د اروپايي ټولنې مشرانو پرون موافقه وکړه چې د افریقا په لویدیځ کې د ایبولا د وژونکي ویروس پرضد د مبارزې لپاره د خپلې مالي مرستې کچه یو میلیارد یورو ته اوچته کړي.
د اروپايي ټولنې مشر "هرمان وان رامپوې" په بروکسل کې د اروپايي ټولنې د سرمشریزې په دوهمه ورځ په خپله ټویټر پاڼه کې د دې نوې مالي مرستې خبر ورکړ.
له بلې خوا د روغتیا نړیوال سازمان WHO پرون اعلان وکړ چې په راروانه ډسمبر میاشت کې به د ایبولا د واکسین ازمېیل د افریقا په لویدیځ کې پیل کړي.
ټاکل شوې چې د ۲۰۱۵ کال تر نیمايي پورې د دې کمپاین په ترڅ کې سلګونه زره کسان واکسین شي؛ خو WHO وايي، تراوسه لامعلومه نه ده چې ایا دا واکسین به د دې خطرناکې ناروغۍ په وړاندې ګټور وي؛ کنه.
د "ډبلیو. اېچ. او" یوې ویاندې "ډاکټرې ماري پولي کیني" پرون وویل؛ که د دې واکسین دوه ډولونه اغېزمن ثابت شي؛ امکان لري چې په راتلونکي کال کې پر میلیونونو کسانو تطبیق شي.
د ایبولا د واکسین د دوو پرمختللو ډولونو ازمېیل لادمخه پیل شوي دي. ایبولا ناروغۍ تراوسه ۴۸۰۰ کسان وژلي. مالي د لویدیځې افریقا شپږم هېواد دی چې په روانه اونۍ کې یې د ایبولا ناروغۍ د خپراوي راپور ورکړ.
په همدې حال کې یو امریکایی ډاکټر چې په لویدیځه افریقا کې په ایبولا د اخته ناروغانو له علاج وروسته نیویارک ته ستون شوی؛ په همدې ناروغۍ اخته بلل شوی دی. دا په نیویارک کې لومړنی کس دی چې په ایبولا اخته تشخیص شوی دی.
د یوه بل خبر له مخې، د امریکا د مریلنډ ایالت یوه اوسېدونکې نرسه چې په ټکساس ایالت کې په دې ناروغۍ د یوه اخته ناروغ د علاج پرمهال یې د ایبولا ویروس اخیستی و؛ روغه شوې ده.