به کله کېږي.

د پاکستان حکومت د روان ۲۰۲۰م کال د مارچ په پیل کې د کرونا ویروس د خپرېدو د مخنیوي په هدف د چمن او سپین بولدک لاره وتړله، خو په اپرېل کې یې د محدودې سوداګرۍ اجازه ورکړه.

د پاکستان حکومت په جولای کې یوازې د اختر په ورځو کې د سوداګرۍ لپاره لاره پرانیسته.

ملګري ملتونه: شمالي کوریا د اټومي وسلې د جوړولو پروګرام پراخ کړی

ارشیف

د ملګرو ملتونو د یوه نوي پټ راپور له مخې شمالي کوریا د اټومي وسلې د جوړولو لپاره خپل پروګرام پراخ کړی او ځینې هېوادونه باور لري چې پیونګ یانګ کوچنۍ اټومي وسلې جوړې کړې دي.

د دې راپور له مخې چې د څېړونکو یوې خپلواکې ډلې برابر کړی او په موقتي ډول پټ یا محرم بلل شوی، شمالي کوریا احتمالا داسې واړه اټومي بمونه جوړ کړي چې د بالستیک توغندیو په سروکو کې ځایېدای شي.

رویټرز او د جرمني خبري آژانسونو چې لومړی یې د دې څېړنې خبر ورکړی وايي، دا راپور پرون د ملګرو ملتونو امنیت شورا ته چې پنځلس غړي لري وړاندې شوی او څېړنې یې د دې شورا د یوه غړي هېواد د اطلاعاتو پر بنسټ ولاړې دي.

شمالي کوریا تر اوسه شپږ اټومي ازموینې کړي چې وروستۍ یې د ۲۰۱۷ کال په سېپټېمبر میاشت کې وه.

ملګرو ملتونو له ۲۰۰۶میلادي کال راهیسې د اټومي فعالیتونو په خاطر پر شمالي کوریا څو ځلې بندیزونه لګولي دي.

سیمه ییز چارواکي: د لغمان دوه امنیتي مسئولین څارنوالۍ ته معرفي شوي

ارشیف

لغمان ولایت کې دوه امنیتي مسئولین د اداري فساد په تور څارنوالۍ ته معرفي شول.

د لغمان د والي ویاند اسدالله دولتزي نن سې شنبه ازادۍ راډيو ته وویل، تورن کسان به په عدلي او قضايي ادارو کې خپل سپیناوی کوي.

هغه زیاتوي: "د دولت شاه ولسوالۍ امنیه قوماندان او د ملي اردو د ټولي قوماندان له دندو لیرې او څارنوالۍ ته ورپېژندل شوي دي، پر دوی د اداري فساد او نور تورونه دي، چې عدلي او قضايي ادارې به په دې اړه پرېکړه کوي."

دا په داسې حال کې ده چې د ازادۍ راډیو د خبریال په حواله، څه موده مخکې په دولت شاه ولسوالۍ کې یوه اندازه چاودېدونکي توکي تر نیول کېدو وروسته بېرته په پیسو پلورل شوي وو.

تورنو کسانو لا د دې قضیې په اړه څه نه دي ویلي.

د ځینو افغان چارواکو او وکیلانو معاشونه او مالي امتیازات وځنډول شول

ولسي جرګه

د هغو چارواکو او وکیلانو معاشونه او مالي امتیازات وځنډول شول، چې خپله شتمني یې په ټاکل شویو درېیو اوونیو کې ثبت نه کړه.

د شتمنیو د ثبت او ارزونې ادارې مشر عبدالودود بشریار نن مازیګر په کابل کې یوه خبري کنفرانس ته وویل، په دغو کسانو کې د ملي شورا استازي، دوه وزیران او معینان شامل دي.

هغه زیاته کړه: "په دې کې د ولسي جرګې ۱۷۲ وکیلان، د مشرانو جرګې ۱۲ غړي، دوه وزیران، څلور والیان او شپږ معینان شامل دي."

