د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۱:۳۷

شریفي: حکومت دې د خبریالانو خوندیتوب لپاره جدي تدابیر ونیسي


د افغانستان د خبریالانو د خوندیتوب کمېټه له حکومته غواړي چې د افغان خبریالانو د امنیت لپاره جدي تدابیر و نیسي.

یاده کمېټه وايي، که دا ستونزه حل نشي نو رسنۍ او د بیان ازادي به زیانمنه شي.

د افغان خبریالانو د خوندیتوب کمېټه وایي، خبریالان د جګړې په ښکېلو هیڅ یوې غاړې پورې اړه نه لري او باید ورباندې حمله و نه شي.

د دغې کمېټې مسؤل نجیب شریفي د شنبې په ورځ ازادي راډيو ته وویل چې د افغان خبریالانو امنیت تر پخوا ډېر خراب شوی دی او باید جدي تدابیر ورته و نیول شي.

شریفي: د افغان خبریالانو امنیت تر پخوا ډېر خراب شوی.
شریفي: د افغان خبریالانو امنیت تر پخوا ډېر خراب شوی.

نوموړی زیاته کړه:

"موږ ډېر اندېښمن، خو هیله من یو چې مسؤلین په دې برخه کې جدي تدابیر و نیسي که نه نو د بیان ازادي چې د تېرو پنځلسو کلونو تر ټولو ستره لاسته راوړنه ده، دا به له منځه ولاړه شي."

نوموړی زیاتوي چې د رسنیو مسؤلین هم کله چې خبریالان نا امنه سیمو ته لېږي، هغوی ته باید لازمې زده کړې ورکړي او حفاظتي وسایل ورته برابر کړي.

د خبریالانو له نا خوندیتوبه په داسې حال کې اندېښنې را پیدا شوي چې د جمعې په ورځ د هلمند په مرکز لښکرګاه کې د نعمت الله زهیر په نوم د یوه خبریال موټر پر ماین برابر شو او هغه پکې ووژل شو.

خبریال نعمت الله پرون جمعه هلمند کې ووژل شو.
خبریال نعمت الله پرون جمعه هلمند کې ووژل شو.

ولسمشر اشرف غني، اجرائیه رئیس عبدالله عبدالله، د بې پولې خبریالانو ټولنې، کابل پرس کلب او د خبریالانو د حقونو لپاره فعالو بنسټونو دا پېښه و غندله.

په همدې حال کې د هلمند د خبریالانو د ټولنې رئیس زین الله ستانکزی وایي، په دغه ولایت کې خبریالان له ډول ډول ګواښونو سره مخ دي.

نوموړي زیاته کړه:

"په هلمند کې د خبریالانو وضعیت ښه نه دی او په مجموع کې دوی او کورنۍ یې تر فشار لاندي دي، په تېرو اتو کلونو کې دا د مطبوعاتو د کورنۍ پنځم کس دی چې په هلمند کې شهید کېږي."

دا په داسې حال کې ده چې د غبرګولې میاشتې په ۱۷مه د امریکا د ملي راډیو "NPR" سابقه لرونکي خبریال ډیویډ ګیلکي او بل افغان خبریال ذبیح الله تمنا د هلمند په مارجې ولسوالۍ کې له دوو نورو کسانو سره د طالبانو په یو برید کې ووژل شول.

خبریال ډیویډ ګیلکي او بل افغان خبریال ذبیح الله تمنا د غبرګولې په ۱۷مه هلمند کې ووژل شول.
خبریال ډیویډ ګیلکي او بل افغان خبریال ذبیح الله تمنا د غبرګولې په ۱۷مه هلمند کې ووژل شول.

له دې مخکې په زابل کې هم د ملي ټلویزیون خبریال محمد یعقوب شرافت د نا معلومو وسله والو له خوا ووژل شو.

خبریال محمد یعقوب شرافت تېره میاشت ووژل شو.
خبریال محمد یعقوب شرافت تېره میاشت ووژل شو.

د خبریالانو د خوندیتوب کمېټې سږ کال د افغان خبریالانو لپاره خونړی بللی او وایي چې د همدې کال په جریان کې ۱۲ خبریالان په افغانستان کې وژل شوي دي.

اخوا د کورنیو چارو وزارت د خبریالانو د خوندیتوب لپاره د هڅو خبره کوي.

د دغه وزارت د ویاند مرستیال نجیب دانش ازادي راډيو ته وویل چې په همدې هدف په دې وروستیو کې د خبریالانو د خوندیتوب لپاره د همغږۍ دفترونه په مرکز او ولایتونو کې جوړ شول.

دانش: د خبریالانو د خوندیتوب لپاره د همغږۍ دفترونه جوړ شول.
دانش: د خبریالانو د خوندیتوب لپاره د همغږۍ دفترونه جوړ شول.

نوموړي زیاته کړه:

"ولسمشر د خبریالانو د خوندیتوب او د هغوی ستونزو ته د رسیدګۍ په هدف سپارښتنې وکړې، موږ د افغانستان د ولایتونو په کچه د همغږۍ دفترونه جوړ کړل، دغه دفترونه دنده لري چې ګواښونو ته په کتو یو سم ځای د رسنیو له ټولو امکاناتو سره دوی ته برابر کړي چې له نېکه مرغه دې کار ښه نتیجه هم ورکړې ده."

خبریالانو ته د دولت د بې پامۍ تر څنګ وسله وال طالبان هم په زیاتو مواردو کې د خبریالانو پر وړاندې په تاوتریخوالي تورن دي.

خو طالب ویاند ذبیح الله مجاهد ازادي راډيو ته وویل چې په ځينو مواردو کې د خبریالانو پر وړاندې ناڅاپي پېښې کېږي او په خبره یې چې دوی هیڅ کله خبریالان قصداً نه په نښه کوي.

راپور: محمد قسیم سوله مل

XS
SM
MD
LG