د لاسرسۍ وړ لېنکونه

تازه خبر
پنجشنبه ۸ کب ۱۳۹۸ کابل ۰۲:۱۸

خبرونه

د امريكا خبری رسنی رپوټ وركوی چی په پام كی ده منتخب ولسمشر بارك اوباما به د فزيك د نوبل د جايزی گټونكی سټيوين چو د انرژی د وزير په توگه وټاكی.

د ورځې تازه خبرونه دلته ولولئ

د امریکا لوی درستیز: د طالبانو په اړه ټولو اندېښنو ته مو پام دی

د امریکا د وسله‌والو ځواکونو لوی درستیز مارک میلي

د امریکا د وسله‌والو ځواکونو لوی درستیز وایي، د طالبانو په اړه ټولو اندېښنو ته‌یې پام دی او له دې ډلې سره د سولې د یوه تړون د لاسلیک کېدو پلوي کوي.

جنرال مارک میلي چې پرون‌یې د امریکا د کانګرس په یوه استماعیه غونډه کې خبرې کولې، وویل دی په دې چې طالبان څومره وړتیا لري پوه دی، خو بیا هم ورسره د سولې د یوه تړون د لاسلیک کېدو ملاتړ کوي.

خو جنرال میلي دا هم وویل چې دی به هېڅکله د دې ملاتړ ونه‌کړي چې ورسره استخباراتي معلومات شریک شي.

تر دې مخکې د امریکا ولسمشر ډونالد ټرمپ له طالبانو سره یوې هوکړې ته د رسېدو په صورت کې له افغانستانه د یو شمېر امریکایي ځواکونو د ایستلو په اړه په څرګندونو کې ژمنه کړې چې امریکا به په دې هېواد کې قوي استخباراتي حضور ولري ترڅو له خاورې یې په نړیواله کچه د حملو لپاره د اډې په توګه کار وانه‌خیستل شي.

له طالبانو سره د یوه تړون له مخې چې په پام کې ده بل سبا د شنبې په ورځ د دواړو لورو ترمنځ په قطر کې لاسلیک شي، له افغانستانه امریکایي سرتېري چې په اوس وخت کې یې شمېر شااوخوا ۱۲ زره دی، په تدریجي ډول وځي.

د افغانستان د بیارغونې لپاره د امریکا سرمفتش جان سوپکو په وروستي راپور کې ویلي چې د جګړې په څېر په ټولنه کې د وسله‌والو د ادغام پروسه هم پېچلې او هم اوږده ده.

هغه خبرداری ورکړ چې امریکا باید په افغانستان کې د ادغام یو پراخ پروګرام تمویل کړي کنه د سولې له بهیر سره د طالبانو د یوځای کېدونکو ۶۰ زره وسله‌والو یو شمېر به‌یې بېرته شخړو او بغاوت ته مخه کړي.

شمالي مقدونیې او ګرجستان کې د کرونا وایروس پېښې ثبت شوې

راپورونه وايي چې تر ۲۷۰۰ زیات وګړي په دې وایروس د اخته کېدو له امله مړه شوي دي.

شمالي مقدونیې او ګرجستان پرون د فبرورۍ په ۲۶مه، د کرونا وایروس د ثبت خبر ورکړ.

د شمالي مقدونیې حکومت پرون وویل چې یوه ښځه چې يوه میاشت‌یې په ایټالیا کې تېره کړې په دې وایروس اخته پېژندل شوې ده.

د اروپا د نورو هېوادونو په پرتله په ايټالیا کې ډېر خلک په کرونا وایروس اخته شوي دي.

تر دې یوه ورځ وړاندې د کروېشیا حکومت وویل چې هلته هم یو وګړی په کرونا وایروس اخته پېژندل شوی دی.

د ګرجستان حکومت هم پرون وویل چې یو وګړی چې له ایرانه ورستون شوی و په کرونا وایروس اخته پېژندل شوی دی.

د ګرجستان حکومت ویلي چې دا سړی ۵۰ کلن دی او تر سختې طبي څارنې لاندې دی.

دا وایروس په ډسمبر کې د چین له ووهان ښاره راولاړ شو. په ټوله نړۍ کې تر ۸۰ زره زیات وګړي په دې وایروس اخته شوي دي.

راپورونه وايي چې تر ۲۷۰۰ زیات وګړي په دې وایروس د اخته کېدو له امله مړه شوي دي.

