د لاسرسي لېنکونه

فساد افغانستان کې له جدي ستونزه څخه شمېرل کېږي چې د اروپايي ټولنې په باور ریښې یې ان د افغانستان مهمو چارواکو ته رسېږي.

په افغانستان کې د اروپايي ټولنې سفیر فرانزمایکل مېلېبن د چهارشنبې په ورځ ازادي راډیو سره په ځانګړي مرګه کې وویل، د اداري فساد د له‎منځه وړلو لپاره افغان حکومت باید لومړی له مجازاتو څخه د تېښتې فرهنګ له‎منځه یوسي.

ښاغلي مېلېبن په دې باور دی چې افغان حکومت کې یو شمېر کړۍ په اداري فساد کې ښکیل دي او دغه پدیده هغه وخت له‎منځه تلای شي چې د حکومت هغه لوړ پوړي چارواکي چې فساد کې ښکیل دي مجازات شي.

د اروپايې ټولنې سفیر: د فساد ضد مبارزې کارونه دې همغږي شي

په افغانستان کې د اروپايي ټولنې سفیر فرانزمایکل مېلېبن

په افغانستان کې د اروپايي ټولنې سفیر فرانزمایکل مېلېبن

نوموړي زیاته کړه:

"زما په باور افغانستان کې له فساد سره مبارزه کې دوه عمده نیمګړتیاوې موجودې دي، یوه له مجازاتو څخه د تېښتې فرهنګ چې دې هېواد کې حاکم دی او دویم له اداري فساد سره د مبارزې برخه کې ټول کارونه باید همغږي اوسي. له ادارې فساد سره د مبارزې په هدف د عدلي او قضايي مرکز جوړېدل یو ښه ګام دی او هیله لرو د دولت هغه لوړ پوړي چارواکي چې فساد کې ښکیل دي تر قضایي څېړونو لاندې ونیول شي."

هغه زیاتوي له اداري فساد سره د مبارزې هغه مېکانېزم چې په ۹۰مه پیړۍ کې په چین کې تجربه شوې د افغانستان لپاره ګټوره ثابتېدای شي.

څو ورځې مخکې هم اروپايي ټولنې په یوه راپور کې د افغانستان په عدلي او قضايي بنسټونو کې د فساد په اړه اندیښنه ښودلې وه او ویلي وو دغه بنسټونو کې اداري فساد د لېرې پرتو سیمو خلک دې ته اړ کړي چې د خپلو ستونزو د هواري لپاره وسله‎والو مخالفینو ته مراجعه وکړي.

اروپايي ټولنه: فساد د لیرو پرتو سیمو افغانان د مخالفینو محکمو ته اړ ایستي

خو د افغانستان سترې محکمې او د حکومت د رسنیو مرکز د اروپايي ټولنې دغه راپور رد کړی دی.

سترې محکمې د اروپايي ټولنې وروستۍ څرګندونې له انصافه لیرې وبللې

خو دا ځل افغانستان کې د دغه ټولنې سفیر وړاندیز کوي چې د فساد د له‎منځه وړلو لپاره باید عدلي او قضايي بنسټونو کې شفافیت رامنځته راشي.

د افغانستان د لویې څارنوالۍ مسؤلان په دې اړه خبرو کولو ته حاضر نه‎شول.

خو له دې مخکې افغان حکومت ویلي و د هغو فساد کوونکو په وړاندې به هم اقدام کوي چې په لوړو څوکیو کې دندې ترسره کوي او له فساد سره د مبارزې د عدلي او قضايي مرکز جوړېدل هم دې برخه کې د حکومت د جدي ارادې ښکارندویي کوي.

خو پوښتنه دا ده چې له مجازاتو څخه د تېښتې فرهنګ څومره افغاني ټولنه کې حاکمه ده او له فساد سره د مبارزې د بنسټونو له نظره فساد کوونکي په کومه سطح کې دي؟

له اداري فساد سره د مبارزې د عالي ادارې رئیس سید حسین فخري په دې اړه وايي:

اداري فساد سره د مبارزې د عالي ادارې رئیس سید حسین فخري

اداري فساد سره د مبارزې د عالي ادارې رئیس سید حسین فخري

"د دې لپاره چې د خلکو او نړیوالې ټولنې رضایت ترلاسه کړو، عدلي او قضايي مرکز باید خپل کارونه په جدي ډول ترسره کړي څو له مجازاتو څخه د تېښتې فرهنګ کمرنګه شي، له حقونو څخه د ملاتړ اداري او عدلي او قضايي مرکزونه باید په دې برخه کې قاطع عمل وکړي."

له دې ټولو سره-سره نړېوالې ټولنې له افغانستان سره خپلې مرستې د فساد پر له‎منځه وړلو مشروطې کړي دي او حکومت هم له اداري فساد سره مبارزه د خپلو کارونو له لومړیتوبونو څخه یادوي.

خو له اداري فساد سره د مبارزې عالي ادارې رئیس وايي، دې برخه کې د خلکو او نړیوالو د قناعت ترلاسه کولو لپاره باید افغان حکومت د فساد پر وړاندې مبارزه لاجدي کړي څو دغه پدیده د حکومت په پراختیايي او اصلاحي برنامو اغېز ونه کړي.

راپور: عبادالله حنان زی

XS
SM
MD
LG