د وزیرانو شورا د مځکې د ادارې په نوم یوه نوې اداره تصویب کړه
02.06.1389
د افغانستان د وزیرانو شورا په وروستۍ غونډه کې د مځکې د ادارې په نوم یوه نوې اداره تصویب او جوړه شوه چې د کرنې او مالدارۍ وزارت په چوکاټ کې به کار کوي.
د افغانستان د کرنې او مالدارۍ وزیر محمد اصف رحیمي وايي، چې دغه اداره به د غصب شوېو مځکو پر سر د جنجالونو د حل، د کرنېزې پراختیا لپاره د مځکو ځانګړې کول او د مځکو د غصب د مخنیوي لپاره به کار کوي.
د افغانستان د کرنې وزیر له ازادۍ راډیو سره په ځانګړې مرکه کې، له طبعي پېښو سره د مبارزې د ملي ادارې د چارواکو دا خبره ناسمه وبلله چې ګواکې افغانستان به سږ کال سخت ژمې ولري او د غلو دانو له کمښت سره به مخامخ وي.