د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۱:۳۳

چارواکي: له طبیعي پېښو ګواښېدونکو سیمو ته مرستې رسول شوي


افغان چارواکي وايي، هغو سیمو ته‌یې لازمې مرستې استولي چې د ژمي په موسم کې د طبیعي پېښو له ګواښ سره مخامخ کېږي.

افغانستان کې د طبیعي پېښو په وړاندې اقدامات خورا ستونزمن کار دی ځکه له یوې خوا په ډېری سیمو کې طبیعي پېښې نه اټکل کېږي او له بلې‌خوا عامه تأسیسات ډېر ډاډمن نه‎دي.

د طبیعي پېښو پر ضد د مبارزې چارو کې د دولت وزارت وايي، هغو سیمو ته چې خلک‌یې په تېرو کلونو کې د طبیعي پېښو له کبله زیانمن شوي دي، له اوسه د مرستې خوراکي او غیر خوراکي مواد استول شوي دي.

د دې وزارت د بېړنیو عملیاتو د مرکز مشر احمد خان ناصح ازادي راډیو ته وویل چې دا عملیات له حکومتي او غیر حکومتي ادارو سره په ګډه شوي.

افغان چارواکي وايي طبیعي پېښو پر وړاندې مقابلې ته چمتووالی لري
افغان چارواکي وايي طبیعي پېښو پر وړاندې مقابلې ته چمتووالی لري

ښاغلي ناصح زیاته کړه:

"د خوړو نړیوال پروګرام د طبیعي پېښو ضد ادارې، د «ای، او، ام» او ملګرو ملتونو او همداراز د کډوالو وزارت په مرسته د افغانستان په بېلابېلو سیمو کې خپلې چارې سره همغږي کړي دي. هغه لږو ډېر امکانات چې دولت او د ملګرو ملتونو ادارې یې لري د هېواد هغو سیمو ته لېږدول شوي چې لارې یې ستونزمنې او لوړې دي."

د طبیعي پېښو پر ضد د مبارزې په چارو کې د دولت وزارت یوازنۍ اداره نه‎ده چې د طبیعي پېښو پر مهال د مرستو د رسولو دنده لري بلکې پر ملګرو ملتونو او نورو مرستندویو ټولنو سربېره د اجرائیه رئیس عبدالله عبدالله په مشرۍ یو دولتي کمېسیون هم د دې کار لپاره شته خو له دې سره-سره هر کال طبیعي پېښې د افغانستان په ډېرو سیمو کې خلکو ته ځاني او مالي زیانونه اړوي نو ځکه پر مرستندویو مؤسسو او په تېره د طبیعي پېښو پر ضد د مبارزې پر ادارو انتقادونه هم زیات دي.

د ولسي جرګې غړی نذیر احمد احمدزی وايي، دې ادارو په تېرو کلونو کې د طبیعي پېښو پر مهال یوازې کابل ته له نېږدې پرتو ولایتونو سره مرسته کړې.

د ولسي جرګې غړی نذیر احمد احمدزی
د ولسي جرګې غړی نذیر احمد احمدزی

ښاغلی احمدزی وايي:

"د طبیعي پېښو ادارې صرف مرکز ته نېږدې ولایتونو ته که مرسته رسولې وي نور ټول ولایتونه ترې محروم دي. له دولته غواړو چې باید د افغانستان ټولو وګړو ته په یو نظر وګوري څو چې عاجلې مرستې هغو سیمو ته چې له مشکل سره مخامخ شوي دي ورسېږي."

د دې انتقادونو په ځواب کې د طبیعي پېښو پر ضد د مبارزې په چارو کې د دولت وزارت وايي چې دا اداره خپل امکانات نه‎لري او دنده‌یې د سکتوري وزارتونو او د دولتي ادارو او مرستندویو ټولنو د هڅو تنظیم دی.

ژمی په ټول افغانستان کې خو په خاص ډول د مرکزي ولایتونو په لیرې پرتو سیمو کې خورا سخت تېرېږي.

د دې سیمو لارې تقریباً هر کال د واورو د ورېدو له کبله بندېږي او د بیا خلاصېدو تر وخته‌یې خلک د خوړو، روغتیايي امکاناتو او نورو اړتیاوو د کمښت له کبله له جدي ستونزو سره لاس او ګرېوان وي.

دا ستونزې یوه یا دوه ورځې نه بلکې د یوه بشپړ فصل په اوږدو کې دوام کوي.

XS
SM
MD
LG