د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۴:۰۲

ولایتي شورا: حکومت د کندز امنیت ټینګښت په اړه جدي اراده نه لري


د کندز د ولایتي شورا یو شمېر غړي وايي، د ژمې موسم هم د ختمېدو په حال کې دی، خو په کندز کې د دولت تر سېوري لاندې ساحه کې کوم پرمختګ او پراختیا نه لېدل کېږي، ځکه لاهم وسله وال طالبان د ښار په نېږدې څنډو کې شتون لري.

د کندز د ولایتي شورا رئیس امرالدین ولي د شنبې په ورځ ازادي راډيو ته وویل چې مرکزي حکومت او د دې ولایت سیمه ییزو چارواکو، تر اوسه پورې خپلې ژمنې نه دې عملي کړي همدارنګه په دې ولایت کې د امنیت راوستو په برخه کې پاتي راغلي دي.

نوموړی خبرداری ورکوي، که چېرې وضعیت همدا ډول دوام پیدا کړي، نو ښايي د هوا په ګرمېدو سره به کندز بیا ځل د وسله والو مخالفینو د بریدونو شاهد وي.

ولي: چارواکو د امنیت په اړه خپلې ژمنې نه دي عملي کړي.
ولي: چارواکو د امنیت په اړه خپلې ژمنې نه دي عملي کړي.

نوموړي زیاته کړه:

"د ژمې موسم ډېر ښه وخت وو چې باید دغه ولایت د طالبانو له موجودیت څخه پاک شوی وای، خو سیمه ییز چارواکي او مرکزي حکومت هسې خبرې کوي، اما په عمل کې څه نه لېدل کېږي، نو اوس مهال خلک د خپل راتلونکي په اړه اندېښمن دي."

په ورته وخت کې د ولایتي شورا یو تن غړی غلام رباني رباني بیا وايي چې ورځ تر بلې د دې ولایت په مرکز او ولسوالیو کې امنیتي وضعیت له ننګونو سره مخامخ کېږي، خو دولت په دې اړه هېڅ غبرګون نه ښيي.

غلام رباني رباني.
غلام رباني رباني.

نوموړي زیاته کړه:

"د کندز خلک د دې ولایت اوسني وضعیت نه راضي نه دي او د ښار په شااوخوا سیمو کې لاهم طالبان حضور لري، خو له مرکزي حکومت څخه غواړو چې دې ولایت امنیتي وضعیت ته پاملرنه وکړي او د خلکو ستونزې هوارې کړي."

ښاغلي رباني زیاته کړه چې مرکزي حکومت په دې ولایت کې د امنیت په راوستو کې پاتې راغلی او کومې ژمنې یې چې د کندز خلکو سره کړي وې، هغه لا تراوسه پورې نه دې عملې شوي.

بل خوا د کندز امنیه قوماندان جنرال عبدالحمید حمیدی بیا وايي چې له څو ورځو راهیسې افغان ګډو ځواکونو د «پامیر۵» په نوم د وسله والو مخالفینو پر وړاندې تصفیوي عملیات په کړي او لاهم د کندز ښار په شااوخوا سیمې کې جریان لري.

د کندز امنیه قوماندان جنرال عبدالحمید حمید.
د کندز امنیه قوماندان جنرال عبدالحمید حمید.

نوموړي زیاته کړه:

"موږ د وسله والو طالبانو هر ډول تحرکاتو پر وړاندې پوره چمتووالی لرو او د موسم بدلون زموږ پروړاندې هېڅ ډول ننکونې نشي جوړولی او موږ لوی پلانونه ترلاس لاندې لرو او پلې کولو سره به یې د کندز امنیتي ساحه پراختیا ومومي."

په همدې کال کې په شمال ختیځ زون کې د پولیسو د ۸۰۸ سپین زر زون عمومي قوماندان لوی پاسوال شېرعزیز کامه وال وايي چې اوس مهال په دې ولایت کې د افغان ځواکونو شپني او ځمکني تصفیوي عملیات دوام لري.

نوموړي زیاته کړه:

"د کندز ښار امنیتي کمربند پلان کابو تکمیل شوی دی او موږ د ښار په یو شمېر مهمو سیمو کې لوی قرارګاوي جوړي کړي او دښمن د تګ را تګ لارې موږ تثبیت او هلته مو پوستې جوړي کړي دي."

د کندز خلک وايي چې د کندز ښار بېرته نیولو څخه تر اوسه پورې څوځلي د وسله والو طالبانو پر وړاندې افغان ځواکونو تصفیوي عملیاتونه پیل کړي، خو د دولت تر کنټرول لاندې ساحې کې کوم بدلون نه دې راغلی، ځکه لا هم د دې ولایت په مرکز پورې اړوند نېږدې شااوخوا سیمو کې وسله وال طالبان فزیکي حضور لري.

راپور: اجمل ارین

XS
SM
MD
LG