برېښنا وزارت:د برېښنا په كارولوكې بايد اصراف ونه شي

په داسې حال كې چې په دې ورستېو كې په كابل او ولايتونو كې د بريښنا د توضيع چارې ښې او كړۍ يې پراخه شوې ده د افغانستان د اوبو او برېښنا وزارت له خلكو غوښتي چې د بريښنا په كارولو كې دې له اصراف څخه كار نه اخلي.

د افغانستان د اوبو او بريښنا وزير محمد اسماعيل د سې شنبې په ورځ په كابل كې يوې غونډې ته وويل، چې د برېښنا په كارولو كېاصراف د ټولنې په تاون دى نو پكار ده چې خلك په دې برخه كې له غورڅخه كار واخلي:

"لكه څرنګه چې يوهيږئ د اقتصاد چټك پرمختګ د انرژۍ غوښتنه زياتوي نو ځكه بايد د انرژۍ په مصرفولو كې له اصراف څخه كار وا نه خلو، دا معقوله تل په ياد ولرئ چې څاڅكى، څاڅكى سيند جوړوي."

په داسې حال كې چې د افغانستان د اوبو او برېښنا وزارت په دې وروستيو كې د ښو لاسته راوړنو خبره كوي د نظر خاوندان بيا دغې خبرې ته په غبرګون سره وايي، چې د برېښنا په برخه كې اساسي پروژې نه دي پلى شوي.

د افغانستان د ماليې پخواني وزير اشرف غني احمدزي چې په دغې غونډه كې يې ګډون كړى وويل، چې افغانستان د بريښنا د توليد لپاره پريمانه اوبه لري خو اوس يواځې د ۶۵۰ ميګا واټه برېښنا د توليد ظرفيت لري چې دا په هيڅ ډول كافي نه ده:
"له بده مرغه له دومره ډيرو لګښتونو سره، سره د بريښنا او يا د اوبو يو نوى بند نه دى جوړ شوى او دا هغه خبره ده چې زموږ د خلكو په وينا رنځونكې ده."

خو د افغانستان د اوبو او بريښنا وزارت چارواكي وايي، چې د اوبو او بريښنا د بندونو جوړول اوږد مهالې پروژې دي چې ډير وخت غواړي او د لګښتونه پوره كول يې هم د نړېوالې ټولنې له مرستې پرته نا شوني دي.

دا په داسې حال كې ده چې افغان دولت د كابل په نړېوال كنفرانس كې له نړېوالې ټولنې وغوښتل چې د اوږد مهالو پروژو د پلي كېدلو په برخه كې مالي مرسته وكړي او نړېوالې ټولنې هم په نوموړې برخه كې د همكارئ ژمنه كړې ده.