د لاسرسي لېنکونه

د اېمېلونو هک کېدو کې د روسیې نوم نه‌اخیستو لپاره د «FBI» پر رئیس انتقاد


په امریکا متحده ایالتو کې ډموکراټانو د دغه هېواد د فدرالي تحقیقاتو ادارې یا «اف. بي. ای» پر رئیس انتقاد کړی چې د ډموکراتانو د ایمیلونو د هک کېدو په خاطر یې له روسیې یادونه نه‌ده کړې.

دوی په داسې حال کې دا اعتراض کړی چې د امریکا جمهوري ریاست انتخاباتو ته یوه اوونۍ پاتې ده.

«اف. بي. ای» ویلي چې د هېلري کلېنټن د یوې سکرټرې هما عابدین د اېمېلونو په اړه چې کېدای شي د کلېنټن د اېمېلونو له پخوانۍ قضیې سره ارتباط ولري خپل تحقیقات پیل کړي دي.

د ډموکراټ ګوند مشرانو د امریکا د فدرالي تحقیقاتو ادارې پر رئیس جېمز کامي «James Comey» انتقاد کړی چې ولې یې روسیه د نورو ټولو حکومتي مشرانو په څېر په دې ملامته نه‌ده بللې چې د ډموکراټانو د اېمېلونو په "هکینګ" کې لاس لري.

د اف. بي. ای رئیس جېمز کامي

د اف. بي. ای رئیس جېمز کامي

د «CNBC» ټلوېزیون د یوه راپور له مخې چې د دوشنبې په ورځ خپور شو د امریکا فدرالي تحقیقاتو ادارې رئیس جېمز کامي «James Comey» د کورني امنیت او د استخباراتو د ادارو له هغې اعلامیې سره له یوځای کېدو ډډه وکړه چې په‌کې د ډیموکراټانو د اېمېلونو د "هک" او افشا کېدو خبره په روسیه پورې تړلې بلل شوې ده.

جېمز کامي وروسته له هغې د امریکا د جمهوري ریاست انتخاباتو په کمپاینونو کې ښکېل وبلل شو چې د دغه هېواد کانګرېس ته‌یې په یوه لیک کې وویل «اف. بي. ای» په هغو اېمېلونو تحقیقات کوي چې تازه‌یې د هېلري کلېنټن د یوې سکرترې هما عابدین د جلا شوي مېړه انټوني وېنر له کمپیوټره ترلاسه کړي دي.

د ولسمشرۍ انتخاباتو لپاره د ډموکراټ ګوند کاندیدې هېلري کلېنټن د دوشنبې په ورځ د اوهایو په کېنټ ښار کې وویل چې روسیه هڅه کوي څو ډونالډ ټرمپ د امریکا د ولسمشر په توګه انتخاب شي.

کلېنټن: روسیه هڅه کوي ټرمپ د امریکا ولسمشر وټاکل شي.

کلېنټن: روسیه هڅه کوي ټرمپ د امریکا ولسمشر وټاکل شي.

نوموړې زیاته کړه:

"په داسې حال کې چې د امریکا جمهوري ریاست ټاکنو ته اته ورځې پاتې دي، موږ نه‌شو کولای چې تر دې زیات انتظار وباسو، ډونالډ ټرمپ باید ژر تر ژره له کرېملېن او د هغوی له نورو شریکانو سره خپلې ټولې اړیکې افشا کړي."

د نیویارک ټایمز ورځپاڼې بیا راپور ورکړی چې د امریکا د فدرالي تحقیقاتو ادارې «اف. بي. ای» د دوشنبې په ورځ د هېلري کلېنټن د یوې خاصې سکرترې هما عابدین د اېمېلونو څېړنه د یوه خاص کمپیوټري پروګرام په واسطه پیل کړې ده.

ویل شوي د دې ادارې څېړونکي هڅه کوي څو دا مشخصه کړي چې ایا په دغو اېمېلونو کې څه پټ معلومات هم شته که څنګه.

دا هم نه‌ده معلومه چې یاده اداره به د انتخاباتو تر ورځې دا څېړنه بشپړه کړي یا به ترې پاتې شي.

د هېلري کلېنټن د انتخاباتي کمپاین مسؤل روبي موک او د سنا جرګې د ډموکراټانو مشر هاري رییډ د فدرالي تحقیقاتو ادارې رئیس جېمز کامي د حساسو اطلاعاتو په برخه کې په دوه ګوني چلند تورن کړی دی.

وروسته له هغه چې جېمز کامي د نویو څېړنو اعلان وکړ د هېلري کلېنټن د ملاتړو کتارونه هم لږ څه کم شوي دي.

تازه د جمهوري غوښتونکو ګوند کاندید ډونالډ ټرمپ په اوهایو او فلوریدا ایالتونو کې چې ابتدايي بریاوې په وروستیو نتیجو خورا اغېز کوي تر هېلري کلېنټن مخکې شوی دی.

XS
SM
MD
LG