د لاسرسي لېنکونه

د پکتیکا ملکي او پوځي چارواکي وايي چې د یاد ولایت درې لوېدیځې ولسوالۍ وړممې، تروه او وازېخوا چې له امنیتي ګواښونو سره مخامخې وې، د افغان امنیتي ځواکونو د جګړه‌ییزو فعالیتونو نتیجه کې د وسله‎والو له تهدیده ژغورل شوي دي.

د شنبې په ورځ د پکتیکا چارواکو په یوې خبري ناسته کې وویل چې وسله‎والو د یاد ولایت د ځینو سیمو د نیولو هڅې کولې، خو افغان امنیتي ځواکونه وتوانېدل چې خپلې ټولې سیمې وساتي او په ځانګړي ډول درې لوېدیځې ولسوالۍ چې د نسبتاً ډېر امنیتي تهدید سره مخامخې وې، لارې يې خلاصې کړي او د وسله‎والو له ګواښه‌يې وساتي.

پکتیکا کې د ملي اردو د دوهمې پلې لواء قوماندان عبدالواسع میلاد وايي چې د افغان ځواکونو په عملیاتو او همدارنګه هوايي بریدونو کې ۸۶ وسله‎وال وژل شوي او ۷۶ نور ټپیان شوي دي.

د پکتیکا ملکي او پوځي چارواکي رسنیو ته څرګندونې کوي.

د پکتیکا ملکي او پوځي چارواکي رسنیو ته څرګندونې کوي.

نوموړی زیاتوي:

"د کره راپورونو پر اساس د دښمن تقریباً ۷۶ تنه زخمیان دي او ۸۶ يې له‎منځه تللي دي، په‎ دې کې یو هدف د نړیوالو ځواکونو په همکارۍ او دوه هدفه هم د افغان هوايي ځواکونو په بریدونو کې له‎منځه وړل شوي دي."

د ملي اردو یاد قوماندان وايي چې په‎ دې عملیاتو کې د افغان ځواکونو دوه سرتېري هم وژل شوي او ۶ نور ټپیان شوي دي.

د پکتیکا مرستیال والي عطاالله فضلي په دې خبري کنفرانس کې وويل، پکتیکا کې د امنیتي او دفاعي څواکونو تر منخ نېږدې همغږي شته او له همدې کبله ده چې وسله‎وال مخالفین نه‎شي کولای د پکتیکا کومه سیمه تر خپلې ولکې لاندې راولي.

عطاالله فضلي اوس‎مهال د یاد ولایت د غربي ولسوالیو امنیت د ډاډ وړ وباله او زیاته‌يې کړه، لارې يې خلاصې شوي او ماینونو څخه پاکې شوې دي، همدارنګه خلک کولای شي، په یادو سیمو کې خپل ورځني ژوند ته دوام ورکړي.

فضلي: پکتیکا کې د امنیتي او دفاعي ځواکونو تر منځ نېږدې همغږي شته.

فضلي: پکتیکا کې د امنیتي او دفاعي ځواکونو تر منځ نېږدې همغږي شته.

د پکتیکا ولایت د امنیه قوماندانۍ د امنیت امر سمونمل عبدالرؤف مسعود وايي چې په لوېدیځو درېیو ولسوالیو کې يې د وسله‎والو څخه یوه اندازه وسلې هم ترلاسه کړي دي.

عبدالرؤف مسعود زیاتوي:

"په وازېخوا، وړممۍ او تروې ولسوالیو کې وسله‎والو مخالفینو ته درنه مرګ ژوبله اوښتې ده، په یادو عملیاتو کې د وسله‎والو مخالفینو (۲۰) عرادې موټر سایکلونه، یو میل دهشکه، یو میل زیکویک، یو میل هاوان او یو مزایل له‌منځه وړل شوي دي."

تر اوسه وسله‎والو د پکتیکا د چارواکو د دې ادعاوو په باب رسنیو ته څه نه‎دي ویلي.

راپور: نجیب‌الله الوخېل

XS
SM
MD
LG