په کونړ کې ۱۶مشکوک طالبان نیول شوي
09.12.1388
د افغانستان د ملي دفاع وزارت وايي، چې د ملي اردو سرتېرو د كونړ ولايت په سركاڼو ولسوالۍ كې شپاړلس مشكوك وسلوال نيولي دي.
د ملي دفاع وزارت په يوې اعلاميې كې ويلي دي، چې دغه كسان وروسته له هغې په تصفیوي عملياتو كې له وسلو او مهماتو سره ونيول شول، چې د ملي اردو يو كاروان له كمين سره مخ شو.
په اعلاميې كې راغلي دي، د كمين په نتيجه كې د ملي اردو څلورسرتېري هم ټپيان شوي دي.
د دفاع وزارت همداراز وايي، چې په هلمند او زابل ولايتونو كې تېره ورځ د ملي اردو دوه سرتېري د سړك د غاړې په دوو بمي چاودنو كې وژل شوي دي.