د لاسرسي لېنکونه

ټایمز اف انډیا:

د ټایمز اف انډیا ورځپاڼې د افغانستان د کرکټ د ملي ټیم له هندي سر روزنکي سره خبرې کړې دي.

ورځپاڼه د لالچاند راجپوت له قوله لیکلي چې وایي، د افغانستان د کرکټ ملي ټیم به په دوو یا درېیو راتلونکو کلونو کې د ټسټ یا څو ورځنیو لوبو لپاره چمتو شي.

ورځپاڼې د هند د کرکټ په پریمیرلیګونو کې د افغانستان د ملي ټیم د دوو لوبغاړو محمد نبي او راشد خان حضور ته هم اشاره کړې ده.

لالچاند راجپوت ټایمز اف انډیا ته ویلي چې دغو لیګونو کې د دواړو لوبغاړو ګډون نه یوازې د دوی دواړو لپاره مهمه مسئله ده بلکه هغه د کرکټ نورو افغان لوبغاړو ته هم انګېزه ورکوي.

د افغانستان د کرکټ ټیم سر روزونکي نبي او راشد د کرکټ هغه لوبغاړي یاد کړي دي چې نړیواله کچه لوبې کوي او ویلي یې دي چې هغوی به د هند په دوو غوره لیکونو کې د کرکټ له نړیوالو شخصیتنو ډېر څه زده‎کړي.

هغه همدا راز ویلي چې دې فکر کوي چې دوه درې کاله نور په‎کار دي چې د افغانستان ټیم په بشپړه توګه د ټسټ لوبو لپاره تیار شي.

ټایمز اف انډیا د ښاغلي راجپوټ له قوله لیکي چې ویلي یې دي، په ټسټ لوبو کې د افغانستان ګډون تر ډېره د کرکټ د نړیوالې شورا یا ICC په پریکړې پورې تړلی دی.

وال‎سټريټ ژورنال ورځپاڼه د افغانستان په اړه په یوه مطلب کې لیکي، اروپایي اتحادیه د سولې له هغه تړون سره د په میلیونو ډالرو مالي ملاتړ لپاره تیاری نیسي چې د افغانستان د حکومت او د یوې وسله‎والې یاغې ډلې د مشر ترمنځ لاسلیک شوی دی.

د وال‎سټریټ په وینا اروپایي اتحادیه هیله منه ده چې دغه مالي مرسته به چې له افغانستان سره یې کوي، د حزب‎اسلامي له مشر ګلبدین حکمتیار سره د سولې د تړون چې متحدو ایالتونو یې هم ملاتړ کړی، له عملي کولو سره مرسته وکړي.

د ورځپاڼې په لیکنه دا به همدا راز په دغه جګړه ځپلي هېواد کې د دولت نورې وسله‎والې ډلې هم دې ته وهڅوي چې له حکومت سره د سولې ورته تړونونه لاسلیک کړي.

د حزب‎اسلامي د مشر او د حکومت ترمنځ د سولې د تړون چې له لاسلیک یې څه باندې شپږ میاشتې تیریږي، ځینې موارد عملي شوي خو له نظام سره د ښاغلي حکمتیار د یوځای کېدو، په کابل کې د هغه د هستوګن ځای، له زندانونو د دې حزب د غړیو د خوشې کېدو او د غړیو لپاره یې د هستوګن ځایونو په ګډون ځینې موارد تر اوسه نه‎دي عملي شوي.

د افغانستان جمهوري ریاست وایي، د حزب‎اسلامي د یو شمېر زندانیانو د خوشې کېدو په ګډون به په دوو راتلونکو اونیو کې د شوې موافقې نور موارد عملي شي.

د حزب‎اسلامي یوه لوړ پوړي مشر هم ازادي راډیو ته تائید کړه چې ښاغلی حکمتیار به په نېژدې راتلونکې کې د افغانستان په یوه ولایت کې ځان راڅرګند کړي.

XS
SM
MD
LG