د هلمند ولایت چارواکي وایي، د تېرو څلورو میاشتو په ترڅ کې یې د دغه ولایت د پولیسو په لیکو کې ۷۰ فیصده خیالي تشکېلات لهمنځه وړي دي.
د هلمند د والي ویاند عمر ځواک د پنجشنبه په ورځ آزادي راډیو ته وویل چې د هلمند اداره په پام کې لري په راتلونکې یوې میاشتې کې دغه ډول تشکېلات په بشپړ ډول له منځه یوسي.
ښاغلی ځواک وايي:
"د هلمند ادارې او پهخپله والي پهدې ټینګار کوي څو هغه خیالي تشکيلات چې په پولیسو کې شته ژر تر ژره لهمنځه یوړل شي او پرځای یې نور مستحق کسان وګمارل شي. موږ توانیدلي یو د پولیسو شاوخوا اویا فیصده خیالي تشکېلات له منځه یوسو او پاتې فیصده به یې له درېیو اونیو نیولې تر یوې میاشتې پورې له منځه یوړل شي."
د هلمند چارواکي وایي، تېرو څو میاشتو کې یې یوازې په مارجې ولسوالۍ کې ۴۰۰ پولیس چې غېر حاضر وو له دندو لېرې او پر ځای یې نور کسان ګمارلي دي.
د پولیسو په لیکو کې د اصلاحاتو خبره داسې مهال کېږي چې د افغانستان د کورنیو چارو وزارت یو پلاوی د پنجشنبې په ورځ هلمند ولایت ته ورغلی او د والي په ګډون یې له اړوند چارواکو سره د پولیسو د اصلاحاتو پر لارو چارو خبرې کړي دي.
تر دې وړاندې د افغانستان د کورنیو چارو د وزارت ویاند ویلي و چې په ټولو ولایتونو کې یې د پولیسو په لیکو کې د اصلاحاتو او ستونزو د هواري په هدف ۲۰ ټیمونه جوړ کړي څو د پولیسو ستونزې وڅېړي او د هواري په هدف یې اقدامات وشي.