د شفافیت نړیوال سازمان وايي، په افغانستان کې د فساد پر ضد د مبارزې لپاره ډېرې ادارې جلا کار کوي چې ترمنځ یې نه همغږي شته او نه هره اداره د اغېزمن کار لپاره خپلواکي لري.
د شفافیت نړیوال سازمان چې په دې اړه یې یوه نوې څېړنه کړې او د خپلو څېړنو راپور یې پرون خپور کړ، سپارښتنه کوي چې افغانستان کې د فساد پر ضد د اغېزمنې مبارزې لپاره باید د ګڼ شمېر ادارو په تشکیلاتو کې له بنسټه بدلون راشي.
د دې سازمان د جنوبي اسیا د برخې سلاکارې الهام محمد ازادي راډیو ته وویل، دوی د خپلو څېړنو پر بنسټ د دې ستونزې د حل لپاره افغان حکومت ته درې طرحې وړاندې کړي دي.
د مېرمن محمد په وینا د ټولو ادارو پر ځای د یوې واحدې ادارې جوړول د درې واړو طرحو په سر کې دي:
"لومړنی وړاندیز چې له افغان حکومته مو د هغه په اړه د غور غوښتنه وکړه دا دی چې د فساد پرضد د مبارزې یوه داسې نوې اداره جوړه کړي چې د اوسنیو نهو ادارو ځای ونیسي. خو دا طرح په اساسي قانون کې بدلون ته اړتیا لري او د تورنو کسانو د دریځ او موقف په اړه له ویرې یا لېوالتیا پرته د یوې خپلواکې څارونکې ادارې په توګه د کار یقيني کول یې ښايي لویې ستونزې رامنځ ته کړي."
مېرمن محمد وايي، په اساسي قانون کې د بدلون د مخنیوي لپاره دوهم وړاندیز د نهو ادارو پر ځای د دوو پیاوړو ادارو جوړول دي او که دا هم نه منل کېږي نو ټولې ادارې پر خپل حال پاتې کیدای شي خو د دې ادارو ترمنځ باید همغږي راشي او د یو بل په چارو کې دې لاسوهنې نهکوي.
د شفافیت نړیوال سازمان همدا راز وايي چې دې ادارو ته د څېړنو په چارو کې باید خپلواکي ورکړل شي او همدا راز د افغانستان اوسنی عدلي او قضایي سیسټم باید نور هم پیاوړی شي.
افغان چارواکو د شفافیت د نړیوال سازمان د راپور په اړه تر دې دمه څه نهدي ویلي خو د فساد پر ضد د مبارزې د عالي ادارې د شکایتونو د اورېدو د څانګې رئیس وحیدالله زاهد پرون د ازادي راډیو په یوه بحث کې دا تائید کړه چې د فساد پر ضد د مبارزې موازي ادارې د ستونزو باعث کېږي خو ده زیاته کړه چې د فساد پرضد د مبارزې عالي اداره خپله سټراټیژي لري او په خپلو چارو کې تر ډېره خپلواکه ده.