اوکراین له روسیې سره د کریمیا د جبري الحاق په اړه مراسم جوړوي

د اوکراین ولسمشر ولادیمیر زلنسکي

د اوکراین ولسمشر ولادیمیر زلنسکي یو نوی فرمان لاسلیک کړ چې پر اساس به‌یې د فبرورۍ ۲۶مه نېټه، هغه ورځ چې په ۲۰۱۴ میلادي کال کې روسیې په زوره د کریمیا ټاپو وزمه له اوکراینه جلا او له ځان سره الحاق کړه، په ځانګړو مراسمو یادېږي.

د اوکراین د ولسمشر د فرمان له مخې د فبرورۍ ۲۶مه، د روسیې له‌خوا د کریمیا او سویستوپول د اشغال په وړاندې د اوکراین د خلکو د مقاومت ورځ بلل شوې ده.

په هغه ورځ د کریمیا په مرکز سویستوپول کې د روسیې د لاسوهنې پر ضد تر ټولو لویه مظاهره وشوه.

د روسیې دا کار د نړۍ ۱۰۰ هېوادونو غیر مشروع بللی دی.

د روسیې حکومت له ۲۰۱۴ میلادي کال راهیسې د اوکراین په ختیځ کې د هغو بېلتون غوښتونکو ملاتړ کړی چې له اوکراینه جلايي غواړي.

په دې جګړه کې تر اوسه تر ۱۳ زره زیات اوکراینیان وژل شوي دي.

امریکا د کتائب حزب‌الله ډلې مشر یو نړیوال ترورېست ونوماوه

د کتائب حزب‌الله ډلې یو شمېر جنګیالي

د امریکا متحده ایالاتو په عراق کې د ایران ملاتړې د کتائب حزب‌الله ډلې مشر د یوه نړیوال ترورېست په توګه ونوماوه.

دغې ډلې په دې وروستیو کې په عراق کې دېره پر امریکایي او نورو بهرنیو سرتېرو د یو شمېر حملو مسؤلیت اخیستی دی.

د امریکا د بهرنیو چارو وزارت پرون وویل چې متحده ایالات د دغې ډلې د وسله‌والې څانګې مشر احمد الحمیداوي د ځانګړو نړیوالو ترورېستانو په فهرست کې شامل کړ.

د دغه اقدام له مخې په امریکا کې د هغه شتمني، که وي، کنګل کېږي او ورسره مالي راکړه ورکړه جرم ګڼل کېږي.

د کتائب حزب‌الله ډله په ۲۰۰۹ م کال یوه ترورېستي ډله نومول شوې ده.

اوچا: ایران سره د افغانستان غربي ولایتونو تګ راتګ د اندېښنې وړ ده

د افغانستان حکومت د فبرورۍ په ۲۳مه په نیمروز او هرات کې له ایران سره پوله وتړله، خو د فبرورۍ په ۲۵مه‌یې تګ راتګ ته اجازه ورکړه.

په افغانستان کې د ملګرو ملتونو د بشري مرستو د هماهنګۍ اداره "اوچا" وايي چې له ایران سره د غربي ولایتونو تګ راتګ په دې هېواد د کرونا وایروس د خپرېدو لپاره د اندېښنې وړ خبره ده.

د دې ادارې په خبرپاڼه کې چې پرون د فبرورۍ په ۲۶مه، خپره شوې لیکل شوي چې په افغانستان کې یوازې یوه مثبته پېښه ثبت شوې، خو ۱۰ وګړي تر دې شک لاندې دي چې کرونا وایروس لري.

په خبرپاڼه کې لیکل شوي چې په افغانستان کې اوس‌مهال ۷۰۹ چپرکټونه په کرونا وایروس د اخته کسانو د قرنطین لپاره شته او د روغتیا نړیوال سازمان نږدې ۵ لکه خبرپاڼې خلکو ته د معلوماتو ورکولو لپاره چاپ کړې دي.

د افغانستان حکومت د فبرورۍ په ۲۳مه په نیمروز او هرات کې له ایران سره پوله وتړله، خو د فبرورۍ په ۲۵مه‌یې تګ راتګ ته اجازه ورکړه.

د ملګرو ملتونو د بشري مرستو د همغږۍ ادارې ویلي چې په نیمروز او هرات کې به د عامې روغتیا وزارت ځانګړې ډلې هغه خلک چې ایران ته ځي او راځي معاینه کوي.

