د امریکا منتخب ولسمشر ډونالډ ټرمپ د ساوت کارولینا ایالت ګورنره نیکي هیلي په ملګرو ملتونو کې د واشنګټن د استازې په توګه ټاکلې ده.
په ملګرو ملتونو کې د امریکا د استازي په توګه د هیلي انتخاب چې په بهرنیو روابطو کې زیاته تجربه نهلري، د امریکا د هغو ۴ ډیپلوماټانو له ټاکل کېدو سره توپیر لري چې تراوسه پورې يې په ملګرو ملتونو کې د امریکا استازیتوب کړی دی.
سمنټا پاور:
سمنټا پاور له ۲۰۱۳ کار راپدیخوا په ملګرو ملتونو کې د امریکا استازیتوب کوي.
پاور چې د ژورنالېزم په ډګر کې یې د پولیټزر په نامه جایزه ګټلې، ایرلنډ کې زیږیدلې او لا ماشومه وه چې متحده ایالاتو ته راغلې.
سمنټا پاور د ولسمشر بارک اوباما د انتخاباتي کمپاین او هغه مهال چې نوموړی سناتور و، د بهرنیو اړیکو د سلاکارې په توګه کار کړی دی.
د بارک اوباما د جموري ریاست په لومړنی دوره کې سمنټا پاور د سپینې ماڼۍ د امنیتي سلاکارانو په ډله کې وه.
نوموړې یو له هغو سلاکارانو څخه وه چې پر لیبیا يې د امریکا د هوايې برید ملاتړ وکړ.
سوزان رائیس:
تر سمنټا پاور مخکې په ملګرو ملتونو کې د امریکا استازیتوب سوزان رائیس کاوه.
مېرمن رائیس له ۲۰۰۹ نیولې تر ۲۰۱۳ کاله پورې په دې دنده کې وه.
سوزان رائیس په اکسفورډ پوهنتون کې د نړیوالو اړیکو په برخه کې لوړې زدهکړې کړي او له ځوانی راهیسې يې د بهرنی پالیسې په برخه کې دنده ترسره کړې ده.
سوزان رائیس د امریکا د پخواني ولسمشر بیل کلېنټن په دوره کې د ملي امنیت د شورا غړې وه.
هغې دغه راز د افریقا په چارو کې د متحده ایالاتو د بهرنیو چارو د وزارت د مرستیالې په توګه هم کار کړی دی.
زلمی خلیلزاد:
افغان الاصله امریکايي ډیپلوماټ زلمی خلیلزاد له ۲۰۰۷ نه تر ۲۰۰۹ کاله پورې په ملګرو ملتونو کې د امریکا استازی و.
خلیلزاد په بیروت کې له امریکايي پوهنتون فارغ شوی او بیا يې د شیکاګو پوهنتون کې هم لوړې زدهکړې کړي دي.
په څلورو ژبو خبرې کوونکي زلمی خلیلزاد د رونالډ ریګن له دورې راپدیخوا د امریکا د ملي امنیت اړوند لوړو پوستونو کار کړی دی.
پر امریکا د ۲۰۰۱میلادي کال د سېپټمبر د یوولسمې له بریدونو وروسته د هغه مهال ولسمشر جورج ډبلیو بوش خلیلزاد د افغانستان لپاره د واشنګټن استازی کړ او د افغانستان د پخواني ولسمشرحامد کرزي سره يې نېږدې کار وکړ.
له افغانستان وروسته خلیلزاد په بغداد کې هم د متحده ایالاتو د سفیر په توګه دنده ترسره کړه.
جان بالټن:
جان بالټن چې له ۲۰۰۵ نیولې تر ۲۰۰۶ میلادي کاله پورې په ملګرو ملتونو کې د امریکا استازی و ښايې د امریکا د بهرنۍ پالیسی په برخه کې تر ټولو لانجمن شخصیت وي.
بالټن په بالتیمور ایالت کې زیږیدلی او د رونالډ ریګن د واکمنۍ او بیا د جورج بوش او چورچ ډبیلو بوش د جمهوري ریاست په دورو کې د درېیو فدرالي ادارو مشري وکړه.
د جورج ډبیلو بوش په دوره کې جون بولټن د امریکا د بهرنیو چارو په وزارت کې د وسلو د کنټرول د برخې مسؤل وټاکل شو .
جان بالټن د بوش لهخوا په ملګرو ملتونو کې د امریکا د استازیتوب لپاره ونومول شو خو نوموړی ونه توانېد چې د دې پوسټ لپاره د کانګرس د سنا تائید ترلاسه کړي.
جان بالټن د سنا له مخالفت سره- سره د هغه مهال د ولسمشر جور ډبیلو بوش لهخوا په ملګرو ملتونو کې ۱۷ میاشتې په مؤقت ډول د واشنګټن استازیتوب وکړ.
د امریکا منتخب ولسمشر ډونالډ ټرمپ نیکې هیلي اوس په ملګرو ملتونو کې د امریکا د استازۍ په توګه نومولې ده.
که مېرمن نیکي چې د ساوت کارولینا والي ده په ملګرو ملتونو کې د واشنګټن نمایندګي وکړي نو دا بهپه دې سازمان کې د امریکا د تیرو څلورو سفیرانو په مقایسه تر ټولو کم تجربه لرونکې استازې وي.