د افغانستان د مشرانو جرګې اداري پلاوی او د سولې عالي شورا وايي د ملګرو ملتونو د امنیت شورا د تحریمونو له لېست څخه د حکمتیار د نوم ایستل د افغانستان د سولې او ثبات په برخه کې د دغې شورا نېک نیت ثابتوي.
دوی دغهراز دا اقدام یو ګټور ګام وباله او زیاتهیې کړه چې د طالبانو مشرانو ته دا ډاډ ورکوي چې امریکا او متحدينيې د سولې د خبرو ملاتړ کوي.
د مشرانو جرګې دوهم مرستیال حسیبالله کلیمزي د دوشنبې په ورځ ازادي راډیو ته وویل، امریکا او متحدینيې هغو اندېښنو ته چې دوی ته سوله لومړیتوب نهلري ځواب ورکړ او روښانهیې کړه چې په افغانستان کې د سولې او ثبات غوښتونکي دي.
ښاغلي کلیمزي زیاته کړه:
"له تور لیسته د حکمتیار د نوم ایستل یو ښه قدم دی او په ورته وخت کې د طالبانو مشرانو ته څرګند پیغام دی چې که سوله وکړي نړۍ ورسره ستونزه نهلري او په افغانستان کې د سولې او ثبات غوښتونکي دي."
د یو شمېر هېوادنو له مخالفت سره سره د روانې اوونۍ د شنبې په ورځ د حزب اسلامي د مشر ګلبدین حکمتیار نوم د ملګرو ملتونو د امنیت شورا د بندیزونو له لېسته وایستل شو.
له دې وړاندې امریکايي چارواکو ویلي چې د افغان دولت او حزباسلامي تر منځ چې د افغانستان یو مخالفه ډله او د افغانستان جګړو کې ښکېله خوا وه، د سولې د خبرو هرکلی کوي.
د دې ترڅنګ امریکا د سولې پروسې ته د وسلهوالو طالبانو د کېنولو په هدف د افغانستان، چین، پاکستان او امریکا تر منځ څلور اړخیزه ناسته هم طرح کړې وه.
د امریکا پخوانی ولسمشر بارک اوباما او اوسني ولسمشر ډونالد ټرمپ هم د افغان حکومت په مشرانو ټینګار کړی چې له وسلهوالو طالبانو سره د سولې خبرې روانې وساتي.
بلخوا د افغانستان د سولې عالي شورا هم وایي چې امریکا او نور هېوادونه په افغانستان کې د سولې د ټینګښت لپاره هلې ځلې کوي او دوی ته ارزښت لري.
د دغې شورا د نړیوالو اړیکو سلاکار محمد اسماعیل قاسمیار وویل:
"متحده ایالاتو د امنیت شورا په چوکاټ کې هڅه وکړه چې د حکمتیار نوم د تحریم له لېسته بهر کړي، دا په دې معنی ده چې دوی زموږ په هېواد کې سولې او ثبات ته اهمیت ورکوي."
د نړيوالو اړیکو یو شمېر کارپوهان هم په دې اند دي چې د امریکا او د متحدینو په دې اقدام سرهیې د سولې پر پروسې د مخالفو وسلهوالو باور نور هم زیاتېږي.
د نړیوالو اړیکو یوه کارپوه مهدي منادي ازادي راډیو ته وویل:
"په دې برخه کې د امریکا او امنیت شورا رول ښيي چې په افغانستان کې د سولې په اړه خوشبینې ورځ تر بلې ډېرېږي."
هغه وویل، د سولې او ثبات لپاه له حکمتیار سره خبرې اترې یو ښه مثال دی او وسلهوالو طالبان هیلهمند کوي چې په پوره ډاډ له افغان دولت سره سوله وکړي کوم چې د لوېدیځوالو ملاتړ هم له ځانه سره ولري.
راپور: اکرامالله اکرام