د امریکا او چین مشرانو د شمالي کوریا د کړکېچ د سوله ییز حل په اړه خبرې وکړې.
وروسته له دې چې امریکا وویل، د کوریا ټاپووزمې ته الوتک وړونکې بېړۍ او یرغلیزه ډله لېږي، شمالي کوریا خبرداری ورکړ چې پر امریکايي هدفونو به اټمي حمله وکړي.
د روسیې او امریکا ترمنځ په اړیکو کې ترینګلتیا نور له منځني ختیځ او د سوریې له خوا د کیمیايي وسلو له حده اوښتې ده.
د نیویارک ټایمز ورځپاڼې د راپور له مخې، اوس د افغانستان د سولې پروګرام د دواړو هېوادونو ترمنځ په اختلافاتو کې یوه بله زیاتونه ده.
ټاکل شوې ده چې د راتلونکې جمعې په ورځ په مسکو کې د افغانستان په اړه کنفرانس جوړ شي.
په دغه کنفرانس کې امریکا ګډون نه کوي خو پاکستان، چین، هند، افغانستان او د منځنۍ اسیا هېوادونه دې غونډې ته بلل شوي دي.
امریکا ویلي، په دې خاطر د مسکو په کنفرانس کې ګډون نه کوي چې د روسیې په نیت نه پوهېږي.
د مسکو په غونډه کې د واشنګټن نهګډون
د دسمبر له میاشتې را په دې خوا دا څووم کنفرانس دی چې د افغانستان په اړه په مسکو کې جوړېږي.
په لومړۍ غونډه کې د افغانستان له ګډونه پرته روسیې، چین او پاکستان برخه لرله خو په دوهمه کې یې افغانستان هم ګډون کړی و خو افغانستان ټیټ پوړی استازی ورلېږلی و.
د افغانستان د ولسي جرګې ځیني غړي او دغه راز یو شمېر امریکايي چارواکي باور لري چې روسیه له طالبانو سره پوځي مرسته هم کوي.
جنرال سکاپاروتي: د طالبانو ترمنځ د روسیې نفوذ زیات شوی
روسیه دا خبره ردوي، وايي، د افغانستان د سولې د پروسې د بریالیتوب لپاره یې له طالبانو سره تماسونه نیولي او غواړي چې د افغانستان بې ثباتي د منځنۍ اسیا هېوادونو ته خپره نه شي.
خو د افغانستان د ولسي جرګې دوهم مرستیال محمد نذیر احمدزی وايي چې له طالبانو سره د روسیې د ملاتړ کره اسناد شته.
ښاغلي احمدزي همداراز وویل، په کابل کې د روسیې سفیر له ځینو افغان چارواکو او سیاستوالو سره کتنې کړي او هغوی یې د امریکا خلاف هڅولي دي.
د امریکا د دفاع جیمز متېس او د امریکا د مرکزي قوماندان جنرال جوزیف ووټل وزیر په شمول یو شمېر چارواکي باور لري چې روسیه له طالبانو سره مالي مرسته او حتي وسلې ورکوي.
جنرال سکاپاروتي: د طالبانو تر منځ د روسیې نفوذ زیات شوی
نیویارک ټایمز په یوه راپور کې ویلي، په داسي حال کې چې په اروپا کې د ناټو او روسیې اختلاف زیات شوی، له سخت دریځو سره د روسیې مرستې په سیمه کې د ناټو ځواکونو ته ګواښ پېښوي.