یو اوریدونکي د ازادۍ راډیو د اوږدو ليکونو ریکارډ مات کړ

ددې لیک اوږدوالی تر اتو مترو زیات دی چې یو اوریدونکي د سندرو میلمانه خپرونې ته را استولی دی او تر اوسه  ازادۍ راډیو  ته د راغلیو ټولو اوږدو لیکونو څخه اوږد لیک دی.
په لیک کې سلامونه ، شعرونه ، سندرې، غوره ویناوې ،په زړه پورې مطالب  او په بېلابېلو رنګونو کښل شوي ښکلي رسمونه تر سترګو کېږي.

موږ له دې اوریدونکې څخه مننه کوو او کور ودانې ورته وايو چې په دومره مینه او خلوص يې دومره یو اوږد لیک لیکلی او موږ ته يې استولی دی.

څومره چې ممکنه وه موږ يې لیک په راډیويي خپرونو کې خپور کړی . او دا دی په ویب پاڼه کې مو هم تاسو پرې خبر کړﺉ.

پر دې سربېره د ازادۍ راډیو  هره ورځ د بېلابېلو خپرونو  لپار په تېلفوني پیغامونو او ایمیلونو سربېره  د ګڼ شمیر اوریدونکيو لېکونه هم را استوي.

دالېکونه ډېرکله یوازې پر یو سپین کاغذ څو کرښې نه وي ، بلکې زموږ یوشمیر اوریدونکي موږ ته ډېر په زړه پورې له ډول ‌ډول رنګونو ، تصویرونو او رسمونو ډک لېکونه هم راستوي .

د ازادۍ راډیو کارکونکي د خپلو اوریدونکو داسې له مینې او خلوص نه په ډکو لېکونو خوشالېږي مننه ترې کوي او په بېلابېلو خپرونو کې يې خپروي.

له نورو اوریدونکي هم هېله لرو چې زموږ د خپرونو په اړه موږ ته لېکونه راواستوي ، تیلفوني پیغامونه راته ثبت کړي او ایمیلونه راته ولېکي، موږ په بېلابېلو خپرونو کې ستاسو لیکونه او پیغامونه خپرو.

او همدارنګه د خپرونو په جوړولو کې هم ستاسو نظرونه په پام کې نیسو.