دتورخم جلال اباد په لويه لار کنکريټي فرش جوړ شو 

دتورخم جلال اباد په لويه لار دتېر کال دسېلابونو په وجه دسراچې دلويدلي پول پر ځاى جوړشوى کنکريټي فرش يا واش دشنبې په ورځ پرانستل شو داد امريکا په مشرى د PRT په مرسته جوړ شوى.
ننګرهار والي ګل اغا شېرزي دسراچې دپول پر ځاى دکنکرېټي فرش دپرانستو په وخت وويل، دامريکا په مشرۍ دننګرهار PRT پردغه پروژه ٣ نيم لکه ډالر لګولي دي.

دتورخم جلال اباد دلارې موټر چلوونکي که څه هم خوشاله و، چې سمدستي ورته لاره جوړه شوه؛ خو داساسي پله او دتورخم دويم سړک دجوړېدو غوښتونکي و، يوه تن وويل: موږ ددې فرش په جوړېدو خوشاله شو؛ خو په دې څه نه کېږي داخو سبا بيا سېلابونه خرابوي اساسي کار دې وشي بل پل دې جوړ شي او همدارنګه دې دوهم سړک کار هم ژر پيل شي ځکه چې هره ورځ په يوه سړک ډېرې پېښې کېږي.

ننګرهار والي وويل، دپاکستان حکومت ورته ددويم سړک دجوړېدو ډاډ ورکړى او يو شمېر وسايل يې هم رارسېدلي هم دي.

دتورخم جلال اباد ٧٤ کيلو متره اوږده لار دپاکستان هېواد په مرسته يوه راسته جوړه شوې او دبلې کار په نيمايي کې پاتې دى.