ټرمپ: په کرونا د امریکایانو د اخته کېدو خطر ډېر لږ دی

د امریکا ولسمشر ډونالد ټرمپ په یوه خبري کنفرانس کې د خبرو پر مهال.

د امریکا متحده ایالاتو ولسمشر وایي، پر کرونا وایروس د امریکایانو د اخته کېدو خطر ډېر لږ دی او هغه اقدامات چې حکومت کړي، په نړیواله کچه له دغه خپاره شوي وایروس څخه‌یې د امریکا له خوندي کولو سره مرسته کړې ده.

ډونالد ټرمپ چې پرون‌یې په یوه خبري کنفرانس کې خبرې کولې، وویل چې امریکا د دغه وایروس په وړاندې د واکسین په جوړولو کې په چټکۍ پرمختګ کوي.

هغه وویل، لومړیتوب‌یې د امریکایانو روغتیا او خوندیتوب دی. ټرمپ له هغو سیمو پر مسافرت د بندیزونو لګول د اساسي اقداماتو په توګه یاد کړل چې کرونا وایروس په‌کې خپور شوی دی.

د امریکا د روغتیا او د بشري خدمتونو د وزارت د راپور له مخې په متحده ایالاتو کې د کرونا وایروس ۵۹ مثبتې پېښې ثبت شوي چې ۴۲یې هغه مسافر دي چې د ډایموند پرنسېس په نوم له جاپاني تفرېحي کښتۍ څخه امریکا ته انتقال شوي دي.

درې تنه هم د چین له ووهان ښاره چې د کرونا وایروس اصلي سرچینه ده، امریکا ته ستانه کړای شوي دي.

سعودي عربستان د عمرې حج د ادا کوونکو په مخ پولې وتړلې

د حرا غار

سعودي عربستان د کرونا وایروس د خپرېدو له وېرې مکې ته د عمرې حج د ادا کولو او په مدینه کې د اسلام د ستر پیغمبر جومات ته د ورتلو لپاره د زیارت کوونکو په مخ په موقت ډول خپلې پولې تړلې دي.

د سعودي عربستان چارواکو دغه‌راز د هغو هېوادونو سیلانیان هم په موقت ډول خپلې خاورې ته له ننوتو منع کړي چې په‌کې د کرونا وایروس خپور شوی دی.

د سعودي عربستان د بهرنیو چارو وزارت وویل چې دغه اقدامات‌یې د خپلو وګړو، په دې هېواد کې د استوګنو او د ورتلونکو سیلانیانو د خوندیتوب لپاره کړي دي.

سعودي عربستان په دې هېواد کې د کرونا وایروس د مثبتې پېښې راپور نه‌دی ورکړی، خو ګاونډ کوېټ یې ویلي چې د سعودي یو تبعه په دې هېواد کې د کرونا پر وایروس اخته شوی دی.

هر کال د عمرې حج د ادا کولو لپاره له اسلامي هېوادونو په لسګونه زره زیارت کوونکي سعودي عربستان ته ورځي.

تر اوسه دا هم نه‌ده څرګنده چې د کرونا وایروس خپرېدل به د حج په سږنیو مراسمو چې شااوخوا پنځه میاشتې وروسته ترسره کېږي، اغېز وکړي.

په سیمه کې ایران تر ټولو زیات د کرونا وایروس ځپلی چې د دې هېواد چارواکو یې له امله د ۱۹ کسانو د مړینې خبر ورکړی دی.

دغه‌راز د خلیج په دوو هېوادونو، کوېټ او بحرین کې هم په دې وروستیو ورځو کې د کرونا وایروس نورې مثبتې پېښې ثبت شوي دي.

پشتین: له قید او شرط پرته د پاکستان له حکومت سره خبرو ته تیار یو

منظور پښتین د جنورۍ په ۲۷مه، نېټه د پاکستان دحکومت پر ضد بیان ورکولو د کرکې د خپرولو او دسیسې په تور ونیول شو.

په پاکستان کې د پښتنو د حقونو لپاره د مبارزې مشر منظور پشتین وايي چې له قید او شرط پرته د پاکستان له حکومت سره خبرو ته تیار دي، خو په خبرو کې باید یوې پایلې ته د رسېدو نیت موجود وي.