ښاغلي بشریار وویل، تر دې وروسته به د د لوړپوړو او منځپوړو چارواکو په تړاو هم دغه اقدام کېږي، که چېرې دوی هم خپله شتمني ثبت کړې نه وي، مالي امتیازونه او معاشونه به وځنډول شي.

ټرمپ: ممکن افغانستان کې نږدې ۵۰۰۰ پورې خپل سرتېري راکم کړو

ډونالډ ټرمپ

د امریکا د متحدو ایالتونو ولسمشر وايي احتمالاً تر نومبر میاشتې پورې به په افغانستان کې د امریکايي ځواکونو شمېر د څلوروزرو او پنځو زرو ترمنځ شمېر ته راکم شي.

ډونالډ ټرمپ له اکسیوز خبري شبکې سره په هغه مرکه چې پرون له ایچ. بي. او خپره شوه وویل: "په لنډه موده کې به زموږ د پوځیانو شمېر ۸۰۰۰ ته راکم شي، بیا به دا شمېر څلورو زرو ته راکم شي، دا مهال پر دې موضوع په خبرو اترو بوخت یو، موږ د ۱۹ کلونو لپاره په افغانستان کې وو."

کله چې خبریال پوښتنه وکړه، په نومبر میاشت کې چې په امریکا کې د ولسمشرۍ ټاکنې کېږي، په افغانستان کې د امریکايي پوځیانو شمېر به دقیقاً څو ته راکم شي؟

ولسمشر ټرمپ وویل، چې احتمالاً دغه شمېر به د ۴۰۰۰ او ۵۰۰۰ ترمنځ ته راکم شوی وي.

په افغانستان کې د امریکايي پوځیانو شمېر مخکې ۱۲۰۰۰ ښوول شوی و، خو د امریکا او طالبانو ترمنځ د موافقې له مخې په افغانستان کې د امریکايي پوځیانو شمېر په کمېدو دی.

یوه امریکايي جنرال په جون میاشت کې ویلي وو، د امریکايي پوځیانو شمېر ۸۶۰۰ ته راکم شوی دی.

چین د ټیک ټاک اپلکېشن پېرلو لپاره د امریکا هڅې 'څرګنده سرزوري' بولي

د چین بیرغ

چین، د ټیک ټاک اپلکېشن د رانیولو لپاره د امریکا د متحدو ایالتونو هڅې یوه "څرګنده سرزوري" بللې ده.

دغه اپلکېشن د یوه چینايي شرکت دی، چې د لنډو ویډیوګانو د کتلو لپاره کارول کېږي، خو په وروستیو کې په امریکا کې د ملي امنیت د ملحوظاتو له مخې له څېړنو سره مخامخ دی.

امریکايي چارواکو ویلي چې دغه شرکت د کاروونکو پټ معلومات د چین له دولت سره شریکوي، خو ټیک ټاک دا موضوع ردوي.

د امریکا د متحدو ایالتونو ولسمشر ډونالډ ټرمپ پرون د ټیک ټاک لپاره د شپږو اوونیو مهلت وټاکه، چې د امریکا د برخې فعالیتونه وپلوري.

ولسمشر ټرمپ ویلي، د امریکایي شرکت مایکروسافټ له خوا د دغه اپلکېشن د رانیولو مخالف نه دی.

خو د چین د بهرنیو چارو وزیر وانګ وینبین نن په پیکنګ کې وویل، د امریکا دا اقدام د نړيوال تجارتي سازمان له اصولو سره په ټکر کې دی.

د کندهار د سپین بولدک-چمن ترمنځ لویه لار نن سهار پرانیستل شو

د چمن او سپین بولدک لار

د کندهار د سپین بولدک-چمن ترمنځ لویه لار له تېرو څو ورځو تړل کېدو وروسته نن سهار پرانیستل شوه.

خو د افغانستان د سوداګرۍ او پانګونې خونې مرستیال یونس مومند نن ازادي راډیو ته وویل چې لاهم د صادراتو او وارداتو پر مخ دا لار بنده ده چې له امله‌یې سوداګرو ته ګڼ زیانونه اوښتي.

