زرګونه ایرانیان په تهران کې د ایوین «Evin» زندان مخته راټول شوي او د سیاسي بندي آرش صادقي د خوشې کېدو غوښتنه کوي.
تر دې وړاندې د ایران پارلمان ځینو استازو هم حکومت ته خبرداری ورکړی وو چې ارش صادقي د نهخوړو له کبله په نازک روغتیایي حالت کې دی او باید آزاد شي.
دغو استازو د ایران قضائیه قوې مشر صادق لارېجاني ته لیکلي وو چې ښایي د ارش صادقي مرګ جدي سیاسي پایلې ولري.
ارش صادقي چې پهخپله له جون میاشتې راهیسې د ایران ملي امنیت ته د خطر پېښولو په تور زندان کې دی، د اکټوبر له ۲۴ نېټې څخهیې وروسته له هغه اعتصاب پیل کړ چې د ده مېرمن ګلرخ ابراهیمي د یوې ناخپرې شوې مقالې له کبله نیول شوې او په بند کې ده.
ګلرخ ابراهیمي د بشري حقونو فعاله ده او مقالهیې په دې اړه وه چې یو کس د قرانکریم د سوځولو وروسته سنګسار شو.
پر دې اسلامي مقرراتو ته د سپکاوي تور لګول شوی دی.
د بخښنې نړیوال سازمان د مېرمن ابراهیمي پر وړاندې تورونه د خندا وړ بللي دي او وایي چې دا د خپلې مفکورې له کبله سزا ویني.
ځیني راپورونه وایي، د جنورۍ پر دوهمه نېټه تر ۸۰۰ پورې ایرانيانو د ایوین زندان مخته لاریون کړی دی.
دا ډول سولهییز لاریونونه ایران کې ډېر نادر اقدام دی ځکه د حکومت ضد مظاهرې هلته اکثراً له ځواکونو سره مخامخ کېږي.
د جنورۍ د دوهمې نېټې د مظاهرو انځورونه پر ټولنیزو شبکو خپاره شوي چې ښیي لاریون کوونکو د ارش او د هغه د مېرمنې عکسونه لېږدوي، ځینو یې بیا د هغوی نومونه په خپلو لاسونو لیکلي وو او ویل یې چې "موږ ټول ارش یو."
صادقي ایران کې د بشري حقونو نړیوال کمپاین ته ویلي و چې پر ده تورونه د هغو زدهکوونکو د پلوي له کبله لګول شوي چې هغوی زدهکړې نهشوې کولای او همیې د بشري حقونو سولهییزو لاریونونو کې برخه اخیستې ده.
د بشري حقونو لندن مېشتې ډلې پرون په یوې اعلامیې کې لیکلي چې د ایران چارواکو د صادقي ژوند له خطر سره مخامخ کړی دی.
په اعلامیه کې راغلي چې چارواکي ښه پوهېږي ان د څو ساعتونو ځنډ کولای شي د ارش صادقي د مرګ او ژوند تر منځ واټن بدل کړي.