منظور پشتین پرون د فبرورۍ په ۲۶مه، ازادي راډیو ته وویل چې د پاکستان حکومت باید د پښتنو له یو موټي کېدو د وېرې پر ځای "د لر او بر یو افغان" ناره ومني.

هغه زیاته کړه: "لر او بر یو افغان یو تاریخي حقیقت دی. د دې حقیقت انکار که پاکستان یا بل هر هېواد کوي بې‌بنیاده دی. لر او بر یو افغان یوه بنیادي ناره ده، دا د یوه نسل نوم دی."

منظور پشتین د جنورۍ په ۲۷مه نېټه د پاکستان حکومت پر ضد د بیان ورکولو، د کرکې د خپرولو او دسیسې په تور ونیول شو.

هغه تقریباً یوه میاشت په زندان کې تېره کړه او د سې شنبې په ورځ په ضمانت خوشې شو.

منظور پشتین پرون وویل چې د پاکستان په قبایلي سیمو کې د قبایلي مشرانو د قتل د هدفي وژنو او ترورونو په اړه باید یو نړیوال پلاوی تحقیق وکړي او د حقیقت موندلو په پلاوي کې باید د هغو هېوادونو استازي هم شامل وي چې د ترورېزم پر ضد جګړې ته پیسې ورکوي.

هرات کې یوه فابریکه په ورځ کې ۶۰ زره طبي ماسکونه جوړوي

د کرونا وایروس د یوې مثبتې پېښې تر ثبت وروسته د ماسکونو لپاره د خلکو تقاضا ډېره زیاته شوې ده.

د هرات د صنعتي ښارګوټي یوه فابرکه په ورځ کې ۶۰ زره طبي ماسکونه جوړوي.

د فابریکې یوه مسئول جاوېد شېرزاد پرون د فبرورۍ په ۲۶مه، ازادي راډیو ته وویل چې په هرات کې د کرونا وایروس د یوې مثبتې پېښې تر ثبت وروسته د ماسکونو لپاره د خلکو تقاضا ډېره زیاته شوې ده.

جاوېد شېرزاد وویل: "له کله راهیسې چې دلته وضعیت اضطراري شوی، د عامې روغتیا ریاست او نورو چارواکو په غوښتنه موږ د ماسکونو تولید پېل کړی دی. په ابتدا کې موږ غوښتل چې ماسکونه بهر ته د صادرولو لپاره جوړ کړو، خو اوس په کور تقاضا زیاته ده له دې امله موږ د خپلو وطنوالو د ضرورت د کمولو لپاره کار کوو."

په افغانستان کې د کرونا وایروس لومړۍ مثبته پېښه په هرات کې ثبت شوه.

کرونا وایروس انسان ته د والګي یا زکام په څېر مرض پیدا کوي او حتی د مرګ سبب کېدلاې شي.

خلکو ته ښايي چې لاسونه په صابون او اوبو پرېمینځي، خوله او پوزه په ماسک کې پټه کړي او له داسې کسانو چې والګی یا زکام لري، لیرې واوسي.

د افغانستان کرکټ بورډ پر محمد شهزاد لګېدلی بندیز لیرې کړ

د افغاستان کرکټ ملي لوبډلې غړی محمد شهزاد

د افغانستان کرکټ بورډ د ملي لوبډلې پر وتلي غړي، محمد شهزاد لګېدلی بندیز لیرې کړ.

د افغانستان کرکټ بورډ تېر دوبی اعلان وکړ چې محمد شهزاد د کرکټ بورډ له خبرتیا او اجازې پرته له افغانستانه بهر سفر او په لوبه کې ګډون کړی چې له اداري اصولو سرغړونه بلل کېږي او د یوه کال لپاره‌يې د کرکټ په سیالیو کې له ګډونه منع شوی دی.

خو دې ادارې پرون د فبرورۍ په ۲۶مه، پر ټویټر خبر ورکړ چې محمد شهزاد له بندیزونو خلاص شو.

د افغانستان د کرکټ بورډ پر وېب‌پاڼه لیکل شوي چې محمد شهزاد تر تقریباً اوو میاشتو بندیز وروسته ازاد دی او کولائ شي چې هر ډول کرکټ وکړي، خو د هغه پر قرارداد لګېدلی بندیز به پر ځای وي.

د محمد شهزاد پر قرارداد بندیز د روان کال په اګسټ کې پای ته رسېږي.

