په اسټراليا کې مېشتو هزاره توکمو دغه مظاهره له هغې حکومتي ودانۍ دباندې رابللې وه چې دننه په کې ولسمشر محمد اشرف غني د اسټراليا له ګورنر جنرال پيټر کاسګروف سره په کتنه بوخت وو.
د اسوشيټېد پرېس اژانس په حواله، مظاهرهچيانو چې شمېر يې له زرو تر دوو زرو ښوول شوى، شعار ورکاوه چې افغانستان کې دې د هزاره وو په وړاندې تبعيض پايته ورسېږي او هغه پناه غوښتونکي دې بېرته افغانستان ته نه ستنول کېږي چې اسټراليا کې يې د قبلېدو اسناد رد شوي دي.
د مظاهرې يوه برخهوال برات علي باتور ازادي راډيو ته وويل، د مظاهرهچيانو شمېر شپږو زرو ته رسېده او دوې غوښتنې يې درلودې:
"د يوه تفاهمليک پر اساس چې په ٢٠١١میلادي کال د پخواني ولسمشر حامد کرزي د حکومت او د اسټراليا د دولت ترمنځ لاسليک شوى و، دوى موافقه کړې وه په اسټراليا کې دېره پناه غوښتونکي په جبري توګه افغانستان ته وايستل شي. له هغې راهيسې زيات کسان افغانستان ته ستانه کړاى شوي هم دي. د خلکو غوښتنه دا وه چې د اسټراليا دولت او ولسمشر غني دې چې دلته راغلى دا تفاهمليک وګوري، د افغانستان وضعيت څومره بدل شوى او څومره ستونزمن دى په ځانګړي ډول هزارهګانو ته چې هلته تبعيض ورسره کېږي."
باتور وويل، د دوى بله غوښتنه دا ده چې د دوى په وړاندې دې په افغانستان کې سيسټماتيک تبعيض پاى ته ورسېږي.
د اسوشېټېد پرېس خبري اژانس په حواله، افغان حکومت په ٢٠١١میلادي کال له اسټراليا سره يو تفاهمليک لاسليک کړى چې له مخې يې افغانستان هغه افغان پناه غوښتونکي چې اسټراليا کې يې د پناه غوښتنې "رد شوي"- ومني.
خو د ولسمشر د وياند د دفتر سرپرست شاه حسين مرتضوي وايي چې په اسټراليا کې هغو افغانانو چې مظاهرې کړي، د اسټراليا تابعيت لري او دا موضوع په افغان حکومت پورې اړه نهلري:
"دا په موږ پورې هېڅ ارتباط نهلري، دوى د اسټراليا تبعه دي او د هغه ځاى تابعيت لري، دا يې خپل حق دى چې هلته په اسټراليا کې مظاهرې وکړي."
تردې يوه ورځ مخکې په مېلبورن ښار کې د افغان ځوانانو د ټولنې او د غاليو د شرکت غړو بله غونډه تنظيم کړې وه.
د ځوانانو د ټولنې يوه غړي عزتالله علم بيا د ولسمشر محمد اشرف غني ورسره د مله هيئت او افغان حکومت په پلوي ګڼ کسان راټول کړي وو:
"دغو کسانو شعار ورکاوه چې موږ دې افغانستان ته نه لېږل کېږو. دلته ډېر خلک شته چې په کښتيو کې راغلي، دوى ته هم ويل شوي وو چې ولسمشر د دې لپاره چې د اسټراليا حکومت سره يو تړون وکړي څو تاسې بېرته افغانستان ته ولېږي. خو د دوى اصلي هدف تل دا وي چې غواړي بې اتفاقي واچوي."
هزاره مظاهرهکوونکو ادعا درلوده چې ولسمشر د اسټراليا له چارواکو سره غواړي له دغه هېواده د هغو پناه غوښتونکو پر ستنولو خبرې وکړي چې اسټراليا کې يې د پناه غوښتنې رد شوي دي.
اسټراليا کې د افغانستان سفير وحيد ويسي له ازادي راډيو سره په خبرو کې دا مسئله رد کړه:
"دا موضوع اصلاً اجنډا کې شامله نهده، پر دې موضوع مو هېڅ کار نهدى کړى. خو د کډوالو په اړه يوه موضوع شته چې دوى څنګه اسټراليا کې وهڅول شي او ملاتړ يې وشي. ولسمشر د اسټراليا له ګورنر جنرال سره پردې موضوع بحث درلود چې افغانانو د اسټراليا په تحول کې څومره مثبت نقش درلود او دا چې اسټراليا کې د افغانانو نوى نسل په زدهکړه بوخت دى، نا تائيد شوي معلومات ښيي چې شاوخوا ٦زره افغان محصلان دلته په لوړو زدهکړو بوخت دي چې د افغانستان شتمني ګڼل کېږي."
تردې مخکې هم د افغان ولسمشر د بهرنيو سفرونو پر مهال ورته مظاهرې شوې دي.
په اسټراليا کې مېشت د فوايد عامې پخوانى وزير خالق فضل وايي، د ولسمشر پر خلاف په مېلبورن او نورو ځايونو کې مظاهرې د نورو په هدايت شوي دي:
"دا ډول مظاهرې کول خودجوش نهدي. نورو کسان هدايت ورکوي، تمويلېږي او پروګرام کېږي. که نه يو افغان چې په بهر کې اوسېږي څنګه دا وايي چې تاسې په افغانستان کې سرمايه ګذاري مه کوئ، زما سره ظلم کېږي. که د افغانستان اوسني شرايط مطالعه شي، کومو خلکو چې مظاهرې کړي او تنظيم کړي، فکر کوم د دوى خپل ژوند تر بل هر وخت بهتره شوى دى."
ولسمشرغني د يکشنبې ناوخته د اسټراليا پلازمېنې ته ورسېد او د چهارشنبې په ورځ به له دغه هېواد روان شي.
دا اسټراليا ته د ولسمشر محمد اشرف غني اول رسمي سفر دى.
افغان چارواکو ويلي چې د ولسمشر د سفر اصلي هدف د تجارتي، اقتصادي مسايلو او د کانونو د استخراج په برخه کې بحث و.
په پام کې ده ولسمشرمحمد اشرف غني اندونيزيا او سينګاپور ته هم لاړ شي.