هلمند کې د هیرویینو جوړولو درې فابرکې له منځه یوړل شوې
30.10.1388
د افغانستان د كورنيو چارو وزارت وايي، د مخدره موادو پرضد د مبارزې پوليسو په هلمند ولايت كې د هيرويينو جوړولو درې فابريكې له منځه وړي دي.
د كورنيو چارو وزارت په يوې اعلاميې كې د دغه وزارت د مخدره موادو پرضد د مبارزې مرستيال جنرال داود داود له قوله ويلي دي، چې دغه عملياتو د هلمند ولايت د سنګين ولسوالۍ په ساروان كلا كلي كې شوي دي.
په اعلاميې كې راغلي دي، چې پوليسو په دغو عملياتو كې يو نيم سل كيلو ګرامه ترياك، اتيا كيلوګرامه سوديم كلورايد، ۲۴۰ كيلوګرامه كاربوهايدريت، چې د هيرويينو په جوړولو كې ترينه كار اخيستل كيږي، هم نيولي دي.
د كورنيو چارو وزارت همداراز خبر وركړى، چې د هلمند په ناوې ولسوالۍ كې هم پوليسو په يوه كور كې څه كم دېرش كيلوګرامه چرس له يوه مشكوك كس سره نيولي دي.