د لاسرسي لېنکونه

د سوريې لپاره د ملګرو ملتونو ځانګړى استازى د دغه هېواد پلازمېنې دمشق ته ورسېد.

سټيفن ډېمېستورا په داسې حال کې سوريې ته سفر کوي چې په شمالي ښار حلب کې د دولت له‌خوا پوځي عمليات شديد شوي دي.

ډېمېستورا به نن ناوخته د سوريې د بهرنيو چارو له وزير وليدالمعلم سره وګوري.

په همدې حال کې د روغتيا نړيوال سازمان يوې چارواکې اليزابت هاف ويلي، د دولتي ځواکونو له‌خوا د هوايي حملو او د توپونو د ډزو له کبله د حلب په هغو سيمو کې چې د ياغيانو په کنټرول کې دي، صحي مرکزونه غير فعال شوي دي.

په ټولنيزو رسنيو کې په يوه وېډيو کې يو تن په ويجاړ شوي روغتون کې وضعيت بيانوي:

"هغه ناروغان او ټپيان چې په اتاقونو کې وو او له کوڅې څخه ښکارېدل، موږ تر بمبارۍ وروسته د خراب وضعيت له کبله دوى دهلېز ته انتقال کړل. د شديدې حملې له کبله د جراحۍ خونه غير فعاله شوې او د جراحۍ عمليات په ټپه درېدلي دي."

د سوريې فعالان وايي، وروسته له هغې چې تېره سې شنبه د سوريې حکومت تازه حملې پيل کړي، د حلب په ختيځ کې تر سلو زيات ملکيان وژل شوي دي.

راپورونه وايي اووه ماشومان نن د هغه توغندي په چاودنه ووژل شول چې ياغيانو د حلب په لوېديځ کې د دولت تر ولکې لاندې سيمې باندې وتوغاوه.

حلب له ٢٠١٢م کال راهيسې پر دوو برخو وېشل شوى، پر لوېديځه برخه‌يې دولتي ځواکونه او پر ختيځه برخه‌يې ياغيان کنټرول لري.

XS
SM
MD
LG