کرکټ بورډ لیکلي چې د ملي لوبډلې دې بټس من او وکېټر د عفوې غوښتنه کړې وه او ژمنه‌یې کړې چې بیا به تېروتنې نه‌تکراروي.

ماه‌جبین قزلباش مړه شوه

وتلې سندرغاړې ماه‌جبین قزلباش

د پښتو ژبې ډېره وتلې سندرغاړې ماه‌جبین قزلباش پرون د فبرورۍ په ۲۶مه، له نړۍ سترګې پټې کړې.

قزلباش پرون د پېښور په لېډي ريډنګ روغتون کې مړه شوې ده.

د راپورونو پر اساس، هغې د زړه ناروغي درلوده.

پر هغې د زړه حمله راغلې وه او په لېډۍ رېدنګ کې بستر وه.

ماه‌جبین قزلباش کلونه کلونه سندرې وبللې او په افغانستان کې هم ډېره پېژندل شوې ده.

په خېبر پښتونخوا کې د پاکستان راډيو مشر لایق‌زاده لایق پرون ماخوستن له ازادي راډیو سره په مرکه کې وویل چې هغه د پلار له‌خوا د ایران د مشهد او د مور له‌خوا پېښورۍ وه.

لایق‌زاده لایق وویل چې ماه‌جبین قزلباش په ۱۹۷۱ میلادي کال کې په پېښور راډيو کې له سندرو ویلو خپل هنري سفر پیل کړ.

د ماه‌جبین قزلباش درې زامن او یو لور پاتې دي.

لایق‌زاده لایق ازادي راډیو ته وویل چې ماه‌جبین قزلباش د ژوند په وروستیو وختونو کې له ډېر کمزوري اقتصاده کړېده او حتی د ژوند په وروستیو ورځو کې یې د ځان د درملنې وس هم نه‌درلود.

د هغې د مړینې پر خبر پر ټولنیزو رسنیو ډېرو خلکو تبصرې کړې دي.

د پاکستان د پارلمان پخواني غړي او سیاستوال، افراسیاب خټک پر ټویټر لیکلي چې د قزلباش خدمت به تل د خلکو په یاد پاتې وي او مرګ‌یې د پښتنو د موسیقۍ لپاره لوی زیان بولي.

اروپايي ټولنې یو ځل بیا له افغان حکومت د ملاتړ د دوام اعلان وکړ

افغان ولسمشر محمد اشرف غني د افغانستان لپاره د اروپايي ټولنې له ځانګړي استازي رولاند کوبیا سره د لیدنې پر مهال.

د افغانستان لپاره د اروپایي ټولنې ځانګړي استازي یو ځل بیا د افغانستان له حکومت څخه د ملاتړ او ورسره د همکارۍ د دوام په اړه ډاډ ورکړ.

د ارګ په یوې اعلامیه کې راغلي چې رولاند کوبیا نن تر غرمې دمخه په ګلخانې ماڼۍ کې له ولسمشر اشرف غني سره د لیدو پر مهال دا خبره کړې ده.

د اعلامیې له مخې ښاغلي کوبیا د افغانستان له ټولو سیاستوالو غوښتي چې د سولې پروسې د بریالي ترسره کېدو لپاره په ګډه کار وکړي.

ولسمشر غني په دې لیدنه کې د افغانستان لپاره د اروپایي ټولنې استازي ته ویلي چې د سولې پروسې د فرصتونو او احتمالي خطرونو په اړه‌یې له بېلابېلو لورو سره سلامشورې کړي او د دغو چارو د ښه مدیریت لپاره چمتووالی لري.

د افغانستان د سولي لپاره د امریکا د بهرنیو چارو وزارت د استازي زلمي خلیل‌زاد او په قطر کې د طالبانو د سیاسي مشرانو ترمنځ تر ډېرو خبرو اترو وروسته ټاکل شوې ده د روانې فبرورۍ پر ۲۹مه د دواړو لورو ترمنځ توافق لاسلیک شي چې له مخې به‌یې له افغانستان څخه د بهرنیو ځواکونو وتلو او د افغان حکومت او طالبانو ترمنځ مخامخ خبرو ته زمینه برابره شي.

