د لاسرسي لېنکونه

د افغانستان د کورنیو چارو وزارت وايي، د کابل د څرخي پله د تحصن کوونکو بندیانو ستونزه به د ورځې تر پایه حل شي.

د دغه وزارت د ویاند دفتر سرپرست نجیب دانش د چهارشنبې په ورځ کابل کې خبریالانو ته وویل، یو پلاوی یې ګمارلی چې د څرخي پله د محبس له هغو زندانیانو سره له نېږدې وویني چې تحصن‌يې کړی دی.

نوموړی وايي:

"قضیه‌یې د کورنیو چارو وزارت ته رسېدلې، دغه وزارت یو پلاوی ګمارلی او ټاکل شوې چې د لویې څارنوالۍ استازي هم ورشي او دغه ستونزه چې بندیانو مطرح کړې، رسیده‎ګي ورته وشي. دوی ځینې موضوع‌ګانې مطرح کړي چې باید له نېږدې ورسره خبرې وشي. هیله ده نن ماسپښین دغه موضوع حل شي."

د کورنیو چارو وزارت سرپرست ویاند نجیب دانش

د کورنیو چارو وزارت سرپرست ویاند نجیب دانش

د کابل چاپ ځینو ورځپاڼو د مشرانو جرګې د یو شمېر غړو له خولې لیکلي چې د کابل د څرخي پله محبس کې شااوخوا سلو بندیانو له څلورو ورځو راهیسې پر حکومت د اعتراض په توګه شونډې ګنډلې دي.

په دې اړه خبرونه دا هم وايي چې دغو بندیانو د جمهور رئیس پر هغه فرمان اعتراض کړی چې له مخې د څرخي پله زندانیان، د بند د پاتې مودې د بشپړولو لپاره د نورو ولایتونو زندانونو ته نه‎شي تبدیلېدی.

د افغانستان مشرانو جرګې د دغه محبس پر قضیې اندېښنه ښودلې او د ستونزې د حل‎لپاره‌یې قانوني حل لاره غوښتې ده.

د چهارشنبې په ورځ د ولسي جرګې ځینو غړو هم یادې پېښې ته اشاره وکړه او تمه‌یې وښوده چې دغه ستونزه ژر تر ژره حل شي.

د ولسي جرګې رئیس عبدالرؤف ابراهیمي د جرګې عدلي او قضايي کمېسیون ته دنده وسپارله چې موضوع وڅېړي.

د ولسي جرګې رئیس عبدالرؤف ابراهیمي

د ولسي جرګې رئیس عبدالرؤف ابراهیمي

نوموړی وايي:

"د څرخي پله زندان کې د مخدره موادو د بندیانو تحصن د اندېښنې وړ دی، له عدلي او قضايي کمېسیونه هیله ده چې د یوه پلاوي په ذریعه د دغه محبس وضعیت له نېږدې وویني او ستونزه‌یې واوري، څو دغه ستونزه رفع شي."

د کابل د څرخي پله زندان کې د بندیانو دغه اعتراضیه خوځښت لومړی نه‎دی بلکې تېرو کلونو کې هم څو ځلې د بندیانو له‎خوا دا ډول اعتراضیه حرکتونه شوي دي.

د کابل د څرخي پله زندان د افغانستان له لویو زندانونو څخه دی چې د کورنیو چارو وزارت د معلوماتو له مخې د بېلابېلو جرمونو په تړاو شااوخوا اووه زره زندانیان په‌کې د بند موده تېروي.

راپور: خان محمد سیند

XS
SM
MD
LG