د لاسرسي لېنکونه

د پاکستان کراچۍ ښار کې د فرقه‎يي تشدد له څو پېښو وروسته پولیسو پرون د سُني او شیعه مسلمانانو پر مدرسو او جوماتونو چاپې واچولې او لسګونه کسان یې ونیول.

کراچۍ کې تېره اوونۍ د هغې سُني ډلې پنځه تنه پلویان ووژل شول چې شیعه‎ګان مسلمانان نه‎ګڼي.

د چارواکو په وینا دا وژنه ښايي د شیعه‎ګانو له‎خوا انتقامي حمله وه ځکه دې ډلې له هغې یوه اوونۍ مخکې شمالي نظیم اباد سیمه کې د پنځو شیعه‎ګانو د وژنې مسؤلیت منلی و.

پر مدرسو د پاکستان د امنیتي مامورینو د پرونۍ چاپې په وړاندې سُني او شیعه فعالانو اعتراضونه هم وکړل.

په دې ترڅ کې شیعه معترضانو یوه لویه لار د اتو ساعتونو لپاره بنده کړه چې وروسته بیا د مظاهرو ضد پولیسو د اوښکې بهوونکي ګاز په وسیله تیت پرک کړل.

پاکستاني چارواکي وايي، په دې عملیاتو کې له طالبانو سره د تړلې لشکرجنګوي ډلې دوه وسله‎وال نیول شوي دي. چارواکي وايي، دا کسان پر شیعه‎ګانو او دولتي ځواکونو د ۲۸ حملو په ترسره کولو او همدا راز په روان کال کې د نامتو قوالي بول امجد صابري په وژنه تورن دي.

XS
SM
MD
LG