پاکستان په کابل پوهنتون کې د اجتماعي علومو یو پوهنځی پرانیست

په افغانستان كې د پوهنتونو د كميت او كيفيت د ښه كولو په بهير كې دادى د كابل په پوهنتون كې د پاكستان په مالي مرسته د علامه اقبال په نامه د اجمتاعي علومو يو پوهنځى په عصري توګه جوړ او د كابل پوهنتون ته وسپارل شو.

په دغه پوهنځي كې د پاكستان د حكومت له خوا د لسو ميليونو ډالرو په لږولو سره ۲۸ درسي او ۲۰ دفتري خونې، دوه د كانفرانسونو لپاره تالارونه، دوه د كمپيوټر خونې، كتابتون، لابراتوار او داسي نور له عصري او مجهزو لوازمو سره جوړ شوي دي.

د كابل پوهنتون ریيس پوهاند حميدالله امين د دغه پوهنځي د كنجيانو د سپارلو په مراسمو كې د چهارشنبې په ورځ داسي وويل:

"دغه ودانۍ چې نن یې پرانستنه کوو، د کابل پوهنتون لپاره یو لویه لاسته راوړنه ده او دا د افغانستان او پاکستان د دوستۍ او ورورولۍ یوه بېلګه ده."

نوموړي وړاندي وويل، چې په دغې ودانۍ كې به چې د رغولو چارې يې په پنځو كلونو كې بشپړې شوي دي دوه پوهنځي ځای پرځای شي ځكه ظرفيت يې له ۲۵۰۰ محصلينو څخه زيات دي.

په دې مراسمو كې په كابل كې د پاكستان سفير محمد صادق وويل، چې د پاكستان زيات تمركز په افغانستان كې د تعليم او زده كړې په برخه كې دی او له همدې امله يې نه يواځي دا ودانۍ بلكې په ننګرهار كې د ساينس د پوهنځي ودانې جوړه كړې ده او دغه راز هركال افغانستان ته په سلګونو تحصيلي بورسونه وركوي.

"له افغانستان سره د پاكستان د اړيكو په برخه كې د پاكستان تمركز د دې هېواد د تعليم په برخه كې دی. د پاكستان حكومت دامهال د افغاني محصلينو د لوړو زده كړو لپاره په ۲۰۰۰ سكالرشيپونو يا بورسنو باندې كار كوي او موږ به په دغو سكالرشيپونو كې د دې پوهنتون محصلينو ته ځانګړې برخه وركړو.

نوموړي وړاندې وويل، چې د تيرو كلونو پرمهال چې په افغانستان كې جګړې روانې وې تقريبا ۲۸۰۰۰ افغان محصلين د پاكستان له دولتي پوهنتونو څخه فارغ شوي دي او دامهال په خپل هېواد كې خلكو ته خدمت كوي.

دغه راز د پاكستان سفير وويل، چې تر ۶۰۰۰ زيات افغانان همدا اوس د پاكستان په دولتي پوهنتونونو كې زده كړې كوي، چې دا له افغانستان څخه د باندې د افغان محصلينو ۶۰% جوړوي او د دې ترڅنګ تقريبا نيم ميليون افغان ماشومان د پاكستان په ښونځيو كې دا مهال په زده كړو بوخت دي.