د ترکمنستان په هغو سيمو کې چې د افغانستان پولې ته څېرمه پرتې دي، خلک شکايت لري چې ناامنيو د دوى ژوند تريخ کړى دى.
د مارچَک کلي اوسېدونکي وايي، هر وختيې پر کور-کلي مرمۍ لګېږي، کهيې کولاى شوى وختي به بل ځاى ته کډه شوي وو.
په هرات، فارياب، بادغيس او جوزجان ولايتونو کې چې يو وخت د افغانستان خوندي ولايتونه ګڼل کېدل، حملې او وسلهوالې جګړې عامې شوې دي.
د ناامنيو د زياتېدو له کبله د ولسمشر لومړي مرستيال عبدالرشيد دوستم هم څو-څو وارې سيمې ته سفر وکړ او هلتهيې د پوځي عملياتو مشري په غاړه واخيسته.
ويل کېږي د دغو عملياتو له کبله ځيني سيمې له وسلهوالو طالبانو او د هغوى له متحدانو ونيول شوې.
د افغانستان رسنيو د دغو عملياتو او د ترکمنستان پولې ته نېږدې د جګړې راپور هم ورکړى، خو په عشقاباد کې چارواکي وايي، دوى له افغانستان سره په سرحد کې کومه امنيتي ستونزه نهلري.
د ازادي راډيو ترکمنۍ څانګه توانېدلې د مارچک کلي له ګڼو اوسېدونکو سره خبرې وکړي.
مارچک کلى د ترکمنستان د ماري ولايت په تخته بازار ولسوالۍ کې د افغانستان سرحد ته نېږدې پروت دى.
د کلي اوسېدونکي وايي، زيات وخت مرمۍ د دوى پر کلي هم لګېږي.
د ترکمنستان حکومت معمولاً د هغو کسانو په وړاندې جدي چلند کوي چې له بهرنيو رسنيو سره د ترکمنستان پر وضعيت خبرې کوي، يا داسې معلومات له رسنيو سره شريکوي چې د چارواکو له څرګندونو سره په ټکر کې وي.
د دغو ملحوظاتو له کبله په راپور کې د مرکه شويو کسانو نومونه نهدي اخيستل شوي.
د ترکمنستان په سرحد کې پراته کليوال وايي، په جنوبي سيمو کې هره ورځ د ډزو غږونه اورېدل کېږي او کلي تهيې نېږدې پوځي څرخي الوتکې ګرځي چې ظاهراً پر سرحد ګزمه کوي.
يوه کليوال ادعا وکړه چې په وروستيو کې يوه مرمۍ د يوې نجلۍ پر لاس ولګېده.
د ده په وينا دولت د هغې د درملنې لګښت ورکړ خو پوليسو په هغې يو بيان لاسليک کړ او ورڅخهيې غوښتنه وکړه چې د پېښې په اړه هېڅچا ته څه ونهوايي.
د دې سرحدي کلي ځيني اوسېدونکي نورو ځايونو ته کډې کولو ته مجبوره شوي دي، خو ټول د کډې کولو وس نهلري.
په مارچک کلي کې پاتې کسان همالته د ژوند سختۍ تېروي.
د ازادي راډيو د ترکمني څانګې د راپور له مخې د کلي ځينو اوسېدونکو ځانونو ته د پناه کېدو ځايونه جوړ کړي چې د نښتو او په خاص ډول د افغانستان په خاوره کې دننه په سرحدي سيمه کې د ناامنيو په وخت کې هلته پناه وړي.
خو د مارچک کلي اوسېدونکو ته د دولت لهخوا دومره مرستې نهرسېږي، ځکه په رسمي ډول د دوى ستونزه جدي نهده نيول شوې.