دو شنبې د وږي لومړۍ نېټه

هشت صبح:

هشت صبح ورځپاڼې په افغانستان کې د خصوصي امنیتی کمپنیو د منحلیدو کیسه را اخیستې ده او دا موضوع یې له بیلابیلو اړخونو نه څیړلې ده.

ورځپاڼې لیکلي چې د خصوصي امنیتی کمپنیو د منحلیدو په اړه د ولسمشر کرزي د فرمان په اړه ډیرې تبصرې کیږي خو مهمه دا ده، چې افغان حکومت د امنیتي ځواکونو ظرفیتونه لوړکړي ترڅو د خصوصي امنیتي کمپینوتشه ډکه شي؟

دې ورڅپاڼې د ملي امنیت د سلاکار ډاکټر رنګین دادفر سپنتا په قلم د افغانستان د جنګ په اړه یوه لیکنه هم خپره کړې، چې ویلي یې دي، هغه ستراتیژۍ چې له تروریزم څخه د سیاسي ابزار په توګه ګټه واخلي بریا ته نه رسیږي.


انیس:

انیس دولتي ورځپاڼې د افغانستان په ځینو برخوکې د سیلابونو له امله د را ولاړو شوو ستونزو او د فقر او غریبۍ د خطرپه اړه لیکنه کړې.

دې ورځپاڼې د پیښو په وړاندې د مبارزې د رییس له قوله لیکلي، چې د ملګروملتونو سازمان باید د افغانستان لپاره د خوراکي موادو د مرستې د ترلاسه کولو په اړه تدابیر ونیسي.

ورځپاڼه په دوام کې لیکي، چې سیلابونو د افغانستان په ځینو برخو کې له هره پلوه ډیر زیانونه اړولي او خلک له ستونزو سره مخامخ دي.

ورځپاڼې په بل ځای کې په افغانستان کې د قانون د حاکمیت او د خلکو له خوا د قانون د عملي کیدو په اړه هم تبصره کړې.

دې ورځپاڼې ویلي، چې د افغانستان خلک باید په خپله له بې قانونۍ څخه مخنیوی وکړي او قانون په بشپړه توګه رعایت کړي.

ملي ارمان:

ملي ارمان ورځپاڼې د خپلې نن ورځې ګڼې په سرمقالې کې پر افغان حکومت له دې امله جدي انتقاد کړی، چې په دې هیواد کې یې د اداري فساد د مخنیوي په برخه کې د پام وړ څه نه دي کړي. ورځپاڼې لیکلي چې ولسمشر کرزی د کرښې وروستۍ برخې ته رسیدلی.

د مقالې لیکوال ویلي، چې د مفسدو کسانو د محاکمه کولو له غوښتنو سره سره بیا هم په فساد یوشمېر ککړ کسان یا نیول شوي نه دي اویا هم توانیدلي له افغانستان څخه بهر ووځي.

دې ورځپاڼې د افغانستان په اړه د پاکستان په پالیسۍ هم تبصره کړې او د پاکستان کړنې یې ارزیابي کړي دي، د مقالې لیکوال څرګنده کړې، چې پاکستان هېڅکله نه غواړي چې له نړې سره پراخې اړیکې لرونکی او پیاوړی افغانستان په څنګ کې ولري.

اراده:

ارادې ورځپاڼې په افغانستان کې د ولسي جرګې د راتلونکو انتخاباتو په اړه تبصره کړې او په دې برخه کې یې شته ستونزې څیړلې دي.

دې ورځپاڼې په غټو ټکو کې لیکلي، چې پر انتخاباتو د ټوپک سیوری شته او دا به پرانتخاباتو ډیره اغیزه پرې باسي.

د مقالې لیکوال وایي، چې سیمه ایز زورواکي اوس دا فرصت پیدا کوي، چې د خلکو په ګواښولو سره د زور له لارې ځانته رایې ترلاسه کړي.

ورځپاڼې د خپلې نن ورځې ګڼې په سرمقالې کې په افغانستان کې د اداري فساد او اغیزو په اړه یې هم تبصره کړې.