د امریکا او طالبانو ترمنځ د توافق تر لاسلیک دمخه د سولي لپاره د اعتماد فضا د رامنځته کېدو په هدف په افغانستان کې د یوې اوونۍ لپاره د تاتریخوالي د کمېدو پرېکړه شوې وه چې نن د دې اوونۍ د پیل پنځمه ورځ ده.

د افغانستان خلکو د دې پرېکړې تود هرکلی وکړ.

مصر کې د حسنې مبارک د جنازې لپاره ځانګړي مراسم جوړېږي

د مصر د پخواني مشر حسنې مبارک جنازه

مصر نن د دې هېواد د پخواني مشر حسنې مبارک د جنازې لپاره ځانګړي پوځي مراسم جوړوي.

د مصر د ولسمشر عبدالفتاح السیسي حکومت د مبارک د مړینې له کبله درې ورځې ملي ماتم اعلان کړ.

حسنې مبارک د ۹۱ کلونو په عمر پرون د قاهرې په یوه پوځي روغتون کې ومړ. د نوموړي ۳۰ کلنه واکمني په ۲۰۱۱ کال کې د عرب پسرلي له اعتراضونو سره ختمه شوه.

د مصر جنرالان او لوړ رتبه افسران نن په موشیر طنطاوي جومات کې راټول شول.

د مبارک دوه زامن جمال او آلا چې تازه د فساد له تورونو پاک راوتلي هم په دې ډله کې ول.

د حسنې مبارک مړی په یوه هلیکوپټر کې دغه جومات ته ولېږدول شو.

د پاکستان د مسلم لیګ نواز ګوند یو مشر وژل شوی

د جاوېد الله خان د جنازې مراسم

د پاکستان د مسلم لیګ نواز ګوند یو سیمه‌ییز مشر چې د تندلارۍ ضد یوې ډلې غړی هم وو د دې هېواد په شمال لوېدیځ کې په ډزو ووژل شو.

جاوېد الله خان تېره میاشت د خېبر پښتونخوا په سوات سیمه کې د اوصاف په نوم یوې ورځپاڼې د مسؤل مدیر په توګه ټاکل شوی وو.

د ده د تره زوی ممتاز خان ازادي راډیو ته ویلي چې دا د یوې کورنۍ ۱۵م غړی وو چې تر ۲۰۰۸ کال راوروسته وژل شوي دي.

ممتاز خان ویلي، "موږ سیاستوال یو او دا د دولت مسؤلیت دی چې زموږ امنیت خوندي کړي."

۳۶ کلن جاوېد الله خان تېره ورځ ناوخته د نامعلومو وسله‌والو تر برید لاندې راغی.

د ده یو ساتونکی پولیس له بریده روغ وتلی.

تر اوسه د دې پېښې مسؤلیت چا نه‌دی منلی.

مودي د هندوانو او اقلیت مسلمانانو ترمنځ د ارامتیا غوښتنه کړې

هند کې اقلیت مسلمانان

د هند صدراعظم نرېندرا مودي په دې هېواد کې د هندوانو او اقلیت مسلمانانو ترمنځ د وروستیو لانجو په تړاو له خلکو د ارامتیا غوښتنه کړې ده.

په دغو لانجو کې په پلازمېنه نوې ډېلي کې لږترلږه ۲۰ کسه وژل شوي دي.

د هند صدراعظم نن چهارشنبه پر خپله ټویټر پاڼه لیکلي، "زه په ډېلي کې له خپلو خویندو او وروڼو څخه غواړم چې هر وخت په خپلو کې سوله او ورولي وساتي."

نوموړي دا هم ویلي چې وضعیت په غور سره څاري او پولیس او نورې ادارې د ثبات او ارامتیا د ډاډمنېدو لپاره کار کوي.

د فبرورۍ پر ۲۳مه په پلازمېنه نوې ډېلي کې دا خونړۍ پېښې د هغو مظاهره کوونکو ترمنځ راپورته شوې چې د هندوستان د تابعیت د نوي جنجالي قانون په اعتراض راوتلي وو.

د نوي قانون له مخې هندوستان هغو کسانو ته تابعیت ورکوي چې مسلمانان نه‌دي او د خپل مذهب په خاطر د ځپنې له وېرې له ۲۰۱۶ کال مخکې هندوستان ته تللي.منتقدین وايي، دا قانون له مسلمانانو سره توپیري چلند کوي، خو حکومت دا خبره ردوي.

نور راوښيه

XS
SM
MD
LG