هغه زیاته کړه: "که څه هم د کندهار د سپین بولدک-چمن ترمنځ لویه لار د تګ راتګ لپاره پرانیستل شوې، خو د سوداګریزو مالونو پر مخ لاهم بنده ده چې له دې امله يې سوداګریزې چارې ټکنۍ کړي."

نوموړي وویل دا مهال دواړه خواوو ته په لسګونه موټر ولاړ دي.

دغه دروازه له هغه وروسته بنده شوه چې په سپین بولدک کې د افغان او پاکستاني پوځیانو ترمنځ نښته وشوه.

د افغانستان د متشبثینو عالي بورډ پرون ازادي راډیو ته ویلي و چې په سپین بولدک کې د افغان او پاکستاني ځواکونو ترمنځ د وروستۍ نښتې او د سپین بولدک او چمن ترمنځ په ګمرک د پاکستاني ځواکونو په توغندیز برید کې ډېری سوداګریز مالونه سوځېدلي دي.

د دغه بورډ د مشر رحم‌الدین حاجي اغا له قوله، له دې امله سوداګرو ته نږدې څلور میلیونه ډالر زیان اوښتی.

ایسایس توپان به د امریکا شمالي او جنوبي کارولینا ایالتونه سخت وځپي

د امریکا بیرغ

تمه ده چې د ایسایس سمندري توپان خطرناکه سیلۍ او درانه ورښتونه به د امریکا د شمالي او جنوبي کارولینا ایالتونه سخت وځپي.

دا توپان اوس‌مهال د متحده ایالاتو د ختیځو سمندري سواحلو خوا ته روان دی.

د امریکا د هریکان یا سمندري توپانونو مرکز پرون د اګسټ په ۳مه نېټه د دواړو ایالتونو په ساحلي سیمو کې دېره خلکو ته د سیلۍ او ورښتونو خبرداری ورکړ.

د ایسایس توپان زور د کارابین سمندرګي له ځپلو وروسته راکم شو. دې توپان په دې سیمه کې دوه تنه ووژل، خو پرون‌یې یو ځل بیا زور واخیست او د باد چټکوالی یې په ساعت کې ۱۲۰ کیلومتره ته لوړ شو.

د هُریکان ملي اداره وايي چې ښايي د دې توپان له کبله سخت ورښتونه د سېلابونو د راوتلو باعث شي.

شمالي کوریا د اټمي وسلې د جوړولو لپاره خپل پروګرام پراخ کړی

ارشیف

د ملګرو ملتونو د یوه نوي محرم راپور له مخې شمالي کوریا د اټمي وسلې د جوړولو لپاره خپل پروګرام پراخ کړی او ځیني هېوادونه باور لري چې پیونګ یانګ کوچنۍ اټمي وسلې جوړې کړې دي.

د دې راپور له مخې چې د څېړونکو یوې خپلواکې ډلې برابر کړی دی او په موقتي ډول محرم بلل شوی، شمالي کوریا احتمالاً داسې واړه اټمي بمونه جوړ کړي دي چې د بالستیک توغندیو په سروکو کې یې ځایېدای شي.

روېټرز او اژانسونو چې لومړی یې د دې څېړنې خبر ورکړی وايي، دا راپور پرون د ملګرو ملتونو امنیت شورا ته چې ۱۵ غړي لري وړاندې شوی او څېړنې یې د دې شورا د یوه غړي هېواد د اطلاعاتو پر بنسټ ولاړې دي.

شمالي کوریا تر اوسه شپږ اټمي ازموینې کړې دي چې وروستۍ یې د ۲۰۱۷ کال په سپټمبر میاشت کې وه. ملګرو ملتونو له ۲۰۰۶ کال راهیسې د اټمي فعالیتونو په خاطر پر شمالي کوریا څو ځلې بندیزونه لګولي دي.

نور راوښيه

XS
SM
MD
LG